Imeum-Imeum
Chapter 1
Nibak khimah Gobnyan, TUHAN geutawök Nabi Musa dan geubri ubak geuhnyan banmandum peuratoran
2 nyang harôh jitaát lé ureuëng Israel. Meunyoe sidroe-droe ureuëng jipeuseumah keureubeuen nyang teutot ubak TUHAN, ureuëng nyan jeuet jipeuseumah leumô, bubiri atawa kaméng jih.
3 Meunyoe nyang jipeuseumah saboh leumô, beulatang nyan harôh nyang agam dan hana meucupa, leumô nyan harôh jiba ubak babah pintoe Khimah TUHAN, mangat TUHAN geuteurimong atra ureuëng nyan.
4 Dan jihnyan harôh jipeuduek jaroe jih ateueh ulée beulatang nyan, deungon nyan peuseumahan ureuëng nyan teuma geuteurimong lé TUHAN keuteupeu amphon desya.
5 Óh lheueh nyan leumô nyan harôh teusie dikeue pintoe Khimah. Darah beulatang nyan harôh jipeuseumah lé imeum-imeum keuturonan Nabi Harun ubak TUHAN, laju jireutek ban peuet boh sagoe miseubah nyang na dikeue pintoe khimah.
6 Óh lheueh nyan lé ureuëng nyan harôh jipuliek kulét jih dan jikoh-koh beulatang nyan.
7 Imeum-imeum harôh jipeukab apui u ateueh miseubah laju jiatoe kayée apui u ateueh nyan.
8 Sie-sie keureubeuen nyang ka lheueh teukoh-koh nyan, meunan cit deungon ulée dan gapah jih, mandum nyan harôh awaknyan keubah u ateueh apui hu.
9 Óh lheueh nyan lé ureuëng nyan harôh ji rhah asoe pruet dan pha leumô nyan, dan imeum nyang meutugaih disinan harôh geutot banmandum nyan. Bée keureubeuen nyang teutot nyan keubit that galak até TUHAN.
10 Meunyoe nyang jipeuseumah saboh bubiri atawa kaméng, beulatang nyan harôh nyang agam dan hana meucupa.
11 Ureuëng nyan harôh jisie beulatang nyan disiblaih utara miseubah, laju lé Imeum-imeum harôh jireutek darah beulatang nyan ateueh ban peuet boh sagoe miseubah.
12 Óh ka lheueh beulatang nyan teusie-sie, mandum sie nyan, meunan cit deungon ulée dan gapah jih, harôh jikeubah lé imeum u ateueh apui nibak miseubah nyan.
13 Lé ureuëng nyan laju jirhah asoe pruet dan pha beulatang nyan. Óh lheueh nyan lé imeum harôh jipeuseumah mandum nyan ubak TUHAN, dan laju jitot u ateueh miseubah. Bée keureubeuen nyang teutot nyan lumpah that galak até TUHAN.
14 Meunyoe nyang jipeuseumah saboh cicém, cicém nyan harôh leuek putéh atawa cicém mirah pati nyang mantong muda.
15 Imeum harôh geuba cicém nyan ubak miseubah, laju geuwiet takue jih dan geutot ulée jih u ateueh miseubah nyan. Darah cicém nyan harôh jipicet uluwa nibak sampeng miseubah.
16 Beue jih meunan cit mandum asoe jih harôh teupeuteubit, laju teujak tiek siblah u timu miseubah bak teumpat abée.
17 Óh lheueh nyan cicém nyan harôh teulheueb bak uram sayeueb jih, sayeueb nyan hán jeuet putôh. Dan cicém nyan harôh teutot ateueh miseubah. Bée keureubeuen nyang teutot nyan lumpah that galak até TUHAN.
Chapter 2
Meunyoe sidroe-droe ureuëng jipeuseumah keureubeuen teuhidang ubak TUHAN, keureubeuen nyan harôh teupông nyang paleng jroh nyang ka teuprée ngon minyéuk zaiton dan teuboh keumeunyan diateueh nyan.
2 Ureuëng nyan harôh jiba ubak imeum-imeum keuturonan Nabi Harun. Imeum nyang meutugaih disinan geucok laju sireugam teupông nyan meunan cit deungon minyéuk zaiton dan banmandum keumeunyan, dan atranyan mandum geutot laju ateueh miseubah sibagoe tanda bahwa banmandum nyan ka geupeuseumah ubak TUHAN. Bée keureubeuen teuhidang nyang mangat nyan lumpah that galak até TUHAN.
3 Keureubeuen teuhidang nyang leubeh nyan na kheueh keu imeum-imeum. Keureubeuen nyan suci that sabab teucok nibak peunajoh nyang ka teupeuseumah ubak TUHAN.
4 Meunyoe nyang jipeuseumah nyan ruti nyang teutot didalam acuwan, ruti nyan harôh teupeugét hana meurago. Ruti nyan jeuet teubai, teupeugét nibak teupông halôh nyang teuramah ngon minyéuk zaiton, jeuet cit juadah nyang teusiliek ngon minyéuk zaiton.
5 Meunyoe nyang jipeuseumah nyan ruti nyang teupanggang di ateueh panggang, ruti nyan harôh teupeugét nibak teupông halôh deungon minyéuk zaiton, teuma hana jeuet teuboh rago.
6 Ruti nyang teupeuseumah nyan harôh teupriek-priek, laju teuro minyéuk zaiton.
7 Meunyoe nyang teupeuseumah nyan ruti nyang teutaguen lam kuali, ruti nyan harôh teupeugét nibak teupông nyang halôh dan minyéuk zaiton.
8 Ruti nyang teupeugét deungon cara lagée nyan harôh teupeuseumah ubak TUHAN dan teujok ubak imeum-imeum nyang ba atranyan ubak miseubah.
9 Imeum-imeum geucok siladum nibak rutinyan laju geutot ateueh miseubah sibagoe tanda bahwa banmandum nyan ka geupeuseumah ubak TUHAN. Bée jih nyang mangat nyan lumpah that galak até TUHAN.
10 Nyang leubeh nibak nyan na kheueh hak milék imeum. Ruti nyan lumpah suci sabab teucok nibak peunajoh nyang ka teupeuseumah ubak TUHAN.
11 Keureubeuen hidangan keu TUHAN hana jeuet teujampu ngon meulisan atawa rago, sabab meulisan dan rago hana jeuet teutot keu teupeuseumah ubak TUHAN.
12 Nibak wase tanoh nyang phon bak tieb-tieb thon, siladum harôh teupeuseumah ubak TUHAN, teuma hana jeuet teutot ateueh miseubah.
13 Tieb-tieb keureubeuen teuhidang harôh teuboh sira, sabab sira sibagoe tanda janji Po teu Allah deungon gata. Jadi mandum peuseumahan harôh teuboh sira.
14 Meunyoe gata tapeuseumah ubak TUHAN gandom nyang phon gata pot, taba kheueh gandom barô nyang ka teutôb halôh atawa teupanggang.
15 Gandom nyan harôh teuboh minyéuk zaiton dan teuboh keumeunyan di ateueh nyan.
16 Imeum harôh geutot siladum nibak gandom dan minyéuk nyan meunan cit banmandum keumeunyan, sibagoe tanda bahwa banmandum nyan ka geupeuseumah ubak TUHAN.
Chapter 3
Meunyoe sidroe-droe ureuëng jipeuseumah saboh leumô keu keureubeuen peudamé, leumô nyan jeuet nyang agam dan jeuet nyang inong, teuma hana jeuet meucupa.
2 Ureuëng nyang peuseumah atra nyan harôh jikeubah jaroe jihnyan ateueh ulée beulatang nyan laju jisie bak babah pintoe Khimah TUHAN. Imeum-imeum keuturonan Nabi Harun harôh geureutek darah leumô nyan ateueh ban peuet boh sagoe miseubah nyan.
3 Keu keureubeuen peudamé ubak TUHAN, imeum harôh geupeuseumah bagian-bagian nyoe, nibak beulatang nyan: gapah nyang meubalot asoe pruet jih,
4 boh keuiéng deungon gapah jih dan bagian nyang paleng gét nibak até jih.
5 Mandumnyan meusajan-sajan deungon keureubeuen-keureubeuen nyang laén, harôh teutot u ateueh miseubah. Bée keureubeuen nyang teutot nyan lumpah that galak até TUHAN.
6 Meunyoe nyang jipeuseumah keu keureubeuen peudamé nyan saboh bubiri atawa kaméng, beulatang nyan jeuet agam dan jeuet inong, teuma hana jeuet meucupa.
7 Meunyoe sidroe-droe ureuëng jipeuseumah saboh bubiri, ureuëng nyan harôh jiba atranyan ubak Khimah TUHAN.
8 Disinan ureuëng nyan harôh jipeuduek jaroe jih ateueh ulée bubiri nyan óh lheueh nyan laju jijak sie dikeue Khimah. Dan di imeum laju geureutek darah beulatang nyan ateueh ban peuet boh sagoe miseubah nyan.
9 Keu keureubeuen peudamé ubak TUHAN imeum harôh geupeuseumah bagian-bagian nyoe nibak bubiri nyan: gapah jih, mandum ikue nyang na gapah dan teukoh bak bineh tuleueng-tuleueng jih, gapah nyang meubalot asoe pruet jih,
10 boh keuiéng deungon gapah jih dan bagian nyang paleng gét nibak até jih.
11 Imeum nyang meutugaih disinan harôh geutot banmandum nyan di ateueh miseubah keu keureubeuen peunajoh keu TUHAN.
12 Meunyoe nyang jipeuseumah saboh kaméng, ureuëng nyang peuseumah atranyan harôh jiba ubak Khimah TUHAN.
13 Nibak teumpat nyan harôh jipeuduek jaroe jihnyan ateueh ulée kaméng nyan dan laju jisie dikeue Khimah. Imeum harôh geureutek darah beulatang nyan ateueh ban peuet boh sagoe miseubah.
14 Keu keureubeuen peunajoh keu TUHAN, imeum harôh geupeuseumah bagian-bagian nyoe nibak kaméng nyan: gapah nyang meubalot asoe pruet jih,
15 boh keuiéng ngon gapah jih dan bagian nyang paleng gét nibak até jih.
16 Imeum nyang meutugaih disinan harôh geutot mandum nyan u ateueh miseubah. Bée keureubeuen peunajoh nyan lumpah that galak até TUHAN. Mandum gapah beulatang nyan keu TUHAN.
17 Ureuëng Israel sagai-sagai hana jeuet jipajoh gapah atawa darah. Peuratoran nyan teutab na siumu masa dan harôh jitaát lé tieb-tieb ureuëng Israel dipat mantong jihnyan tinggai.
Chapter 4
TUHAN meufeureuman ubak Nabi Musa, geuyue peumaklum ubak bansa Israel bahwa soemantong nyang deungon hana jisaja meudesya sabab jilangga salah saboh nibak peurintah TUHAN, harôh jiseutôt peuratoran nyoe.
3 Meunyoe nyang meudesya Imeum Agong, sampoe bansa Israel meusajan meusalah, ureuëngnyan harôh jikeureubeuen saboh leumô agam muda nyang hana meucupa ubak TUHAN mangat desya jihnyan geupeu amphon.
4 Leumô nyan harôh jiba ubak babah pintoe Khimah TUHAN. Imeum Agong harôh geupeuduek jaroe gobnyan ateueh ulée beulatang nyan, óh lheueh nyan laju jisie dikeue Khimah.
5 Siladum nibak darah nyan harôh jipeutamong lam Khimah.
6 Laju jihnyan jiculok jaroe jih lam darah nyan dan jireutek tujoh goe dikeue tirée nyang peujareueng Ruweueng Suci.
7 Siladum nibak darah nyan harôh jisiliek ubak lungkée-lungkée nibak sagoe miseubah dupa mangat bée didalam Khimah, dan nyang leubeh nyan harôh jireutek nibak aleue miseubah keureubeuen teutot nyang na bak pintoe Khimah.
8 Imeum harôh geucok banmandum gapah leumô agam nyan, na kheueh gapah nyang meubalot asoe pruet jih,
9 boh keuiéng ngon gapah jih dan bagian nyang paleng gét nibak até jih.
10 Banmandum nyan harôh teutot ateueh miseubah keureubeuen nyang teutot lagée bak keureubeuen peudamé.
11 Teuma asoe leumô nyan, kulét jih, ulée jih, gaki jih, asoe pruet nyang leubeh jitamong cit keunan usus jih,
12 jadi banmandum keucuali jeumba nyang ka teupeu meungkréeh, harôh teupeuteubiet uluwa khimah. Disinan leumô nyan harôh teutot ateueh kayée apui bak teumpat teuboh abée, na kheueh teumpat nyang khusos keu nyan.
13 Meunyoe nyang meudesya mandum umat Israel, sabab ngon hana jisaja ka ji-iengkeue salah saboh peurintah TUHAN,
14 teuma meunan desya nyan jiteupeue, umat harôh jiba saboh leumô agam nyang muda ukeue Khimah TUHAN. Beulatang nyan harôh jipeuseumah sibagoe keureubeuen peuamphon desya.
15 Mandum peumimpén bansa harôh geupeuduek jaroe gobnyan ateueh ulée nyan, dan laju geusie bak teumpat nyan.
16 Imeum Agong harôh geuba siladum nibak darah nyan keu teupeutamong dalam Khimah.
17 Disinan jihnyan harôh jiculok jaroe jih u dalam darah nyan dan laju jireutek tujoh goe dikeue tirée nyang jeuet keubataih Ruweueng Suci.
18 Siladum treuk harôh jisiliek ateueh lungkée-lungkée nibak sagoe-sagoe miseubah dupa didalam Khimah dan nyang leubeh nyan harôh teureutek ateueh aleue miseubah teumpat keureubeuen nyang teutot di babah pintoe Khimah.
19 Banmandum gapah beulatang nyan harôh teucok dan laju teutot u ateueh miseubah.
20 Cara jih lagée teupeuseumah leumô agam keu keureubeuen peuamphon desya. Meunan kheueh cara Imeum Agong geupeuseumah keureubeuen keu desya-desya umat, teuma mandum desya-desya nyan teuma geupeu amphon lé TUHAN.
21 Óh lheueh nibaknyan di leumô agam nyan harôh jipeuteubiet uluwa, dan jitot laju diluwa khimah-khimah, lagée teupeu seumah leumô agam keu keureubeuen peuamphon desya Imeum Agong nyan keudroe. Meunan kheueh cara jih teupeuseumah keureubeuen peuamphon desya umat.
22 Meunyoe nyang meudesya sidroe ureuëng nyang mat kuasa sabab deungon hana jisaja ka geuiengkeue salah saboh peurintah TUHAN,
23 teuma bagaih that watée ka jiteupeu, gobnyan harôh jikeureubeuen saboh kaméng agam nyang hana meucupa keu peuamphon desya.
24 Jihnyan harôh jipeuduek jaroe jih ateueh ulée beulatang nyan, laju jisie u siblah utara miseubah, teumpat teusie beulatang keu keureubeuen nyang teutot.
25 Imeum harôh geuculok jaroe gobnyan udalam darah beulatang nyan dan geusiliek laju nibak lungkée-lungkée nibak sagoe miseubah dan geureutek laju ateueh aleue miseubah.
26 Óh lheueh nyan banmandum gapah beulatang nyan harôh geutot u ateueh miseubah, lagée bak keureubeuen peudamé. Meunan kheueh cara imeum geupeuseumah keureubeuen keu desya ureuëng nyan mat kuasa, deungon na lagée nyan ureuëng nyan teuma geupeuamphon lé TUHAN.
27 Meunyoe sidroe lamkawan rakyat ba jipeubuet desya sabab ngon hana jisaja ji-iengkeue salah saboh peurintah TUHAN,
28 teuma bubagaih that watée ka jiteupeu hainyan, jihnyan harôh jikeureubeuen saboh kaméng inong nyang hana meucupa.
29 Ureuëng nyan harôh jipeuduek jaroe jih nyan ateueh ulée beulatang nyan, laju jijak sie u siblah utara miseubah bak teumpat teusie beulatang keu keureubeuen teutot.
30 Imeum harôh geuculok jaroe geuh lam darah nyan, dan geusiliek laju ubak lungkée-lungkée nyang na bak sagoe-sagoe miseubah dan darah nyang leubeh nyan laju geureutek ubak aleue miseubah nyan.
31 Banmandum gapah beulatang nyan harôh teucok lagée bak keureubeuen peudamé. Gapah nyan harôh geutot lé imeum u ateueh miseubah, bée jih nyang mangat nyan teupeugalak até TUHAN. Meunan kheueh cara jih imeum geupeuseumah keureubeuen keu desya sidroe ureuëng biasa, teuma ureuëng nyan laju geupeu amphon lé TUHAN.
32 Meunyoe na sidroe ureuëng jikeureubeuen saboh bubiri keu teupeuamphon desya jihnyan, bubiri nyan harôh nyang inong nyang hana meucupa.
33 Ureuëng nyan harôh jipeuduek jaroe jih ateueh ulée beulatang nyan, laju jijak sie u siblah utara miseubah, bak teumpat teusie beulatang keu keureubeuen nyang teutot.
34 Imeum harôh geuculok jaroe gobnyan lam darah nyan, dan laju geusiliek ubak lungkée-lungkée nyang na bak sagoe-sagoe miseubah, dan darah nyang leubeh nyan laju geureutek bak aleue miseubah.
35 Óh lheueh nyan banmandum gapah beulatang nyan harôh geucok lagée bak keureubeuen peudamé. Gapah nyan harôh geutot ateueh miseubah, meusajan-sajan ngon keureubeuen peunajoh nyang teupeuseumah ubak TUHAN. Meunan kheueh cara imeum geupeuseumah keureubeuen keu desya ureuëng nyan, teuma ureuëng nyan laju geupeuamphon lé TUHAN.
Chapter 5
Keureubeuen peuamphon desya peureulée teupeuseumah: Meunyoe sidroe ureuëng seucara reseumi teulakée jeuet keusaksi ubak kantô peungadelan, teuma hana jitem peugah peue nyang ka jingieng atawa jideungoe sampoe ureuëng nyan harôh jitanggong akibat jih.
2 Meunyoe sidroe ureuëng meusalah sabab deungon hana jisaja ka jeuet keu kuto, sabab ka tupéeh ngon salah sapeue nyang kuto, miseu jih, bangke beulatang, dan óh lheueh nyan jisadar buet jih nyan.
3 Meunyoe sidroe ureuëng meusalah sabab ngon hana jisaja ka tupéeh barang kuto nyang asai jih nibak manusia, dan óh lheueh nyan jisadar buet jih nyan.
4 Meunyoe na sidroe ureuëng meusalah sabab jimeusumpah ban galak droe keu jipeubuet peue mantong, dan óh lheueh nyan ji insaf peue nyang ka jipeubuet.
5 Bak tieb-tieb buet jih nyan, ureuëng nyang meusalah harôh ji aku buet jih nyang salah nyan.
6 Dan keu teutuboh desya jihnyan, ureuëng nyan harôh jiba saboh bubiri atawa kaméng inong keu TUHAN. Imeum harôh geupeuseumah keureubeuen nyan mangat jeuet desya ureuëng nyan geupeu amphon.
7 Meunyoe ureuëng nyang salah nyan hana hase jipeuna saboh bubiri atawa kaméng keu teutuboh desya jih nyan, ureuëng nyan harôh jiba dua boh cicém leuek putéh atawa cicém mirah pati nyang muda, saboh keu keureubeuen peuamphon desya, dan saboh treuk keu keureubeuen nyang teutot.
8 Cicém-cicém nyan harôh teuba ubak imeum. Imeum harôh teuleubeh ilée geupeuseumah cicém nyang ka teupeu teuntée keu keureubeuen peu amphon desya. Takue cicém nyan harôh jiputa, teuma hana jeuet sampoe putôh ulée jih.
9 Darah cicém nyan harôh geureutek ubak sagoe miseubah, dan nyang leubeh nibak nyan harôh geupirét uluwa ubak aleue miseubah sibagoe keureubeuen peu amphon desya.
10 Óh ka lheueh nyan imeum geupeuseumah cicém nyang keudua keu keureubeuen nyang teutot, saban lagée peuratoran nyang na. Meunan kheueh cara jih imeum geupeuseumah keureubeuen keu desya ureuëng nyan, laju ureuëng nyan geupeu amphon lé TUHAN.
11 Meunyoe ureuëng nyang meusalah nyan hana hase jipeuna dua boh cicém leuek putéh atawa cicém mirah pati keu keureubeuen peu amphon desya, ureuëng nyan harôh jiba sikilo teupông. Teupông nyan hana jeuet teujampu ngon minyéuk zaiton atawa meusajan ngon keumeunyan, sabab keureubeuen nyan na kheueh keureubeuen peu amphon desya dan bukon keureubeuen teuhidang.
12 Teupông nyan harôh teuba ubak imeum. Imeum harôh geucok saboh reugam nibak teupông nyan sibagoe tanda bahwa banmandum nyan ka lheueh geukeureubeuen ubak TUHAN. Teupông nyang sireugam nyan harôh geutot ateueh miseubah sibagoe keureubeuen peunajoh. Nyan kheueh keureubeuen gobnyan keu peu amphon desya.
13 Meunan kheueh cara jih imeum geupeuseumah keureubeuen keu ureuëng nyan, teuma ureuëng nyan geupeu amphon lé TUHAN. Teupông nyang leubeh nyan keu imeum, lagée bak keureubeuen gandom.
14 TUHAN geubri ubak Nabi Musa peuratoran-peuratoran lagée nyoe.
15 Meunyoe sidroe-droe ureuëng deungon hana jisaja ka jipeubuet desya sabab lalo bak jijok keureubeuen-keureubeuen droe jih nyang teupeu wajéb ubak TUHAN, teuma lé ureuëng nyan harôh jiba keureubeuen gantoe rugoe. Keureubeuen nyan harôh saboh bubiri atawa kaméng agam nyang hana meucupa, dan teutakse meunurot yuem nyang ka teuntée bak Khimah TUHAN.
16 Ureuëng nyan harôh jibayeue peue nyang yoh watée ilée ka geupeulalo, teutamah dua ploh peureusen. Óh lheueh nyan jihnyan harôh jijok beulatang nyan ubak imeum, dan imeum laju geukeureubeuen keu desya ureuëng nyan, teuma di ureuëng nyan laju geupeuamphon lé TUHAN.
17 Meunyoe sidroe-droe ureuëng jipeubuet desya sabab ka ji-iengkeue ubak sapeue-sapeue peurintah TUHAN, ureuëng nyan meusalah dan harôh jitanggong akibat jih.
18 Keu keureubeuen gantoe rugoe ureuëng nyan harôh jiba saboh bubiri atawa kaméng agam nyang hana meucupa dan teutakse meunurot yuem nyang saban lagée yuem bak Khimah TUHAN. Imeum geukeureubeuen keu desya ureuëng nyan, teuma gobnyan geupeu amphon lé TUHAN.
19 Nyan kheueh keureubeuen gantoe rugoe keu buet nyang salah nyang ka jipeubuet teuhadab TUHAN.
Chapter 6
TUHAN geubri ubak Nabi Musa peuratoran-peuratoran nyoe.
2 Sidroe-droe ureuëng harôh jipeuseumah keureubeuen meunyoe ureuëng nyan meudesya ubak TUHAN sabab hana jitem jok pulang barang nyang jikeubah lé ureuëng laén nibak jihnyan, atawa jitipée gob, jicue atra gob, atawa ka meuteumé barang nyang gadôh, lé ureuëng nyan ji-iengkeue ngon jimeubudok cula-calo.
4 Ureuëng nyang meusalah nyan harôh jibayeue lom mandum nyang jiteumé nyan ngon cara hana jujoe. Watée jihnyan ka meuteumé bahwa jihnyan salah, ureuëng nyan harôh jibayeue peunoh keu ureuëng po atra nyan, teutamah dua ploh peureusen.
6 Keu keureubeuen geunantoe rugoe ureuëng nyan harôh jipeuseumah saboh bubiri atawa kaméng agam nyang hana meucupa dan teutakse meunurot yuem nyang meuyuem bak Khimah TUHAN.
7 Imeum geukeureubeuen keu desya ureuëng nyan, teuma ureuëng nyan laju geupeu amphon desya jih lé TUHAN.
8 TUHAN meufeureuman ubak Nabi Musa, mangat geujak peusampoe ubak Nabi Harun dan aneuëk-aneuëk gobnyan peuratoran-peuratoran lagée nyoe keuhai keureubeuen nyang teutot banmandum. Imeum harôh geupeuduek keureubeuen nyang teutot u ateueh miseubah dan geupeubiyeu disinan simalam beungoh, dan apui jih teutab hu sabe.
10 Óh ka lheueh keureubeuen nyan jeuet keu abée, imeum geusôk sileuweue paneuek bajée jubah nibak ija lineun, harôh geubeu ôt abée nyang meugapah nyan nibak ateueh miseubah laju geukeubah bak binéh miseubah.
11 Óh ka lheueh nyan gobnyan harôh geugantoe peukayan dan geuba laju abée u luwa khimah-khimah, ubak teumpat nyang ka teupeu khusos keu nyan.
12 Tieb-tieb beungoh imeum harôh geukeubah kayée apui u ateueh miseubah, geuatoe keureubeuen nyang teutot di ateueh nyan, dan geutot gapah nibak keureubeuen peudamé. Apui nyang na ateueh miseubah harôh hu sabe hana jeuet lon.
14 Nyoe kheueh peuratoran-peuratoran keuhai keureubeuen teuhidang keu TUHAN. Keureubeuen nyan harôh teuba ukeue miseubah lé sidroe nibak keuturonan Nabi Harun.
15 Gobnyan harôh geucok saboh reugam teupông halôh deungon minyéuk dan banmandum keumeunyan, laju geutot u ateueh miseubah sibagoe tanda bahwa banmandum keureubeuen nyan geupeuseumah ubak TUHAN. Bée keureubeuen nyang mangat nyan lumpah that galak até TUHAN.
16 Teupông nyang leubeh nyan harôh teupeugét keu ruti hana meurago dan geupajoh lé imeum-imeum nibak teumpat nyang khusos, na kheueh nibak leuen Khimah TUHAN. Nyan kheueh jeumba imeum nyang geubri lé TUHAN keu awaknyan ateueh keureubeuen peunajoh. Peunajoh nyan that suci, lagée keureubeuen peuamphon desya dan keureubeuen geunantoe rugoe.
18 Keu siumu masa soe mantong ureuëng agam nibak keuturonan Nabi Harun jeuet geumakheun ruti nyan; nyan kheueh jeumba awaknyan nyang teutab nibak peunajoh nyang geupeuseumah ubak TUHAN. Ureuëng laén nyang cukéh peunajoh nyang ka geukeureubeuen nyan, teuma meuteumé bala ngon sabab teunaga suci nibak nyan.
19 TUHAN geubri ubak Nabi Musa peuratoran-peuratoran lagée nyoe,
20 keuhai keureubeuen bak teubaiát sidroe imeum keuturonan Nabi Harun. Bak uroe gobnyan teubaiát, ureuëng nyan harôh geupeuseumah sikilogram teupông gandom ubak TUHAN. Siteungoh treuk harôh geupeuseumah watée beungoh uroe dan nyang leubeh nyan óh watée uroe ka seupôt.
21 Teupông nyan harôh teujampu ngon minyéuk, laju teutot ateueh panggang apui, óh lheueh nyan geupriek-priek dan geupeuseumah sibagoe keureubeuen teuhidang. Bée keureubeuen nyang mangat nyan lumpah galak até TUHAN.
22 Keu siumu masa tieb-tieb keuturonan Nabi Harun nyang teubaiát jeuet keu Imeum Agong harôh geupeuseumah keureubeuen nyan. Banmandum nyan harôh teutot sibagoe peuseumahan keu TUHAN.
23 Tieb-tieb keureubeuen teuhidang nyang geupeuseumah lé imeum harôh teutot banmandum, mubacutpi hana jeuet teupajoh.
24 TUHAN meufeureuman ubak Nabi Musa, geuyue jak peusampoe ubak Nabi Harun ngon aneuëk-aneuëk gobnyan keuhai peuratoran-peuratoran lagée nyoe keuhai keureubeuen peu amphon desya. Beulatang keu keureubeuen peu amphon desya teusie nibak teumpat nyang lazem teusie beulatang keu keureubeuen nyang teutot. Keureubeuen nyan lumpah that suci.
26 Imeum nyang peuseumah keureubeuen nyan harôh geumakheun atra nyan nibak teumpat nyang khusos, na kheueh nibak seuramo Khimah TUHAN.
27 Soe mantong atawa peue mantong nyang keunong nibak sie beulatang peulara nyan teuma keunong bala sabab sakeuti nyang ka keunong nibak sie nyan. Meunyoe siôn bajée nyang keunong meusipreuk darah beulatang nyan, bajée nyan harôh teu rhah bak teumpat nyang khusos.
28 Beulangöng tanoh nyang teupeuguna keu teumpat reuböh sie keureubeuen nyan harôh teupeubeukah. Meunyoe nyang teupeuguna beulangöng beuso, beulangöng nyan harôh teu-uet dan teupeu gleh laju ngon ié.
29 Tieb-tieb ureuëng agam lam keuluwarga imeum-imeum nyan jeuet jipajoh keureubeuen nyang lumpah suci nyan.
30 Beulatang keu keureubeuen peu amphon desya nyang teucok bacut darah jih keu teuba ubak Ruweueng Suci, atranyan harôh teutot sampoe habéh dan hanjeuet teupajoh.
Chapter 7
Nyoe kheueh peuratoran-peuratoran keuhai keureubeuen geunantoe rugoe. Keureubeuen nyan lumpah suci.
2 Beulatang nyang teu keureubeuen nyan harôh teusie nibak teumpat lazem teuseumeusie keu keureubeuen nyang teutot, dan darah jih laju teureutek nibak ban peuet boh sagoe miseubah.
3 Imeum harôh geupeuseumah u ateueh miseubah banmandum gapah beulatang nyan, na kheueh: Ikue jih nyang meugapah, gapah nyang teutôb nibak asoe pruet jih, boh keuiéng ngon gapah jih, dan bagian nyang paleng gét nibak até jih.
5 Banmandum nyan harôh teutot ateueh miseubah sibagoe keureubeuen peunajoh keu TUHAN. Keureubeuen nyan na kheueh keu keureubeuen geunantoe rugoe.
6 Tieb-tieb ureuëng agam lam keuluwarga imeum-imeum jeuet jipajoh sie keureubeuen nyan, teuma awaknyan harôh jipajoh atra nyan nibak teumpat nyang khusos, sabab keureubeuen nyan lumpah that suci.
7 Keu keureubeuen peu amphon desya dan keureubeuen geunantoe rugoe keunong cit nibak peuratoran nyang saban, na kheueh: Asoe sie beulatang peulara nyang teukeureubeuen nyan na kheueh keu imeum nyang geupeuseumah.
8 Meunan cit kulét beulatang nyan pih keu imeum.
9 Tieb-tieb keureubeuen teuhidang nyang teutot nibak teumpat teutot atawa teutaguen lam kuali atawa nyang teupanggang, atranyan jeuet keu jeumba imeum nyang geupeuseumah.
10 Teuma keureubeuen teuhidang nyang hana teupeumasak, bah kheueh nyan nyang teujampu ngon minyéuk meunan cit nyang tho, banmandum nyan keu imeum-imeum keuturonan Nabi Harun, dan harôh teuweuek rata sabe keudroe-droe awaknyan.
11 Nyoe kheueh atoran-atoran jih keuhai keureubeuen peudamé nyang teupeuseumah ubak TUHAN.
12 Meunyoe keureubeuen nyan jipeuseumah keu teulakée teurimong gaséh, deungon beulatang nyan harôh teupeuseumah teuma ruti nyang hana meurago. Ruti nyan jeuet nyang teubai teupông teuwot ngon minyéuk zaiton, meunan cit jeuet ruti tho nyang lipeh nyang teusiliek ngon minyéuk, atawa juadah teupông nyang teupeugét ngon minyéuk zaiton.
13 Seulaén nibak nyan harôh jipeuseumah cit nyang teupeugét teuboh rago.
14 Nibak tieb-tieb bagoe ruti nyan siladum harôh teupeuseumah ubak TUHAN, dan nyan jeumba imeum nyang cok darah beulatang nyan laju teureutek nibak miseubah keu keureubeuen peudamé.
15 Asoe sie nyan harôh teupajoh nibak uroe beulatang nyan teukeureubeuen, mubacutpi hana jeuet teutinggai sampoe óh singoh beungoh.
16 Meunyoe na sidroe-droe ureuëng jiba keureubeuen peudamé keu jijak peulheueh kaôi jihnyan, atawa keu keureubeuen keugalak droe, atranyan hana peureulée teupajoh sampoe habéh bak uroe nyan cit teuma. Nyang leubeh nyan jeuet jipajoh óh singoh teuma.
17 Meunyoe trok bak uroe nyang keu lhée mantong na cit tinggai, sie nyan harôh teutot sampoe habéh.
18 Teuma meunyoe bak uroe nyang keu lhée eungkot sie nyan jipajoh cit, keureubeuen nyan hana geuteurimong dan hana teuba hase sapeue keu ureuëng nyan, teuma ka jeuet keu hareuem. Ureuëng nyang pajoh atra nyan ka salah dan harôh jitanggong akibat jih.
19 Sie nyang ka keunong salah sapeue najis atra nyan harôh teutot sampoe habéh dan hana jeuet teupajoh. Sie keureubeuen peudamé teuma jeuet jipajoh lé ureuëng nyang hana meu najih.
20 Meunyoe na ureuëng jipajoh euengkot sie nyan bak watée jih nyan lam najis, ureuëng nyan hana lé teu anggab anggota umat Po teu Allah.
21 Meunyoe na ureuëng jipajoh sie keureubeuen nyan óh ka lheueh tupéh ngon najis, bah kheueh nyan nyang asai jih nibak manusia meunan cit nibak beulatang, ureuëng nyan pih saban cit hana lé teu anggab anggota umat Po teu Allah.
22 TUHAN geubri ubak Nabi Musa peuratoran-peuratoran lagée nyoe
23 keu bansa Israel. Gapah leumô, gapah bubiri atawa gapah kaméng hana jeuet teupajoh.
24 Gapah beulatang nyang maté keudroe atawa sabab jiteugöm lé beulatang juwah, atranyan hana jeuet teupajoh teuma jeuet teupeuguna keu keupeue laén.
25 Ureuëng nyang pajoh gapah beulatang nyang jeuet teupeuseumah sibagoe keureubeuen peunajoh keu Po teu Allah, ureuëng nyan hana le teu anggab sibagoe anggota umat Po teu Allah.
26 Ureuëng Israel, dipat mantong awaknyan tinggai, hana jeuet jipajoh darah cicém atawa darah beulatang nyang laén.
27 Soe mantong nyang iengkeue ubak atoran nyan ureuëng nyan hana le teuanggab sibagoe anggota umat Po teu Allah.
28 TUHAN geubri lom ubak Nabi Musa peuratoran-peuratoran nyang lagée nyoe
29 keu bansa Israel. Soe mantong nyang jiba keureubeuen peudamé, harôh jiweuek siladum keu keureubeuen khusos ubak TUHAN.
30 Gobnyan keudroe harôh jiba keureubeuen peunajoh nyan. Gapah ngon dada beulatang nyan harôh jipeuseumah sibagoe keureubeuen nyang teujok ubak TUHAN.
31 Imeum harôh geutot gapah beulatang nyan ateueh miseubah, teuma dada jih na kheueh jeumba imeum-imeum.
32 Pha uneuen harôh jibri sibagoe keureubeuen khusos
33 ubak imeum nyang jipeuseumah darah dan gapah keureubeuen peudamé nyan.
34 Dada ngon pha uneuen na kheueh teujok khusos nyang geucok lé TUHAN nibak keureubeuen nyang jijok lé bansa Israel dan jibri ubak imeum-imeum. Nyan kheueh meuneubri bansa Israel keu imeum-imeum siumu masa.
35 Nibak peunajoh nyang jipeuseumah ubak TUHAN, jeumba nyan kheueh nyang jijok ubak Nabi Harun ngon aneuëk-aneuëk gobnyan bak uroe awaknyan teubaiát jeuet keu imeum.
36 Bak uroe nyan TUHAN geupeurintah ubak bansa Israel mangat jeuet nibak keureubeuen awaknyan, jeumba nyan keu imeum-imeum. Atoran nyang lagée nyan harôh jiseutôt lé bansa Israel siumu masa.
37 Meunan kheueh atoran-atoran keuhai keureubeuen nyang teutot, keureubeuen teuhidang, keureubeuen peu amphon desya, keureubeuen geunantoe rugoe, keureubeuen peubaiát dan keureubeuen peudamé.
38 TUHAN geubri banmandum peurintah nyan ubak Nabi Musa di Gunong Sinai bak watée gobnyan geuyue bansa Israel jipeuseumah keureubeuen bak padang guron Sinai.
Chapter 8
TUHAN meufeureuman ubak Nabi Musa, "Gata jak hôi laju Nabi Harun ngon aneuëk-aneuëk jihnyan dan gata ba laju peukayan imeum, minyéuk upacara, saboh leumô agam muda, keu keureubeuen peu amphon desya, dua boh bubiri agam dan saboh raga ruti nyang hana meurago.
3 Óh lheueh nyan gata yue meusapat banmandum umat Israel nibak leuen Khimah Ulôn."
4 Nabi Musa laju geupeubuet peue nyang ka geupeurintah lé TUHAN ubak gobnyan. Bak watée banmandum umat ka meusapat nibak teumpat nyan,
5 Nabi Musa laju geupeugah ubak awaknyan, "Nyang ulôn peubuet bak saát nyoe na kheueh peurintah TUHAN."
6 Óh lheueh nyan laju geuyue ubak Nabi Harun ngon aneuëk-aneuëk gobnyan mangat jipeurab ukeue sira geu rhah droe.
7 Óh ka lheueh nyan lé gobnyan laju geupeungui peukayan imeum ubak Nabi Harun: bajée panyang jaroe, talo keuiéng ngon bajée jubah. Meunan cit ngon efod nyang geugantung bak keuiéng gobnyan deungon ikat ija nyang halôh.
8 Óh lheueh nyan geupeungui laju tutôb dada ubak Nabi Harun, dan udalam sinutôb dada nyan geupeutamong laju Urim ngon Tumim.
9 Laju geupeuseuôn seureuban ateueh ulée Nabi Harun, dan nibak seureuban nyan geupeungui ngon piasan méuh, nyan na kheueh sibagoe tanda bahwa Nabi Harun ka jeuet keu hak milék TUHAN. Banmandum nyan geupeubuet lé Nabi Musa lagée nyang ka geupeurintah lé TUHAN ubak gobnyan.
10 Laju lé Nabi Musa geucok minyéuk upacara geusiliek laju ubak Khimah TUHAN ngon banmandum peukakaih nyan. Deungon lagée nyan banmandum ka geupeu khusos keu TUHAN.
11 Bacut nibak minyéuk nyan laju geureutek tujoh goe u ateueh miseubah dan banmandum peukakaih nyang na disinan, meunan cit u ateueh bak ié ngon aleue jih. Deungon lagée nyan banmandum ka geupeu khusos keu TUHAN.
12 Óh ka lheueh nyan lé Nabi Musa laju geubaiát Nabi Harun deungon cara geurô bacut minyéuk ateueh ulée Nabi Harun nyan.
13 Óh lheueh nyan geuyue laju ubak bandum aneuëk-aneuëk Nabi Harun mangat jijak ukeue. Laju geupeungui ubak awaknyan bajée panyang jaroe ngon talo keuiéng. Laju geupeuseuôn seureuban ateueh ulée awaknyan lagée nyang ka geupeurintah lé TUHAN ubak gobnyan.
14 Óh ka lheueh nyan Nabi Musa laju geucok saboh leumô agam muda keu keureubeuen peu amphon desya. Nabi Harun dan aneuëk-aneuëk gobnyan geupeuduek laju jaroe gobnyan ateueh ulée beulatang nyan.
15 Lé Nabi Musa laju geusie óh lheueh nyan geucok teuma bacut darah beulatang nyang ka lheueh geusie nyan. Darah nyan laju geusiliek ngon jaroe gobnyan ateueh lungkée-lungkée nyang na nibak sagoe-sagoe miseubah, mangat jeuet miseubah nyan teupeu khusos keu Po teu Allah. Darah nyang leubeh nyan laju geu rô ateueh aleue miseubah. Meunan kheueh cara jih miseubah nyan teupeusuci dan teupeu khusos keu TUHAN.
16 Nibak leumô nyang ban teusie nyan, lé Nabi Musa laju geucok banmandum gapah nyang na meutamon nibak asoe pruet jih, boh keuiéng ngon gapah jih ngon bagian nyang paleng get nibak até jih. Banmandum nyan laju geutot u ateueh miseubah.
17 Teuma asoe leumô nyan, kulét jih, asoe pruet nyang leubeh, meunan cit deungon pruet, jadi banmandum leumô nyan seulaén bagian-bagian nyang ka teupeueng kréeh teutot laju diluwa khimah-khimah lagée nyang ka geupeurintah lé TUHAN.
18 Óh lheueh nyan Nabi Musa laju geucok bubiri agam sibagoe keureubeuen nyang teutot, lé Nabi Harun ngon aneuëk-aneuëk gobnyan laju geupeuduek jaroe geuh ateueh ulée bubiri nyan.
19 Nabi Musa laju geusie beulatang nyan darah jih laju geureutek ateueh ban peuet boh sagoe miseubah nyan.
20 Beulatang nyan laju geukoh-koh dan asoe pruet meunan cit deungon gaki jih laju geu rhah deungon ié. Ulée, gapah, ngon nyang leubeh nyan nibak asoe bubiri agam geutot laju sibagoe keureubeuen nyang teutot u ateueh miseubah lagée nyang ka geupeurintah lé TUHAN ubak gobnyan. Bée keureubeuen peunajoh nyang mangat nyan lumpah that galak até TUHAN.
22 Óh lheueh nyan lé Nabi Musa laju geucok bubiri agam nyang saboh treuk keu keureubeuen peubaiát imeum. Nabi Harun ngon aneuëk-aneuëk gobnyan laju geupeuduek jaroe gobnyan ateueh ulée beulatang nyan,
23 óh lheueh nyan Nabi Musa laju geusie bubiri nyan. Óh lheueh nibak nyan geucok darah bacut laju geusiliek ubak punyueng uneuen Nabi Harun, ubak nang jaroe blah uneuen, ngon nang gaki uneuen gobnyan.
24 Óh ka lheueh geupeubuet nyang lagée nyan bagoe laju geuyue banmandum aneuëk-aneuëk Nabi Harun mangat jipeurab, óh ban sare rab, laju geusiliek maséng-maséng blah uneuen punyueng awaknyan darah beulatang nyan bacut sapoe, ubak nang jaroe blah uneuen, dan ubak nang gaki blah uneuen. Darah nyang na mantong leubeh laju geuro ateueh ban peuet boh sagoe miseubah.
25 Nabi Musa laju geucok gapah bubiri nyan, ikue jih nyang meugapah, mandum gapah nyang meulabô bak asoe pruet jih, bagian nyang paleng get nibak até jih, boh keuiéng deungon gapah jih meunan cit deungon gaki uneuen jih.
26 Lam raga nyang meuasoe ruti hana meurago nyang ka teupeuseumah keu TUHAN, Nabi Musa laju geucok saboh ruti teubai nyang teupeugét deungon minyéuk dan saboh treuk ruti lipeh. Ruti nyan laju geukeubah ateueh gapah ngon ateueh pha uneuen bubiri.
27 Banmandum nyan geupeuduek bak jaroe Nabi Harun ngon aneuëk-aneuëk gobnyan, laju awaknyan peuseumah sibagoe keureubeuen teujok ubak TUHAN.
28 Óh ka lheueh nyan Nabi Musa laju geucok peunajoh nibak awaknyan laju geutot u ateueh miseubah, meusigoe deungon keureubeuen nyang teutot keu keureubeuen peubaiát. Bée keureubeuen peunajoh nyan lumpah that galak até TUHAN.
29 Lé Nabi Musa laju geucok dada bubiri nyan laju geupeuseumah sibagoe keureubeuen nyang teujok ubak TUHAN. Nyan kheueh jeumba Nabi Musa nibak bubiri agam nyang teukeureubeuen keu upacara peubaiát imeum. Banmandum nyan geupeubuet lé Nabi Musa lagée nyang ka geupeurintah lé TUHAN ubak gobnyan.
30 Óh lheueh nyan Nabi Musa geucok siladum minyéuk upacara dan siladum darah nyang mantong na ateueh miseubah, laju geureutek ateueh Nabi Harun dan aneuëk-aneuëk gobnyan meunan cit ateueh peukayan awaknyan. Deungon cara lagée nyan Nabi Musa ka geupeu khusos awaknyan dan peukayan awaknyan keu TUHAN.
31 Óh lheueh nyan Nabi Musa geupeugah ubak Nabi Harun dan aneuëk-aneuëk gobnyan, "Neutaguen kheueh laju eungkot sie keureubeuen nyan bak babah pintoe Khimah TUHAN. Meunurot peurintah TUHAN, droeneueh nyoe harôh neupajoh nibak teumpat nyan ngon ruti keureubeuen peubaiát nyang na dalam raga.
32 Eungkot sie ngon ruti nyang na mantong leubeh nyan harôh droeneueh tot sampoe habéh.
33 Tujoh uroe treb jih droeneueh hana jeuet neutinggai Khimah TUHAN sampoe upacara peubaiát seuleusoe.
34 TUHAN geupeurintah peue nyang tapeubuet nibak uroe nyoe meunan cit teuma tapeubuet bak uroe laén. Deungon upacara nyan mandum desya-desya droeneueh geupeu amphon.
35 Tujoh uroe treb jih, uroe ngon malam, droeneueh harôh tinggai dikeue pintoe Khimah keu neupeubuet peue nyang geupeurintah lé TUHAN. Meunyoe droeneueh hana neupeubuet lagée nyang geupeurintah nyan, droeneueh teuma maté. Nyan kheueh nyang geupeurintah lé TUHAN ubak ulôn."
36 Dan Nabi Harun pi ngon banmandum aneuëk-aneuëk gobnyan laju geupeubuet banmandum nyang geupeurintah lé TUHAN meulalu Nabi Musa.
Chapter 9
Siuroe óh lheueh upacara peubaiát nyan seuleusoe, bak uroe nyang keulapan, Nabi Musa laju geuhôi Nabi Harun ngon aneuëk-aneuëk gobnyan meunan cit bubena peumimpén bansa Israel.
2 Geupeugah lé Nabi Musa ubak Nabi Harun, "Neucok kheueh laju saboh leumô agam nyang mantong muda dan saboh bubiri agam, mandum nyan hana meucupa. Neupeuseumah kheueh bandua boh beulatang nyan ubak TUHAN, leumô agam keu keureubeuen peu amphon desya dan bubiri agam keu keureubeuen nyang teutot.
3 Dan neuyue kheueh laju bansa Israel mangat jipeuseumah saboh kaméng agam sibagoe keureubeuen peu amphon desya saboh aneuëk leumô dan saboh aneuëk bubiri nyang maséng-maséng meu umu sithon nyang hana meucupa keu keureubeuen nyang teutot.
4 Neuyue cit ubak awaknyan mangat jikeureubeuen saboh leumô agam dan saboh kaméng agam sibagoe keureubeuen peudamé. Mandum nyan harôh awaknyan peuseumah keu TUHAN meusajan-sajan deungon keureubeuen teuhidang nyang ka teuboh minyéuk, sabab nibak uroe nyoe TUHAN geuteuka ubak awaknyan."
5 Bandum nyang geupeugah lé Nabi Musa awaknyan ba ukeue Khimah, dan banmandum umat meugumpôi bak teumpat nyan keu meu iébadat ubak TUHAN.
6 Laju geupeugah lé Nabi Musa, "TUHAN geuyue ubak droeneueh neupeubuet nyoe mangat droeneueh deueh neukalon cahya TUHAN teuka."
7 Óh ka lheueh nyan gobnyan laju geupeugah ubak Nabi Harun, "Neujak kheueh laju ubak miseubah óh trok keunan neupeusiab laju keureubeuen peu amphon desya ngon keureubeuen nyang teutot, mangat desya droeneueh ngon desya umat geupeu amphon lé TUHAN. Neupeubuet kheueh nyan lagée nyang ka geupeurintah lé TUHAN."
8 Ban geudeungoe haba nyan geujak kheueh laju Nabi Harun ubak miseubah ban sare trok keunan geusie laju saboh leumô agam keu keureubeuen peu amphon desya geuh keudroe.
9 Aneuëk-aneuëk Nabi Harun jipeusampoe laju darah beulatang nyan ubak Nabi Harun, dan lé gobnyan laju geuculok jaroe geuh lam darah nyan, dan geusiliek laju ubak lungkée-lungkée nyang na nibak peuet boh sagoe miseubah. Óh ka lheueh nyan darah nyang na mantong leubeh laju geuro ubak aleue miseubah.
10 Gapah, boh keuiéng ngon bagian nyang paleng gét nibak beulatang nyan geutot laju u ateueh miseubah, lagée nyang ka geupeurintah lé TUHAN ubak Nabi Musa.
11 Teuma asoe ngon kulét beulatang nyan geutot laju diluwa khimah-khimah.
12 Óh lheueh nyan Nabi Harun laju geusie beulatang keureubeuen teutot keu droe geuh. Aneuëk-aneuëk Nabi Harun laju geujakjok darah beulatang nyan ubak gobnyan, dan darah nyan laju geurô ubak ban peuet boh sagoe miseubah.
13 Óh lheueh nyan awaknyan jijok laju ubak gobnyan ulée dan bagian-bagian nyang laén nibak beulatang nyan, dan atranyan laju geutot u ateueh miseubah.
14 Óh lheueh nyan asoe pruet ngon pha beulatang nyan laju geu rhah dan geutot laju ngon keureubeuen nyang teutot u ateueh miseubah.
15 Óh ka lheueh nyan gobnyan laju geukeureubeuen kaméng sibagoe keureubeuen peu amphon desya umat. Kaméng nyan geusie dan geupeuseumah lagée keureubeuen peu amphon desya geuéh keudroe.
16 Lheueh nyan geucok teuma beulatang keu keureubeuen teutot, laju geupeuseumah atranyan meunurot atoran.
17 Óh lheueh nyan geupeuseumah teuma keureubeuen teuhidang; geucok laju saboh reugam teupông, geutot laju ateueh miseubah. Nyan kheueh sibagoe seunamah keu keureubeuen teutot tieb-tieb uroe.
18 Geusie teuma lom saboh leumô agam dan saboh bubiri agam keu keureubeuen peudamé keu umat. Aneuëk-aneuëk Nabi Harun laju geujakjok darah nyan ubak gobnyan, ngon darah nyan laju geurô ateueh ban peuet boh sagoe miseubah.
19 Bak teumpat-teumpat nyang na gapah nibak leumô dan kaméng nyan awaknyan peuduek
20 u ateueh dada mandua beulatang nyan, lé Nabi Harun laju geutot u ateueh miseubah.
21 Dada ngon pha beulatang nyan geupeuseumah sibagoe keureubeuen nyang teujok keu TUHAN. Nyan na kheueh jeumba imeum-imeum, lagée nyang geupeurintah lé Nabi Musa.
22 Óh ka seuleusoe geupeuseumah banmandum keureubeuen nyan, Nabi Harun laju geubot jaroe geuh u ateueh umat Israel dan laju geubri beureukat ubak awaknyan, óh lheueh nyan laju geutron.
23 Nabi Musa ngon Nabi Harun laju geutamong lam Khimah TUHAN. Óh lheueh nyan awaknyan geuteubiet laju geubri beureukat ubak umat. Dan banmandum umat Israel deueh jikalon cahya TUHAN teuka.
24 Ngon hana teusangka-sangka TUHAN laju geupeutreun apui nyang jilahiéb habéh banmandum keureubeuen nyang teutot dan bagian-bagian nyang meugapah di ateueh miseubah. Watée umat Israel jikalon hai nyan, awaknyan meusurak-surak laju jisujut jiseumah Gobnyan.
Chapter 10
Bak siuroe, Nadab dan Abihu, aneuëk-aneuëk Nabi Harun, jicok laju teumpat apui jih maséng-maséng jipasoe laju ngon ngeue apui. Óh lheueh nyan lé awaknyan jipasoe teuma dupa lam teumpat apui nyan dan jipeuseumah laju ubak TUHAN. Teuma apui nyan hana haleue sabab TUHAN hana geuyue peuseumah atranyan keu Gobnyan.
2 Lé TUHAN laju geupeutreun apui ateueh awaknyan dan awaknyan laju maté sabab jipajoh lé apui bak Khimah TUHAN.
3 Laju geupeugah lé Nabi Musa ubak Nabi Harun, "Nyan kheueh nyang geumeukeusut lé TUHAN watée Gobnyan geupeugah, 'Mandum nyang peutimang Ulôn harôh jihoreumat keusucian Ulôn. Ulôn teuma Lôn peugah keu agungan Lôn ubak banmandum bansa Lôn.' " Teuma Nabi Harun geuiemdroe.
4 Óh lheueh nyan Nabi Musa laju geuhôi Misael ngon Elsafan, aneuëk-aneuëk Uziel, apha Nabi Harun. Geupeugah ubak awaknyan, "Tajak kheueh keunoe dan tacok kheueh laju manyét syedara sipupu gata nibak Khimah TUHAN dan takeubah laju diluwa Khimah-khimah."
5 Awaknyan laju jijakcok ngon jipeuteubiet mandua droe manyét nyan nyang mantong meupeukayan jiba laju uluwa Khimah-khimah, lagée nyang ka geupeurintah lé TUHAN.
6 Nabi Musa laju geupeugah ubak Nabi Harun meunan cit ubak aneuëk-aneuëk nyang laén, awaknyan na kheueh Eleazar dan Itamar, "Bék tapeuleumah ôk bak ulée gata sansui, dan bék tapriek peukayan gata keu gata tunyok bahwa gata seudeh ngon meukabông. Meunyoe gata tapeubuet lagée nyan, gata teuma maté, dan banmandum umat Israel teuma geubeungéh lé TUHAN. Teuma meunyoe ureuëng Israel nyang laén jeuet meukabông keu bandua droe nyang maté sabab tutong ngon apui nyan teuka nibak TUHAN.
7 Bék tatinggai Khimah TUHAN mangat gatanyoe hana maté, sabab gata ka teubaiát ngon minyéuk upacara keu tapeutimang TUHAN." Awaknyan laju jipeubuet lagée nyang ka geupeugah lé Nabi Musa.
8 TUHAN meufeureuman ubak Nabi Harun,
9 "Óh ka lheueh gata jieb ié anggô atawa ié kreueh nyang laén, gata dan aneuëk-aneuëk gata hana jeuet tatamong lam Khimah Lôn. Meunyoe gata iengkeue keu peuratoran Ulôn nyan, gata maté. Peurintah nyan harôh jitaát lé banmandum keuturonan gata.
10 Gata harôh hase tapeubeda lamkawan nyang geupeukhusos keu Po teu Allah ngon nyang hana, lamkawan nyang najih ngon nyang hana najih.
11 Banmandum huköm nyang Ulôn bri ubak gata meulalu Nabi Musa, harôh beuhase gata peurunoe keu bansa Israel."
12 Nabi Musa geupeugah ubak Nabi Harun dan ubak bandua droe aneuëk geuhnyan, Eleazar ngon Itamar, "Tacok kheueh laju gandom nyang leubeh nibak nyang teupeuseumah keu TUHAN. Nibak teupông nyan neupeuget kheueh ruti nyang hana meurago, dan jak pajoh kheueh nyan bak binéh miseubah, sabab keureubeuen nyan lumpah suci.
13 Ruti nyan harôh teupajoh bak teumpat nyang suci, sabab nibak peunajoh nyang teupeuseumah ubak TUHAN, ruti nyan ka jeuet keu jeumba gata dan aneuëk-aneuëk gata nyang agam. Nyan kheueh peurintah TUHAN ubak ulôn.
14 Teuma gata ngon aneuëk-aneuëk gata nyang agam ngon nyang inong jeuet gata pajoh dada keureubeuen nyang teubri dan pha keureubeuen khusos. Nyan kheueh jeumba imeum-imeum nibak keureubeuen peudamé bansa Israel. Atranyan jeuet gata jak pajoh patmantong asai bék bak teumpat nyang na najih.
15 Pha keureubeuen khusos ngon dada keureubeuen nyang teubri nyan harôh teuba meusajan-sajan ngon gapah keu keureubeuen nyang teutot sibagoe keureubeuen khusos keu TUHAN. Jeumba-jeumba nyan ka jeuet keu hak milék gata dan aneuëk-aneuëk gata siumu masa, lagée nyang geupeurintah lé TUHAN."
16 Óh lheueh nyan Nabi Musa geutanyong keuhai kaméng keu keureubeuen peu amphon desya. Gobnyan geubri tée bahwa kaméng nyan ka teutot. Ngon sabab nyan Nabi Musa beungéh that ubak Eleazar dan Itamar, dan gobnyan geupeugah ubak awaknyan,
17 "Pakon keureubeuen peu amphon desya nyan hana gata pajoh bak teumpat nyang suci? Keureubeuen nyan that suci; TUHAN geubri nyan ubak gata, mangat desya umat Israel geupeu amphon.
18 Darah kaméng nyan hana teuba ubak Khimah TUHAN, nyang sikeubit jih keureubeuen nyan gata makheun bak teumpat nyan lagée nyang ka ulôn peurintah ubak gata."
19 Geujaweueb lé Nabi Harun, "Beutôi, nibak uroe nyoe umat Israel ka jipeuseumah keureubeuen peu amphon desya ngon keureubeuen nyang teutot keu TUHAN. Bahpi lagée nyan, bala nyoe ka rhot u ateueh lôn. Meunyoe uroe nyoe ulôn makheun cit keureubeuen peu amphon desya nyan, peu kheueh TUHAN teuma harok?"
20 Nabi Musa that-that puih watée geudeungoe Nabi Harun geujaweueb lagée nyan.
Chapter 11
TUHAN geubri ubak Nabi Musa ngon Nabi Harun peuratoran-peuratoran lagée nyoe
2 keu bansa Israel. Mandum beulatang nyang udeb ateueh darat nyang mamah biak dan gukée jih teuprah na kheueh haleue dan jeuet teupajoh.
4 Bék tapajoh unta, peulandok atawa marmut. Beulatang nyan hareuem sabab bahpi jimamah biak, gukée jih hana teuprah.
7 Bék gatapajoh bui. Beulatang nyan hareuem, sabab bahpi gukée jih teuprah, beulatang nyan hana jimamah biak.
8 Asoe jih hana jeuet teupajoh dan bangke jih pi hana jeuet teucukéh sabab beulatang nyan hareuem.
9 Gata jeuet tapajoh meubago rupa eungkot nyang na sireb dan nyang na sisék.
10 Beulatang nyang udeb lam ié teuma hana meusireb dan hana meusisék nyan na kheueh hareuem. Nyang lagée nyan hana jeuet teupajoh, meunan cit deungon bangke jih hana jeuet teucukéh.
13 Nyang rhoh lamkawan mubagoe cicém nyang hana jeuet gata pajoh sabab najih na kheueh: cicém Siwah, cicém kutôktôk, mubagoe jeunéh kleueng, cicém nasar, cicém gagak, cicém unta, cicém cama, blekok, dan mubagoe jeunéh cangiriek, undan, cicém kasa dan simantông.
20 Banmandum jeunéh seurangga nyang meusayeub na kheueh hareuem,
21 keucuali nyang jeuet ji grob.
22 Daruet, daruet kléng dan daruet ijo jeuet teupajoh.
23 Teuma banmandum seurangga laén nyang meusayeub meunan cit jimeu éue na kheueh hareuem.
24 Sidroe-droe ureuëng ka keunong najih sampoe án mata uroe jilob na kheueh meunyoe ureuëng nyan ka tupéh ngon saboh lamkawan bangke nyoe: beulatang nyang meugukée, keucuali nyang gukée jih teuprah dan jimamah biak, dan beulatang nyang meugaki peuet dan na gukée jih. Barang sigasoe nyang ba bangke beulatang nyang seujeunéh nyan ureuëng nyan harôh ji rhah peukayan jih, teuma ureuëng nyan teutab mantong najih sampoe án mata uroe jilob.
29 Tiköih tanoh, tiköih rayeuek, tiköih ubit, kadal, asai ateueh nan cangguek peue mantong teutab hareuem, landak, muruwa, bengkarung, eungkot cue dan bunlon teutab hareuem.
31 Soemantong nyang mat beulatang nyan atawa bangke jih atranyan teutab najih sampoe mata uroe jilob.
32 Meunyoe bangke beulatang nyan rhot u ateueh barang peue mantong, teuma barang nyan pi ka jeuet keu najih. Hainyan keunong ateueh barang bah kheueh nyan nyang teupeugét nibak kayée, ija, kulét, atawa ija kröng, dan hana soai keupeue barang nyan teupeuguna. Barang nyan harôh teureundam lam ié, teuma teutab najih sampoe mata uroe jilob.
33 Meunyoe bangke nyan rhot lam beulangöng tanoh, peue mantong nyang na lam beulangöng nyan ka jeuet keu najih, dan beulangöng nyan harôh teupeubeukah.
34 Peunajoh nyang keunong ié nibak beulangöng nyan ka jeuet keu najih, meunan cit ié jieb nyang na lam beulangöng nyan ka jeuet keu najih.
35 Peue mantong nyang keunong ateueh bangke nyang rhot nyan ka jeuet keu najih. Dapu atawa teumpat tot nibak tanoh nyang keunong bangke nyan harôh teupeubeukah sabab ka keunong najih.
36 Laén hai meunyoe mata ié atawa mon, mandum nyang laén ka jeuet keu najih meunyoe keunong bangke.
37 Meunyoe bangke nyan rhot ateueh bijéh nyang keuneuk tabu, bijéh nyan teutab gleh.
38 Laén hai meunyoe bijéh nyan teungoh teureundam lam ié laju rhot bangke nyan ateueh bijéh nyang teureundam nyan, teuma bijéh nyan ka jeuet keu najih.
39 Barang gasoe nyang mat bangke beulatang haleue ka jeuet keunajih sampoe án mata uroe jilob.
40 Ureuëng nyang ba atawa nyang pajoh bangke nyan ureuëng nyan harôh jirhah peukayan droe jih, teuma ureuëng nyan teutab najih sampoe mata uroe jilob.
41 Mandum beulatang nyang meulata ateueh tanoh, bah kheueh nyang jimeu-eue, nyang meugaki peuet atawa nyang jai gaki, nyan na kheueh hareuem dan hana jeuet teupajoh.
43 Bék gata peunajih droe gata deungon teupajoh beulatang nyang lagée nyan.
44 Ulôn kheueh TUHAN Allah gata, sabab nyan jaga kheueh mangat gata teutab suci, sabab Ulôn suci.
45 Ulôn kheueh TUHAN nyang peuteubiet dan ba gata nibak nanggroe Meusé, mangat Ulôn nyoe jeuet keu Po teu Allah gata. Bah kheueh gata suci, sabab Ulôn suci.
46 Nyan kheueh atoran keuhai beulatang, rhoh cit keunan cicém, beulatang nyang udeb lam ié dan nyang meulata ateueh tanoh.
47 Gata harôh hase tapeubeda lamkawan nyang gleh ngon nyang najih, lamkawan beulatang nyang jeuet teupajoh ngon beulatang nyang hana jeuet teupajoh.
Chapter 12
TUHAN geubri ubak Nabi Musa peuratoran-peuratoran lagée nyoe
2 keu bansa Israel. Meunyoe sidroe ureuëng inong jipeulahé aneuëk agam, tujoh uroe ureuëng inong nyan lam keuadaan kuto, saban lagée yoh watée ureuëng nyan teuka he.
3 Bak uroe nyang keulapan aneuëk nyang lahé nyan harôh teupeusunat.
4 Óh ka lheueh lhée ploh lhée uroe treuk inong nyan mantong lam keuadaan kuto sabab jiteubiet darah. Ureuëng nyan hana jeuet jimat barang-barang nyang teupeuguna keu iébadat dan hana jeuet jitamong lam Khimah TUHAN sampoe trok bak watée inong nyan suci teuma.
5 Meunyoe ureuëng inong jipeulahé aneuëk inong, peuet blah uroe ureuëng inong nyan lam keuadaan kuto, saban lagée yoh watée ureuëng nyan teuka he. Óh lheueh nyan nam ploh nam uroe treuk ureuëng nyan mantong lam kuto sabab jiteubiet darah.
6 Óh ka lheueh seuleusoe masa peusuci, bah kheueh sabab ka lheueh jipeulahé aneuëk agam meunan cit ngon aneuëk inong, ureuëng inong nyan harôh jiba peuseumahan ubak imeum dikeue pintoe Khimah TUHAN. Keureubeuen nyan na kheueh saboh aneuëk bubiri nyang meu umu sithon keu keureubeuen nyang teutot, dan saboh cicém mirah pati nyang muda atawa cicém leuek nyang muda keu keureubeuen peu amphon desya.
7 Imeum harôh geujok keureubeuen jih nyan ubak TUHAN dan geupeuna upacara keu teusampôh najih ureuëng inong nyan, sampoe ureuëng inong nyan ka jeuet keu gleh. Lagée nyan kheueh nyang harôh jipeubuet lé sidroe ureuëng inong meunyoe jihnyan jipeulahé aneuëk.
8 Meunyoe ureuëng inong nyan hana hase jipeuna saboh aneuëk bubiri, ureuëng nyan harôh jiba dua aneuëk cicém mirah pati muda atawa cicém leuek muda: saboh keu keureubeuen nyang teutot saboh treuk keu keureubeuen peu amphon desya. Imeum harôh geupeubuet upacara keu teusampôh najih bak ureuëng inong nyan, deungon lagée nyan ureuëng nyan ka jeuet keu gleh lom teuma.
Chapter 13
TUHAN geubri ubak Nabi Musa ngon Nabi Harun peuratoran-peuratoran nyang lagée nyoe:
2 Meunyoe na sidroe-droe ureuëng jibeudôh kru, atawa purée atawa jitimoh putéh meutumpok-tumpok nibak kulét ureuëng nyan nyang akhé jih rhot keu peunyakét kulét nyang mubahya, ureuëng nyan harôh teuba ubak imeum keuturonan Nabi Harun.
3 Imeum harôh geupareksa bak teumpat nyang sakét nibak kulét ureuëng nyan. Meunyoe bulée nyang na bak teumpat nyan ka jeuet keu putéh, dan bak teumpat nyang sakét deuh jih leubeh lhok nibak kulét silingka nyan, ureuëng nyan ka keunong peunyakét kulét nyang paleng mubahya. Lé imeum harôh geupeugah bahwa ureuëng nyan najih.
4 Teuma meunyoe bagian nyang sakét wareuna jih putéh dan hana leubeh nibak kulét nyang na silingka nyan, meunan cit bulée nyang na nibak nyan hana cit putéh, ureuëng nyan harôh teupeu aséng tujoh uroe treb jih.
5 Bak uroe nyang keutujoh, lé imeum harôh geupareksa lom. Dan meunurot geupike lé gobnyan peunyakét nyan mantong sa keuadaan jih dan hana jimeu-eue ho laén, ureuëng nyan harôh teupeu aséng tujoh uroe treuk.
6 Bak uroe nyang keutujoh lé imeum harôh keupareksa lom, dan meunyoe bagian nyang sakét nyan ka leu-eueng dan jimeu-eue, lé imeum harôh geupeugah bahwa ureuëng nyan ka gleh. Nyan peunyakét kulét nyang hana mubahya. Dan ureuëng nyan harôh jirhah peukayan jih dan gobnyan ka jeuet keu gleh.
7 Teuma óh lheueh geupeugah lé imeum peunyakét ureuëng nyan gleh teuma peunyakét nyan ka jimeu-eue, ureuëng nyan harôh meuhadab lom ubak imeum.
8 Lé imeum harôh geupareksa lom, dan meunyoe peunyakét nyan beutôi ka jimeu-eue, ureuëng nyan harôh teupeugah ka najih; ureuëng nyan keunong peunyakét kulét nyang paleng mubahya.
9 Sidroe ureuëng keunong peunyakét kulét nyang mubahya ureuëng nyan harôh teuba ubak imeum.
10 Meunyoe meunurot geukalon lé imeum nibak kulét ureuëng nyan na keumong putéh nyang ka luhok dan bulée jih pih nyang na silingka nyan ka putéh,
11 ureuëng nyan ka keunong peunyakét kulét nyang mubahya. Lé imeum harôh geupeugah bahwa ureuëng nyan ka jeuet keu najih. Hana peureulée le ureuëng nyan teupeu aséng, sabab ka nyata bahwa ureuëng nyan najih.
12 Meunyoe geukalon lé imeum meucak-cak putéh nyan ka jimeu-eue phon nibak ulée ka trok bak gaki,
13 dan hase geupeureksa lé gobnyan kulét nyan ka jimeu-eue bansaboh tuboh dan banmandum kulét ureuëng nyan ka jeuet keu putéh, ureuëng nyan ka jeuet teupeugah gleh.
14 Teuma meunyoe jitimoh luhok, lé imeum harôh geupareksa lom.
15 Meunyoe nyan meumang luhok, ureuëng nyan harôh geupeugah najih, sabab ureuëng nyan ka keunong peunyakét kulét nyang mubahya.
16 Teuma meunyoe luhok nyan puléh dan ka jeuet keu putéh lom, ureuëng nyan harôh jijak meuhadab ubak imeum
17 keu teupareksa lom. Meunyoe luhok nyan meumang ka jeuet keu putéh, lé imeum harôh geupeugah bahwa ureuëng nyan gleh.
18 Meunyoe sidroe ureuëng na keunong ceumuét nyang ka puléh,
19 teuma nibak beukaih nyan na jibeudôh keumong putéh atawa meucak-cak putéh hi jih lagée mirah-mirah, ureuëng nyan harôh jijak meuhadab ubak imeum
20 keu teupeureksa. Meunyoe meucak-cak nyan leumah jih leubeh lhok nibak kulét sikeulileng nyan dan bulée nyang na sikeulileng nyan pih ka jeuet keu putéh, lé imeum harôh geupeugah bahwa ureuëng nyan ka jeuet keu najih. Ceumuét nyan sibagoe awai keu keunong peunyakét kulét nyang meubahya.
21 Teuma meunyoe meunurot geupeureksa lé imeum bulée nyang na bak bagian nyan hana jeuet keu putéh, dan bagian nyan hana leubeh nibak kulét sikeulileng nyan, teuma leubeh muda wareuna jih, ureuëng nyan harôh teupeu aséng nyang treb jih tujoh uroe.
22 Meunyoe meucak-cak putéh nyan na jimeu-eue, lé imeum harôh geupeugah bahwa ureuëng nyan najih sabab ureuëng nyan ka keunong peunyakét kulét nyang mubahya.
23 Teuma meunyoe meucak-cak putéh nyan hana meu-ubah dan hana teuma jimeu-eue, nyan na kheueh beukaih ceumuét, jadi ureuëng nyan na kheueh gleh.
24 Meunyoe na sidroe ureuëng nyang luka sabab tutong ngon apui, laju kulét nibak teumpat luka nyan ka jeuet keu putéh atawa putéh mubayang-bayang mirah,
25 lé imeum harôh geupareksa. Meunyoe bulée nyang na silingka nyan ka jeuet keu putéh dan luka jih leubeh lhok nibak kulét silingka nyan, teuma peunyakét kulét nyang paleng mubahya dan jibeudôh nibak teumpat luka tutong nyan, dan lé imeum harôh geupeugah bahwa ureuëng nyan najih.
26 Teuma meunyoe bulée nyang na bak teumpat nyan hana jeuet keu putéh dan bagian nyan hana leubeh lhok nibak kulét nyang na silingka nyan, teuma leubeh muda wareuna jih, teuma ureuëng nyan harôh teupeu aséng nyang treb jih tujoh uroe.
27 Bak uroe nyang keutujoh imeum harôh geupareksa lom. Meunyoe meucak-cak putéh nyan ka jimeu-eue, teuma ureuëng nyan ka keunong peunyakét kulét nyang mubahya, dan harôh teupeugah najih.
28 Teuma meunyoe meucak-cak putéh nyan hana meu-ubah dan hana teuma jimeu-eue, teuma leubeh putéh wareuna jih, nyan bukon peunyakét kulét nyang mubahya. Imeum harôh geupeugah bahwa ureuëng nyan gleh, sabab wareuna nyang putéh nyan beukaih tutong ngon apui.
29 Meunyoe sidroe ureuëng agam atawa ureuëng inong ka keunong peunyakét kulét bak ulée jihnyan atawa bak keueng jih,
30 ureuëng nyan harôh geupeureksa lé imeum. Meunyoe bagian nyang sakét nyan leumah jih leubeh lhok nibak kulét nyan na silingka nyan, dan ôk atawa janggot nyang na disinan ka lagée kunéng laju luroh, teuma ureuëng nyan ka keunong peunyakét kulét nyan mubahya dan ureuëng nyan harôh teupeugah najih.
31 Meunyoe meunurot geupeureksa lé imeum bagian deuh jih hana leubeh lhok nibak kulét nyang na silingka nyan, teuma hana deuh ôk atawa janggot nyang gét nibak bagian nyan, teuma ureuëng nyan harôh teupeu aséng nyang treb jih tujoh uroe.
32 Bak uroe nyang keutujoh, imeum harôh geupareksa lom bagian nyang sakét nibak ureuëng nyan, meunyoe peunyakét nyan hana jimeu-eue dan hana meurumpok ôk atawa janggot nyang rab-rab kunéng nibak bagian nyan, lom teuma deuh jih hana leubeh lhok nibak kulét di silingka nyan,
33 ureuëng nyan harôh teucuko ôk atawa janggot disilingka teumpat nyang sakét. Ôh lheueh nyan ureuëng nyan harôh teupeu aséng lom nyang treb jih tujoh uroe.
34 Bak uroe nyang keu tujoh, lé imeum harôh geupareksa lom. Meunyoe peunyakét ureuëng nyan hana jimeu-eue dan bagian nyan leumah jih hana leubeh lhok nibak kulét nyang na silingka nyan, ureuëng nyan ka jeuet teupeugah gleh dan peukayan ureuëng nyan harôh teujak rhah.
35 Teuma meunyoe ka lheueh geupeugah peunyakét ureuëng nyan ka gleh teuma ka jimeu-eue,
36 lé imeum harôh geupareksa lom. Meunyoe peunyakét nyan beutôi ka jimeu-eue, hana peureulée le geupareksa lé imeum peu kheueh ôk atawa janggot ureuëng nyan ka kunéng, sabab ka nyata bahwa ureuëng nyan ka najih.
37 Teuma meunyoe meunurot kheun imeum peunyakét ureuëng nyan hana jimeu-eue, dan ôk atawa janggot gét jitimoh nibak teumpat nyan, teuma peunyakét nyan ka jeuet geupeugah puléh. Dan imeum harôh geupeugah ureuëng nyan ka gleh.
38 Meunyoe sidroe-droe ureuëng agam atawa ureuëng inong na meucak-cak putéh nibak kulét jih,
39 imeum harôh geupareksa ureuëng nyan. Meunyoe meucak-cak putéh nyan deuh jih mubayang-bayang putéh, ureuëng nyan teuma keunong peunyakét kurab, dan ureuëng nyan jeuet teupeugah gleh.
40 Meunyoe sidroe ureuëng agam ulée siblah ulikot ka jeuet keu-ueh lagée teucuko, ueh nyan hana meusabab gobnyan ka jeuet keu najih.
42 Teuma meunyoe jibeudôh keumong putéh mubayang-bayang mirah nibak teumpat ulée nyang ueh nyan, ureuëng nyan ka keunong peunyakét kulét nyang mubahya.
43 Imeum harôh geupareksa ureuëng nyan, dan meunyoe beutôi na keumong putéh mubayang-bayang mirah,
44 lé imeum harôh geupeugah bahwa ureuëng nyan najih sabab ka keunong peunyakét kulét nyang lumpah mubahya bak ulée gobnyan.
45 Sidroe-droe ureuëng nyang keunong peunyakét nyang mubahya, ureuëng nyan harôh jingui peukayan nyang beukah-beukah dan ôk jih bak ulée jipeubiyeu mantong sansui ngon meugeureupé. Gobnyan harôh jitôb bagian miyueb muka jih sira ji klik-klik, "Najih! Najih!"
46 Simantong ureuëng nyan keunong peunyakét nyan ureuëng nyan teutab najih dan harôh tinggai diluwa khimah-khimah, jioh nibak ureuëng nyang laén.
47 Meunyoe meuteumé lumpok nibak peukayan atawa ija wol atawa ija lineun,
48 atawa nibak kulét atawa peue mantong nyang teupeugét nibak kulét,
49 dan wareuna ija rapöh nyan mubayang-bayang ijo atawa mubayang-bayang mirah, teuma rapöh nyang lagée nyan jeunéh jimeu-eue laju atranyan harôh teupeuleumah ubak imeum.
50 imeum harôh geupareksa barang nyan, laju geupeu aséng nyang treb jih tujoh uroe.
51 Bak uroe nyang keutujoh atranyan harôh geupareksa lom, dan meunyoe rapöh nyan keubit ka jimeu-eue, teuma barang nyan na kheueh najih.
52 Imeum harôh geutot ija nyan, sabab rapöh nyang na nyan jeunéh nyang jimeu-eue, jadi harôh teupeu ranab lam apui hu.
53 Teuma meunyoe meunurot nyang geupareksa lé imeum nyan rapöh nyan hana jimeu-eue nibak barang nyan,
54 gobnyan laju geuyue mangat barang nyan jirhah dan jipeu aséng nyang treb jih tujoh uroe trek.
55 Óh lheueh nyan lé imeum harôh geupareksa lom. Meunyoe rapöh nyan hana jimeu-eue teuma hi jih teutab saban, barang nyan mantong najih dan harôh teutot lam apui hu, bahpi nyang rapöh nyan teuma na nibak bagian keue atawa nibak bagian likot.
56 Teuma meunyoe nyang meunurot geupareksa lé imeum rapöh nyan ka meukureueng hi jih, bak nyang keunong rapöh nibak ija atawa kulét nyan harôh teupriek.
57 Meunyoe óh dudoe jiteubiet lom, dan rapöh nyan jimeu-eue, lé ureuëng po ija atawa kulét nyan harôh geutot lam apui barang nyan.
58 Meunyoe óh ka lheueh teu rhah hi nyang lumpok nibak ija nyan atawa kulét nyan ka gadôh, teuma atranyan harôh teu rhah lom, barô kheueh teuanggab gleh.
59 Meunan kheueh atoran-atoran keuhai nyang rapöh nyang meuteumé nibak peukayan atawa ija nibak lineun atawa ija wol, atawa nibak peue mantong nyang teupeugét nibak kulét.
Chapter 14
TUHAN geubri ubak Nabi Musa peuratoran-peuratoran lagée nyoe keuhai upacara teupeugleh óh ka lheueh puléh nibak peunyakét kulét nyang mubahya. Bak uroe ureuëng nyang teupeugah gleh, ureuëng nyan harôh teuba ubak imeum,
3 lé imeum laju geuba ureuëng nyan uluwa khimah-khimah. Meunyoe meunurot teupareksa ureuëng nyan ka puléh,
4 lé imeum laju geuyue ba ubak ureuëng nyan dua boh cicém udeb nyang hana hareuem, sikrék kayée bak aron, sikrék talo mirah dan saboh tangke ôn hisop.
5 Cicém nyang saboh harôh teusie ateueh beulangöng tanoh nyang meuasoe ié gleh nyang teucok nibak mata ié.
6 Cicém nyang saboh treuk nibak kayée bak aron, talo mirah ngon saboh tangke ôn hisop harôh teuculok lam darah cicém nyang ka teusie nyan.
7 Lé imeum laju geureutek tujoh goe darah cicém nyan ubak ureuëng nyang ka puléh nyan, dan laju geupeugah bahwa ureuëng nyan ka gleh. Dan cicém nyang mantong udeb geujak peuleueh laju u blang.
8 Óh lheueh nyan lé ureuëng nyan laju jijak rhah peukayan droe jih, jicukö mandum ôk jih, dan jijak manoe. Deungon nyan gleh kheueh ureuëng nyan, dan ka jeuet jitamong u dalam khimah-khimah, teuma tujoh uroe treuk ureuëng nyan hana jeuet jitamong lam khimah jih keudroe.
9 Bak uroe nyang keutujoh ureuëng nyan harôh jicukö mandum ôk jih, meunan cit deungon janggot jih, calak mata ureuëng nyan dan banmandum bulée nyang na nibak tuboh ureuëng nyan. Óh lheueh nyan lé ureuëng nyan laju jijak rhah peukayan jih keudroe dan jimanoe. Barô kheueh óh lheueh nyan ureuëng nyan ka gleh.
10 Bak uroe nyang keu lapan ureuëng nyan harôh jiba dua boh aneuëk bubiri agam dan saboh aneuëk bubiri inong nyang meu umu sithon, nyang maséng-maséng hana meucupa. Seulaén nibak nyan jiba teuma lhée kilo gram teupông nyang ka teujampu ngon minyéuk zaiton dan siper lhée arée minyéuk zaiton.
11 Lé imeum laju jiba ureuëng nyan meusigoe ngon peuseumahan jih nyan ubak babah pintoe Khimah TUHAN.
12 Imeum harôh geucok saboh aneuëk bubiri agam dan siper lhée arée minyéuk zaiton keu keureubeuen geunantoe rugoe, dan laju geupeuseumah sibagoe keureubeuen teubri ubak TUHAN.
13 Aneuëk bubiri nyan harôh teusie bak teumpat nyang khusos na kheueh bak teumpat sie keureubeuen peu amphon desya dan keureubeuen teutot. Bubiri nyan harôh teusie disinan sabab keureubeuen gantoe rugoe ngon keureubeuen peu amphon desya na kheueh lumpah that suci dan jeuet keu jeumba imeum.
14 Imeum harôh geucok bacut darah aneuëk bubiri nyan laju geusiliek ubak punyueng blah uneuen, bak nang jaroe uneuen dan bak nang gaki uneuen ureuëng nyang teuma geupeugah ka gleh.
15 Óh lheueh nyan lé imeum geucok laju bacut minyéuk zaiton laju geuro lam paleuet jaroe geuh nyang blah wie.
16 Óh ka lheueh gobnyan geuculok aneuëk jaroe geuh nyang blah uneuen lam minyéuk, dan geu ceupet tujoh goe lam Khimah TUHAN.
17 Dan minyéuk nyang mantong na tinggai bacut bak jaroe gobnyan nyan laju geusiliek ubak teumpat-teumpat nyang ka teusiliek darah, na kheueh ubak ôn punyueng blah uneuen, bak nang jaroe blah uneuen, dan nang gaki blah uneuen ureuëng nyang teuma geupeugah ka gleh.
18 Minyéuk nyang leubeh nyan harôh geuro ateueh ulée ureuëng nyan. Deungon lagée nyan imeum ka geupeuna upacara peusuci keu ureuëng nyan dikeue TUHAN.
19 Óh lheueh nyan lé imeum harôh geupeuseumah keureubeuen peu amphon desya mangat ureuëng nyang najih nyan ka jeuet keu gleh. Óh lheueh nyan gobnyan harôh geusie beulatang keu keureubeuen nyang teutot
20 dan geupeuseumah meusajan ngon keureubeuen teuhidang ateueh miseubah. Deungon lagée nyan imeum ka geupeuna ucapara teupeusuci keu ureuëng nyan, dan ureuëng nyan pih ka jeuet keu gleh.
21 Meunyoe ureuëng nyan gasien dan hana mampu, teuma keu keureubeuen geunantoe rugoe jihnyan jeuet jiba saboh aneuëk bubiri agam sibagoe keureubeuen nyang teujok ubak TUHAN. Seulaén nibak nyan sikilo gram teupông nyang teujampu ngon minyéuk zaiton sibagoe keureubeuen teuhidang, dan siper lhée minyéuk zaiton.
22 Meunan cit di ureuëng nyan harôh teuma jiba dua boh cicém mirah pati nyang mantong muda atawa cicém leuek muda: saboh keu keureubeuen peu amphon desya dan saboh treuk keu keureubeuen teutot.
23 Banmandum peuseumahan nyan harôh teuba ubak imeum dikeue babah pintoe Khimah TUHAN bak uroe nyang keu lapan upacara teupeu gleh droe gobnyan.
24 Le imeum laju geucok aneuëk bubiri ngon minyéuk zaiton dan laju geupeuseumah sibagoe keureubeuen nyang teujok ubak TUHAN, dan nyan keu jeumba imeum.
25 Laju lé imeum harôh geusie aneuëk bubiri nyan dan geusiliek laju darah jih bacut ubak punyueng blah uneuen, nang jaroe blah uneuen dan nang jaroe gaki uneuen ureuëng nyang ka geupeugah gleh.
26 Lé imeum harôh geuro bacut minyéuk ubak tapak jaroe gobnyan blah wie
27 dan deungon jaroe uneuen gobnyan laju geupicet minyéuk nyan tujoh goe u dalam Khimah TUHAN.
28 Dan minyéuk nyang na tinggai bacut treuk lam jaroe gobnyan harôh geusiliek ubak teumpat-teumpat nyang ka teusiliek darah, na kheueh ubak ôn punyueng nyang blah uneuen, nang jaroe uneuen dan nang gaki blah uneuen ureuëng nyang teuma geupeugah gleh.
29 Minyéuk nyang leubeh nyan harôh geuro ateueh ulée ureuëng nyan sibagoe upacara teupeu gleh droe gobnyan dikeue TUHAN.
30 Óh lheueh nyan lé imeum harôh geupeuseumah saboh cicém mirah pati muda atawa cicém leuek muda
31 keu keureubeuen peu amphon desya, dan saboh treuk keu keureubeuen nyang teutot meusigoe ngon keureubeuen teuhidang. Deungon lagée nyan imeum geupeuna upacara teupeu gleh ateueh ureuëng nyan dikeue TUHAN.
32 Nyan kheueh peuratoran keuhai upacara teupeusuci óh ka lheueh keunong peunyakét kulét nyang mubahya keu ureuëng nyang hana meudaya.
33 TUHAN geubri ubak Nabi Musa ngon Nabi Harun
34 peuratoran-peuratoran keuhai rumoh nyang ka keunong peunyakét rapöh dan ka jimeu-eue. Peuratoran-peuratoran nyoe teupeubuet óh ka lheueh bansa Israel jitamong u Kanaan, nanggroe nyang geubri lé TUHAN keu awaknyan.
35 Soemantong nyang meuteumé rumoh droe ka keunong rapöh, harôh jijak peugah hainyan ubak imeum.
36 Sigohlom imeum teuka geujak pareksa nyang keunong rapöh nyan, gobnyan harôh geupeurintah mangat peue-peue nyang na lam rumoh nyan teupeuteubiet uluwa. Meunyoe hán, peue mantong nyang na lam rumoh nyan ka jeuet keu najih, dan laju imeum teuka
37 keu geupareksa nyang rapöh nyan. Meunyoe na deuh meucak-cak rab lagée ijo-ijo atawa mubayang-bayang mirah nyang leumah jih lagée ka jitamong u dalam beuton nyan,
38 imeum harôh geutinggai laju rumoh nyan dan geupeubiyeu mantong rumoh nyan teugunci nyang treb jih tujoh uroe.
39 Bak uroe nyang keutujoh imeum nyan harôh geuteuka dan geupareksa lom teuma. Meunyoe nyang rapöh nyan ka jimeu-eue,
40 gobnyan harôh geupeurintah mangat batée-batée beuton nyang ka keunong rapöh nyan teureulôh dan mandum beuton siblah udalam teu kréh. Nyang teukréh nyan lagée peulaster ngon batée-batée nyan harôh teujak böih ubak saboh teumpat nyang najih nyang na diluwa banda.
42 Dan batée-batée nyang ka geupeuteubiet nyan harôh teugantoe deungon batée-batée nyang barô. Banmandum beuton rumoh nyan harôh teulapeh ngon peulaster barô.
43 Meunyoe rapöh nyan jiteuka lom, padahai batée-batée rumoh nyan ka teugantoe dan beuton-beuton rumoh nyan ka teu kréh dan teupeulaster lom,
44 lé imeum harôh geujak ngieng dan geupareksa rumoh nyan lom. Meunyoe rapöh nyan keubiet ka ji-éue meuluwah teuma rumoh nyan ka jeuet keu najih
45 dan harôh teureulôh. Batée-batée, kayée-kayée dan banmandum peulaster jih harôh teuba u teumpat nyang najih nyang na di luwa banda.
46 Sigohlom nyan soe mantong nyang tamong lam rumoh nyan ka jeuet keu najih sampoe mata uroe jilob.
47 Soe mantong nyang éh atawa jimakheun nibak rumoh nyan harôh ji rhah peukayan droe jih.
48 Teuma meunyoe imeum nyang teuka dan meunurot nyang geupareksa lé gobnyan hana jiteuka lé nyang rapöh óh ka lheueh rumoh nyan teupeulaster lom, gobnyan harôh geupeugah bahwa rumoh nyan ka gleh, sabab nyang rapöh nyan ka gadôh banmandum.
49 Keu teupeu suci rumoh, imeum harôh geucok dua boh cicém, kayée bak sala, talo mirah dan saboh tangke hisop.
50 Cicém nyang saboh harôh teusie ateueh beulangöng nyang meuasoe ié gét nibak mata ié.
51 Laju óh lheueh nyan, kayée bak sala, talo mirah, hisop dan cicém nyang mantong udeb harôh teuculok lam darah cicém nyang ka lheueh teusie dan u dalam ié nyang gét. Óh lheueh nyan, rumoh nyan harôh geureutek tujoh goe.
52 Cicém nyang mantong udeb harôh geupeuleueh lam padang uluwa banda. Deungon lagée nyan imeum ka geupeubuet upacara teupeusuci rumoh, dan rumoh nyan ka jeuet keu gleh.
54 Nyan kheueh peuratoran-peuratoran keuhai peunyakét kulét nyang paleng mubahya,
55 keuhai bucôh-bucôh, luhok atawa meucak-cak putéh atawa kumong nibak tuboh, dan keuhai rapöh nibak peukayan atawa rumoh.
57 Peuratoran-peuratoran nyan guna jih keu teupeu teuntée peu kheueh sapeue-peue nyan gleh atawa najih.
Chapter 15
TUHAN geubri ubak Nabi Musa dan Nabi Harun peuratoran-peuratoran nyang lagée nyoe
2 keu bansa Israel. Meunyoe sidroe ureuëng agam jiteubiet meuliléh akibat keunong peunyakét nibak boh kréh, nyang jiteubiet meuliléh nyan najih,
3 bah kheueh nyang teubiet meunan cit nyang meuteun.
4 Teumpat duek atawa teumpat éh ureuëng nyan najih.
5 Soe mantong nyang cukéh ureuëng nyang jiteubiet meuliléh atawa teumpat éh ureuëng nyan, atawa jiduek nibak teumpat beukaih ureuëng nyan duek, atawa teumpat jiludah lé ureuëng nyan, ureuëng nyang keunong nyan harôh ji rhah peukayan dan jimanoe, dan ureuëng nyan najih sampoe án mata uroe jilob.
9 Peulana atawa peue mantong nyang jiduek lé ureuëng nyang peuteubiet meuliléh nyan ka jeuet keu najih.
10 Soe mantong nyang cukéh sapeue-sapeue nyang beukaih jiduek lé ureuëng nyan, nyan ka jeuet keu najih sampoe mata uroe jilob. Soe mantong ureuëng nyang beuôt barang nyan harôh ji rhah peukayan ureuëng nyan dan jimanoe, dan ureuëng nyan najih sampoe mata uroe jilob.
11 Meunyoe ureuëng nyang jiteubiet meuliléh nyan gohlom ji rhah jaroe laju jicukéh ureuëng laén, teuma ureuëng nyang jicukéh nyan harôh ji rhah peukayan droe jih dan jimanoe, dan ureuëng nyan najih sampoe mata uroe jilob.
12 Beulangöng tanoh nyang jicukéh lé ureuëng nyan harôh jipeubeukah dan peukakaih nyang jimat nyan harôh teu rhah.
13 Meunyoe ureuëng nyan ka puléh, ureuëng nyan harôh jipréh tujoh uroe treuk. Óh lheueh nyan gobnyan harôh ji rhah peukayan jih keudroe dan jijak manoe ubak mata ié, teuma gleh kheueh ureuëng nyan.
14 Bak uroe nyang keu lapan ureuëng nyan harôh jiba dua boh cicém mirah pati nyang muda atawa cicém leuek muda ubak babah pintoe Khimah TUHAN laju jijok ubak imeum.
15 Imeum harôh geupeuseumah cicém nyang saboh sibagoe keureubeuen peu amphon desya, dan saboh treuk keu keureubeuen nyang teutot. Deungon lagée nyan imeum ka geupeuna upacara peusuci ureuëng nyan dikeue TUHAN.
16 Meunyoe sidroe ureuëng agam jipeuteubiet ié manikam, ureuëng nyan harôh jimanoe teuma teutab najih sampoe án mata uroe jilob.
17 Barang peue mantong bah kheueh nyan nyang nibak ija atawa kulét nyang keunong manikam nyan harôh teu rhah; barang nyan najih sampoe án mata uroe jilob.
18 Óh ka lheueh meusituboh, bah kheueh ureuëng agam meunan cit ureuëng inong harôh manoe, teuma awaknyan teutab najih sampoe án mata uroe jilob.
19 Ureuëng inong nyang teungoh jiteuka he, ureuëng inong nyan najih nyang treb jih tujoh uroe. Soe mantong nyang cukéh ureuëng nyan ka jeuet keu najih sampoe mata uroe jilob.
20 Peue mantong nyang jigiduek atawa ji éh lé ureuëng inong nyang mantong lam he nyan atranyan ka jeuet keu najih.
21 Soe mantong nyang cukéh teumpat beukaih ji éh atawa jigiduek lé ureuëng inong nyang teungoh jiteuka he, ureuëng nyan harôh ji rhah peukayan gobnyan dan jimanoe, dan ureuëng nyan najih sampoe án mata uroe jilob.
24 Meunyoe sidroe ureuëng agam jimeusituboh ngon ureuëng inong nyang teungoh teuka he, ureuëng agam nyan pih ka jeuet keu najih nyang treb jih tujoh uroe, dan tieb-tieb teumpat éh nyang ji éh lé ureuëng nyan pih ka jeuet keu najih.
25 Meunyoe ureuëng inong jiteubiet darah na meupadub uroe treb jih diluwa masa teuka he jih, atawa darah jih nyan jiteubiet hana jipiôh sampoe ka habéh watée teuka he gobnyan, ureuëng nyan najih seumantong meudarah nyan saban lagée gobnyan masa lam he.
26 Teumpat éh atawa teumpat duek gobnyan seumantong ureuëng nyan jiteubiet darah na kheueh najih.
27 Soe mantong nyang cukéh teumpat nyan, jihnyan jeuet keu najih. Gobnyan harôh ji rhah peukayan jih dan jimanoe, dan gobnyan najih sampoe án mata uroe jilob.
28 Óh ka lheueh darah nyan jipiôh, ureuëng inong nyan harôh jipréh nyang treb jih tujoh uroe trek. Barô kheueh óh lheueh nyan gobnyan ka gleh.
29 Bak uroe nyang keu lapan ureuëng nyan harôh jiba dua boh cicém mirah pati muda atawa cicém leuek muda ubak imeum nibak babah pintoe Khimah TUHAN.
30 Cicém nyang saboh harôh jipeuseumah sibagoe keureubeuen peu amphon desya, dan nyang saboh trek sibagoe keureubeuen teutot. Deungon cara nyan imeum ka geupeuna upacara peusuci ureuëng inong dikeue TUHAN.
31 TUHAN meufeureuman ubak Nabi Musa mangat geujak peuingat ubak bansa Israel mangat geupeurati pajan awaknyan jiteuka najih dan pajan teuma hana jiteuka, mangat awaknyan hana jipeunajih Khimah TUHAN nyang na lamkawan khimah-khimah awaknyan. Meunyoe awaknyan jipeunajih Khimah nyan, awaknyan teuma maté.
32 Meunan kheueh peuratoran-peuratoran keuhai ureuëng agam nyang jipeuteubiet meuliléh sabab sakét eumpang kréeh atawa jipeuteubiet manikam,
33 keuhai ureuëng inong nyang teungoh he, dan keuhai ureuëng agam nyang meujimak ngon ureuëng inong nyang teungoh teuka he.
Chapter 16
Óh ka lheueh meuninggai bandua droe aneuëk Nabi Harun watée awaknyan jipeuseumah apui nyang hana geu rela lé TUHAN, TUHAN meufeureuman ubak Nabi Musa,
2 kheun TUHAN, "Tajak peusampoe kheueh ubak syedara gata Nabi Harun, bahwa bak uroe nyang ka teupeuteuntée mantong jihnyan jeuet jitamong lam Ruweueng Nyang Mahasuci nyang teupeuleung ngon tirée rawa, sabab disinan kheueh Ulôn peuleumah droe Lôn lam awan di ateueh tutôb Peuto Peujanji. Meunyoe Nabi Harun ji iengkeue ubak peurintah nyan, laju jihnyan teuma maté.
3 Teuma ngon cara jipeuseumah leumô agam nyang mantong muda keu keureubeuen peu amphon desya dan saboh bubiri agam keu keureubeuen nyang teutot, Nabi Harun jeuet jitamong lam Ruweueng Mahasuci."
4 Lheueh nyan teuma Nabi Harun jipeurati ubak peuratoran-peuratoran nyoe. Sigohlom jitamong lam Ruweueng Mahasuci leubeh dilée harôh jimanoe dan jingui peukayan imeum, na kheueh bajée, sileuweue paneuk, talo keuiéng dan seureuban, banmandum nyang teupeugét nibak lineun.
5 Lé umat Israel harôh jiseurah ubak Nabi Harun dua boh kaméng agam keu keureubeuen peu amphon desya dan saboh bubiri agam keu keureubeuen nyang teutot.
6 Nabi Harun harôh jipeuseumah saboh leumô agam keu keureubeuen peu amphon desya keu droe jihnyan dan keuluwarga jih.
7 Ban dua boh leumô agam nibak Israel nyan harôh jiba ubak babah pintoe Khimah TUHAN.
8 Disinan jihnyan harôh ji rhom undi deungon cara jipeuguna dua neuk aneuk batée, nyang sineuk jiboh tanda "keu TUHAN", dan nyang laén "keu Azazel".
9 Kaméng nyang teupiléh keu TUHAN harôh teupeuguna keu keureubeuen peu amphon desya.
10 Kaméng nyang teupiléh keu Azazel harôh teuba udeb-udeb dikeue TUHAN dan laju teuparoh u padang pasi keu Azazel, deungon na lagée nyan mangat desya-desya bansa Israel geu sampôh bube nyang na.
11 Óh ka lheueh Nabi Harun geupeuseumah dan geusie leumô agam keu keureubeuen peu amphon desya keu droe gobnyan keudroe dan keu keuluwarga,
12 gobnyan harôh geucok teumpat apui nibak miseubah dan geupasoe laju peunoh deungon ngeue apui dan dua boh reugam dupa nyang halôh, atranyan laju geuba ubak Ruweueng Mahasuci.
13 Dupa nyan harôh teutot dikeue Peuto Peujanjian, sampoe asab meukeubok akhé jih teutôb Peuto nyan dan Nabi Harun hana deuh geukalon gobnyan, sabab meunyoe gobnyan geukalon, gobnyan teuma maté.
14 Laju Nabi Harun geucok bacut darah leumô, ngon jaroe gobnyan geureutek darahnyan ubak bagian muka tutôb Peuto Peujanjian dan tujoh goe ukeue Peuto.
15 Óh ka lheueh nyan Nabi Harun harôh geusie kaméng keu keureubeuen peu amphon desya umat Israel. Darah kaméng nyan harôh jiba ubak Ruweueng Mahasuci, laju geupicet ubak bagian keue situtôb Peuto Peujanjian dan ukeue Peuto, lagée nyang ka geupeubuet ngon darah leumô agam.
16 Deungon cara nyan gobnyan ka geupeu gleh Ruweueng Mahasuci nibak najih bansa Israel dan nibak banmandum desya awaknyan. Khimah TUHAN harôh teupeusuci sabab na jih di teungoh-teungoh khimah-khimah bansa Israel dan keunong najih awaknyan.
17 Phon nibak saát Nabi Harun geutamong lam Ruweueng Mahasuci keu geupeubuet upacara teupeusuci sampoe án gobnyan geuteubiet, meusidroe pi hana jeuet na lam Khimah nyan. Óh ka lheueh seuleusoe geupeubuet upacara keu gobnyan keudroe, keu keuluwarga gobnyan dan keu banmandum bansa Israel,
18 Nabi Harun harôh geuteubiet dan geujak laju ubak miseubah nyan. Gobnyan harôh geucok bacut sapeue darah leumô ngon darah kaméng, dan geusiliek laju darah-darah nyan ubak lungkée-lungkée nibak sagoe-sagoe miseubah.
19 Ngon jaroe gobnyan lé geuhnyan harôh geureutek bacut darah nyan tujoh goe u ateueh miseubah. Deungon caranyan gobnyan ka geupeusuci miseubah nibak najih bansa Israel, mangat jeuet keu suci.
20 Óh ka seuleusoe geupeuna upacara teupeusuci Ruweueng Mahasuci dan bagian-bagian nyang laén nibak Khimah TUHAN meunan cit ngon miseubah gobnyan, Nabi Harun harôh geupeuseumah ubak TUHAN kaméng nyang udeb nyang geupiléh keu Azazel.
21 Gobnyan harôh geupeuduek bandua jaroe gobnyan ateueh ulée kaméng nyan sira geu aku banmandum nyang salah, desya dan nyang ji iengkeue lé bansa Israel. Ngon lagée nyan, banmandum salah bansa Israel geupinah laju ateueh ulée kaméng nyan. Dan ureuëng nyang ka geubri tugaih keu nyan laju jiparoh kaméng nyan u padang pasi.
22 Lé kaméng nyan jiba banmandum desya bansa Israel u daerah tandus nyang hana ureuëng tinggai dan kaméng nyan harôh jipeuleueh nibak padang pasi.
23 Óh ka lheueh nyan Nabi Harun geutamong lam Khimah, geusut peukayan imeum nyang geungui bak tuboh gobnyan watée geutamong lam Ruweueng Mahasuci, dan geutinggai laju peukayan nyan disinan.
24 Dan gobnyan harôh geujak manoe ubak saboh teumpat nyang ka teupeu khusos laju geungui peukayan geuh keudroe. Óh ka lheueh nyan gobnyan harôh geuteubiet dan geupeuseumah keureubeuen nyang teutot keu teupeu amphon desya geuh keudroe dan desya bansa Israel.
25 Gapah beulatang keu keureubeuen peu amphon desya nyan harôh teutot ateueh miseubah nyan.
26 Ureuëng nyang peuleueh kaméng keu Azazel nibak padang pasi harôh ji rhah peukayan droe jih ngon jimanoe sigohlom ureuëng nyan jiwoe ubak khimah-khimah.
27 Leumô agam dan kaméng keu keureubeuen peu amphon desya, nyang darah jih teupeutamong lam Ruweueng Mahasuci keu peu amphon desya, harôh teuba uluwa khimah-khimah dan laju jitot. Kulét, asoe ngon asoe pruet bandua beulatang nyan harôh teutot banmandum.
28 Ureuëng nyang tot atranyan harôh ji rhah peukayan droe jih dan jimanoe sigohlom jiwoe ubak khimah-khimah.
29 Banmandum peuratoran nyoe harôh jitaát keu siumu masa. Bak tanggai siploh buleuen tujoh, ureuëng Israel dan ureuëng aséng nyang na tinggai teutab di teungoh-teungoh awaknyan harôh jipuasa dan hana jeuet jimubuet, sabab uroe nyoe uroe nyang lumpah suci. Bak uroe nyan harôh jipeuna upacara keu teupeusuci bansa Israel nibak banmandum desya awaknyan mangat awaknyan gleh.
32 Imeum Agong, nyang ka lheueh teubaiát dan teupeu khusos keu Po teu Allah keu geunantoe ayah gobnyan, harôh geupeubuet upacara peusuci nyan. Gobnyan harôh geungui peukayan khusos,
33 gobnyan geupeubuet upacara peusuci Ruweueng Mahasuci, bagian-bagian laén nibak Khimah TUHAN, miseubah, imeum-imeum dan banmandum bansa Israel.
34 Upacara nyan harôh geupeubuet sigoe dalam sithon keu teupeusuci bansa Israel nibak sigala desya awaknyan. Nyan kheueh peuratoran-peuratoran nyang harôh jitaát keu siumu masa. Nabi Musa geupeubuet laju lagée nyang ka geupeurintah lé TUHAN ubak gobnyan.
Chapter 17
TUHAN meufeureuman ubak Nabi Musa mangat geujak jok peuratoran-peuratoran nyoe ubak Nabi Harun, aneuëk-aneuëk gobnyan dan banmandum bansa Israel.
3 Meunyoe sidroe ureuëng Israel jipeuseumah leumô, bubiri atawa kaméng keu TUHAN, beulatang nyan harôh jisie nibak babah pintoe Khimah TUHAN. Meunyoe atranyan jisie bak teumpat nyang laén, jihnyan ka ji iengkeue ubak huköm sabab jipeurô darah. Jihnyan hana teu anggab sibagoe anggota umat Po teu Allah.
5 Peurintah nyan meukeusut jih mangat bansa Israel jiba ubak Khimah TUHAN banmandum beulatang keureubeuen nyang lazem jih awaknyan sie di ladang-ladang. Awaknyan wajéb jiba keureubeuen nyan ubak imeum dikeue babah pintoe Khimah TUHAN dan jisie atranyan nibak teumpat nyan sibagoe keureubeuen peudamé.
6 Imeum harôh geureutek darah nyan ubak sagoe-sagoe miseubah dikeue babah pintoe Khimah TUHAN laju geutot gapah mangat jeuet bée jih nyang mangat nyan lumpah that galak até TUHAN.
7 Bansa Israel harôh teutab seutia ubak TUHAN dan sagai-sagai hana jeuet jisie beulatang nibak blang-blang sibagoe keureubeuen ubak jén-jén jeuhet. Peuratoran nyan harôh jitaát keu siumu masa.
8 Meunyoe sidroe ureuëng Israel atawa sidroe ureuëng aséng nyang na tinggai teutab lamkawan bansa Israel jipeuseumah keureubeuen nyang teutot atawa keureubeuen laén
9 ubak TUHAN, ureuëng nyan harôh jipeuseumah dikeue babah pintoe Khimah TUHAN. Meunyoe jihnyan jipeuseumah atranyan bak teumpat laén, ureuëng nyan hana jeuet teu anggab anggota umat Po teu Allah.
10 Meunyoe sidroe-droe ureuëng Israel atawa ureuëng aséng nyang na tinggai teutab lamkawan bansa Israel jipajoh darah, teuma ureuëng nyan geuhuköm lé TUHAN dan hana geu anggab anggota umat Gobnyan.
11 Nyawöng tieb-tieb makhluk na lam darah nyan. Sabab nyan TUHAN geupeurintah mangat bandum darah jireutek ateueh miseubah mangat desya-desya umat geusampôh bubena. Darah na kheueh nyawöng, teusampôh desya.
12 Nyan kheueh sabab jih ureuëng Israel atawa ureuëng aséng nyang na tinggai teutab di lamkawan awaknyan teutam bék jipajoh darah.
13 Meunyoe na sidroe-droe ureuëng Israel atawa ureuëng aséng nyang na tinggai di lamkawan bansa Israel jidrob cicém atawa beulatang laén nyang hana hareuem, jihnyan harôh jipeuteubiet darah beulatang nyan dan laju jiseubée ngon tanoh.
14 Nyawöng tieb-tieb makhluk na lam darah nyan, sababnyan TUHAN geutam bansa Israel jipajoh darah. Soe mantong ureuëng nyang jipeubuet buet nyang teutam nyan ureuëng nyan hana le teu anggab anggota umat Po teu Allah.
15 Soe mantong ureuëng Israel atawa ureuëng aséng nyang pajoh sie beulatang nyang ka maté keudroe atawa maté sabab jiteugöm lé beulatang juwah, harôh jijak rhah peukayan jih óh lheueh nyan jimanoe dan jipréh sampoe án mata uroe jilob, barô kheueh ureuëng nyan teupeugah ka gleh.
16 Meunyoe jihnyan hana jipeubuet lagée nyan, jihnyan harôh jitanggong akibat jih.
Chapter 18
TUHAN meufeureuman ubak Nabi Musa mangat geujak peusampoe ubak bansa Israel peurintah nyang lagée nyoe, "Ulôn kheueh TUHAN Allah gata.
3 Bék kheueh gata seutôt lagée nyang jipeubuet lé ureuëng nyang na di nanggroe Meusé, teumpat gata phon-phon that tinggai, atawa lagée ureuëng nyang na di Kanaan, nibak teumpat nyang jinoe Ulôn ba gata.
4 Taát kheueh ubak huköm-huköm Ulôn dan gata peubuet kheueh laju peue nyang Ulôn peurintah. Ulôn kheueh TUHAN Allah gata.
5 Taát kheueh ubak peuratoran-peuratoran dan huköm-huköm nyang Ulôn bri ubak gata. Meunyoe gata tapeubuet lagée nyan, udeb gata seulamat. Ulôn kheueh TUHAN."
6 TUHAN geubri peuratoran-peuratoran lagée nyoe. Bék meusituboh ngon sidroe lamkawan syedara gata.
7 Bék meusituboh ngon ma gata, peurumoh ayah gata, sabab jihnyan hak bapak gata.
8 Bék gata hina ayah gata ngon cara gata meusituboh ngon peurumoh ayah gata nyang laén.
9 Bék meusituboh ngon syedara gata nyang inong atawa syedara ui gata, bah kheueh nyang rayeuek saboh rumoh ngon gata meunan cit nyang rayeuek di rumoh laén.
10 Bék meusituboh ngon cucoe gata; nyang lagée nyan teuma teupeu malée droe gata keudroe.
11 Bék meusituboh ngon syedara gata nyang inong nyang saboh yah laén ma atawa nyang saboh ma laén yah, sabab jihnyan saboh darah cit deungon gata.
12 Bék meusituboh ngon ma cut gata, bah kheueh nyan syedara ayah gata meunan cit syedara ma gata.
14 Bék meusituboh ngon peurumoh apha gata, sabab jihnyan ma cut gata cit teuma.
15 Bék meusituboh ngon aneuëk meulintée
16 atawa ngon peurumoh aduen gata.
17 Bék meusituboh ngon aneuëk atawa cucoe sidroe ureuëng inong nyang ka lheueh gata meusituboh ngon inong nyan. Mungken awaknyan rakan krab gata, dan buet nyang lagée nyan hana jeuet na.
18 Bék gata meukawen ngon syedara peurumoh gata seumantong udeb peurumoh gata.
19 Bék meusituboh ngon ureuëng inong nyang mantong lam he, sabab jih nyan mantong lam najih.
20 Bék meusituboh ngon peurumoh ureuëng laén; buet nyang lagéenyan ka rhoh gata jeuet keu najih.
21 Bék gata jok sidroe lamkawan aneuëk gata keu jiseumuja ubak Molokh, sabab buet nyang lagée nyan teuhina nan Po teu Allah, TUHAN gata.
22 Ureuëng agam hana jeuet jimeusituboh sabe ngon agam; Po teu Allah geubanci that bak buet lagée nyan.
23 Ureuëng agam meunan cit di ureuëng inong, sagai-sagai hana jeuet jimeusituboh ngon beulatang; buet nyang jeuhet nyan ka teupeu najih gata.
24 Bék gata peunajih droe gata deungon buet-buet nyang lagée nyan, sabab deungon cara lagée nyan bansa-bansa nyang tinggai di Kanaan sigohlom gata ka jipeunajih droe jih keudroe. Lé sabab nyan awaknyan geu use lé TUHAN mangat gata jeuet ta tinggai di nanggroe nyan.
25 Awaknyan ka jipeubuet banmandum buet nyang luwat that nyan, sampoe tanoh awaknyan ka jeuet keu najih. Teuma TUHAN geuhuköm awaknyan sampoe awaknyan hán jeuet tinggai le nibak teumpat nyan. Teuma digata bék sagai-sagai gata peubuet nyang lagée nyan. Gata banmandum, ureuëng Israel dan ureuëng aséng nyang tinggai lamkawan gata, harôh gata taát peuratoran dan peurintah TUHAN,
28 mangat gata bék geuhuköm lé Gobnyan dan teu-use nibak tanoh nyan lagée ureuëng-ureuëng nyang hana jituri TUHAN, nyang tinggai disinan sigohlom gata.
29 Gata tateupeue bahwa soe mantong nyang peubuet buet nyang kuto ngon luwat nyan ureuëng nyan hana lé teu anggab anggota umat Po teu Allah.
30 Laju TUHAN meufeureuman, "Taát kheueh ubak peuratoran-peuratoran nyang ka Ulôn bri dan bék gata seutôt buet-buet ureuëng nyang tinggai di tanoh Kanaan sigohlom gata. Bék gata peunajih droe gata keudroe ngon cara teupeubuet buet-buet nyang lagéenyan bagoe. Ulôn kheueh TUHAN Allah gata."
Chapter 19
TUHAN meufeureuman ubak Nabi Musa mangat geujak peusampoe ubak bansa Israel peurintah nyang lagée nyoe, "Beusuci kheueh gata, sabab Ulôn TUHAN Po teu Allah gata na kheueh suci.
3 Tieb-tieb ureuëng harôh jihoreumat ubak ayah ngon ma jih dan jipeuraya uroe raya Sabat lagée nyang Ulôn peurintah. Ulôn kheueh TUHAN Allah gata.
4 Bék gata seumah beurala. Bék gata peugét patong nibak logam dan gata seumah. Ulôn kheueh TUHAN Allah gata.
5 Meunyoe gata tapeuseumah beulatang keu keureubeuen peudamé, seutôt kheueh peuratoran-peuratoran nyang Ulôn bri, mangat keureubeuen nyan Ulôn teurimong.
6 Asoe sie jih harôh teupajoh bak uroe beulatang nyan teusie atawa óh singoh nyan teuma. Asoe sie nyang mantong na tinggai bak uroe nyang keu lhée atranyan harôh teutot sampoe habéh,
7 sabab sie nyan ka hareuem. Meunyoe sie nyan jipajoh cit teuma, keureubeuen nyan hana Lôn teurimong.
8 Soe mantong nyang pajoh sie nyan ureuëng nyan ka salah sabab hana jihareuga peue nyang Ulôn peu khusos keu Ulôn. Ureuëng nyan hana le Ulôn anggab anggota umat Ulôn.
9 Meunyoe gata tamupot, bék kheueh gata pot boh gandom nyang timoh bak binéh-binéh blang gata, dan bék gata riwang tajakcok boh gandom nyang na tinggai óh lheueh gata pot.
10 Bék gata riwang ubak lampôh anggô keu gata jak peusapat boh anggô nyang mantong tinggai óh ka lheueh gata pot nyang paleng pon. Meunan cit ngon boh-boh jih nyang ka rhot bék gata cok. Bah kheueh nyan keu ureuëng gasien dan ureuëng aséng. Ulôn kheueh TUHAN Allah gata.
11 Bék cumucue, seumeunget atawa meusulet.
12 Bék meujanji deumi nan Ulôn meunyoe gata meukeusut keu tapeutrok janji nyan, sabab deungon lagée nyan gata ka tahina nan Ulôn. Ulôn kheueh TUHAN Allah gata.
13 Bék gata lakée paksa seusamoe gata atawa gata reupah barang jih. Eungkoh sidroe-droe ureuëng nyang jimubuet nibak gata bék gata teun-teun, bahpi nyan simalam mantong.
14 Bék gata seurapa ureuëng tulo dan bék gata tiek batée dikeue ureuëng buta. Horeumat dan teumakot kheueh gata ubak Ulôn, sabab Ulôn nyoe na kheueh TUHAN Allah gata.
15 Gata harôh jujoe meunyoe gata peusidang gob; bék gata dong blah ureuëng gasien dan bék gata takot keu ureuëng kaya.
16 Bék gata tabu fiteunah ubak ureuëng-ureuëng nyang sibansa ngon gata, deungon na lagée nyan gata hana teupeusabab manusia maté. Ulôn kheueh TUHAN.
17 Bék na gata dam ateueh soe mantong. Peubéeréeh kheueh sileuséh gata deungon soe mantong, mangat gata hana meudesya ngon sabab ureuëng laén.
18 Bék gata balaih dam dan bék gata banci ubak ureuëng laén, teuma cinta kheueh seusamoe gata lagée gata cinta ubak droe gata keudroe. Ulôn kheueh TUHAN.
19 Taát kheueh peue-peue nyang Ulôn peurintah. Bék gata peukawen beulatang nyang laén jeunéh jih. Bék gata pula dua macam bijéh bak saboh keubeueng tanoh. Bék gata ngui peukayan nyang teucôb ngon dua boh rupa.
20 Meunyoe na sidroe-droe ureuëng agam jimeujanji jipeubloe namiet jih nyang inong ubak ureuëng agam laén keu jipeujeuet keu gundek jih, dan ureuëng nyang tem bloe namiet nyan gohlom jibayeue, laju lé ureuëng po nyang phon jimeusituboh ngon namiet nyan, awaknyan bandua harôh teuhuköm, teuma hana jeuet teuhuköm maté, sabab ureuëng inong nyan mantong namiet jih.
21 Ureuëng agam nyan harôh jiba saboh bubiri agam ubak babah pintoe Khimah Ulôn keu keureubeuen geunantoe rugoe.
22 Lé imeum harôh geukeureubeuen bubiri nyan nibak upacara teupeusuci, mangat desya ureuëng nyan teupeu amphon. Teuma Ulôn, Allah teuma Lôn peu amphon jihnyan.
23 Meunyoe gata ka tatamong u nanggroe Kanaan dan gata pula na meupadub macam bak kayée nyang meuboh disinan, teuma lhée thon nyang keuphon boh kayée nyan harôh gata anggab hareuem dan hana jeuet gata pajoh.
24 Bak thon nyang keu peuet banmandum boh jih harôh teupeuseumah keu teupeugah teurimong gaséh ubak Ulôn, TUHAN.
25 Bak thon nyang keu limong barô kheueh jeuet gata pajoh boh jih. Meunyoe banmandum gata peubuet peuratoran nyan, seunaman bak kayée gata teuma jimeuboh leubeh jai nibak nyan. Ulôn kheueh TUHAN Allah gata.
26 Bék pajoh darah. Bék peuguna iéleumé gaéb.
27 Bék gata gunteng ôk bak binéh ulée gata atawa gata cukö janggot gata.
28 Bék gata tob-tob kulét gata keu gata peugét tanda-tanda atawa gata peuluka badan gata sibagoe tanda meukabông ateueh ureuëng maté. Ulôn kheueh TUHAN.
29 Bék gata peuhina deurajat aneuëk gata nyang inong deungon cara gata peujeuet aneuëk nyan keu inong jeuhet bak kuil. Deungon gata peubuet lagée nyan gata ka tapeukuto nanggroe droe gata, dan ureuëng-ureuëng nyang peubuet mukah ban galak droe meuraja lela.
30 Peuraya kheueh uroe Sabat dan horeumat kheueh teumpat nyang ka teupeukhusos keu teuseumah Lôn. Ulôn kheueh TUHAN.
31 Bék gata lakée naseuhat ubak dukun nyang jimeuhubongan ngon areuwah-areuwah ureuëng maté. Meunyoe nyan gata peubuet gata ka jeuet keu najih. Ulôn kheueh TUHAN Allah gata.
32 Seugan kheueh dan horeumat kheueh ubak ureuëng tuha. Horeumat dan teumakot kheueh gata ubak Ulôn, sabab Ulôn kheueh TUHAN.
33 Bék gata peubuet nyang kon-kon ateueh ureuëng aséng nyang na tinggai di nanggroe gata.
34 Peutimang kheueh awaknyan lagée gata peutimang ureuëng-ureuëng nyang saboh bansa ngon gata dan gata sayang kheueh keu awaknyan lagée gata sayang ubak droe gata keudroe. Ingat kheueh bahwa gatapi ka lheueh udeb lagée ureuëng aséng di nanggroe Meusé. Ulôn kheueh TUHAN Allah gata.
35 Bék gata tipé ureuëng laén ngon cara gata peuguna sinipat, sinimang atawa sinukat peuleusu.
36 Peuguna kheueh metée, sinimang dan sinukat nyang beutôi. Ulôn kheueh TUHAN Allah gata, dan Ulôn ka Lôn ba gata peuteubiet nibak nanggroe Meusé.
37 Taát kheueh ubak mandum huköm dan peurintah Lôn. Ulôn kheueh TUHAN."
Chapter 20
TUHAN meufeureuman ubak Nabi Musa mangat geujak peusampoe hainyoe ubak bansa Israel, "Soe mantong ureuëng lamkawan gata atawa ureuëng aséng nyang na tinggai lamkawan gata nyang jikeureubeuen aneuëk jih ubak Molokh, ureuëng nyang peubuet nyan harôh teurhom ngon batée sampoe maté lé banmandum masyarakat.
3 Ureuëng nyang keureubeuen aneuëk jih ubak Molokh, ka jipeunajih Khimah Lôn dan jipeuhina nan Ulôn nyang suci. Ureuëng nyan teuma Lôn huköm dan hana le Lôn anggab sibagoe anggota umat Lôn.
4 Meunyoe masyarakat jikalon ban ateueh buet nyang jipeubuet lé ureuëng nyan hana jipeu rhot huköman maté ateueh ureuëng nyan,
5 teuma Ulôn keudroe nyang huköm ureuëng nyan, banmandum keuluwarga ureuëng nyan, meunan cit banmandum ureuëng nyang na meusajan ngon ureuëng nyan jitinggai Ulôn dan jiseumah Molokh. Awaknyan hana le Lôn anggab anggota umat Lôn.
6 Ureuëng nyang jak lakée naseuhat ubak dukun nyang dukun nyan jimeuhubongan ngon areuwah-areuwah ureuëng maté teuma Lôn huköm dan ureuëng nyan hana Lôn anggab le anggota umat Lôn.
7 Jaga kheueh droe gata mangat gata teutab suci, sabab Ulôn kheueh TUHAN Allah gata.
8 Taát kheueh bak huköm-huköm Lôn, sabab Ulôn kheueh TUHAN nyang peukhusos gata keu Ulôn."
9 TUHAN geubri peuratoran-peuratoran nyoe, "Ureuëng nyang kutok ayah ngon ma jih ureuëng nyan harôh teuhuköm maté. Ureuëng nyan maté sabab salah jih keudroe.
10 Meunyoe na sidroe ureuëng Israel jimeumukah ngon peurumoh ureuëng saboh bansa ngon jih, ureuëng nyan ngon inong nyan harôh teuhuköm maté.
11 Sidroe ureuëng agam nyang jimeusituboh ngon peurumoh ayah jih nyang laén, ureuëng nyan ka jipeukosa hak milék ayah jih. Ureuëng agam ngon ureuëng inong nyan harôh teuhuköm maté. Awaknyan maté sabab salah jih keudroe.
12 Meunyoe na sidroe ureuëng agam jimeusituboh ngon meulintée jih nyang inong, bandua droe ureuëng nyan harôh teuhuköm maté. Awaknyan ka jimeumukah, dan maté sabab salah jih keudroe.
13 Meunyoe na sidroe ureuëng agam jimeusituboh ngon ureuëng agam nyang laén, awaknyan ka jipeubuet buet nyang luwat dan hina, dan bandua ureuëng nyan harôh teuhuköm maté. Awaknyan maté sabab salah jih keudroe.
14 Meunyoe sidroe ureuëng agam jimeukawen ngon sidroe ureuëng inong dan ma ureuëng inong nyan, ban lhée droe awaknyan harôh teutot lam apui sampoe án maté, sabab awaknyan ka jipeubuet buet nyang lumpah hina. Dan buet nyang lagée nyan hán jeuet na lamkawan gata.
15 Meunyoe sidroe ureuëng agam jimeusituboh ngon beulatang, ureuëng ngon beulatang nyan harôh teupoh maté.
16 Meunyoe sidroe ureuëng inong jimeusituboh ngon beulatang, ureuëng dan beulatang nyan harôh teupoh maté. Jihnyan maté sabab buet jih keudroe.
17 Meunyoe sidroe ureuëng agam jimeusituboh ngon syedara jih nyang inong atawa ngon syedara jih nyang inong laén ma atawa saboh ma laén ayah, awaknyan hana le teu anggab anggota umat Ulôn. Awaknyan ka jipeubuet buet nyang lumpah hina dan harôh jitanggong akibat jih.
18 Meunyoe sidroe ureuëng agam jimeusituboh ngon sidroe ureuëng inong nyang teungoh teuka he, awaknyan hana le teu anggab anggota umat Ulôn.
19 Meunyoe sidroe ureuëng agam jimeusituboh ngon ma cut jih, bandua awaknyan harôh jitanggong akibat buet nyang jipeubuet nyan.
20 Meunyoe sidroe ureuëng agam jimeusituboh ngon peurumoh apha jih, ureuëng nyan ka jihina apha jih. Agam ngon inong nyan harôh jitanggong huköman jih. Sampoe án maté awaknyan hana meuteumé aneuëk.
21 Meunyoe sidroe ureuëng agam jireupah peurumoh syedara jih, jihnyan ka jihina syedara jih nyan dan ka jipeubuet buet nyang paleng hina. Sampoe án maté awaknyan hana meuteumé aneuëk."
22 TUHAN meufeureuman, "Taát kheueh ubak huköm dan peurintah Lôn, mangat gata hana teu use nibak nanggroe Kanaan, bak Ulôn ba gata.
23 Bék gata seutôt adat istiadat bansa nyang tinggai disinan. Awaknyan jipeuluwat Ulôn ngon buet jih nyang jeuhet. Nyang kheueh sabab jih awaknyan Ulôn use, mangat gata meuteumé tatamong u nanggroe nyan.
24 Tanoh nyang kaya dan subô nyan ka Ulôn peujanji keu gata, dan Ulôn bri keu gata jeuet keu hak milék gata. Ulôn kheueh TUHAN Allah gata nyang peu aséng gata nibak bansa-bansa nyang laén.
25 Lé sabab nyan gata harôh meuteumé gata peubeda beulatang nyang hareuem ngon nyang hana hareuem. Bék gata pajoh beulatang hareuem. Beulatang nyan Ulôn peugah hareuem, jadi gata pajoh cit gata ka jeuet keu najih.
26 Gata Ulôn peu aséng nibak bansa-bansa laén mangat gata jeuet keu milék Ulôn. Gata harôh suci sabab Ulôn kheueh TUHAN, dan Ulôn suci.
27 Tieb-tieb ureuëng agam atawa ureuëng inong nyang jipeuna hubongan ngon areuwah-areuwah ureuëng maté ureuëng nyan harôh teu rhom ngon batée sampoe án maté. Ureuëng nyan maté sabab salah jih keudroe."
Chapter 21
TUHAN meufeureuman ubak Nabi Musa mangat geujak peusampoe peurintah nyoe ubak imeum-imeum keuturonan Nabi Harun, "Sidroe imeum hana jeuet jipeunajih droe jih keudroe sabab meusajan jijak bak upacara teupeukubu waréh kawöm jih,
2 laén hai meunyoe nyang maté nyan ma jih keudroe, ayah jih, aneuëk jih, syedara jih nyang agam,
3 atawa syedara jih nyang inong nyang gohlom meukawen, dan tinggai saboh rumoh ngon jih.
4 Jih nyan hana jeuet jipeu najih droe deungon cara jiseutôt upacara teupeukubu waréh kawöm peurumoh jih.
5 Sidroe imeum hana jeuet jicukö siladum nibak ôk jih bak ulée dan hana jeuet gunteng janggot jih atawa jipeuluka tuboh jih ngon barang tajam sibagoe tanda bahwa jihnyan teungoh meukabông.
6 Jihnyan milék Ulôn nyang khusos dan hana jeuet jipeukuto nan Ulôn. Jihnyan jikeureubeuen peunajoh keu Ulôn, deungon nyan jihnyan harôh suci.
7 Sidroe imeum hana jeuet jimeukawen ngon beukaih inong jeuhet atawa sidroe inong nyang hana le peurawan atawa nyang ka meucre, sabab imeum na kheueh milék Ulôn.
8 Bansa Israel harôh jiaku imeum sibagoe ureuëng nyang teupeu khusos keu Ulôn sabab jihnyan jipeuseumah keureubeuen peunajoh keu Ulôn. Ulôn kheueh TUHAN; Ulôn nyoe suci dan Ulôn harôh Lôn peusuci umat Lôn.
9 Meunyoe aneuëk imeum nyang inong ka jeuet keu inong jeuhet, aneuëk nyan ka jihina ayah jih dan nyan harôh teutot lam apui sampoe maté.
10 Imeum Agong ka lheueh teubaiát deungon cara teuprée minyéuk ateueh ulée gobnyan dan deungon cara teupeungui peukayan imeum agong bak ureuëng nyan. Lé sabab nyan gobnyan hana jeuet jipeubiyeu ôk jih bak ulée sansui atawa jipriek peukayan jih sibagoe tanda meukabông.
11 Jihnyan ka jipeuseumah ubak Ulôn beu jeuet keu milék Ulôn, teuma ngon na lagée nyan jih nyan hana jeuet jipeu najih droe. Meunan cit jih nyan hana jeuet jipeunajih Khimah Ulôn deungon cara jiteubiet nibak sinan keu jijak tamong lam rumoh nyang na manyét, bahpi nyan manyét ayah jih atawa ma jih keudroe.
13 Jihnyan jeuet jimeukawen ngon sidroe inong nyang mantong peurawan nibak sukée jih keudroe. Dan hana jeuet jimeukawen ngon sidroe inong balée atawa sidroe inong nyang ka meucre, atawa beukaih inong jeuhet.
15 Meunyoe ji iengkeue peurintah nyan, teuma aneuëk-aneuëk jih nyang siharôh jih suci, teuma jeuet keu najih. Ulôn kheueh TUHAN dan Ulôn ka Lôn peukhusos jihnyan jeuet keu Imeum Agong."
16 TUHAN meufeureuman ubak Nabi Musa mangat geujak peugah nyoe ubak Nabi Harun, "Sidroe keuturonan gata nyang cidra tuboh jih hana jeuet jipeuseumah keureubeuen peunajoh keu Ulôn. Hai nyang lagée nyan teutab na sabe siumu masa.
18 Ureuëng nyang peuseumah keureubeuen hana cidra badan jih, na kheueh ureuëng buta dan ureuëng lapée, ureuëng cacat muka jih atawa anggota tuboh jih,
19 nyang lapée jaroe jih atawa nyang capiek gaki jih,
20 nyang bungkok dan ureuëng nyang paleng ubit nibak ureuëng biasa, nyang keunong peunyakét mata atawa nyang keunong peunyakét kulét dan ureuëng nyang teugasi.
21 Tieb-tieb keuturonan Imeum Harun nyang cidra badan jih hana jeuet jipeuseumah keureubeuen peunajoh keu Ulôn.
22 Teuma jih nyan jeuet jipajoh peunajoh nyang teupeuseumah nyan, bah kheueh nyan keureubeuen peunajoh nyang suci meunan cit keureubeuen peunajoh nyang lumpah suci.
23 Sabab ureuëng nyan cidra badan jih, ureuëng nyan hana jeuet jipeurab ubak tirée nyang teupisah Ruweueng Suci atawa miseubah. Jihnyan hana jeuet jipeukuto barang-barang nyang ka teupeu khusos keu Ulôn, sabab Ulôn kheueh TUHAN, dan Ulôn kheueh nyang peu khusos barang-barang nyan."
24 Nyan kheueh peuratoran-peuratoran nyang geupeusampoe lé Nabi Musa ubak Nabi Harun dan aneuëk-aneuëk gobnyan, dan ubak banmandum bansa Israel.
Chapter 22
TUHAN meufeureuman ubak Nabi Musa beu geujak peusampoe peurintah nyoe ubak Nabi Harun dan aneuëk-aneuëk gobnyan, "Peubuet kheueh beu jroh-jroh peue nyang jipeuseumah lé bansa Israel khusos keu Ulôn, mangat gata hana tapeukuto nan Ulôn nyang suci. Ulôn kheueh TUHAN.
3 Meunyoe sidroe nibak keuturonan gata lam keuadaan najih jijak peurab ubak keureubeuen-keureubeuen suci nyang jipeukhusos lé bansa Israel keu Ulôn, jihnyan hana jeuet jilayani nibak miseubah. Peuratoran nyan teutab na siumu masa. Ulôn kheueh TUHAN.
4 Sidroe keuturonan Nabi Harun nyang keunong peunyakét kulét nyang mubahya, atawa nyang keunong peunyakét nibak alat keulamin jih sampoe jiteubiet meuliléh-liléh, teutam hán jeuet jipajoh keureubeuen suci sigohlom jihnyan teupeugah ka gleh. Sidroe imeum ka jeuet keu najih meunyoe imeum nyan tupéh ngon barang nyang meunajih sabab keunong manyét. Meunan cit di ureuëng nyan najih meunyoe ié manikam ureuëng nyan jiteubiet,
5 atawa tupéh ngon beulatang dan ureuëng nyang najih.
6 Sidroe imeum nyang deungon cara peue mantong ka jeuet keu najih, teuma najih nyan sampoe mata uroe jilob. Dan óh ka lheueh mata uroe jilob jih nyan gohlom jeuet jipajoh peunajoh nyang teupeu seumah ubak TUHAN meunyoe jihnyan gohlom jimanoe.
7 Óh ka lheueh mata uroe jilob ureuëng nyan ka gleh dan ka jeuet jipajoh, sabab nyan kheueh peunajoh jih.
8 Ureuëng nyan hana jeuet jipajoh sie beulatang nyang maté keudroe atawa beulatang nyang maté jiteugöm lé beulatang juwah. Meunyoe nyang lagée nyan jipajoh cit, ureuëng nyan ka jeuet keu najih. Ulôn kheueh TUHAN.
9 Banmandum imeum harôh jitaát ubak peuratoran nyang Ulôn bri. Meunyoe hán, awaknyan salah dan teuma jih maté, sabab ji iengkeue ubak peuratoran-peuratoran nyan suci nyan. Ulôn kheueh TUHAN, dan Ulôn kheueh nyang peu khusos awaknyan keu Ulôn.
10 Keureubeuen nyang teupeu khusos keu Ulôn nyang jeuet pajoh na kheueh lé keuluwarga imeum nyan keudroe; ureuëng laén hana jeuet, bahpi ureuëng nyan saboh rumoh ngon imeum nyan atawa ureuëng nyang tung upah ubak gobnyan.
11 Teuma namiet-namiet nyang jibloe lé imeum nyan ngon péng jih keudroe atawa nyang lahé lam rumoh jih nyan, jeuet ji pajoh peunajoh jeumba imeum nyan.
12 Aneuëk inong sidroe imeum nyang meukawen ngon kon imeum, hana jeuet jipajoh keureubeuen nyan.
13 Teuma aneuëk inong imeum nyang ka jeuet keu inong balée atawa nyang jicre teuma hana meu aneuëk laju jiwoe u rumoh ayah jih dan ka jeuet tanggong jaweueb ureuëng syiek jih nyan lom, jeuet jipajoh jeumba ureuëng syiek jih nyan. Teuma keuluwarga imeum mantong nyang jeuet pajoh keureubeuen nyan.
14 Meunyoe sidroe nyang bukon anggota imeum nyang deungon hana jisaja ka jipajoh peunajoh nyang teupeuseumah ubak TUHAN, ureuëng nyan harôh jibri geunantoe ubak imeum jitamah lom dua ploh peureusen.
15 Imeum-imeum hana jeuet jipeunajih keureubeuen nyang teupeu khusos keu Ulôn
16 deungon jipeubiyeu jipajoh lé ureuëng nyang hana hak jih. Hai nyan ka teupeu jeuet ureuëng nyan salah dan teupeuteuka huköman ateueh ureuëng nyan. Ulôn kheueh TUHAN, dan Ulôn nyang peusuci peuseumahan nyan."
17 TUHAN meufeureuman ubak Nabi Musa geuyue jak peusampoe ubak Nabi Harun, aneuëk-aneuëk gobnyan dan banmandum bansa Israel peuratoran-peuratoran nyang lagée nyoe. Meunyoe sidroe ureuëng Israel atawa ureuëng aséng nyang tinggai teutab di Israel jipeuseumah keureubeuen teutot keu jipeu lheueh kaôi, atawa keu keureubeuen keugalak droe, beulatang nyan harôh nyang agam dan hana jeuet na meucupa mangat jeuet teuteurimong.
20 Bék peuseumah beulatang nyang na cupa, sabab nyang lagée nyan TUHAN hana geuteurimong.
21 Meunyoe sidroe ureuëng jipeuseumah ubak TUHAN keureubeuen peudamé keu jibayeue kaôi jih atawa keu keureubeuen keu galak droe, beulatang nyan hán jeuet na meucupa, mangat jeuet geuteurimong.
22 Bék kheueh teupeuseumah ubak TUHAN beulatang nyang buta, nyang patah tuleueng jih atawa nyang luka, nyang jitimoh barah ka meudanoh, nyang ka keunong peunyakét kulét atawa kude. Beulatang nyang lagée nyan bék jipeuseumah keu keureubeuen peunajoh u ateueh miseubah.
23 Keu keureubeuen keu galak droe gata jeuet tapeuseumah beulatang nyang hana sampoereuna hi jih; teuma keu teupeu lheueh kaôi, beulatang nyang lagée nyan hana jeuet teuteurimong.
24 Bék kheueh peuseumah keu TUHAN beulatang nyang aneuëk keumiro jih ka rusak sabab meuseupet, ka teukoh, luka leumbam-leumbam atawa teutiek. Hai nyang lagée nyan hana jeuet na di nanggroe gata.
25 Beulatang peulara nyang meuteumé nibak ureuëng aséng hana jeuet teupeuseumah keu keureubeuen peunajoh. Beulatang nyan teu anggab ka cupa dan hana jeuet teuteurimong.
26 Aneuëk leumô, aneuëk bubiri atawa aneuëk kaméng nyang ban lahé harôh tinggai nibak nang jih treb jih tujoh uroe. Barô kheueh óh lheueh nyan beulatang nyan jeuet teuteurimong keu keureubeuen peunajoh.
28 Bék kheueh gata keureubeuen nang leumô atawa bubiri atawa kaméng meusigoe ngon aneuëk jih nibak uroe nyang saban.
29 Meunyoe gata tapeuseumah keureubeuen teurimong gaséh ubak TUHAN, gata peubuet kheueh nyan meunurot atoran nyang na, mangat keureubeuen gata geuteurimong.
30 Makheun kheueh keureubeuen nyan bak uroe nyan cit teuma, dan bék gata tinggai mubacut pi keu keusingoh beungoh.
31 TUHAN meufeureuman, "Taát kheueh ubak peue-peue nyang Ulôn peurintah; Ulôn kheueh TUHAN gata.
32 Bék gata peukuto nan Ulôn nyang suci. Banmandum bansa Israel harôh jiseumah Ulôn sibagoe Nyang Mahasuci. Ulôn kheueh TUHAN dan Ulôn nyang peujeuet gata suci.
33 Ulôn ba gata teupeuteubiet nibak nanggroe Meusé, mangat Ulôn jeuet keu Po teu Allah gata. Ulôn kheueh TUHAN."
Chapter 23
TUHAN geubri ubak Nabi Musa atoran-atoran keuhai peurayaan agama, nyang harôh geupeumaklum sibagoe uroe raya keu meu iébadat.
2
3 Na nam uroe watée jak mubuet, teuma bak uroe nyang keu tujoh, uroe Sabat, na kheueh uroe meureuhat nyang teupeu khusos keu TUHAN. Nibak uroe nyan gata harôh gata meusapat keu gata meu iébadat dan hana jeuet nyang jak meubuet.
4 Nyoe kheueh uroe-uroe raya nyang ka geupeuteutab lé TUHAN dan nyang harôh teupeumaklum bak watée nyang ka teupeu teuntée.
5 Uroe Raya Paskah nyang teupeu raya keu teuhoreumat TUHAN, teupeuphon watée mata uroe lhob bak tanggai peuet blaih buleuen sa.
6 Óh singoh nyan, tanggai limong blaih, phon Peurayaan ruti hana Meurago, dan tujoh uroe treb jih hana jeuet gata pajoh ruti nyang teupeugét teuboh rago.
7 Tujoh uroe treb jih nyan gata harôh tapeuseumah keureubeuen peunajoh ubak TUHAN. Bak uroe nyang phon dan nyang keu tujoh peurayaan nyan gata harôh tameusapat keu gata iébadat dan hana jeuet gata meubuet nyang brat-brat.
8
9 Meunyoe gata ka trok u nanggroe nyang geubri lé TUHAN keu gata, dan gata peusapat wase tanoh, beureukah gandom nyang phon that gata pot harôh gata ba ubak imeum.
11 Bak uroe óh ka lheueh uroe Sabat, imeum harôh jipeuseumah gandom nyan sibagoe keureubeuen nyang teubri ubak TUHAN, mangat TUHAN galak keu gata.
12 Bak uroe gata tapeuseumah gandom nyan, harôh cit gata peuseumah keu keureubeuen nyang teutot saboh aneuëk bubiri agam nyang meu-umu sithon dan hana meucupa.
13 Keu keureubeuen peunajoh peuseumah kheueh teuma dua kilo gram teupông teujampu ngon minyéuk zaiton. Bée keureubeuen nyang haröm nyan lumpah that galak até TUHAN. Meusigoe ngon nyan peuseumah teuma si arée ié anggô.
14 Sigohlom teuba peuseumahan nyan ubak TUHAN, hana jeuet gata pajoh mubacut pi nibak gandom nyang barô nyan, bah kheueh nyang mantong meuntah, teupanggang atawa teutot jeuet keu ruti. Peuratoran nyan harôh jitaát lé banmandum keuturonan gata keu siumu masa.
15 Phon nibak uroe óh ka lheueh uroe Sabat, watée gata peuseumah ubak TUHAN beureukah gandom nyang phon, gata harôh ta itong tujoh goe aleuhat peunoh.
16 Bak uroe nyang keulimong ploh, na kheueh uroe óh ka lheueh uroe Sabat nyang keutujoh, gata harôh taba keureubeuen teuhidang ubak TUHAN.
17 Tieb-tieb keuluwarga harôh jiba dua boh ruti sibago peuseumahan teujok keu TUHAN, tieb-tieb ruti harôh teupeugét nibak dua kilo gram teupông halôh nyang teuboh rago dan atra nyan harôh jipeuseumah ubak TUHAN sibagoe keureubeuen wase tanoh nyang phon.
18 Meusajan ngon ruti nyan bansa Israel harôh jipeuseumah teuma tujoh boh aneuëk bubiri nyang meu-umu sithon, saboh leumô agam muda dan dua boh kaméng. Maséng-maséng beulatang nyan hana jeuet na meucupa dan harôh teupeuseumah sibagoe keureubeuen nyang teutot keu TUHAN, deungon keureubeuen teuhidang dan keureubeuen ié anggô. Bée keureubeuen nyang haröm nyan lumpah that galak até TUHAN.
19 Dan peuseumah teuma saboh kaméng agam keu keureubeuen peu amphon desya dan dua boh bubiri agam nyang meu-umu sithon keu keureubeuen peudamé.
20 Ruti dan bandua boh aneuëk bubiri nyan harôh jipeuseumah lé imeum sibago keureubeuen nyang teubri ubak TUHAN, dan nyan na kheueh keu imeum. Banmandum peuseumahan nyan na kheueh suci.
21 Bak uroe nyan gata harôh meusapat keu meuiébadat dan hana jeuet gata meubuet nyang brat-brat. Peuratoran nyan harôh jitaát lé keuturonan gata keu siumu masa, dan dipat mantong awaknyan tinggai.
22 Meunyoe gata jakmupot, bék kheueh gata koh gandom nyang na timoh nibak binéh-binéh blang gata dan bék gata riwang keu gata jak peusapat boh-boh gandom nyang na tinggai óh ka lheueh gata pot. Bah kheueh atra nyan jicok lé ureuëng gasien dan ureuëng aséng. TUHAN na kheueh Allah gata.
23 Tanggai sa buleuen tujoh harôh teupeuraya sibago uroe nyang khusos keu meureuhat. Bak uroe nyan meutanda deungon su beureuguih, dan gata harôh meusapat keu gata jak meuiébadat.
25 Peuseumah kheueh keureubeuen peunajoh keu TUHAN dan bék gata peubuet buet-buet nyang brat nibak uroe nyan.
26 Tanggai siploh buleuen tujoh na kheueh uroe upacara sithon sigo keu peu amphon desya bansa Israel. Bak uroe nyan gata harôh tapuasa dan gata meusapat keu gata jak iébadat meunan cit meusigoe ngon nyan gata peuseumah keureubeuen peunajoh keu TUHAN.
28 Bék gata jak bak buet, sabab uroe nyan na kheueh uroe peu amphon desya, mangat gata meuteumé amphon dikeue TUHAN Po teu Allah.
29 Soe mantong nyang pajoh peue mantong nibak uroe nyan, ureuëng nyan hana teu anggab le anggota umat Allah.
30 Dan soe mantong nyang jipeubuet buet nibak uroe nyan, ureuëng nyan geuhuköm lé TUHAN keudroe ngon huköman maté.
31 Peuratoran nyan keunong ateueh banmandum keuturonan gata dipat mantong awaknyan tinggai.
32 Phon bak saát mata uroe lob bak tanggai sikureueng buleuen nyan trok ubak watée mata uroe jilob bak tanggai siploh, harôh gata peuraya lagée uroe Sabat, uroe nyang khusos keu meureuhat. Siuroe peunoh nyan gata harôh puasa.
33 Khanuri Jambo Ôn phon bak tanggai limong blaih buleuen tujoh dan treb jih tujoh uroe.
35 Nyang tujoh uroe treb jih nyan, tieb-tieb uroe gata harôh gata peuseumah keureubeuen peunajoh. Bak uroe nyang phon dan nyang keulapan gata harôh meusapat keu meu iébadat dan gata peuseumah keureubeuen peunajoh ubak TUHAN. Bék kheueh gata peubuet buet-buet nyang brat nibak uroe nyan.
37 Nyan kheueh uroe raya agama nyang ka geupeuteutab lé TUHAN dan nyang harôh gata peumaklum. Nibak peurayaan-peurayaan nyan gata harôh gata horeumat TUHAN deungon gata meusapat keu meu iébadat dan gata peuna keureubeuen peunajoh, keureubeuen nyang teutot, keureubeuen teuhidang, keureubeuen beulatang dan keureubeuen ié anggô, lé jih dub nyang teupeureulée tieb-tieb uroe.
38 Peurayaan-peurayaan nyan na kheueh sibagoe seunamah nibak uroe-uroe Sabat biasa, meunan cit deungon banmandum peuseumahan nyan sibago seunamah nibak meuneubri gata nyang biasa, bak keureubeuen gata keu gata teuboh kaôi, atawa keureubeuen keugalak droe nyang gata bri ubak TUHAN.
39 Óh ka lheueh musém mupot, phon tanggai limong blaih buleuen tujoh, gata harôh gata peuna peurayaan nyang treb jih tujoh uroe. Uroe nyang phon dan nyang lapan na kheueh uroe nyang khusos keu meureuhat.
40 Bak uroe nyang phon gata harôh gata pot boh kayée nyang paleng jroh lam lampôh gata, meunan cit deungon ôn-ôn palma dan ranteng-ranteng nibak bak-bak kayée nyang luhu, dan gata peuphon kheueh peurayaan sukacita keu teuhoreumat TUHAN Po teu Allah gata.
41 Peurayaan nyan harôh gata peuna nyang treb jih tujoh uroe. Peuratoran nyan harôh jipeubuet lé keuturonan gata keu siumu masa.
42 Tujoh uroe treb jih banmandum bansa Israel harôh tinggai lam jambo-jambo ôn,
43 mangat keuturonan gata jiteupeue bahwa TUHAN geuyue bansa Israel tinggai lam jambo-jambo nyang seuderhana, watée Gobnyan geuba awaknyan peuteubiet lam nanggroe Meusé. Gobnyan kheueh TUHAN Po teu Allah gata.
44 Meunan kheueh cara jih Nabi Musa geupeusampoe ubak bansa Israel peuratoran-peuratoran keuhai cara teupeuna peurayaan-peurayaan keu tehoreumat TUHAN.
Chapter 24
TUHAN meufeureuman ubak Nabi Musa geuyue jak peusampoe peurintah-peurintah nyoe ubak bansa Israel: Ba kheueh laju minyéuk zaiton nyang murni dan nyang paleng gét keu panyöt lam Khimah TUHAN, mangat jeuet teupeu udeb dan hu sabe.
3 Nabi Harun harôh geu atoe banmandum panyöt-panyöt nyan pon seupôt sampoe troh beungoh nibak teumpat TUHAN teuka, diluwa tirée nyang teutôb Peuto Peujanjian nibak Ruweueng Mahasuci. Peurintah nyan harôh jipeubuet keu siumu masa.
4 Nabi Harun harôh geu urôh banmandum panyöt-panyöt bak gaki panyöt nyang teupeugét nibak méuh murni mangat teutab hu lam Khimah TUHAN.
5 Cok kheueh laju dua blaih kilo gram teupông nyang paleng gét dan peugét kheueh laju dua blaih boh ruti bulat, maséng-maséng sikilo gram teupông.
6 Keubah laju ruti nyan lam dua boh suson, tieb-tieb suson nam boh ruti, ateueh meuja nyang meulapéh ngon méuh murni nyang na dalam Khimah TUHAN.
7 Pasoe laju keumeunyan nyang aseuli ubak tieb-tieb sinuson ruti sibago tanda bahwa ruti nyan keureubeuen peunajoh keu TUHAN.
8 Tieb-tieb uroe Sabat harôh na ruti nyang teuhidang lam Khimah TUHAN. Nyan kheueh keuwajéban bansa Israel keu siumu masa.
9 Ruti nyan na kheueh keu Nabi Harun dan keuturonan gobnyan. Awaknyan harôh geupajoh atra nyan bak teumpat nyang suci, sabab rutinyan sibagoe bagian nyang paleng suci nibak keureubeuen peunajoh nyang teupeuseumah ubak TUHAN keu imeum-imeum.
10 Nibak khimah-khimah ureuëng Israel na sidroe ureuëng agam. Ayah jih ureuëng Meusé dan ma jih ureuëng Israel nyang nanjih Selomit, aneuëk Dibri nibak sukée Dan. Bak siuroe ureuëng nyan jimeudakwa ngon ureuëng Israel di khimah-khimah nyan. Watée meudakwa nyan, ureuëng nyan laju jikutok Po teu Allah. Sabab nyan kheueh lé ureuëng Israel jiba ureuëng nyan meuhadab ubak Nabi Musa,
12 dan jiteun ureuëng nyan disinan sira jipréh keuputosan TUHAN keuhai peue nyang harôh awaknyan peubuet ateueh ureuëng nyan.
13 TUHAN meufeureuman ubak Nabi Musa,
14 "Gata ba laju ureuëng nyan uluwa khimah-khimah. Soe mantong ureuëng nyang ka jideungoe ureuëng nyan jikutok Ulôn, harôh jipeuduek jaroe ateueh ulée ureuëng nyan keu jibri keusaksian bahwa ureuëng nyan salah. Óh lheueh nyan banmandum umat harôh jirhom ureuëng nyan ngon batée sampoe án maté.
15 Óh ka lheueh nyan jak peumaklum kheueh nyoe ubak bansa Israel: Soe mantong nyang kutok Po teu Allah ureuëng nyan harôh jitanggong akibat jih
16 dan teuhuköm maté. Soe mantong nyang kutok TUHAN ureuëng nyan harôh teugeulawa ngon batée sampoe maté lé banmandum jeumaáh. Huköm nyan teutab berlaku keu ureuëng Israel dan ureuëng aséng nyang ka tinggai teutab di Israel.
17 Soe mantong nyang poh maté ureuëng laén ureuëng nyan harôh teuhuköm maté.
18 Soe mantong nyang poh maté beulatang ureuëng laén harôh jigantoe. Dasai jih na kheueh 'nyawöng geunantoe nyawöng'.
19 Soe mantong ngon sabab jih ureuëng laén cidra, peue mantong nyang ka jipeubuet, harôh teubalah teuma ateueh ureuëng nyan.
20 Meunyoe jihnyan jipeupatah tuleueng, teuma tuleueng jih pih harôh teupeupatah teuma. Meunyoe jih nyan jipeubuta siblaih mata ureuëng laén, teuma mata ureuëng nyan harôh teupeubuta siblaih. Meunyoe jih jipoh ureuëng laén sampoe patah gigo, teuma gigo ureuëng nyan pih harôh teupeupatah teuma. Peue mantong nyang jipeubuet seuhingga ureuëng laén cidra, nyan pih harôh teubalaih ateueh ureuëng nyan sampoe cidra.
21 Soe mantong nyang poh maté beulatang harôh jigantoe, teuma soe mantong nyang poh maté manusia ureuëng nyang harôh teuhuköm maté.
22 Huköm nyan teutab berlaku keu gata banmandum dan keu ureuëng aséng nyang tinggai teutab meusajan gata, sabab Ulôn kheueh TUHAN, Allah gata."
23 Óh ka lheueh Nabi Musa geupeusampoe hai nyan ubak bansa Israel, awaknyan laju jiba ureuëng nyang ka kutok Po teu Allah nyan uluwa khimah-khimah laju jigeulawa ureuëng nyan ngon batée sampoe maté. Deungon cara lagée nyan bansa Israel ka jipeubuet peue nyang ka geupeurintah lé TUHAN ubak Nabi Musa.
Chapter 25
Nibak ateueh Gunong Sinai TUHAN meufeureuman ubak Nabi Musa dan geuyue laju ubak gobnyan
2 jak peusampoe kheueh peuratoran-peuratoran nyoe ubak bansa Israel. Meunyoe gata tatamong lam nanggroe nyang teuma geubri lé TUHAN keu gata, gata harôh gata horeumat TUHAN deungon cara lagée nyoe: Tieb-tieb thon nyang keutujoh gata hana jeuet gata pula sapeue nibak tanoh.
3 Nam thon treb jih harôh gata pula banmandum lampôh atawa ladang gata, gata gunteng lampôh-lampôh anggô dan gata peusapat wase tanoh gata.
4 Teuma tieb-tieb thon nyang keutujoh teupeu khusos keu TUHAN. Sithon peunoh nyan tanoh gata peubiyeu mantong meunan hana jeuet gata keureuja. Bék gata pula sapeue pi lam ladang dan bék gata gunteng lampôh anggô gata.
5 Meunan cit gandom nyang timoh keudroe atawa anggô bak anggô gata keudroe nyang hana teugunteng, hana jeuet gata peusapat dan gata keubah, sabab thon nyoe na kheueh thon tanoh meureuhat.
6 Bah kheueh meunan, tanoh nyan teuma jibri cit wase keu teupeujeuet peunajoh keu gata, namiet-namiet gata, ureuëng-ureuëng nyang tung upah nibak gata, dan ureuëng aséng nyang na tinggai deungon gata.
7 Meunan cit keu beulatang-beulatang nyang gata peulara dan beulatang-beulatang kleuet lam nanggroe gata. Peue mantong nyang jipeuhase lé tanoh nyan jeuet teumakheun.
8 Itong kheueh tujoh go tujoh thon, deungon jeumeulah jih peuet ploh sikureueng thon.
9 Óh lheueh nibak tanggai siploh buleuen tujoh, bak uroe peu amphon desya, gata yue kheueh ureuëng mangat jiyueb beureuguih jeub-jeub teumpat bansaboh nanggroe.
10 Harôh gata peukhusos thon nyang keu limong ploh nyan, dan gata peumaklum keuhai beubaih ubak mandum ureuëng lam nanggroe. Lam thon nyan banmandum hareuta milék nyang ka teupeubloe harôh teujok pulang ubak ureuëng po jih nyang phon atawa ubak keuturonan jih. Soe nyang jipeubloe sibagoe namiet harôh jipeuriwang ubak keuluwarga jih.
11 Bék kheueh gata pula ladang gata. Gandom nyang timoh keudroe jih atawa boh anggô lam lampôh anggô gata nyang hana teugunteng atra nyan hana jeuet peusapat dan gata keubah.
12 Thon nyan na kheueh thon nyang suci keu gata. Gata teuma jeuet teupajoh peue nyang na timoh di ladang gata.
13 Bak thon nyan banmandum tanoh nyang ka teupeubloe harôh teujok pulang ubak ureuëng nyang phon po tanoh nyan.
14 Teuma meunyoe gata tapeubloe tanoh bansa droe gata ureuëng Israel, atawa gata bloe tanoh nibak ureuëng nyan, bék kheueh gata peubuet bloe peubloe nyan ngon hana jujoe.
15 Yuem tanoh nyan harôh teupatok meunurot jeumeulah thon seumantong tanoh nyan mantong jibri hase trok ubak Thon Teupulang lom teuma.
16 Meunyoe jeumeulah thon jih le, yuem tanoh nyan meuhái. Teuma meunyoe jeumeulah thon jih bacut, yuem jih harôh murah, sabab nyang teupeubloe na kheueh jeumeulah wase mupot.
17 Bék teumipée sabe keudroe gata ureuëng Israel, teuma bah kheueh gata takot ubak TUHAN, Po teu Allah gata.
18 Taát kheueh ubak mandum huköm dan peurintah TUHAN, mangat gata udeb deungon aman nibak nanggroe nyan.
19 Tanoh nanggroe nyan teuma jibri wase sampoe gata na peunajoh nyang seb dan tinggai disinan deungon aman seujahtera.
20 Mungken na nyang teumanyong peue nyang teupajoh watée thon nyang keutujoh bak watée tanoh hana teupula sapeue dan hase jih hana teukuteb.
21 Bak thon nyang keunam TUHAN teuma geubri beureukat ubak tanoh sampoe wase jih seb keu lhée thon.
22 Bak thon gata tapula ladang gata nyan lam thon nyang keulapan, hase nyang teupot bak thon nyang keunam mantong na keu gata pajoh. Dan keuneubah peunajoh gata nyang mantong teukeubah seb sampoe bak watée gata tapeusapat hase nibak thon nyan.
23 Pajan mantong tanoh gata hana jeuet teupeubloe, sabab tanoh nyan bukon atra gata, teuma milék Po teu Allah. Gata cit lagée ureuëng aséng nyang meuteumé idhin gata peuguna tanoh nyan.
24 Meunyoe saboh keubeueng tanoh teupeubloe, harôh jiaku hak milék ureuëng po phon keu teutuboh tanoh nyan.
25 Meunyoe sidroe ureuëng Israel ka rhot ubak gasien sampoe jih nyan teupaksa jipeubloe tanoh jih, waréh kawöm jih nyang paleng to wajéb jiteuboh tanoh nyan.
26 Meunyoe hana ureuëng nyang teuboh tanoh nyan teuma di ureuëng po tanoh nyan bak saboh saát hase dan na péng nyang seb keu jiteuboh tanoh nyan,
27 teuma ureuëng nyan harôh jibayeue ubak ureuëng nyang ka bloe tanoh jihnyan deungon yuem hase tanoh nyan sampoe bak thon-thon seulanjut jih sampoe trok ubak Thon Teupulang nyang teuma teuka. Deungon lagée nyan jihnyan ka meuteumé lom tanoh droe jih.
28 Teuma dilikot nibaknyan meunyoe ureuëng nyan hana daya keu jiteuboh tanoh nyan, di ureuëng nyang bloe tanoh nyan teutab na kuasa sampoe trok ubak Thon Teupulang teuma. Bak thon nyan tanoh nyan harôh teupulang ubak ureuëng po nyang phon.
29 Meunyoe sidroe ureuëng jipeubloe saboh rumoh lam banda nyang jikeulileng lé beuton, teuma ureuëng nyan nahak jiteuboh rumoh jihnyan lam jangka watée sithon teuhitong phon tanggai teupeubloe atra nyan.
30 Teuma meunyoe rumoh nyan hana jiteuboh lam watée sithon teuma gadôh kheueh hak jih keu jiteuboh rumoh nyan. Rumoh nyan teutab hak milék ureuëng nyang bloe dan keuturonan ureuëng bloe nyan. Lam Thon Teupulang, rumoh nyan hana teujok pulang.
31 Keu rumoh di gampông nyang hana jikeulileng lé beuton keunong ubak peuratoran nyang phon lagée nibak tanoh: ureuëng nyang phon na hak jiteuboh dan rumoh nyan harôh jijok pulang nibak Thon Teupulang.
32 Teuma di ureuëng Lewi na hak keu pajan mantong jiteuboh atra milék awaknyan di banda-banda nyang ka teupeuteutab keu awaknyan.
33 Meunyoe ureuëng Lewi jipeubloe rumoh jih bak saboh banda nyan dan jihnyan hana niet jiteuboh atra nyan, rumoh nyan harôh jijok lom ubak jih nyan nibak Thon Teupulang lom teuma. Sabab rumoh ureuëng Lewi di banda-banda awaknyan na kheueh milék awaknyan nyang teutab lamkawan bansa Israel.
34 Teuma blang naleueng nyang bansikeulileng banda-banda sukée Lewi hana jeuet teupeubloe. Nyan na kheueh atra ureuëng Lewi keu siumu masa.
35 Meunyoe na ureuëng nyang saboh bansa ngon gata nyang tinggai lamkawan gata ka rhot ubak gasien dan hana hase lé jimita hareutakat keu biaya udeb jih, gata harôh gata tulông jih nyan lagée ureuëng aséng atawa jamé teuka, mangat ureuëng nyan hase udeb sabe lamkawan gata.
36 Bék kheueh gata lakée bungöng nibak péng nyang gata peu-utang bak ureuëng nyan, teuma bah kheueh gata tatakot ubak Po teu Allah, dan peubiyeu mantong ureuëng nyan udeb lamkawan gata. Meunan cit bék gata cok laba nibak peunajoh nyang gata peubloe keu ureuëng nyan.
38 Nyang kheueh peurintah TUHAN Po teu Allah gata nyang ka geupeuteubiet gata nibak nanggroe Meusé keu geubri nanggroe Kanaan ubak gata, mangat gobnyan jeuet keu Po teu Allah gata.
39 Meunyoe na ureuëng nyang saboh bansa ngon gata nyang rhot ubak gasien sampoe ji peubloe droe jih sibagoe namiet ubak gata, ureuëng nyan hana jeuet gata yue jimubuet lagée buet nyang jipeubuet lé namiet.
40 Ureuëng nyan harôh tinggai nibak gata sibagoe ureuëng tung upah dan jimubuet bak gata sampoe ubak Thon Teupulang.
41 Bak watée nyan ureuëng nyan ngon aneuëk-aneuëk jih jeuet jitinggai rumoh gata dan jigisa ubak keuluwarga jih dan ubak tanoh indatu jih.
42 Ureuëng Israel na kheueh hamba-hamba TUHAN; Gobnyan kheueh nyang ba awaknyan peuteubiet nibak nanggroe Meusé, dan ngon sabab nyan awaknyan hana jeuet teupeubloe sibagoe namiet.
43 Jadi ureuëng Israel nyang jipeubloe droeji ubak gata hán jeuet barang gaho gata peubuet ateueh jihnyan. Bah kheueh gata teumakot ubak Po teu Allah gata.
44 Meunyoe gata na peureulée namiet, jeuet gata bloe bak bansa-bansa nyang na tinggai sikeulileng gata.
45 Meunan cit jeuet gata bloe aneuëk-aneuëk ureuëng aséng nyang na tinggai teutab lamkawan gata. Aneuëk-aneuëk ureuëng aséng nyang lahé di nanggroe gata atra nyan jeuet keuhak milék gata
46 dan jeuet cit gata peuwaréh ubak aneuëk-aneuëk gata keu jeuet keu namiet awaknyan siumu masa. Meunyoe seusabe gata ureuëng Israel hana jeuet gata peubuet ngon gasa.
47 Meunyoe na ureuëng aséng nyang tinggai lamkawan gata jeuet keu kaya, dan na teuma ureuëng gata Israel ka rhot gasien sampoe ureuëng nyan jipeubloe droe jih sibagoe namiet ubak ureuëng aséng nyan atawa ubak keuluwarga jih,
48 ureuëng Israel nyan teutab na hak keu teutuboh. Sidroe nibak syedara jih nyang agam,
49 atawa apha jih, atawa syedara karong jih atawa sidroe nyang laén nibak rakan jih nyang paleng krab, jeuet jiteuboh nyan. Atawa meunyoe jih keudroe keumungkenan mampu, ureuëng nyan jeuet jiteuboh droe jih keudroe.
50 Namiet nyan harôh jimupakat ngon ureuëng nyang ka bloe jih. Awaknyan harôh ji itong jeumeulah thon nibak phon droe jih nyan teupeubloe sibagoe namiet sampoe ubak Thon Teupulang teuma, laju jipeuteuntée yuem sineuboh jihnyan. Yuem nyan harôh teupeuteutab meunurot teu itong upah nyang teubri ubak ureuëng tung upah.
51 Namiet nyan harôh jijok pulang yuem teubloe droe jih nyan nyang le jih sidub upah ureuëng tung upah nyang treb jih sithon nyang gohlom trok,
53 siulah-ulah jihnyan ka jimubuet sibago ureuëng tung upah nyang teugaji sithon sigoe. Toke jih hana jeuet jipeubuet ateueh ureuëng nyan deungon gasa.
54 Meunyoe jihnyan hana hase teutuboh ngon cara lagée nyan, ureuëng nyan dan aneuëk-aneuëk jih harôh teupeubeubaih bak Thon Teupulang ukeue nyan teuma.
55 Sidroe ureuëng Israel hana jeuet jihnyan jeuet keu namiet siumu masa sabab bansa Israel na kheueh hamba-hamba TUHAN. TUHAN kheueh nyang ba awaknyan teupeuteubiet nibak nanggroe Meusé. Gobnyan kheueh TUHAN, Allah awaknyan.
Chapter 26
TUHAN meufeureuman, "Bék kheueh gata peugét beurala atawa gata peudong patong atawa taméh batée nyang meu-uke keu gata seumah. Ulôn kheueh TUHAN Allah gata.
2 Peuraya kheueh uroe raya Sabat dan uroe-uroe raya agama nyang laén dan horeumat kheueh ubak teumpat nyang teupeu khusos keu teuseumah Ulôn. Ulôn kheueh TUHAN.
3 Meunyoe gata udeb meunurot atoran-atoran nyang teuka nibak Ulôn dan gata taát peue-peue nyang Ulôn peurintah,
4 Ulôn ku peutreun ujeuen óh trok bak watée, sampoe tanoh jibri wase dan dumna bak kayée jimeuboh.
5 Wase tanoh gata meulimpah ruwah, dan meunyoe ka trok watée jih keu teujak pot boh anggô, gata mantong gata koh gandom. Dan meunyoe ka trok watée keu tapula gandom, gata mantong tapot boh anggô. Bak gata teuma na peunajoh nyang seb dan udeb seujahtera di nanggroe gata.
6 Ulôn teuma Lôn jaga keuamanan nanggroe gata sampoe gata jeuet gata éh deungon teunang dan hana teumakot keu soe mantong. Beulatang-beulatang juah teuma Lôn peuranab nibak nanggroe gata, dan muprang pi teuma hana lé di nanggroe gata.
7 Gata teuma hase tapeutaloe bubena na musoh gata;
8 deungon limong droe gata hase tapeutaloe sireutoh droe musoh, dan deungon sireutoh droe hase tapeuloe siploh ribée droe musoh.
9 Ulôn teuma Lôn bri beureukat ubak gata dan teuma Lôn bri aneuëk-aneuëk cucoe nyang jai keu gata. Peue nyang ka Ulôn meujanji ngon gata, pasti Ulôn peutrok.
10 Wase tanoh gata teuma meulimpah ruwah, sampoe trok sithon. Sikeubit jih gata teupaksa harôh gata peuteubiet hase meuneupot gata nyang ka treb mangat na teumpat gata keubah hase meuneupot nyang barô.
11 Ulôn teuma tinggai lamkawan gata lam Khimah Ulôn, dan hana Lôn tulak gata.
12 Ulôn teuma na meusajan gata; Ulôn jeuet keu Po teu Allah gata dan gata jeuet keu umat Ulôn.
13 Ulôn, TUHAN Allah gata, nyang ba gata teupeuteubiet nibak nanggroe Meusé mangat gata bék jeuet le keunamiet. Keukuasaan nyang seupet gata ka Ulôn wiet, dan gata Ulôn peujeuet keu ureuëng nyang meurdehka."
14 TUHAN meufeureuman, "Meunyoe gata hana tadeungoe Ulôn dan hana gata peubuet lagée nyang ka Ulôn peurintah,
15 meunyoe gata ta iengkeue ubak janji nyang Ulôn peugét ngon gata dan hana gata taát ubak peue-peue nyang ka Ulôn peuteutab dan peuratoran-peuratoran Lôn,
16 gata teuma Lôn huköm. Ulôn teuma ku peuteuka bala u ateueh gata, peunyakét ngon deumam nyang hana hase teupeupuléh, sampoe mata gata jeuet keubuta dan gata udeb meurana. Gata teuma gata pula seunaman dan hase jih hana gata teumé pajoh, sabab musoh-musoh gata teuka jijak peutaloe gata dan jipeuhabéh peue nyang gata pula.
17 Gata teuma Lôn huköm, sampoe gata jipeutaloe lé musoh-musoh gata dan jikuasa lé ureuëng nyang banci keu gata. Gata teuma jeuet keu ureuëng nyang paleng geusun sampoe gata plueng, bahpi hana nyang peulet gata.
18 Meunyoe ka lheueh gata rasa banmandum huköman nyan dan gata gohlom taát ubak Ulôn, huköman ateueh gata teuma Lôn tamah tujoh go ganda.
19 Gata sombong lumpah na, Ulôn teuma Ulôn peutundok gata. Ujeuen hana teuma jitreun, sampoe tanoh gata ka habéh tho dan kreuh lagée beuso.
20 Banmandum jeureh payah gata hana meuguna. Sabab tanoh gata hana jibri wase dan mandum seunaman gata hana teuma meuboh.
21 Meunyoe hana putôh cit gata lawan Ulôn dan hana gata tem taát ubak Ulôn, teuma huköman gata Lôn tamah lom tujoh go ganda.
22 Ulôn teuma Lôn peuteuka meubago rupa beulatang juwah lamkawan gata. Beulatang-beulatang nyan jiteugöm bubena aneuëk-aneuëk gata, jipoh maté beulatang peulara gata dan jipeuhabéh gata, sampoe jeumeulah jih tinggai bacut teuk, meunan cit rot-rot nyang na di nanggroe gata ka jeuet keu sungue.
23 Meunyoe ka lheueh gata rasa banmandum huköman nyan gohlom cit gata deungoe Ulôn, mantong cit hana gata piôh talawan Ulôn,
24 deungon nyan laju Lôn heuntam gata dan Lôn huköm gata tujoh goe leubeh brat nibak nyang ka-ka.
25 Ulôn teuma Lôn peuteuka prang lamkawan gata keu teuhuköm gata sabab ka gata iengkeue peujanjian Ulôn deungon gata. Dan meunyoe gata meusapat di banda gata keu gata jak mita teumpat meusom, Ulôn laju Lôn peutreun peunyakét nyang hana hase teupeupuléh, sampoe gata teupaksa gata seurah droe ubak musoh gata.
26 Gata teuma habéh peunajoh, akhéji lam siploh droe ureuëng inong teuma cit saboh teumpat tot ruti nyang na bak awaknyan. Peunajoh nyan teuma teupulang ubak gata seucara teuransom, dan óh ka lheueh gata pajoh ruti nyan, gata hana troe dan teutab mantong teurasa deuk.
27 Óh ka lheueh gata rasa banmandum huköman nyan gata teutab cit mantong talawan Ulôn dan hana gatatem taát ubak Ulôn,
28 teuma deungon beungéh gata laju Lôn heuntam, dan Lôn huköm gata tujoh goe leubeh brat nibak nyang ka-ka.
29 Gata teuma deuk, sampoe trok ubak aneuëk-aneuëk gata keudroe.
30 Ulôn teuma Lôn peuhanco bubena teumpat-teumpat seumuja gata di ateueh bukét-bukét, Lôn reuloh bubena miseubah gata teumpat gata tot dupa, dan Ulôn rhom manyét-manyét gata u ateueh beurala-beurala gata nyang ka reuloh nyan. Deungon rasa luwat
31 banda-banda gata Ulôn peuhanco sampoe jeuet keu rungka-rungka, teumpat-teumpat seumuja gata Ulôn peuhanco dan keureubeuen-keureubeuen gata hana Lôn teurimong.
32 Nanggroe gata teuma Lôn peuhanco sapan sapa, sampoe bubena musoh nyang duek lam nanggroe nyan teuma teukeujot óh jingieng pakriban hibat hanco nanggroe nyan.
33 Ulôn teuma Lôn peuteuka prang di nanggroe gata dan Ulôn peucrebre gata di nanggroe-nanggroe aséng. Blang-blang gata teulanta, dan banda-banda gata teupeubiyeu mantong jeuet keu rungka.
34 Bak watée nyan teungoh gata mantong na di teumpat-teumpat nyang teuböih lam nanggroe musoh-musoh gata, tanoh gata nyang hana gata peubiyeu jipioh meusikeujab yoh watée mantong gata tinggai disinan, teuma teulanta dan na watée jimeureuhat.
36 Ureuëng-ureuëng gata nyang na di teumpat nyang teuböih di nanggroe laén, teuma Lôn peujeuet keuteumakot nyang luwa biasa, sampoe siôn-ôn kayée nyang jiyueb lé angén pi awaknyan ka jiplueng. Gata teuma taplueng sang-sang gata jilet lam mideuen prang, laju reubah bahpi hana musoh bak binéh gata.
37 Gata teuma gata plueng dan laju meugantoh sidroe ngon nyang laén, bahpi hana nyang peucrok gata. Dan gata hana teuma hase gata lawan musoh-musoh gata.
38 Gata teuma maté nibak teumpat nyang teuböih dan jipeubinasa lé nanggroe musoh-musoh gata.
39 Bacut nyang tinggai ureuëng gata nyang mantong udeb lam nanggroe musoh gata teuma meurana sabab desya gata keudroe dan desya indatu gata.
40 Teuma keuturonan gata jiaku keuhai desya jih dan desya indatu jih nyang ka jilawan Ulôn dan jibeurontak ubak Ulôn,
41 sampoe Ulôn cok tindakan Lôn lawan awaknyan dan Lôn use awaknyan u teumpat nyang teuböih nibak nanggroe musoh-musoh awaknyan. Akhé jih, meunyoe keuturonan gata ka taklok dan jirasa huköman sabab desya dan brontak awaknyan,
42 Ulôn teuma Lôn ingat peue nyang ka lheueh Lôn meujanji ngon Nabi Yakub, Nabi Ishaq dan Nabi Ibrahim. Ulôn teuma Lôn peubarô janji Ulôn keu Lôn jok tanoh nyan ubak bansa Ulôn.
43 Teuma tanoh nyan leubeh ilée harôh jitinggai lé peunduduek disinan, mangat beutôi-beutôi meuteumé ji meureuhat. Dan umat Ulôn harôh jirasa banmandum huköman nyang ka Lôn peurhot ateueh droe jih sabab hana jitem taát ubak mandum peuratoran dan peue-peue nyang ka Ulôn peurintah.
44 Teuma meunyoe awaknyan mantong na di nanggroe musoh, awaknyan teutab hana Lôn tinggai atawa Ulôn peubinasa. Sabab meunyoe awaknyan Ulôn peubinasa, saban cit ka Ulôn peuputôh peue nyang ka lheueh Lôn meujanji ngon awaknyan, sabab Ulôn nyoe na kheueh TUHAN, Allah awaknyan.
45 Ulôn teuma Lôn peubarô peujanjian nyang ka lheueh Lôn peugét ngon indatu awaknyan, watée Ulôn tunyok keukuasaan Lôn ubak banmandum bansa deungon cara Ulôn ba umat Lôn nibak tanoh Meusé, mangat Ulôn, TUHAN, jeuet keu Allah awaknyan."
46 Nyan kheueh huköm-huköm dan peurintah-peurintah nyang geubri lé TUHAN di ateueh Gunong Sinai ubak Nabi Musa keu bansa Israel.
Chapter 27
TUHAN meufeureuman ubak Nabi Musa keuhai peuratoran nyoe keu bansa Israel. Meunyoe sidroe-droe ureuëng jipeuseumah ubak TUHAN keu jiteuboh sapeue-sapeue kaôi nyang khusos, ureuëng nyan jeuet jiteuboh ngon sijeumeulah péng
3 meunurot yuem nyang ka teuntée bak Khimah TUHAN: -- di ateueh 60 thon: -- lamkawan 20-60 thon: -- lamkawan 5-20 thon: -- dimiyueb 5 thon: 8 Meunyoe ureuëng nyang meukaôi nyan gasien that keu jibayeue yuem nyang ka teupeuteutab nyan, ureuëng nyan harôh jiba ureuëng nyang ka teupeuseumah ubak TUHAN nyan ubak imeum. Imeum harôh geupeuteutab yuem nyang leubeh miyueb nyang sisuai deungon keumampuan ureuëng nyan.
9 Meunyoe kaôi nyan beulatang haleue nyang jeuet teupeuseumah ubak TUHAN, ureuëng nyang meukaôi nyan hana jeuet jituka ngon beulatang laén, sabab banmandum nyang ka jipeuseumah ubak TUHAN atra nyan ka jeuet keu milék TUHAN. Meunyoe atra nyan jituka cit, bandua boh beulatang nyan ka jeuet keu milék TUHAN.
11 Teuma meunyoe kaôi nyan keuhai beulatang hareuem nyang hana jeuet jiteurimong sibagoe keureubeuen ubak TUHAN, ureuëng nyang meukaôi nyan harôh jiba beulatang nyan ubak imeum.
12 Imeum teuma geupeuteuntée yuem jih meunurot keuadaan beulatang nyan. Dan yuem nyang ka teupeuteuntée nyan na kheueh yuem maté.
13 Meunyoe ureuëng nyan keuneuk jiteuboh beulatang jih nyan, ureuëng nyan harôh jibayeue yuem jih teutamah dua ploh peureusen.
14 Meunyoe sidroe ureuëng jipeuseumah rumoh jih ubak TUHAN, imeum geupeuteuntée yuem rumoh nyan meunurot keuadaan rumoh nyan. Yuem nyang ka geupeuteuntée na kheueh yuem maté.
15 Meunyoe ureuëng nyan keuneuk jituboh rumoh jih nyan, ureuëng nyan harôh jibayeue yuem jih dan jitamah lom dua ploh peureusen.
16 Meunyoe sidroe ureuëng keuneuk jipeuseumah siladum tanoh jih ubak TUHAN, yuem tanoh nyan harôh teupeuteuntée jeumeulah bijéh nyang peureulée keu teupula lam tanoh nyan. Keu tieb-tieb dua ploh kilo gram gandom yuem jih siploh péng pirak.
17 Meunyoe tanoh nyan jipeuseumah phon watée Thon Teupulang, yuem jih harôh teubayeue peunoh.
18 Meunyoe tanoh nyan teupeuseumah óh ka lheueh Thon Teupulang, imeum harôh geutakse yuem kontan jih meunurot jeumeulah thon nyang mantong na sampoe ubak Thon Teupulang nyang teuma teuka, dan geupeuteuntée laju yuem jih nyang leubeh murah.
19 Meunyoe ureuëng nyang peuseumah ladang nyan keuneuk jiteuböh, ureuëng nyan harôh jibayeue yuem jih jitamah teuma dua ploh peureusen.
20 Meunyoe jihnyan jipeubloe lampôh jih nyan deungon hana leubeh dilée jiteuboh ubak TUHAN, ureuëng nyan hana hak le jiteuboh lampôh jih nyan.
21 Bak Thon Teupulang teuma lom, lampôh nyan ka jeuet keumilék TUHAN keu siumu masa, dan atranyan geubri ubak imeum-imeum.
22 Meunyoe sidroe ureuëng jipeuseumah ubak TUHAN saboh lampôh nyang ka jibloe,
23 imeum harôh geutakse yuem meunurot jeumeulah thon nyang mantong na sampoe ubak Thon Teupulang lom teuma. Dan di ureuëng nyan laju jibayeue yuem jih bak uroe nyan cit. Péng nyan ka jeuet keu hak milék TUHAN.
24 Bak Thon Teupulang, lampôh nyan harôh teupulang ubak ureuëng po nyang phon atawa ubak keuturonan jih.
25 Banmandum yuem harôh teupeuteuntée meunurot yuem nyang ka teuntée bak Khimah TUHAN.
26 Beulatang nyang phon lahé na kheueh milék TUHAN, jadi atra nyan hana jeuet teukeureubeuen sibagoe keureubeuen keugalak droe. Aneuëk leumô, aneuëk bubiri atawa aneuëk kaméng nyang phon that lahé na kheueh atra TUHAN.
27 Teuma beulatang hareuem nyang phon lahé jeuet teutuboh meunurot yuem nyang ka teuntée bak Khimah TUHAN, teutamah teuma ngon dua ploh peureusen. Meunyoe hana teutuboh, beulatang nyan jeuet teupeubloe ubak ureuëng laén meunurot yuem nyang ka teuntée bak Khimah TUHAN.
28 Hana meusidroe pi jeuet jipeubloe atawa jituboh peue nyang ka teupeukhusos tanpa syarat ubak TUHAN, bah kheueh nyan manusia, beulatang atawa tanoh. Atranyan na kheueh milék TUHAN siumu masa.
29 Manusia keudroe nyang ka teupeukhusos keu TUHAN keu geupeubinasa nyan hana jeuet teutuboh; ureuëng nyan harôh teupoh maté.
30 Siper siploh nibak banmandum wase tanoh, bah kheueh nyan gandom meunan cit ngon boh-boh kayée, atranyan na kheueh milék TUHAN.
31 Meunyoe sidroe-droe ureuëng jikeuneuk teuboh siladum nibak hase nyan, ureuëng nyan harôh jibayeue yuem nyang ka teupeuteuntée teutamah teuma dua ploh peureusen.
32 Saboh nibak tieb-tieb siploh boh beulatang peulara na kheueh atra TUHAN. Meunyoe beulatang nyan teu itong, tieb-tieb saboh beulatang peulara nyang keu siploh na kheueh atra TUHAN.
33 Ureuëng po beulatang nyan hana jeuet jipiléh-piléh toh nyan gét dan toh nyang hana gét. Meunan cit atra nyan hana jeuet jituka ngon nyang laén. Meunyoe atra nyan jituka cit teuma, ban dua boh beulatang peulara nyan ka jeuet keuhak milék TUHAN dan hana jeuet teutuboh.
34 Nyan kheueh peurintah-peurintah nyang geubri lé TUHAN di ateueh Gunong Sinai ubak Nabi Musa keu bansa Israel.