Yehezkiel

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48

Chapter 1

Bak tanggai nyang keu limong buleuen nyang keu peuet bak thon nyang keu lhée ploh, bak thon nyang keulimong seumeunjak Raja Yoyakhin jiba u teumpat nyang teuböih, ulôn, Teungku Imeum Yehezkiel bin Busi, na nibak binéh Krueng Kebar di Babel meusajan deungon ureuëng-ureuëng nyang teuböih nibak ureuëng Yahudi laén. Hana teusangka-sangka langét teuhah dan ulôn meuteumé lôn kalon keuhai Po teu Allah. Ulôn deungoe TUHAN meufeureuman ubak ulôn dan laju lôn rasa teuga that kuasa Gobnyan.
4 Ulôn tangah laju ulangét dan deuh ulôn kalon angén badée teungoh jipot nibak utara. Geulanteue jiseumama keudeuh keunoe nibak sinamon awan nyang paleng raya, dan langét nyang na nibak banéh nyan peungéuh meucahya. Dalam kilat nyang meuble-ble nyan leumah sapeue-sapeue nyang meukilat lagée peurunggu.
5 Di teungoh-teungoh awan nyan, deuh lôn kalon peuet boh kerub, na kheueh makhluk udeb nyang rab saban ngon manusia,
6 teuma maséng-maséng na peuet boh rupa dan dua boh pasang sayeueb.
7 Gaki jih teupat dan meukilat lagée peurunggu nyang teucane. Jaroe gaki jih meugukée lagée gukée banteng.
8 Seulaén peuet boh rupa dan dua pasang sayeueb nyan, awaknyan na teuma jaroe manusia dimiyueb tieb-tieb sayeueb.
9 Sijudoe sayeueb nibak tieb-tieb makhluk nyan meukeumang dan phon di ujong trok bak ujong sayeueb nyan tupéh teuma deungon sayeueb makhluk nyang laén, sampoe ban peuet boh makhluk nyan ka teubina sagoe peuet. Meunyoe meugrak, maséng-maséng makhluk nyan meugrak teupat ukeue sira jibalek tuboh jih.
10 Tieb-tieb makhluk nyan rupa jih meulaén-laén; nyang rupa jih lagée ureuëng na dikeue, rupa nyang lagée singa na blaih si uneuen, rupa lagée banteng blaih wie, dan waja raja wali si blaih u likot.
11 Sipasang sayeueb nibak tieb-tieb makhluk nyan teupeukeumang u ateueh sampoe tupéh ujong tieb-tieb sayeueb makhluk nyang laén nyang na disiblaih nyan, dan sipasang sayeueb teuk teulipat teutôb tuboh jih.
12 Maséng-maséng makhluk nyan meuhadab ubak peuet boh jurosan sigoe guih, sampoe awaknyan jeuet jijak homantong nyang jigalak deungon tuboh hana teuputa.
13 Bak teungoh makhluknyan na sapeue-sapeue nyang leumah jih lagée ngeue apui atawa suwa apui nyang hu meugrak-grak hana piôh. Apuinyan meu kléb-kléb dan jiteubiet meuek jeuet keu kilat geulanteue.
14 Makhluk-makhluk nyan keudroe meugrak-grak keudeh keunoe nyang bagaih jih lagée kilat.
15 Teungoh lôn kalon bandum nyan, ulôn ngieng teuma na peuet boh ruda di ateueh tanoh, saboh ruda nibak sampéng tieb-tieb makhluk nyan.
16 Ban peuet boh ruda nyan saban dan meukilat lagée batée peumata, dan maséng-maséng na saboh teuk ruda nyang laén nyang meulinteung di teungoh-teungoh nyan.
17 Deungon lagée nyan ruda-ruda nyan hase jituju bak peuet boh arah.
18 Keulileng-keulileng ruda nyan peunoh deungon mata.
19 Makhluk-makhluk nyan jijak homantong nyang jihawa, dan ruda-ruda nyan sabe jiseutôt, sabab jikuasa lé makhluk-makhluk nyan. Pajan mantong makhluk-makhluk nyan meugrak jiék u ateueh atawa jipiôh, ruda-ruda nyan sabe jiseutôt meusajan awaknyan.
22 Di ateueh tieb-tieb ulée makhluk nyan na teuma meubinteung sapeue-sapeue lagée kubah nyang teupeugét nibak kristal nyang hu meucahya.
23 Di miyueb kubah nyan tieb-tieb makhluknyan jireuntang teuma sipasang sayeueb jih u arah makhluk nyang na siblaih jih nyan, seudangkan sayeueb jih nyang sipasang teutôb tuboh jih.
24 Meunyoe makhluk nyan jipo, teudeungoe bak ulôn su sayeueb jih nyang meukeupak-keupak; su jih lagée su ié rhot, lagée su deurab langkah pasokan sipa-i nyang raya, lagée su Po teu Allah Nyang Mahakuasa. Meunyoe makhluknyan jipiôh bak jipo, laju jilipat sayeueb jih,
25 teuma di ateueh kubah nyang di ateueh ulée awaknyan, mantong teudeungoe su makhluk nyan.
26 Di ateueh kubah nyan na sapeue-sapeue nyang saban lagée takhta nibak batée nilam, dan di ateueh nyan na jiduek sapeue-peue nyang leumah jih lagée manusia.
27 Bagian ateueh nyan leumah jih meucahya lagée peurunggu di teungoh-teungoh apui hu. Bagian miyueb jih meucahya trang muble-ble,
28 dan meuwareuna warni lagée peulangi. Nyan kheueh trang meucahya nyang teutunyok ubak keuhaderan TUHAN.

Chapter 2

Ban lôn kalon nyang lagée nyan, ulôn laju reubah meudugöm ateueh tanoh. Laju lôn deungoe su nyang geupeugah, "He manusia fana, beudôh kheueh. Ulôn keuneuk peugah haba deungon gata."
2 Watée su nyan ulôn deungoe, jitamong kheueh Roh Po teu Allah badan lôn, dan geupeudong ulôn. Óh lheueh nyan lôn deungoe lom su nyan geupeugah,
3 "He manusia fana, gata Lôn kirém ubak ureuëng-ureuëng Israel nyang beurontak jilawan Ulôn. Awaknyan beurontak lagée indatu awaknyan keudroe.
4 Awaknyan kreueh ulée dan hana jihoreumat Ulôn. Gata Ulôn kirém ubak awaknyan mangat tapeusampoe keu awaknyan peue-peue nyang Ulôn, TUHAN Allah Nyang Mahamanyang peugah keu awaknyan,
5 peue jitem deungoe lé awaknyan atawa hana; nyang peunteng, awaknyan harôh jiteupeue bahwa na nabi lamkawan awaknyan.
6 Teuma gata, he manusia fana, bék tatakot keu peumbeurontak nyan, atawa ubak peue mantong nyang jipeugah lé awaknyan. Awaknyan jilawan dan jihina gata, siulah-ulah gata udeb lamkawan kala meubisa. Bahpi meunan, bék teumakot.
7 Peutrok kheueh bandum peusan Ulôn nyoe ubak awaknyan, boh jitem deungoe lé awaknyan atawa hana. Ingat kheueh bahwa awaknyan na kheueh peumbeurontak-peumbeurontak.
8 He manusia fana, deungoe kheueh peue nyang Ulôn peugah ubak gata. Bék kheueh taseutôt peumbeurontak nyan. Peuhah kheueh babah gata dan pajoh kheueh peue nyang Ulôn bri ubak gata."
9 Óh lheueh nyan ulôn kalon jaroe nyang teusunyueng ubak ulôn. Dalam jaroe nyan na kitab meugulong,
10 nyang teutuléh nibak bandua binéh jih. Laju geupeuhah geunulong nyan dan disinan teutuléh ratapan, apoh apah dan rintihan.

Chapter 3

Allah meufeureuman, "He manusia fana, pajoh kheueh kitab meugulong nyoe, óh lheueh nyan jak kheueh dan mariet kheueh ubak ureuëng-ureuëng Israel."
2 Laju ulôn peuhah babah lôn dan Po teu Allah laju geusuleueng kitab meugulong nyan lam babah lôn mangat lôn pajoh.
3 Kheun Gobnyan, "He manusia fana, pajoh kheueh! Pasoe kheueh pruet gata ngon kitab meugulong nyoe." Dan kitab nyan pi laju lôn pajoh rasa jih maméh lagée meulisan.
4 Po teu Allah meufeureuman lom, "He manusia fana, tajak kheueh laju ubak ureuëng-ureuëng Israel dan peusampoe kheueh peue mantong peusan Ulôn keu awaknyan.
5 Keu awaknyan kheueh gata Lôn kirém, dan bukon keu bansa nyang basa jih sulet, aséng dan hana muphom. Meunyoe kheueh gata Ulôn kirém ubak bansa nyang lagée nyan, awaknyan jideungoe tutoe haba gata.
7 Teuma bansa Israel hana jitem deungoe gata, bahpi Ulôn keudroe pih hana jipako. Awaknyan bandum kreueh-kreueh ulée dan galak bak meulawan.
8 Jinoenyoe gata Lôn peujeuet kreueh ulée dan gigéh lagée awaknyan cit teuma.
9 Gata Ulôn peujeuet kukôh lagée batée kareueng dan kreueh lagée intan. Bék kheueh tatakot ubak peumbeurontak nyan."
10 Lheuehnyan Po teu Allah geupeugah, "He manusia fana, ngieng kheueh beu gét-gét dan ingat kheueh peue nyang Ulôn peugah nyoe ubak gata.
11 Tajak kheueh ubak bansa gata nyang na tinggai di teumpat nyang teuböih nyan, dan peusampoe kheueh peue nyang Ulôn, TUHAN Nyang Mahamanyang peugah ubak awaknyan, peu kheueh jitem deungoe lé awaknyan atawa hana."
12 Laju Roh Allah geubeuôt ulôn dan dilikot ulôn teudeungoe su geumuroh nyang jipeugah, "Pujoe kheueh keumuliaan TUHAN di syeuruga!"
13 Lôn deungoe su sayeueb makhluk nyan saléng meuantok, dan su meukrab-krab ruda-ruda nyan nyang nyareng lagée su geumpa bumoe.
14 Keukuasaan TUHAN nyang peujeuet ulôn lumpah that hebat, dan bak watée ulôn geubeuôt lé Roh Gobnyan, até ulôn meurasa phet dan seu uem.
15 Dan trok kheueh ulôn ubak teumpat tinggai ureuëng nyang teuböih di Tel Abib nibak binéh Krueng Kebar. Na tujoh uroe treb jih ulôn tinggai disinan; ulôn teumanueng-manueng lé bandum nyang banmantong lôn deungoe dan lôn kalon nyan.
16 Óh ka lheueh tujoh uroe, TUHAN geupeugah ubak ulôn,
17 "He manusia fana, gata Ulôn angkat jeuet keu ureuëng kawai bansa Israel. Tapeusampoe kheueh ubak awaknyan haba peuingat nyang Ulôn bri nyoe.
18 Meunyoe Ulôn peugah bahwa sidroe peunjahat maté, teuma gata hana tapeuingat bak awaknyan mangat awaknyan jiubah pi-e jih sampoe jihnyan seulamat, teuma jihnyan maté mantong lagée ureuëng nyang meudesya, dan tanggong jaweueb ateueh maté jih nyan jitunggée nibak gata.
19 Meunyoe gata tapeuingat ureuëng jeuhet nyan dan ureuëng nyan hán jitem piôh jipeubuet jeuhet, jihnyan maté lagée ureuëng meudesya, teuma gata keudroe seulamat.
20 Meunyoe sidroe ureuëng nyang jroh jipeuphon peubuet desya, dan jihnyan Ulôn peuhadab deungon bahya, teuma jihnyan maté meunyoe gata hana tapeuingat jihnyan. Jihnyan maté sabab desya-desya jihnyan keudroe, dan buet-buet jih nyang jroh nyang ka jipeubuet hana Ulôn ingat. Teuma tanggong jaweueb ateueh maté ureuëng nyan Lôn tunggée nibak gata.
21 Meunyoe ureuëng nyang jroh nyan gata peuingat mangat bék jipeubuet desya, dan jihnyan jiturot naseuhat gata, teuma jihnyan hana Lôn huköm dan gata seulamat."
22 Ulôn rasa teuga that TUHAN teuka dan ulôn deungoe Gobnyan geupeugah ubak ulôn, "Beudôh kheueh dan jak kheueh laju u pantôn. Disinan Ulôn keuneuk peugah haba deungon gata."
23 Dan ulôn jak kheueh u pantôn, dan disinan deuh lôn kalon cahya meukilat tanda teuka TUHAN lagée nyang ka lheueh lôn kalon bak binéh Krueng Kebar. Laju ulôn reubah teudugöm di ateueh tanoh,
24 teuma Roh Po teu Allah geutamong dan geupeudong ulôn. TUHAN meufeureuman ubak ulôn, "Tawoe kheueh dan takurong droe gata didalam rumoh.
25 He manusia fana, gata ji-ikat ngon talo sampoe hana hase tateubiet dan hana jeuet meurumpok deungon gob.
26 Ulôn Lôn peujeuet lidah gata kalu sampoe gata hana hase tapeuingat bansa peumbeurontak nyoe.
27 Teuma, meunyoe Lôn meututoe deungon gata lom dan Lôn peuwirang mangat gata hase meutoe lom, gata harôh tapeusampoe peue nyang Ulôn, TUHAN Nyang Mahamanyang peugah ubak awaknyan. Siladum nibak awaknyan jideungoe, teuma siladum teuk hana, sabab awaknyan keubit bansa nyang beurontak."

Chapter 4

Po teu Allah meufeureuman, "He manusia fana, tacok kheueh laju sineuk batée bata, keubah laju dikeue gata dan gareh laju ateueh batée nyan gamba banda Yerusalem.
2 Laju tagamba cara teukeupong banda nyan, deungon paret-paret, sinamon-sinamon tanoh, khimah-khimah dan alat-alat ngon pok bansikeulileng beuton nyan.
3 Tacok kheueh panci beuso dan anggab kheueh nyan sibagoe bintéh beuso; keubah kheueh panci nyan lamkawan gata dan banda Yerusalem. Óh lheueh nyan meuhadab kheueh ubak banda nyan siulah-ulah gata kheueh nyang keupong banda nyan. Nyan jeuet keulambang keu bansa Israel.
4 Óh lheueh nyan ta-éh kheueh meugeunireueng blaih siwie, dan Ulôn kupeurhot salah bansa Israel nyan ateueh gata. Na 390 uroe gata teuéh lagée nyan dan meudeurita seungsara sabab salah awaknyan. Siuroe gata teuéh lagée nyan teupeulambang sithon huköman bansa Israel.
6 Óh lheueh nyan, taéh kheueh meugeunireueng blaih uneuen dan tarasa kheueh huköman ateueh buet salah Yehuda peuet ploh uroe treb jih, si uroe teupeulambang sithon huköman awaknyan.
7 Pandang kheueh teukeupong Yerusalem. Geupai kheueh boh sineunju gata ateueh banda nyan dan peusampoe kheueh peusan Ulôn keuhai huköman ateueh awaknyan.
8 Gata Lôn ikat sampoe hana hase tabalek tuboh gata nibak wie u uneuen atawa seubalek jih sampoe teukeupong banda nyan seuleusoe.
9 Jinoenyoe, tacok kheueh gandom, jeulai, kacang mirah, kacang polong, sekoi dan gandom halôh. Jampu kheueh banmandum nyan dan peugét kheueh ruti. Nyan kheueh peunajoh gata nyang treb jih 390 uroe gata gata teuéh sihéuet u blaih wie nyan.
10 Ruti nyan harôh gata weuek beuade sampoe tieb-tieb uroe gata makheun 230 gram. Leubeh nibaknyan hana jeuet.
11 Meunan cit deungon ié jieb gata teubataih, nyang jeuet dua cangkie siuroe.
12 Tapeuhu kheueh apui deungon ék manusia keu kayée jih. Panggang kheueh ruti gata ateueh apui nyan dan tapajoh kheueh ruti nyan dikeue ureuëng ramé."
13 TUHAN meufeureuman, "Meunan kheueh cara jih ureuëng Israel singoh jipajoh peunajoh nyang geutam lé huköm Nabi Musa, bak watée awaknyan Ulôn böih u nanggroe-nanggroe aséng."
14 Teuma ulôn jaweueb, "Ya amphon, TUHAN Nyang Mahamanyang! Phon yoh ubit sampoe saát nyoe hántom lom lôn peukutoe droe deungon peunajoh bangke beulatang atawa séueh nyang jipajoh lé beulatang buih. Hántom lôn pajoh peunajoh nyang teuanggab hareuem."
15 Dan Po teu Allah meufeureuman, "Gét kheueh, sibagoe geunantoe ék manusia, gata jeuet tapajoh ék leumô keu ngon tot ruti gata."
16 Óh lheueh nyan Gobnyan meufeureuman lom, "He manusia fana, Ulôn kupeuhanco gudang teumpat keubah peunajoh di Yerusalem. Deungon gundah dan khawate manusia jibataih peunajoh nyang awaknyan pajoh dan ié nyang awaknyan jieb.
17 Awaknyan putôh asa sabab ka habéh peunajoh dan ié jieb, akhé jih awaknyan maté sabab desya-desya jih keudroe."

Chapter 5

TUHAN meufeureuman, "He manusia fana, tacok kheueh peudeueng nyang tajam dan cukô kheueh beuhabéh janggot dan ôk gata ngon peudeueng nyan. Óh lheueh nyan jak timang kheueh ôk nyan nibak ceng dan taweuek kheueh mangat jeuet lhée boh bagi.
2 Siper lhée harôh gata tot di teungoh-teungoh banda nyan óh lheueh nyan akhéjih banda nyan gata keupong. Siper lhée teuk harôh gata tak ngon peudeueng gata sirang takeulileng banda nyan. Dan siper lhée nyang keuneulheueh harôh gata sipreuk u ateueh, laju Ulôn kutiyeub ngon peudeueng Lôn.
3 Tatinggai bacut ôk nyan dan tabungkôh lam ija lipat jubah gata.
4 Óh lheueh nyan tacok bacut nibak ôk nyan, tageulawa laju u dalam apui dan tapeubiyeu mantong ôk nyan hangöh. Nibak teumpat nyan apui jimeuéue bansaboh bansa Israel."
5 TUHAN Nyang Mahamanyang meufeureuman, "Kalon, nyoe kheueh Yerusalem. Banda nyoe Ulôn keubah bak pusat donya, deungon nanggroe-nanggroe laén ban sikeulileng nyan.
6 Teuma Yerusalem ka jitulak peurintah Ulôn dan teunyata leubeh jeuhet nibak bansa-bansa laén, dan leubeh hana taát nibak nanggroe-nanggroe nyang na di sikeulileng nyan. Yerusalem ka ji iengkeue peue-peue nyang Lôn peurintah dan hánjitem taát ubak huköm-huköm Lôn."
7 TUHAN Nyang Mahamanyang meufeureuman, "He Yerusalem, deungoe kheueh nyoe! Gata hana tataát peue-peue nyang Ulôn peurintah meunan cit ubak huköm-huköm Lôn; gata leubeh meubantah nibak bansa-bansa nyang laén nyang na di seukeulileng gata, dan ka gata seutôt adat istiadat bansa-bansa nyan.
8 Teuma Ulôn, TUHAN Nyang Mahamanyang, bak saát nyoe Ulôn peugah bahwa Ulôn na kheueh musoh gata. Gata Lôn huköm dikeue bansa-bansa laén.
9 Sabab bandum buet gata Lôn banci, peunduduek gata Lôn huköm nyang leubeh brat nyang gohlom na Lôn peubuet dan hana Lôn peubuet le.
10 Ureuëng syiek teuma jipajoh aneuëk jih keudroe dan si aneuëk jipajoh ureuëng syiek jihnyan. Meunan kheueh awaknyan Ulôn huköm, dan nyang mantong udeb Lôn peucrebre ubak meubagoe jurosan.
11 Ulôn na kheueh Allah nyang udeb, TUHAN Nyang Mahamanyang, dan nyoe kheueh tutoe haba Lôn: Sabab gata ka tapeukutoe Baét Ulôn deungon sigala buet gata nyang jeuhet dan luwat nyan, Ulôn Lôn peuhanco gata hana amphon.
12 Siper lhée nibak peunduduek gata maté keunong bala peunyakét dan beuncana musém deuk nyang meulanda banda. Siper lhée teuk teuheuntam deungon peudeueng di luwa banda, dan siper lhée teuk Lôn sipreuk u jeueb-jeueb sagoe dan Lôn tiyeub-tiyeub deungon peudeueng.
13 Gata tarasa pakriban hebat jih beungéh dan silab Ulôn sampoe Ulôn puih. Óh lheueh bandum nyan teujadi, gata yakén bahwa Ulôn, TUHAN, ka Lôn peugah haba ubak gata sabab Ulôn meureuka ateueh gata nyang hana seutia.
14 Gata jeuet keu rungka-rungka nyang hana meuguna dan bansa-bansa nyang na bansikeulileng gata ji hina gata; tieb-tieb ureuëng nyang jijak rot nyan jipeujiôh droe nibak gata.
15 Meunyoe Ulôn beungéh dan geungeuen keu gata dan Lôn huköm gata, bandum bansa nyang na di seukeulileng gata jirasa gli. Awaknyan jihina gata dan luwat óh jingieng gata.
16 Ulôn Lôn peuranab bubena peunajoh keuneubah nyang gata keubah dan Lôn peubiyeu peunduduek gata keunong deuk. Awaknyan jirasa pakriban sakét jih meunyoe deuk, lagée aneuk panah tajam nyang peureulong beusôt dan jipeubinasa gata.
17 Seulaén beuncana deuk nyan Lôn peutron teuma bala peunyakét, keukeujaman dan prang keu jipeumaté peunduduek gata, dan beulatang-beulatang juah mangat jipeumaté aneuëk-aneuëk awaknyan. Ulôn, TUHAN, ka Lôn peugah haba."

Chapter 6

TUHAN meufeureuman ubak ulôn, "He manusia fana, pandang kheueh gunong-gunong Israel, dan peusampoe kheueh peusan Ulôn keuhai huköman keu awaknyan.
3 Yue kheueh bak awaknyan beujideungoe dan jisimak peue nyang Ulôn, TUHAN Nyang Mahamanyang peugah ubak gunong-gunong nyan, meunan cit ubak bukét-bukét, barieh-barieh dan pantôn-pantôn. Beutôi, Ulôn kirém peudeueng keu Lôn peuhanco teumpat-teumpat seumah beurala.
4 Miseubah-miseubah awaknyan teureuloh dan dupa-dupa awaknyan teupeubeukah. Bandum ureuëng nyang na disinan teupeumaté dikeue beurala jihnyan.
5 Ulôn kupeujeuet manyét-manyét ureuëng Israel meutabu beba; dan tuleueng-tuleueng awaknyan Lôn peuhambô dikeue miseubah nyan.
6 Bandum banda Israel teupeuhanco, bandum miseubah dan beurala awaknyan hanco meutabu beba, dupa-dupa awaknyan meutabu teueng bayeueng hán meuho saho dan peue-peue mantong nyang awaknyan peugét gadôh.
7 Dipat mantong na ureuëng nyang teupoh maté, dan awaknyan nyang mantong udeb jiteupeue bahwa Ulôn kheueh TUHAN.
8 Teuma bacut sagai lamkawan awaknyan nyang Lôn peuseuleuseh nibak mawöt dan awaknyan Lôn peusiseu sidroe saho lamkawan bansa-bansa;
9 disideh awaknyan udeb di teumpat nyang teuböih. Laju awaknyan teuingat ubak Ulôn dan muphom bahwa Ulôn ku huköm meunan cit Lôn hina awaknyan sabab até awaknyan hana seutia ubak Ulôn. Awaknyan ka jitinggai Ulôn dan jipiléh beurala sibagoe geunantoe Ulôn. Laju awaknyan luwat deungon droe jih keudroe sabab bandum keujeuhetan dan keukeujian nyang ka awaknyan peubuet.
10 Dan awaknyan jiteupeue bahwa Ulôn kheueh TUHAN dan bahwa bandum peuingat nyang Ulôn bri bukon ancaman-ancaman beulaka."
11 TUHAN Nyang Mahamanyang meufeureuman, "Beuseudeh kheueh! Meuba-e kheueh! Tamo kheueh beu meuwéueh-wéueh sabab bandum keujeuhetan dan keukeujian nyang ka jipeubuet lé bansa Israel. Awaknyan maté lé sabab prang, deuk dan bala peunyakét.
12 Awaknyan bandum jirasa beungéh nyang raya that nibak Ulôn. Ureuëng-ureuëng nyang jiôh di teumpat nyang teuböih rhot keusakét dan laju maté; nyang tô maté dimideuen prang, dan nyang tinggai maté sabab lé deuk.
13 Manyét-manyét awaknyan meutabu beuba lamkawan beurala nyang na bansikeulileng miseubah, teugageueng di tieb-tieb bukét nyang manyang, dan nibak pucak tieb-tieb gunong, di miyueb tieb-tieb bak kayée nyang rampak dan bak kayée nyang raya; éuet haba, dipat mantong awaknyan jitot keureubeuen keu beurala awaknyan. Dan somantong ureuëng jiteupeue bahwa Ulôn kheueh TUHAN.
14 Nyoe, Ulôn Lôn beuôt jaroe Ulôn dan Lôn peuhanco nanggroe awaknyan, sampoe ka jeuet keusungue nyang hana ureuëng, phon di Guron Seulatan trok ubak banda Ribla di utara. Nibak teumpat-teumpat jiduek lé ureuëng Israel, hana meusaboh pih nyang geupeuseulamat. Dan jiteupeue kheueh bandum ureuëng bahwa Ulôn kheueh TUHAN."

Chapter 7

TUHAN meufeureuman ubak ulôn,
2 "He manusia fana, Ulôn, TUHAN Nyang Mahamanyang, keuneuk peugah haba nyoe keu tanoh Israel: Nyoe kheueh keuneulheuh riwayat keu nanggroe nyoe!"
3 TUHAN meufeureuman, "He Israel, jinoenyoe ka trok watée gata habéh umu. Gata tarasa meureuka Ulôn. Gata Ulôn adili sipadan ngon buet gata nyang kutoe.
4 Ulôn hana Lôn gaséh atawa Lôn bri amphon keu gata. Ulôn kuhuköm gata sipadan deungon bandum buet nyang keuji nyang ka gata peubuet. Dan tateupeue kheueh lé gata bahwa Ulôn kheueh TUHAN."
5 Nyoe kheueh nyang geupeugah lé TUHAN Nyang Mahamanyang ubak bansa Israel, "Bala deumi bala jiteuka ateueh gata.
6 Jinoenyoe bandum ka keuneulheuh. Nyoe kheueh keuneulheuh gata. Hana harapan le nibak gata.
7 Bandum ka page keu gata, he bansa nyang tinggai nibak tanoh nyoe. Jinoe hana le khanuri-khanuri bak miseubah-miseubah di gunong-gunong, nyang na na kheueh karu sabe nyang hana reuda.
8 Hana treb le gata tarasa meureuka Ulôn nyang paleng teumakot. Gata Ulôn adili sipadan ngon buet nyang gata peubuet. Teuma Lôn balaih ateueh gata mandum buet nyang kuto.
9 Ulôn hana Lôn gaséh atawa Lôn bri amphon ubak gata. Ulôn kuhuköm gata sipadan deungon buet nyang kuto nyang ka gata peubuet. Dan barô kheueh gata teupeue bahwa Ulôn kheueh TUHAN dan Ulôn kheueh nyang huköm gata."
10 Uroe kiamat keu bansa Israel ka trok jiteuka. Keujeuhetan meuraja lela. Keusombongan ka trok bak puncak jih.
11 Keukeujaman meuakibat jih leubeh le keujeuhetan. Bandum keukayaan, keuagongan dan keujayaan awaknyan habéh hana meubeukaih.
12 Watée jih reujang teuka, uroe jih ka tô lumpah na! Ureuëng nyang bloe dan ureuëng peubloe hana meuteumé laba le, sabab huköman Po teu Allah rhot ateueh bandum manusia.
13 Hana ureuëng meukat nyang bagaih meurumpok lom peue nyang ka jipeubloe, sabab meureuka Po teu Allah rhot ateueh soemantong. Ureuëng nyang jeuhet hana seulamat.
14 Beureuguih jimeusu dan bandum ureuëng ka siab-siab. Teuma hana meusidroe pih nyang na jak u mideuen prang, sabab meureuka Po teu Allah rhot ateueh bandum manusia.
15 Bak rot-rot ueh raya lam banda na muprang, di rumoh-rumoh na bala peunyakét dan musém deuk. Soemantong nyang na di luwa banda maté di mideuen prang, dan nyang tinggai lam banda keunong peunyakét dan deuk.
16 Siladum teupeusie nibak mawöt dan jipeuplueng droe u gunong-gunong. Disinan awaknyan jeuet lagée cicém leuek nyang teuparôh di pantôn-pantôn; bandum meurang-rang sabab desya-desya awaknyan keudroe.
17 Somantong ureuëng leumoh jaroe dan guyah teuôt.
18 Awaknyan jingui ija krông dan bansaboh tuboh jih yo meugám-gám. Ulée awaknyan teucukoe ôk dan awaknyan teupeumalée.
19 Méuh dan pirak awaknyan böih bak rot raya lagée geutiek bröh, sabab bak uroe TUHAN teuka beungéh nyang luwa biasa nyan, méuh dan pirak nyan hana hase jipeuseulamat awaknyan, teuma ka jijeurumus awaknyan u dalam desya. Awaknyan hana hase jipeuguna nyan keu jipeupuih nafeusu atawa keu jipeutroe pruet awaknyan keudroe.
20 Yoh masa ilée awaknyan bangga deungon peumata nyang ceudah, teuma sabab awaknyan jipeuguna keu jipeugét beurala-beurala nyang lumpah luwatnyan, laju TUHAN geupeujeuet hareuta awaknyan keu sapeue-sapeue nyang lumah teumakot ngon gli.
21 TUHAN meufeureuman ubak bansa Israel, "Ulôn Lôn peubiyeu ureuëng-ureuëng aséng jijak reupah hareuta gata. Ureuëng-ureuëng jeuhet jireubot atra gata dan jipeukuto gata.
22 Ulôn hana Lôn tulông meunyoe Baét Ulôn jipeurusak dan jipeukuto lé peurampok-peurampok.
23 Bansaboh nanggroe ka jeuet keukaru ka-ák ka-ôk; dipat mantong na ureuëng teupoh maté dan keukeujaman.
24 Bansa-bansa nyang paleng juah Lôn peuteuka keu jijak duek bak rumoh-rumoh gata. Ureuëng-ureuëng nyang gata anggab hebat nyang paleng peukasa yo watée bansa-bansa nyan Ulôn peubiyeu jipeuhanco teumpat-teumpat iébadat gata.
25 Awaknyan keunong lé keuseudehan dan putôh asa, laju jimita keudaméan, teuma hana jiteumé.
26 Mala peutaka dan haba brok hana putôh-putôh teuka u ateueh awaknyan. Gata meudoá mangat bubena Nabi geutem ngieng kutika, teuma awaknyan hana hase. Meunan cit bubena teungku imeum hana kuasa peue nyang harôh geupeurunoe keu umat, dan dumna peumimpén ka habéh naseuhat.
27 Raja meuba-e, putra mahkota putôh asa dan rakyat yo sabab teumakot. Ulôn Lôn huköm gata nyang sisuai deungon peue nyang ka gata peubuet dan Lôn peusidang gata lagée gata nyang ka tapeusidang ureuëng laén. Dan barô kheueh gata teupeue bahwa Ulôn nyoe na kheueh TUHAN."

Chapter 8

Bak tanggai limong buleuen nam bak thon nyang keunam kamoe jiböih u teumpat laén, peumimpén-peumimpén ureuëng nyang teuböih Yehuda nyan jijak u rumoh lôn dan jiduek-duek meusajan ngon ulôn. Ngon hana teusangka-sangka keukuasaan TUHAN Nyang Mahamanyang ka geukuasa bansaboh badan lôn.
2 Laju ulôn tangah dan deuh laju ulôn ngieng na nyang saban lagée manusia. Phon bak keuieng jih sampoe u miyueb deuh jih lagée apui, dan nibak keuieng u ateueh deuh jih lagée meukiwieng-kiwieng lagée peurunggu nyang teuasah.
3 Gobnyan laju geu sunyueng sapeue-peue nyang saban lagée jaroe, laju jihila ôk ulôn. Óh lheueh nyan lam deuh lôn kalon nyan, ulôn laju jibeuôt manyang-manyang u ateueh manyang lé Roh Allah dan laju jiba u Baét TUHAN di Yerusalem, bak babah pintoe tamong seuramoe dalam nyang na di siblaih utara. Nibak teumpat nyan na meuteumé patong beurala nyang jipeuteuka meureuka Po teu Allah.
4 Dan leumah laju ulôn ngieng trang bandrang nyang muble-ble cahya sibagoe tanda TUHAN Allah Israel ka geuteuka, saban lagée nyang ulôn ngieng watée ulôn na bak binéh Krueng Kebar.
5 Po teu Allah meufeureuman ubak ulôn, "Hei manusia fana, pandang kheueh u arah utara." Ulôn seutôt, blaih miseubah bak binéh rot tamong, deuh laju ulôn kalon beurala nyang teupeusabab Po teu Allah beungéh lagoe na.
6 Allah meufeureuman ubak ulôn, "Hei manusia fana, gata ngieng kheueh peue nyang teungoh teujadi? Gata ngieng kheueh laju pakriban buet-buet nyang luwat nyang ka jipeubuet lé ureuëng Israel, nyang peujiôh Ulôn nibak Baét Lôn! Jak keunoe, Ulôn tunyok ubak gata hai-hai nyang leubeh kuto lom."
7 Óh lheueh nyan laju geuba ulôn ubak babah pintoe tamong leuen bagian keue dan laju geupeuleumah saboh ruhuéng bak beuton nyan.
8 Kheun Gobnyan, "Hei manusia fana, peurayeuk kheueh ruhuéng nyoe." Óh ka lheueh ulôn peubuet, laju deuh lôn ngiéng saboh pintoe.
9 Kheun Gobnyan ubak ulôn, "Tamong kheueh dan kalon kheueh buet-buet nyang kutoe dan luwat lumpah na nyang jipeubuet lé awaknyan bak teumpat nyan."
10 Ulôn pih lôn tamong dan laju lôn ngiéng. Bintéh-bintéh kama nyan peunoh teu uke ngon mubagoe rupa ukeran uleue dan beulatang-beulatang hareuem nyang laén, meunan cit mubagoe ukeran beurala nyang jipujoe lé ureuëng-ureuëng Israel.
11 Na tujoh ploh droe peumimpén bansa Israel nyang na disinan, jitamong cit keunan Yaazanya bin Safan. Maséng-maséng awaknyan jimat saboh dupa keumeunyan nyang meuasab.
12 Allah meufeureuman ubak ulôn, "Hei manusia fana, gata kalon peue nyang jipeubuet lé peumimpén-peumimpén Israel deungon cara seungab-seungab? Awaknyan jimeu iébadat lam kama nyang peunoh beurala deungon alasan bahwa Ulôn ka Lôn tinggai nanggroe nyoe dan hana Lôn kalon peue nyang jipeubuet nyan."
13 Laju TUHAN geutanyong ubak ulôn, "Gata takalon buet nyang jipeubuet lé awaknyan leubeh luwat nibak nyang ka."
14 Teuma laju geuba ulôn ubak babah pintoe geureubang Baét TUHAN dan geupeuleumah laju ubak ulôn ureuëng-ureuëng inong nyang teungoh jipeumo ba-e Dewa Tamus nyang ka maté.
15 TUHAN meufeureuman ubak ulôn, "Hei manusia fana, peu kheueh na gata ngieng hai nyan? Mantong jai that-that hai-hai nyang luwat lumpah na."
16 Laju geuba ulôn ubak seuramoe Baét TUHAN. Bak binéh pintoe rot tamong lam ruweueng suci, lamkawan miseubah dan jurong, na dua ploh limong droe. Awaknyan jipeulikot ruweueng suci, dan laju jisujut u arah timu jiseumah mata uroe teubiet.
17 TUHAN meufeureuman ubak ulôn, "Hei manusia fana, peu kheueh gata ngieng nyan? Ureuëng-ureuëng Yehuda nyoe hana puih meunyoe jipeubuet hai-hai nyang luwat nyan dan jipeubuet lom hai-hai nyang hana meuprikeumanusiaan bansaboh nanggroe. Awaknyan pih hana yo sapeue jipeubuet hai nyang lagée nyan bak teumpat nyoe, lam rumoh Ulôn nyang jipeujeuet Ulôn meutamah beungéh ubak jihnyan. Ngieng kheueh pakriban awaknyan jihina Ulôn ngon cara nyang paleng jeuhet!
18 Awaknyan jiteumeurasa pakriban sakét keunong meureuka Ulôn nyang brat! Ulôn hana kupeumeuáh dan Lôn peu amphon awaknyan. Bahpi awaknyan jimeudoá ngon cara jidumpék dan su nyang kreueh dan teuga ubak Ulôn, teuma di Ulôn teutab hana Lôn deungoe doa awaknyan!"

Chapter 9

Óh lheueh nyan ulôn deungoe teuma Po teu Allah geumeuhôi, "Tajak kheueh keunoe he ureuëng-ureuëng nyang peujak huköman Lôn ateueh banda nyoe. Taba kheueh sinjata-sinjata gata."
2 Deungon meusigoe that teuka keunan nam droe ureuëng rot luwa geureubang Utara Baét TUHAN, maséng-maséng awaknyan jiba sinjata. Meusajan ngon awaknyan na ureuëng nyang jisôk peukayan ija lineun bak jaroe jih na jiba sajan alat teumuléh. Awaknyan jitamong dan jidong bak binéh miseubah peurunggu.
3 Laju cahya muble-ble nyang meutanda keuhaderan Allah Israel, jiteubiet cahya lam kerub-kerub, laju jiminah nibak teumpat jih nyang phon ubak babah pintoe tamong Baét TUHAN. Dan TUHAN laju geutawök ureuëng nyang meupeukayan ija lineun nyan sira geupeugah,
4 "Tajak laju ubak jeueb-jeueb sagoe banda dan taboh kheueh tanda nibak keuneng soe mantong ureuëng nyang meurasa seudeh dan susah sabab bandum buet nyang lumpah luwat nyang jipeubuet nibak banda nyan."
5 Ulôn deungoe Po teu Allah meufeureuman ubak ureuëng-ureuëng nyang laén, "Seutôt kheueh gobnyan ho-ho nyang geujak bansaboh sagoe banda dan peumaté kheueh bubena ureuëng ngon hana amphon.
6 Peumaté kheueh bandum ureuëng agam dan ureuëng inong, tuha dan muda, ureuëng tuha dan aneuëk manyak. Teuma bék tacukéeh meusidroe pih nyang na tanda bak keuneng. Phon disinoe, nibak Baét Ulôn nyoe." Dan awaknyan laju jipeuphon tugaih jih keudroe deungon cara jipoh maté bandum peumimpén Israel nyang teungoh jidong di Baét TUHAN.
7 Po teu Allah geupeugah ubak awaknyan, "Peukuto kheueh Baét Ulôn nyoe! Peupeunoh kheueh bandum leuen Baét nyan deungon manyét-manyét manusia. Peuphon kheueh laju!" Dan awaknyan laju jijak poh maté ureuëng-ureuëng nyang na didalam banda.
8 Watée teupoh maté ureuëng-ureuëng lam banda nyan teungoh teujadi, ulôn na disinan sidroe mantong. Laju lôn sujut dan lôn meulakée, "Ya TUHAN Nyang Mahamanyang, beungéh that Droeneueh keu Yerusalem sampoe neupoh maté bandum ureuëng nyang mantong na di Israel nyoe?"
9 Geujaweueb lé Po teu Allah, "Ureuëng-ureuëng Israel dan Yehuda ka jipeubuet desya nyang keubit rayeuk. Awaknyan ka jipeumaté manusia jeueb-jeueb sagoe, dan Yerusalem jipeukutoe deungon keujeuhetan. Awaknyan jipeugah bahwa Ulôn, TUHAN, ka Lôn tinggai nanggroe nyoe sampoe hana hase teukalon buet-buet nyang jipeubuet.
10 Ulôn hana Lôn gaséh awaknyan. Teuma Lôn peubuet ateueh awaknyan peue-peue nyang ka jipeubuet ateueh ureuëng laén."
11 Óh lheueh nyan ureuëng nyang meupeukayan lineun nyan geugisa geujak meulapor ubak TUHAN, kheun gobnyan, "Bandum peurintah TUHAN ka teukeureuja."

Chapter 10

Laju ulôn kalon ubak kubah nyang na di ateueh ulée kerub-kerub nyan, dan lôn ngieng sapeue-peue nyang lagée takhta batée nilam.
2 Óh lheueh nyan Po teu Allah geupeugah ubak ureuëng nyang sôk peukayan lineun nyan, "Lhob kheueh laju lam ruweueng ruda-ruda nyang na di miyueb kerub-kerub nyan, dan cok laju saboh reugam ngeue apui. Dan sipreuk kheueh ngeue apui nyan u ateueh banda." Gobnyan jiturot, dan di ulôn ku ngieng hainyan.
3 Watée ureuëng nyan jitamong, kerub-kerub nyan teungoh jidong di siblaih seulatan Baét TUHAN. Na sigumpai awan ka peunoh lam seuramoe dalam dan bansaboh Baét TUHAN.
4 Cahya nyang muble-ble sibagoe tanda TUHAN ka teuka keunan leumah jiteubiet dalam kerub-kerub nyan dan laju jiminah ubak babah pintoe tamong lam Baét TUHAN, sampoe seuramoe nyan ka peungéuh ngon trang bandrang nyang meucahya.
5 Su sayeueb kerub-kerub nyan watée jikeupak teudeungoe ubak seuramoe luwa, lagée su Po teu Allah Nyang Mahakuasa.
6 Óh ka lheueh TUHAN geuyue bak ureuëng nyang sok peukayan lineun nyan saboh reugam ngeue apui lam ruweueng ruda dimiyueb kerub-kerub nyan, ureuëng nyan tamong dan jidong digeunireng saboh lamkawan ruda-ruda nyan.
7 Dan laju saboh lamkawan kerub nyan jipeutamong jaroe jih u dalam apui nyang na lamkawan awaknyan, dan jicok laju napadub krék ngeue apui nyan, dan ngeue apui nyang ka jicok nyan jijok laju ubak ureuëng nyang sok peukayan lineun nyan. Ureuëng nyan laju jiteurimong óh lheueh nyan jibeudôh di sinan laju jijak.
8 Deuh ulôn kalon bahwa dimiyueb sayeueb tieb-tieb kerub nyan na sapeue-peue nyang hi jih saban ngon jaroe manusia.
9 Meunan cit deuh ulôn kalon bahwa tieb-tieb kerub nyan maséng-maséng na saboh ruda disampéng. Ban peuet boh ruda nyan saban, dan hu muble-ble lagée peumata indah. Maséng-maséng na saboh teuk ruda laén nyang meulienteueng di teungoh-teungoh nyan.
11 Deungon lagée nyan kerub-kerub nyan jeuet jijak bak peuet jurosan. Awaknyan jeuet jijak homantong nyang awaknyan galak, deungon hana jiputa tuboh jih nyan.
12 Bansaboh tuboh awaknyan, rhueng jihnyan, jaroe jih, sayeueb jih dan ruda-ruda pih peunoh deungoe mata.
13 Ulôn deungon bahwa ruda-ruda nyan teuboh nan, "puteueng beuliong".
14 Tieb-tieb kerub nyan hi jih meulaén-laén. Hi nyang phon na kheueh lagée banteng, nyang keudua hi manusia, nyang keu lhée hi singa, dan nyang keu peuet hi cicém siwah.
15 Kerub-kerub nyan kheueh nyang ulôn ngieng ilée nibak binéh Krueng Kebar. Pajan mantong keurub-kerub nyan jimeugrab atawa jipeukeumang sayeueb jihnyan, ji-ék u manyang atawa jipo maju atawa jipiôh, ruda-ruda nyan sabe jiseutôt, sabab jikuasa lé kerub-kerub nyan.
18 Laju lé cahya muble-ble nyang tanda jih keuteuka TUHAN jitinggai laju babah pintoe tamong u Baét TUHAN dan jiminah u ateueh keurub-kerub nyan.
19 Ulôn ngieng kerub-kerub nyan jipeukeumang sayeueb jih laju jipo jitinggai tanoh, dan ruda-ruda jihnyan pih jijak sajan. Laju awaknyan jipiôh bak binéh pintoe geureubang Baét TUHAN nyang na di siblaih u timu, seudangkan cahya muble-ble teutab na ateueh awaknyan.
20 Ulôn laju teuingat bahwa nyan kheueh keurub-kerub nyang yoh masa dilée ulôn kalon na dimiyueb Po teu Allah Israel, bak binéh Krueng Kebar.
21 Kerub-kerub nyan maséng-maséng na peuet macam hi, dua pasang sayeueb, dan meunan cit sapeue-peue lagée jaroe manusia dimiyueb sayeueb-sayeueb jihnyan.
22 Ruman awaknyan saban cit lagée nyang ka ulôn ngieng nibak binéh Krueng Kebar. Maséng-maséng jijak teupat ukeue.

Chapter 11

Laju ulôn geubeuôt lé Roh Po teu Allah dan geuba laju ubak babah pintoe geureubang siblaih Timu Baét TUHAN. Disinan na ulôn kalon 25 droe, lamkawan awaknyan na meuteumé peumimpén bansa, ureuëng nyan na kheueh Yaazanya bin Azur dan Pelaca bin Benaya.
2 Po teu Allah meufeureuman ubak ulôn, "He manusia fana, nyoe kheueh ureuëng-ureuëng nyang jireuncana keuneuk peubuet nyang jeuhet di banda nyoe dan jijok naseuhat nyang sisat hana ngon peusa.
3 Lé sabab nyan tapeusampoe kheueh peusan Ulôn keuhai huköman keu awaknyan, he manusia fana. Sabab awaknyan jipeugah, 'Hana treb le rumoh-rumoh nyoe ta peudong lom. Banda nyoe na kheueh beulangöng dan geutanyoe bandum na kheueh uengkot sie didalam beulangöng nyan. Geutanyoe aman nibak apui hu nyang meuháb-háb sabab jilindong lé beulangöng nyoe.' "
5 Óh lheuehnyan Roh TUHAN ka peunoh lam ulôn, dan ulôn geuyue lé TUHAN mangat lôn peugah ubak umat Israel, "He bansa Israel, Ulôn kuteupeue peue nyang gata peugah dan nyang gata reuncana.
6 Keubiet that le manusia nyang ka gata peumaté, sampoe rot-rot didalam banda ka peunoh ngon manyét manusia.
7 Sabab nyan, Ulôn, TUHAN Nyang Mahamanyang, Lôn peugah ubak gata: Beutôi, banda nyoe na kheueh beulangöng, teuma uengkot sie nyang na didalam nyan bukon kheueh gata, teuma manyét ureuëng-ureuëng nyang ka teupoh maté! Teuma di gata Lôn use neuteubiet nibak banda nyoe!
8 Peu kheueh gata teumakot keu peudeueng? Teuma Lôn kirém ureuëng nyang ba peudeueng keujijak prang gata.
9 Gata Lôn ba dan Lôn peuteubiet lam banda dan Lôn seurah ubak ureuëng aséng. Ulôn ka Lôn peurhot huköman maté ateueh gata.
10 Gata maté dimideuen di nanggroe gata keudroe, teuma neuteupeue kheueh lé gata bahwa Ulôn kheueh TUHAN.
11 Lé sababnyan, gata hana aman lam banda nyoe, hana lagée uengkot sie lam beulangöng. Ulôn Lôn peucrok dan Lôn huköm gata dipat mantong gata na lam nanggroe Israel.
12 Dan barô kheueh gata teupeue bahwa Ulôn kheueh TUHAN dan gata Ulôn huköm sabab ka gata iengkeue bak peuratoran-peuratoran Lôn dan hana gata pakoe peurintah-peurintah Lôn deungon cara gata seutôt huköm bansa-bansa nyang na di seukeulileng gata."
13 Teungoh lôn peugah haba nyan, hana teusangka-sangka Pelaca reubah laju maté. Dan ulôn pih laju lôn sujut dan meulakée, "Óh, TUHAN Nyang Mahamanyang! Peu kheueh banmandum nyang na tinggai sidroe sapat ureuëng Israel nyoe keuneuk neupeumaté?"
14 TUHAN meufeureuman lom ubak ulôn,
15 "He manusia fana, gata dan rakan-rakan gata nyang na di teumpat nyang teuböih teungoh jeuet keuboh nariet lé peunduduek Yerusalem. Kheun awaknyan, 'Ureuëng-ureuëng nyang teuböih nyan lumpah that jiôh nibak Yerusalem keujijak iébadat ubak TUHAN. Tanoh Israel ka geubri lé TUHAN keu geutanyoe.'
16 Sabab nyan, peusampoe kheueh peusan Ulôn nyoe ubak rakan-rakan gata nyang na di teumpat nyang teuböih, bahwa Ulôn kheueh nyang ba awaknyan di jiôh lamkawan bansa-bansa nyang Lôn peusipreuk awaknyan di nanggroe-nanggroe nyan. Teuma teungoh awaknyan mantong na disinan, Ulôn kupeungon awaknyan.
17 Ulôn, TUHAN Nyang Mahamanyang, Ulôn peugah bahwa Ulôn Lôn gumpôi awaknyan nibak nanggroe-nanggroe di teumpat awaknyan teusipreuk, laju Lôn jok pulang tanoh Israel ubak awaknyan.
18 Meunyoe awaknyan jiwoe, awaknyan geuböih bandum beurala nyang kuto dan nyang luwat that nyang awaknyan teumé.
19 Awaknyan Lôn bri até nyang barô dan budho basa nyang barô teuma. Até awaknyan nyang kreueh lagée batée Ulôn cok dan Lôn gantoe ngon até nyang taát ubak ulôn.
20 Dan awaknyan taát ubak peuratoran-peuratoran Lôn dan seutia jiseutôt bandum peurintah Ulôn. Awaknyan jeuet keu umat Lôn dan Ulôn jeuet keu Allah awaknyan.
21 Teuma ureuëng-ureuëng nyang galak jiseumah beurala nyang kuto dan nyang luwat that nyan, Lôn huköm sabab pi-e awaknyan nyang jeuhet nyan." Meunan kheueh feureuman TUHAN Nyang Mahamanyang.
22 Kerub-kerub nyan ka jipeuphon po meunan cit deungon ruda-ruda nyan jiseutôt sajan. Cahya muble-ble nyang keutanda teuka Allah Israel na di ateueh awaknyan.
23 Óh lheueh nyan cahya nyang muble-ble nyan laju jitinggai Yerusalem dan jiminah ubak gunong siblaih utimu banda nyan.
24 Lam keumalon nyan, Roh Po teu Allah geubeuôt ulôn dan geupeuriwang ulôn ubak ureuëng-ureuëng nyang teuböih di Babel. Óh lheueh nyan gadôh kheueh nyang teukalon nyan.
25 Laju ulôn calitra ubak ureuëng-ureuëng nyang teuböih peue-peue mantong nyang ka geupeuleumah lé TUHAN ubak ulôn.

Chapter 12

TUHAN meufeureuman lom ubak ulôn, kheun Gobnyan,
2 "He manusia fana, gata tinggai lamkawan kawöm peumbeurontak. Bak awaknyan na mata, teuma hana jimeungieng; na geulinyuéng, teuma hana jeuet meudeungoe, sabab awaknyan galak bak buet beurontak.
3 Sabab nyan, he manusia fana, teungoh uroe mantong peungéuh, peukemah laju barang-barang gata dan peutamong laju dalam bingkih ija lagée lazém nyang ka jipeubuet lé ureuëng nyang teuböih. Sigohlom malam teuka, tinggai kheueh laju rumoh gata trang-trang lagée ureuëng nyang teuba u teumpat nyang teuböih. Peuruhuéng kheueh laju bintéh rumoh gata deungon jikalon lé kawöm peumbeurontak nyan, dan taba laju bingkih barang gatanyan tapeutamong rot ruhuéng nyang ka gata peubeusôt bak bintéh rumoh gata dan peuteubiet laju. Gulam kheueh bingkih nyan ateueh bahoe gata. Beurangkat kheueh lam seupôt buta; tatôb kheueh mata gata sampoe gata hana deuh rot nyang teungoh tajak nyan. Bah kheueh silurôh bansa Israel jikalon bandum peue nyang gata peubuet nyan, mangat jeuet keupeu ingat nibak awaknyan, barang kali awaknyan insaf bahwa droe awaknyan keudroe na kheueh peumbeurontak."
7 Laju ulôn peubuet peurintah TUHAN ubak ulôn. Bak uroe nyan cit teuma, watée mantong uroe, laju lôn peukeumah barang-barang lôn dalam saboh bingkih ija, lagée nyang ka lazém geupeubuet lé ureuëng meungungse. Watée uroe ka jipeuphon malam, laju lôn peugét ruhuéng ngon jaroe lôn bak bintéh rumoh lôn keudroe, óh lheuehnyan laju lôn teubiet lam rumoh nyan. Deungon jingieng lé bandum ureuëng nyang na disinan, bingkih ija nyan lôn gulam bak bahô lôn, óh lheueh nyan laju ulôn jak.
8 Óh singoh beungoh TUHAN meufeureuman ubak ulôn, meunoe geupeugah,
9 "He manusia fana, bansa Israel, bansa peumbeurontak nyan ka jitanyong ubak gata peue nyang teungoh gata peubuet.
10 Sabab nyan peusampoe kheueh ubak awaknyan peue nyang Ulôn, TUHAN Nyang Mahamanyang peugah ubak awaknyan. Peusan Lôn nyan teutuju ubak raja nyang na di Yerusalem, dan mandum peunduduek banda nyan.
11 Peutrang kheueh bahwa peue nyang gata peubuet nyan na kheueh lambang peue nyang teujadi ateueh awaknyan, na kheueh: awaknyan jeuet keu ureuëng nyang teuböih dan ureuëng teutawan.
12 Lam seupôt butanyan raja awaknyan jigulam bingkih ija jih di ateueh bahô jih dan laju jijak. Ureuëng-ureuëng nyang laén jipeugét ruhuéng nibak bintéh mangat awaknyan hase jiteubiet. Gobnyan jitob mata jih mangat nék leumah rot nyang teungoh jijak nyan.
13 Teuma Ulôn kutiek jeue mangat awaknyan hase ulôn drob. Laju awaknyan Ulôn ba u banda Babel, dan disinan awaknyan maté hana jiteumé kalon banda nyan.
14 Bandum nyang na tinggai lam meuligoe jitamong cit keunan bandum peunaseuhat dan peungawai pribadi raja nyan Ulôn peucrebre u jeueb-jeueb jurosan. Awaknyan Lôn tiyeub dan Ulôn poh maté.
15 Watée awaknyan Ulôn peucrebre lamkawan bansa laén di nanggroe-nanggroe aséng, awaknyan jiteupeue bahwa Ulôn kheueh TUHAN.
16 Na bacut nibak awaknyan Lôn peuseulamat nibak mideuen prang, nibak keunong deuk, dan nibak bala peunyakét, mangat lamkawan bansa-bansa aséng nyan awaknyan sadar bahwa awaknyan ka jipeubuet nibak buet nyang paleng kuto. Dan awaknyan jimeungaku bahwa Ulôn kheueh TUHAN."
17 TUHAN meufeureuman ubak ulôn, "He manusia fana, beuyo kheueh gata bak watée gata pajoh bu, dan beumeutot-tot kheueh sabab gata teumakot bak watée gata tajieb ié.
19 Peusampoe kheueh ubak mandum bansa, peue nyang Ulôn, TUHAN Nyang Mahamanyang peugah ubak peunduduek Yerusalem nyang mantong tinggai ditanoh awaknyan. Awaknyan yo watée jipajoh bu dan yo meukot-kot watée jijieb ié. Tanoh awaknyan jeuet keu tandus, sabab bandum ureuëng nyang na tinggai disinan hana putôh-putôh geuiengkeue huköm.
20 Banda-banda nyang jinoenyoe peunoh deungon peunduduek teupeuhanco dan ladang-ladang jeuet keu guron. Dan jiteupeue kheueh lé awaknyan bahwa Ulôn kheueh TUHAN."
21 TUHAN meufeureuman ubak ulôn, "He manusia fana, pakon ureuëng Israel galak jipeugah-peugah pribasa nyoe: 'Masa meugantoe, teuma nubuat-nubuat hana ántom teujadi'?
23 Nah, peutrok kheueh ubak awaknyan bahwa Ulôn, TUHAN Nyang Mahamanyang, Ulôn jaweueb lagée nyoe: Pribasa nyan Lôn peugadôh, sampoe hana le jipeugah-peugah di Israel. Sibagoe geunantoe peugah laju ubak awaknyan lagée nyoe, 'Masa jih ka trok, dan tieb-tieb nubuat teuma teujadi.'
24 Di Israel hana na le keumalon dan ramaian peuleusu,
25 Ulôn, TUHAN Nyang Mahamanyang Lôn mariet bak bansa Israel, dan bandum nyang Ulôn peugah pasti teujadi, hana teupeue eunteuk singoh le. Deungoe kheueh hé kawöm peumbeurontak! Watée masa udeb gata Lôn peubuet bandum nyang Ulôn peurintah ubak gata. Ulôn, TUHAN Nyang Mahamanyang ka Lôn peugah haba."
26 Feureuman TUHAN ubak ulôn,
27 "He manusia fana, ureuëng-ureuëng Israel jipeugah bahwa keumalon dan nubuat gata barô kheueh jeuet jiôh bak uroe nyang teuma teuka.
28 Sabab nyan, peugah kheueh ubak awaknyan, bahwa Ulôn, TUHAN Nyang Mahamanyang, Lôn peugah: Bandum nyang Ulôn peugah pasti jadéh na, hana teupeu eunteuk singoh le. Ulôn, TUHAN Nyang Mahamanyang ka Lôn peugah haba!"

Chapter 13

TUHAN meufeureuman ubak ulôn,
2 "He manusia fana, tateunak kheueh nabi-nabi Israel nyang jipeugah ramai keunarang jih keudroe. Yue kheueh awaknyan mangat jideungoe peue nyang Ulôn peugah."
3 TUHAN Nyang Mahamanyang meufeureuman, "Ceulaka kheueh nabi-nabi nyang bangai nyan! Ilham jihnyan meuteumé nibak khayalan jih keudroe dan keumalon jihnyan peuleusu mandum.
4 He Israel, nabi-nabi gata nyan hana meuguna, saban cit lagée asée-asée srigala nyang udeb di teungoh-teungoh rungka banda.
5 Awaknyan hana jikeumiet teumpat-teumpat bintéh beuton nyang reuloh, dan meunan cit hana jipeugét bintéh-bintéh beuton nyang reuloh nyan. Jadi, Israel hana hase teupeuteun meunyoe beureutoh prang bak uroe Ulôn, TUHAN teuka geujak bri huköman.
6 Nyang jikalon-kalon lé awaknyan na kheueh peuleusu dan ramaian-ramaian awaknyan sulet. Awaknyan meungaku jiba peusan nibak Ulôn, padahai Ulôn hántom na Lôn utos awaknyan. Pakriban mungken awaknyan jiharab bak ramaian jih nyang teuma teujadi?
7 Ulôn, TUHAN Nyang Mahamanyang Lôn peugah ubak awaknyan, 'Keumalon-keumalon nyan peuleusu dan ramaian-ramaian nyan sulet mandum. Gata tapeugah bahwa bandum nyan na kheueh peusan Ulôn, padahai Ulôn hántom na Lôn peugah haba ubak gata! Sabab nyan Ulôn jeuet keu lawan gata.
9 Ulôn Lôn huköm gata, he nabi-nabi nyang peugah ramaian sulet dan nyang meukhayal keumalon-keumalon nyang hana beutôi! Gata hana jeuet le tabri keuputosan bak sidang-sidang umat Ulôn. Nan-nan gata teuceue nibak dafeutar marga Israel, dan gata hana teutuwoe le u tanoh ié gata. Teuma barô kheueh tateupeue bahwa Ulôn kheueh TUHAN Nyang Mahamanyang.
10 He Nabi-nabi peuleusu! Gata ka tapeusisat umat Ulôn deungon tapeugah bahwa banmandum aman dan béeréeh. Padahai mubacut pih hana! Umat Ulôn ka jipeudong timbok-timbok batée bata nyang guruek watée jipasang, óh lheuehnyan gata teuka tajak heuntam.
11 He nabi-nabi peuleusu! Beuton gata reuloh. Ulôn Lôn peutron ujeuen keuncang. Bintéh beuton nyan jiheuntam lé angén badée dan jitingkeh lé ujeuen es
12 sampoe reuloh, dan somantong ureuëng jitanyong keupeue guna jih bintéh beuton nyan teucet ngon gapu.' "
13 TUHAN Nyang Mahamanyang meufeureuman, "Watée beungéh Lôn nyan, Ulôn Lôn peutron angén badée, ujeuen keuncang dan ujeuen éh keu teupeuhanco bintéh beuton nyan.
14 Ulôn ka naniét keuneuk peureuloh bintéh beuton nyang gata cét ngon gapu nyan, Lôn peuteung bayeueng sampoe nyang tinggai keunaleueng mantong. Bintéh beutonnyan jitimpok dan jipeumaté gata banmandum. Dan barô kheueh gata teupeue bahwa Ulôn kheueh TUHAN.
15 Bintéh beutonnyan dan nyang ka tagapu nyan tarasa hebat jih beungéh Ulôn. Óh lheuehnyan Lôn peugah ubak gata bahwa bintéh beuton nyan gadôh leunyab, saban lagée gata boh gapu,
16 nabi-nabi peuleusu! Gata taramai bahwa Yerusalem aman dan béeréeh, padahai mubacut pi hana!" Meunan kheueh feureuman TUHAN Nyang Mahamanyang.
17 TUHAN meufeureuman, "Jinoenyoe, he manusia fana, tangieng kheueh ureuëng-ureuëng nyang meulagak lagée nabiah lamkawan bansa gata. Teunak kheueh awaknyan,
18 dan peusampoe kheueh peue nyang Ulôn, TUHAN Nyang Mahamanyang peugah ubak awaknyan: 'Ceulaka kheueh gata! Gata peugét keu bandum ureuëng gleueng meujimat dan tudông-tudông sakeuti mangat ureuëng nyang ngui atranyan meuteumé hase jikuasa udeb ureuëng laén. Gata keuneuk meukuasa ateueh udeb maté umat Ulôn, dan kuasa nyan gata ngui deumi keupeuntengan gata keudroe.
19 Gata ka gata hina Ulôn dikeue umat Lôn keudroe deungon harapan mangat meuteumé napadub ôn jeulai dan padub boh ruti. Ureuëng-ureuëng nyang hana meusalah, gata poh maté seudangkan ureuëng nyang seuharôh jih maté gata peubiyeu udeb. Laju gata peungéut umat Ulôn dan awaknyan peucaya ubak gata.' "
20 TUHAN Nyang Mahamanyang meufeureuman ubak ureuëng-ureuëng inong nyang meulagak lagée nabiah nyan, "Ulôn banci bak gleueng-gleueng jimat nyang gata ngui keu gata kuasa ateueh udeb maté umat Ulôn. Gleueng-gleueng nyan Lôn seuntak bak jaroe gata, dan ureuëng-ureuëng nyang gata kuasa Lôn peubeubaih.
21 Tudông-tudông sakeuti gata Ulôn priek, dan umat Ulôn Lôn peujiôh nibak peungaroh jeuhet gata siumu masa. Dan barô kheueh gata teupeue bahwa Ulôn kheueh TUHAN.
22 Ureuëng-ureuëng nyang jroh nyang hana jitem gata peubuet sapeue ateueh jih, gata peujeuet cut até deungon sulet gata nyan. Ureuëng-ureuëng jeuhet gata peujeuet raya até mangat teutab meudesya dan hana teupeu udeb phon saát nyoe.
23 Jinoenyoe ka kheueh habéh keumalon-keumalon peuleusu dan ramaian-ramaian buhak. Ulôn peuseulamat umat Lôn nibak peungaroh jeuhet gata. Dan barô kheueh gata teupeue bahwa Ulôn kheueh TUHAN."

Chapter 14

Na meupadub droe nibak peumimpén bansa Israel jijak meuhadab ubak ulôn keu jiteumanyong keuheundak TUHAN.
2 Dan meufeureuman TUHAN ubak ulôn,
3 "He manusia fana, ureuëng-ureuëng nyoe ka jipeucaya droe ubak beurala-beurala sampoe awaknyan ka rhot u dalam desya. Ék kheueh Ulôn jitanyong lé awaknyan?
4 Sabab nyan, tapeugah kheueh ubak awaknyan bahwa Ulôn, TUHAN Nyang Mahamanyang Lôn peusan lagée nyoe, 'Tieb-tieb ureuëng Israel nyang ka jipeucaya droe ubak beurala dan geupeubiyeu droe jihnyan rhot u dalam desya, óh lheueh nyan laju geujak lakée naseuhat ubak sidroe nabi, hainyan Lôn jaweueb keudroe deungon jeunaweub nyang patot keu beurala-beurala jih nyang le nyan!
5 Bandum beurala nyan ka jipeujiôh umat Ulôn nibak Ulôn, teuma mudah-mudahan deungon na Lôn jaweueb nyang lagée nyan umat Lôn jiwoe ubak Ulôn.'
6 Neupeugah cit teuma ubak ureuëng Israel, bahwa Ulôn, TUHAN Nyang Mahamanyang Lôn peugah ubak awaknyan, 'Meutobat kheueh nibak banmandum desya gata, dan tatinggai kheueh beurala-beurala gata nyang luwat that nyan.'
7 Tieb-tieb ureuëng Israel atawa ureuëng aséng nyang na tinggai lamkawan bansa Israel, nyang jipeujiôh Ulôn dan jipeucaya droe jih ubak beurala, laju jilakée naseuhat ubak sidroe nabi, nyan Lôn jaweueb keudroe.
8 Ulôn kulawan jihnyan dan Lôn peujeuet jihnyan sibagoe cuntoh keu nyang laén. Ulôn Lôn peuaséng jihnyan nibak umat Lôn, dan barô kheueh jiteupeue lé umat Lôn bahwa Ulôn kheueh TUHAN.
9 Meunyoe sidroe nabi ka jipeungéut sampoe jijaweueb nyang salah, Ulôn kheueh nyang peungéut gobnyan. Ulôn, TUHAN Allah Nyang Mahamanyang Lôn peuaséng jihnyan nibak ureuëng-ureuëng Israel.
10 Bah kheueh nabi nyan meunan cit deungon awaknyan nyang lakée naseuhat jihnyan, meuteumé huköman nyang saban.
11 Bandum nyan Ulôn peubuet mangat ureuëng Israel bék le jipeujiôh Ulôn dan bék teuma jipeukutoe droe deungon desya. Deungon lagée nyan awaknyan jeuet keu umat Lôn, dan Ulôn jeuet keu Allah awaknyan." Ulôn, TUHAN Nyang Mahamanyang ka Lôn peugah haba.
12 TUHAN meufeureuman ubak ulôn, "He manusia fana,
13 meunyoe saboh nanggroe meudesya dan hana seutia ubak Ulôn, Ulôn kuhuköm nanggroe nyan. Ulôn peuhanco keuneubah peunajoh awaknyan, Lôn peutron bala dan musém deuk meunan cit Ulôn peumaté bubena manusia dan beulatang.
14 Bahpi Nabi Nuh, Nabi Danel dan Nabi Ayub na tinggai di teumpat nyan, dan keugét awaknyan ban lhée nyang hase jipeuseulamat na kheueh nyawöng jih keudroe. Ulôn, TUHAN Nyang Mahamanyang ka Lôn peugah haba.
15 Jeuet mantong Ulôn peuteuka beulatang-beulatang juah keu jiteugöm peunduduek nanggroe nyan, sampoe daerah nyan ka jeuet keu teumpat nyang paleng meubahya dan hana meusidroe manusia pih nyang ji jeuet jak keunan.
16 Bahpi Nabi Nuh, Nabi Danel, dan Nabi Ayub tinggai disinan, dan deumi Ulôn, Allah nyang udeb, TUHAN Nyang Mahamanyang, awaknyan hana meuhase jipeuseulamat soe mantong, bahpi aneuëk awaknyan keudroe pih hana meuhase jipeuseulamat. Teuma awaknyan keudroe mantong nyang seulamat, dan nanggroe nyan jeuet keu padang pasi.
17 Jeuet mantong Lôn peutron prang u nanggroe nyan, dan Lôn kirém sinjata-sinjata nyang ampuh keu teupeubinasa bah kheueh nyan manusia meunan cit beulatang.
18 Dan bahpi ban lhée droe awaknyan tinggai disinan, teuma deumi Ulôn, Allah nyang udeb, TUHAN Nyang Mahamanyang, awaknyan hana meuhase jipeuseulamat soe mantong, meunan cit aneuëk awaknyan keudroe pih hana. Teuma awaknyan keudroe mantong kheueh nyang seulamat.
19 Jeuet mantong Ulôn peutron bala peunyakét u nanggroe nyan, dan Lôn peuju beungéh Ulôn keu jihnyan sampoe manusia meunan cit beulatang teuma binasa.
20 Dan bahpi Nabi Nuh, Nabi Danel dan Nabi Ayub tinggai disinan, teuma deumi Ulôn, Allah nyang udeb, TUHAN Nyang Mahamanyang, awaknyan hana hase jipeuseulamat soe mantong, bahpi aneuëk awaknyan keudroe. Teuma awaknyan keudroe mantong nyang seulamat sabab keugét awaknyan."
21 TUHAN Nyang Mahamanyang meufeureuman, "Ulôn Lôn peu rhot ban peuet boh huköman Lôn ateueh Yerusalem keu teupeuranab bah kheueh nyan manusia meunan cit deungon beulatang. Huköman nyan na kheueh: prang, bala deuk, beulatang buih dan wabah peunyakét.
22 Meunyoe na nyang hase jipeulheueh droe dan hase jipeuseulamat aneuëk-aneuëk jih keudroe, tangieng kheueh awaknyan meunyoe awaknyan jijak ubak gata. Kalon kheueh pakriban jeuhet jih awaknyan, dan gata sadar dan paih that peue nyang ka Lôn peubuet keu Lôn huköm Yerusalem.
23 Dan gatapih muphom bahwa bandum nyang Ulôn peubuet nyan na alasan. Ulôn, TUHAN Nyang Mahamanyang ka Lôn peugah haba."

Chapter 15

TUHAN meufeureuman ubak ulôn,
2 "He manusia fana, peue keuleubehan kayée anggô ngon kayée laén dalam gle? Peu kheueh keuleubehan bak anggô nibak bak kayée dalam gle?
3 Peu kheueh jeuet kayée nyan teupeuguna keu teupeugét sapeue-sapeue beunda? Peu kheueh jeuet teupeugét ceunawiét keuteumpat gantung peukakaih?
4 Hana meuguna seulaén keukayée apui. Dan meunyoe bandua ujong jih habéh tutong, dan bagian teungoh jih pih jeuet keu arang, peu kheueh mantong meuguna?
5 Hana le! Dan sigohlom teutot, ka hana jeuet ngui le. Peue lom óh ka lheueh tutong dan jipeuhangöh lé apui!"
6 Sabab nyan TUHAN Nyang Mahamanyang geupeugah, "Lagée bak kayée anggô nyang teucok dalam gle laju teutot, meunan cit teuma Lôn peusaneut ateueh peunduduek Yerusalem!
7 Ulôn Lôn huköm awaknyan. Bahpi awaknyan ka teupeusie nibak apui, teuma apui cit teuma nyang tot awaknyan. Dan barô kheueh gata teupeue bahwa Ulôn kheueh TUHAN.
8 Awaknyan hana seutia ubak Ulôn, sabab nyan, tanoh nyan Lôn peujeuet keu padang pasi. Ulôn, TUHAN Nyang Mahamanyang ka geupeugah haba."

Chapter 16

TUHAN meufeureuman lom ubak ulôn,
2 "He manusia fana, tunyok kheueh bak Yerusalem buet-buet nyang kuto nyang ka jipeubuet."
3 TUHAN Nyang Mahamanyang geuyue ubak ulôn mangat lôn jak peusampoe peusan nyoe ubak Yerusalem, "He Yerusalem, gata lahé bak tanoh Kanaan. Ureuëng syiek gata nyang agam ureuëng Amori dan ma gata ureuëng Het.
4 Bak watée gata lahé hana ureuëng nyang koh talo pusat gata, atawa nyang pumanö gata, atawa teuboreh gata ngon sira, atawa nyang peulimbot gata deungon ija.
5 Hana meusidroe pi nyang na gaséh keu gata sampoe jitem peubuet hai-hai nyang lagée nyan keu gata. Watée gata lahé, hana nyang wéueh keu gata, dan gata jitiek di lam ladang.
6 Óh lheuehnyan Lôn jak rot nyan dan leumah laju Lôn kalon gata meulawan-lawan lam darah gata nyang roe meujeu-jeu, teuma Ulôn hana Lôn peubiyeu gata maté.
7 Ulôn cok ié laju Ulôn rhah darah nyang meulabo bak tuboh gata. Lôn geusok kulét gata ngon minyéuk zaiton. Lôn peurayeuk gata lagée sinaman nyang subô. Gata bagaih that raya, seuhat dan manyang seumampai, dan jeuet keusidroe inong muda. Boh mom gata ka jipeuphon buntok dan ôk gata panyang, teuma gata teulon hana sapeue na. Watée Lôn jak rot nyan lom, deuh Lôn kalon bahwa ka trok watée gata keu meucinta. Ulôn leueng bajée jubah Lôn bak tuboh gata nyang teulon, dan Lôn meujanji cinta Ulôn ubak gata. Nyoe, Lôn ikat janji meukawen deungon gata, dan gata jeuet keumilék Ulôn. Ulôn, TUHAN Nyang Mahamanyang ka Lôn peugah haba.
10 Óh lheuehnyan Ulôn peusampoe ubak gata ija gaon nyang meukasab, sipatu nibak kulét nyang paleng halôh, ikat ulée nibak ija lineun dan jubah sutra.
11 Ulôn peungui gata deungon peumata, talo takue dan gleueng-gleueng nyang tari.
12 Ulôn jôk keugata euncien meu idong, keurabu dan mahkota nyang gagah.
13 Meunan kheueh gata teupeungui méuh dan pirak; peukayan gata teupeugét nibak ija lineun dan sutra meukasab. Gata jeuet neupajoh ruti dan teurigu nyang gét, deungon meulisan dan minyéuk zaiton. Ceudah ngon gagah gatanyan hana ngon peusa dan gata jeuet keu ratu.
14 Sigala bansa jipujoe keu lagak gata nyang rupawan, dan Ulôn kheueh nyang ka peujeuet gata gagah hana ngon peusa. Ulôn, TUHAN Nyang Mahamanyang ka Lôn peugah haba.
15 Teuma gata salah peuguna keu ceudehan gata dan nan gata nyang meusyeuhu. Gata éh ngon agam toh mantong nyang na jijak.
16 Siladum nibak peukayan gata tapeuguna keu teuhias teumpat seumah beurala gata. Gata jeuet keu inong jeuhet dan tabri tuboh gata keu tieb-tieb ureuëng agam.
17 Nibak piasan méuh dan pirak nyang Ulôn bri ubak gata, atranyan gata peugét patong-patong ureuëng agam, laju gata peubuet meumukah deungon patong nyan.
18 Gata peungui ubak patong-patong nyan peukayan meukasab nyang ka Ulôn bri ubak gata. Gata peuseumah ubak awaknyan minyéuk zaiton dan dupa nyang ka gata teurimong nibak Ulôn.
19 Ulôn bri keu gata peunajoh nibak teupông teurigu nyang paleng gét, madu dan minyéuk zaiton nyang paleng aseuli. Teuma bandum nyan gata peuseumah ubak beurala-beurala nyan keu gata peugalak até awaknyan. Ulôn, TUHAN Nyang Mahamanyang ka Lôn peugah haba.
20 Óh lheueh nyan gata peuseumah aneuëk-aneuëk geutanyoe, agam dan inong, jeuet keu keureubeuen keu beurala-beurala nyan. Peu kheueh gohlom seb bahwa gata hana seutia ubak Ulôn?
21 Peu kheueh harôh tacok aneuëk-aneuëk Ulôn dan gata keureubeuen awaknyan keu beurala nyan?
22 Lam udeb gata nyang lumpah kuto sibagoe inong jeuhet nyan, mubacutpi hana gata ingat masa yoh ubit gata, watée teulon dan meugawang-gawang lam darah gata nyang meubayak nyan."
23 TUHAN Nyang Mahamanyang meufeureuman, "Ceulaka kheueh gata! Lumpah ceulaka! Gata ka tapeubuet bandum keujeuhetan nyan.
24 Lom teuma, diteungoh-teungoh banda dan nibak tieb-tieb binéh rot raya gata peudong teumpat-teumpat seumah beurala dan meulunte.
25 Gata ka tapeukutoe keulagak gata. Tuboh gata tapeutaba ubak soe mantong ureuëng agam nyang na teuka, dan hana piôh-piôh tapeubuet mukah.
26 Nanggroe Meusé, teutangga gata nyang raya nafeusu jihnyan, ka gata peungon bak teumpat éh. Gata tasaja meulunte mangat Ulôn bagaih beungéh.
27 Jinoenyoe Ulôn cok tendakan keu Lôn huköm gata dan Ulôn cok beureukat nyang ka Ulôn bri keu gata. Lôn jok gata ubak ureuëng-ureuëng Filistin nyang banci keu gata dan nyang bosan jikalon pi-e gata nyang kuto nyan.
28 Teuma nibak gata gohlom cit meurasa puih; sabab nyan kheueh gata tiyeub-tiyeub ureuëng Asyur. Gata jeuet keu mukah awaknyan, teuma hántom cit puih nibak awaknyan.
29 Óh lheuehnyan laju gata jeuet keu mukah ureuëng Babel, bansa meukat nyan. Teuma awaknyan pi hana hase jipeupuih gata."
30 TUHAN Nyang Mahamanyang meufeureuman, "Bandum nyan ka gata peubuet lagée inong lunte nyang hana meumalée.
31 Bak teungoh-teungoh banda dan di tieb-tieb rot raya gata peudong teumpat-teumpat seumah beurala dan teumpat meulunte. Teuma gata kon kheueh lagée lunte biasa nyang jimita péng.
32 Gata lagée sidroe peurumoh nyang jikhianat lakoe droe jih dan jipeubuet jeuhet ngon agam laén.
33 Sidroe inong lunte sabe meuteumé meunayeue, teuma seubalek jih gata kheueh nyang bri hadiah keu geunaséh-geunaséh gata, dan gata rayu awaknyan deungon péng mangat awaknyan jitem teuka dipat mantong keu jijak éh deungon gata.
34 Gata inong lunte nyang laén nibak inong-inong nyang laén. Hana nyang paksa gata jeuet keu lunte. Gata hana teubayeue. Bit, gata laén nibak nyang laén."
35 He Yerusalem, inong lunte, deungoe kheueh peue nyang geufeureuman lé TUHAN Nyang Mahamanyang, "Gata ka tasuet bajée gata, dan sibagoe lunte gata jok droe gata ubak geunaséh-geunaséh dan beurala-beurala gata nyang lumpah luwat nyan. Aneuëk-aneuëk gata tapoh maté dan gata keureubeuen keu beurala-beurala nyan.
37 Sabab nyan, bandum mantan geunaséh gata Lôn peusapat, bah kheueh nyang gata galak meunan cit nyang gata banci. Awaknyan jidong jihudöm gata bansieseun lingka dan jisuet banmandum peukayan gata, sampoe awaknyan hase jingieng tuboh gata nyang ka teulon nyan.
38 Gata Lôn huköm sabab meumukah dan peumaté gobnyan nyang ka peubuet nyan. Nibak beungéh dan meureuka Ulôn nyan, gata Lôn huköm maté.
39 Gata Ulôn jok ubak geunaséh-geunaséh gata keudroe, dan awaknyan jireuloh bandum teumpat gata meumukah dan seumah beurala. Banmandum peukayan dan piasan gata awaknyan reupah, sampoe gata ka teulon lheueh.
40 Awaknyan jiyue geulawa gata bak ureuëng ramé ngon aneuk batée, dan jicang-cang tuboh gata deungon peudeueng.
41 Awaknyan jitot bubena rumoh gata dan jiyue bak ureuëng inong jak peusaksi gata teuhuköm. Meunan kheueh cara jih Lôn peupiôh gata meumukah. Gata hana jibagi-bagi le hadiah keu geunaséh-geunaséh gata.
42 Barô kheueh óh lheueh bandum nyan teujadi beungéh Ulôn reuda, dan Ulôn jeuet teunang lom. Ulôn hana beungéh le atawa ceumuru.
43 Ulôn ku huköm gata sabab gata hana taingat pakriban Lôn useuha gata bak watée gata mantong muda. Gata tapeu jeuet Ulôn beungéh deungon bandum pi-e gata nyang jeuhet nyan. Pakon bandum pi-e gata nyang kuto ngon luwat nyan mantong gata tamah lom ngon buet meumukah? Ulôn TUHAN Nyang Mahamanyang ka Lôn peugah haba."
44 TUHAN meufeureuman, "He Yerusalem, di ureuëng ramé jipeukeunong pribasa nyoe keu gata, 'Lagée ma jih, meunan cit ngon aneuëk inong jih.'
45 Beutôi, gata na kheueh aneuëk inong ma gata. Geuhnyan banci keu lakoe jih dan keu aneuëk jih keudroe. Gata saban that lagée syedara-syedara gata nyang inong nyang banci keu lakoe dan aneuëk-aneuëk jihnyan. Gata dan syedara gata, dan banda-banda nyang na ban seukeulileng gata ma jih ureuëng Het dan ayah ureuëng Amori.
46 Cutda gata na kheueh Samaria di utara deungon bandum gampông. Dan adoe gata na kheueh Sodom di seulatan deungon banmandum gampông nyang disinan.
47 Peu kheueh ka puih gata deungon cara taseutôt langkah awaknyan dan taturot buet awaknyan nyang kuto nyan? Gohlom! Hana treb le gata leubeh jeuhet lom nibak awaknyan.
48 Deumi Ulôn, Po teu Allah nyang udeb, kheun TUHAN Nyang Mahamanyang, syedara gata Sodom deungon gampông-gampông na disinan gohlom na lom jipeubuet jeuhet lagée gata peubuet nyan ngon gampông-gampông gata.
49 Sodom dan gampông-gampông disinan sombong sabab makmu ngon peunajoh nyang le teukeubah lom teuma meuteumé udeb ngon teunang dan damé. Teuma awaknyan hana jitem ngieng ureuëng gasien ngon ureuëng papa.
50 Awaknyan sombong dan kreueh ulée, dan jipeubuet hai-hai nyang Ulôn banci, sabab nyan awaknyan Ulôn peuhanco lagée nyang ka lheueh gata kalon keudroe.
51 Bit Samaria jeuhet, teuma desya jih hana siparoe nibak desya-desya gata. Pi-e gata jiôh leubeh jeuhet. Syedara-syedara gata nyang inong siulah-ulah hana meusalah meunyoe teubandeng deungon gata. Gata harôh teurasa malée dan hina!"
53 TUHAN meufeureuman ubak Yerusalem, "Sodom dan Samaria meunan cit deungon gampông-gampông awaknyan Lôn peumakmu lom. Óh ka lheuehnyan, barô kheueh gata Lôn peumakmu lom teuma.
54 Deungon lagée nyan gata malée ubak droe gata keudroe, dan keuhinaan gata teutunyok ubak bubena syedara gata padubna gét naseb awaknyan.
55 Awaknyan dan gampông-gampông jeuet keumakmu lom, meunan cit deungon gata dan gampông-gampông gata.
56 Kon kheueh gata ka lheueh tapeukém Sodom watée gata mantong sombong dan buet jeuhet gata nyan gohlom leumah?
57 Bak saát nyoe gata saban cit lagée Sodom; gata ka jeuet keubahan jipeukém lé ureuëng Edom, ureuëng Filistin dan wareh lingka gata nyang laén nyang banci keu gata.
58 Gata harôh meudeurita sibagoe akibat buet gata nyang kuto dan luwat nyan. Ulôn, TUHAN ka Lôn peugah haba."
59 TUHAN Nyang Mahamanyang meufeureuman, "Gata Lôn peujeuet nyang sipadan deungon buet gata, sabab gata ka ta iengkeue bak sumpah gata dan taliuengkeu peujanjian Ulôn deungon gata.
60 Teuma Ulôn Lôn ikat peujanjian nyang ka Ulôn peugôt deungon gata bak watée gata mantong muda dan Lôn peugét peujanjian deungon gata nyan na kheueh keu siumu masa.
61 Gata teuingat keu buet-buet gata dan meurasa malée watée mandum syedara-syedara gata Ulôn peuriwang ubak gata. Awaknyan Lôn peujeuet lagée aneuëk-aneuëk gata, bahpi hainyan hana roh bak peujanjian Ulôn deungon gata.
62 Ulôn Lôn peugét peujanjian nyang barô deungon gata. Teuma barô kheueh tateupeue lé gata bahwa Ulôn kheueh TUHAN.
63 Ulôn Lôn peumeuáh banmandum salah gata, teuma gata hana tuwoe dan gata meurasa malée keu tapeugah peue mantong. Ulôn, TUHAN Nyang Mahamanyang ka Lôn peugah haba."

Chapter 17

TUHAN Meufeureuman ubak ulôn,
2 "He manusia fana, calitra laju ubak ureuëng-ureuëng Israel miseu umpama-miseu umpama nyoe,
3 nyang Ulôn, TUHAN Nyang Mahamanyang keuneuk peusampoe ubak awaknyan: Na kheueh saboh cicém rajawali nyang paleng raya nyang meubulée lagak dan meusayeueb luwah dan Lôn teuga. Cicém nyan jipo u gunong Libanon, laju jiwiét sibak pucok ceumara,
4 laju atranyan jipeupo sira jiba jikeubah laju bak banda dagang nyang ramé.
5 Óh lheuehnyan laju jicok sibak seunaman nyang mantong muda nibak tanoh Israel, dan laju jipula bak tanoh ladang nyang subô, nyang hántom kureueng ié.
6 Seunaman nyan jeuet keu bak anggô nyang jitimoh miyueb teuma jimeuéue luwah. Cabeueng-cabeueng jih jipeukeu ubak cicém rajawali nyan, dan ukeu-ukeu jih meusinom khong that dalam tanoh. Bak anggô nyan rampak lumpah na.
7 Teungoh watée nyan na teuma saboh teuk cicém rajawali raksasa nyang laén; sayeueb jih luwah dan bulée jih teubai. Laju diba anggô nyan jipeukeu ukeu-ukeu dan cabeueng-cabeueng jih ubak cicém rajawali nyan deungon harapan mangat cicém rajawali nyan jitem jok keu jihnyan leubeh le lom ié nibak nyang ka na lam ladang nyan.
8 Padahai bak anggô nyan ka teupula bak tanoh nyang subô deungon ié nyang meulimpah, sampoe bak anggô nyan jiteubiet ôn nyang rampak, jimuboh nyang le, dan jeuet keu bak anggô nyang gét.
9 Dan, Ulôn, TUHAN Nyang Mahamanyang, lôn teumanyong: Peu kheueh hase bak anggô nyan udeb dan meukeumang? Peu kheueh hán jilot lé cicém rajawali nyang phon habéh deungon ukeu-ukeu jih, jiluroh boh jih, jiwiet deuen-deuen jih dan jipeubiyeu jihnyan layée? Hana peureulée teunaga atawa bansa nyang le nyang peukasa keu teulot bak kayée nyan sampoe habéh ngon ukeu-ukeu jih.
10 Beutôi jih nyan ka teupula kong that, teuma peu kheueh jih nyan meuhase jitimoh sabe dan meukeumang? Peu kheueh jihnyan hana layée meunyoe jiyueb lé angén timu? Peu kheueh jihnyan hana tô diteumpat jihnyan teupula?"
11 TUHAN meufeureuman ubak ulôn,
12 "Tanyong kheueh laju ubak ureuëng-ureuëng beurontak nyan, peu kheueh awaknyan jipeuphom makna miseu umpama nyan. Jak peutrok laju ubak awaknyan bahwa raja Babel ka jiteuka u Yerusalem, dan jiangkot raja Yehuda meunan cit deungon ureuëng-ureuëng rayeuk banda nyan u Babel.
13 Laju gobnyan jipiléh sidroe lamkawan keuluwarga raja Yehuda nyan, jipeugét peujanjian deungon jih nyan, dan jiyue jihnyan meusumpah seutia ubak gobnyan. Raja Babel nyan jisandra ureuëng-ureuëng peunteng,
14 mangat keurajeuen Yehuda nyan hana jibeudôh le, dan keu teujamin bahwa peujanjian nyan beutôi-beutôi teupeuna.
15 Teuma lé raja Yehuda jibeurontak sira jikirém utosan u nanggroe Meusé mangat meuteumé guda dan tantra nyang le. Peu kheueh jihnyan meuhase? Peu kheueh jihnyan teupeubiyeu seulamat? Hana mungken jihnyan ji-iengkeue ubak peujanjian meunyoe hana teupeukeunong huköman!
16 Deumi Ulôn, Po teu Allah nyang udeb, TUHAN Nyang Mahamanyang, raja Yehuda maté di Babel, sabab jihnyan ka ji iengkeue bak sumpah jih keudroe dan ji-iengkeue peujanjian jihnyan deungon raja Babel nyang ka jipeuduek jihnyan u ateueh takhta.
17 Dan bala tantra Meusé nyang hebat nyan, hana hase jitulông jihnyan nibak jiseureubu ureuëng-ureuëng Babel nyang jipeugét sinamon-sinamon tanoh dan jikueh got-got keu geupeumaté ureuëng nyang le.
18 Sabab jihnyan ka jilingkeue sumpah dan peujanjian jih nyan, dan jihnyan hana hase jipeuplueng droe.
19 Deumi Ulôn, Allah nyang udeb, TUHAN Nyang Mahamanyang, raja Yehuda Lôn huköm sabab ka jilingkeue peujanjian jihnyan deungon raja Babel, padahai jihnyan ka jimeusumpah ateueh nan Ulôn keu jipeupeunoh janji.
20 Ulôn Lôn tiek jeue mangat Lôn drob jihnyan. Jihnyan Ulôn ba u Babel dan Lôn huköm disinan, sabab jihnyan hana seutia ubak Ulôn.
21 Sipa-i jihnyan nyang paleng gét maté dimideuen prang, dan nyang meuhase jipeuplueng droe Ulôn peu crebre u jeueb-jeueb ujong. Dan barô kheueh jiteupeue lé umat Lôn bahwa Ulôn, TUHAN ka Lôn peugah haba."
22 Nyoe kheueh feureuman TUHAN Nyang Mahamanyang, "Nibak bak ceumara nyang manyang, Ulôn pot pucok jih laju Ulôn wiét sikrak cabeueng jih nyang muda; Lôn pula cabeueng nyan bak gunong manyang meusampôh awan.
23 Bak gunong nyang paleng manyang di Israel, cabeueng kayée nyan Ulôn pateng. Disinan kayée nyan meutarök, dan óh lheueh nyan jimuboh teuma, laju jeuet keubak ceumara nyang meusyeuhu meugah. Meubagoe jeuneh cicém jimeu eumpueng didalam nyan dan jimeuceu dimiyueb lindongan nyan.
24 Bandum bak kayée lam nanggroe muphom bahwa Ulôn kheueh TUHAN. Kayée nyang manyang Ulôn koh; kayée nyang miyueb Ulôn peujeuet jitimoh manyang. Kayée nyang luhu Lôn peutho kreng; dan bak kayée nyang tho Ulôn peutimoh tarôk dan meukeumang. Ulôn, TUHAN, ka Lôn peugah haba, bandum tutoe haba Lôn teuma teulaksana."

Chapter 18

TUHAN meufeureuman ubak ulôn,
2 "Pakon pribasa nyoe sabe jipeugah-peugah di nanggroe Israel? 'Ureuëng tuha jipajoh boh anggô nyang masam rasa jih, teuma aneuëk-aneuëk manyak kheueh nyang singke gigo.'
3 Deumi Ulôn, Allah nyang udeb, TUHAN Nyang Mahamanyang, pribasanyan hana teupeugah di nanggroe Israel.
4 Nyawöng tieb-tieb ureuëng na kheueh atra Ulôn, bah kheueh nyan nyawöng ureuëng tuha meunan cit nyawöng aneuëk jihnyan. Ureuëng nyang meudesya, jihnyan kheueh nyang maté.
5 Miseu jih na ureuëng nyang gét, ade dan jujoe.
6 Ureuëng nyan hana jiseumah beurala ureuëng Israel atawa geupajoh keureubeuen nyang teupeuseumah ubak teumpat seumuja dewa-dewa. Gobnyan hántom jirayu peurumoh ureuëng laén atawa geuéh sajan ngon ureuëng inong nyang teungoh meuhé.
7 Jihnyan hántom jiteumipée atawa meureupah atra ureuëng laén. Barang-barang jaminan ureuëng nyang meu utang keu gobnyan sabe jijok pulang óh ka trok bak watée. Ureuëng nyang deuk jibri peunajoh dan ureuëng nyang hana meubajée, jijok peukayan.
8 Gobnyan hántom na jipeu utang ureuëng laén deungon cara geucok bungöng. Gobnyan hánjitem peubuet buet nyang jeuhet dan bak tieb-tieb na meudakwa jihnyan jibri keuputosan nyang jujoe.
9 Ureuëng jipatuh peue nyang Ulôn peurintah dan jitaát banmandum ubak huköm-huköm Lôn. Ureuëng nyang lagéenyan kheueh nyang jujoe dan teutab udeb. Ulôn, TUHAN Nyang Mahamanyang ka geupeugah haba.
10 Teuma miseu jih ureuëng nyan na aneuëk jih nyang tukang meurampok, peumaté gob, dan jipeubuet buet nyang jeuhet nyang laén
11 nyang hántom jipeubuet lé ayah jihnyan simantong ayah geuh nyan udeb lam donya. Jihnyan jipajoh keureubeuen peuseumahan di teumpat-teumpat teupujoe dewa-dewa. Gobnyan jigoda dan geumeumukah ngon peurumoh ureuëng laén.
12 Gobnyan galak jipeungét ureuëng gasien, meurampok, dan jisita barang jaminan ureuëng nyang meu utang ubak jihnyan. Jihnyan jijak bak kuil-kuil ureuëng nyang hana jituri keu TUHAN dan jiseumah beurala nyang kutoe luwabiasa.
13 Ureuëng nyan jijok keu ureuëng nyang meu utang bak jihnyan deungon meubungöng. Peu kheueh ureuëng nyang lagée nyan udeb? Hana! Ureuëng ka jipeubuet bandum buet-buet nyang lumpah kuto nyan, dan jihnyan teuma maté! Maté ureuëng nyan na kheueh akibat buet-buet nyang jipeubuet lé ureuëng nyan keudroe.
14 Miseu jih lom ureuëng nyang peubuet buet nyang jeuhet nyan na jimeu aneuëk, dan aneuëk nyan jikalon bandum buet nyang jipeubuet lé ureuëng syiek jih, teuma aneuëk nyan hana jiseutôt lagée nyang jipeubuet lé ureuëng syiek jih nyan.
15 Aneuëk nyan hana jitem seumah beurala ureuëng Israel, atawa jipajoh keureubeuen peuseumahan di teumpat seumujoe dewa-dewa. Jihnyan hántom na jirayu peurumoh ureuëng laén,
16 atawa jiteugon dan jireupah soe mantong. Barang jaminan ureuëng nyang meu utang bak jihnyan sabe jijok pulang lagée sot teuma. Ureuëng nyang deuk jijok peunajoh dan ureuëng nyang hana peukayan jibri bajée.
17 Jihnyan hántom na jipeubuet jeuhet dan jipeu utang ureuëng laén deungon meubungöng. Jihnyan taát ubak huköm-huköm Lôn dan patuh ubak peurintah Ulôn. Aneuëk nyan hana maté ngon sabab desya-desya ayah jihnyan. Teuma teutab udeb.
18 Seubalek jih, ureuëng syiek jihnyan nyang galak keu buet teumipée, meurampok dan jipeubuet buet nyang jeuhet nyang laén, teuma maté ngon sabab desya-desya jih nyan keudroe.
19 Teuma na ureuëng nyang teumanyong pakon aneuëk nyan hana meusajan jitanggong akibat desya-desya ayah jihnyan. Jaweueb jih na kheueh lagée nyoe, sabab aneuëk nyan gét dan jujoe. Jihnyan taát ubak huköm-huköm Lôn dan jipeubuet bandum nyan deungon seutia, dan jihnyan teutab udeb.
20 Ureuëng nyang jipeubuet desya, ureuëng nyan kheueh nyang maté. Aneuëk hana harôh jitanggong akibat desya nyang jipeubuet lé ureuëng syiek jih; seubalek jih, ayah pi hana harôh jitanggong akibat nibak desya-desya nyang jipeubuet lé aneuëk jihnyan. Ureuëng nyang jroh meuteumé ganjaran nyang jroh sabab buet jihnyan nyang jroh. Dan ureuëng nyang jeuhet meudeurita akibat nibak buet jih nyang jeuhet nyan.
21 Meunyoe sidroe ureuëng jeuhet hana le jipeubuet desya, dan ka jipeuphon taát ubak huköm-huköm Lôn, dan jipeubuet buet-buet nyang gét dan beutôi, ureuëng nyan hana maté.
22 Bandum desya ureuëng nyan Lôn peuamphon; ureuëng nyan udeb, sabab jipeubuet nyang beutôi.
23 Peu kheueh tapike Ulôn, TUHAN Nyang Mahamanyang galak meunyoe ureuëng nyang jeuhet maté? Meubacut pih hana! Ulôn meuharab mangat ureuëng nyan jitinggai bandum desya-desya jihnyan mangat jihnyan teutab udeb.
24 Teuma meunyoe sidroe ureuëng nyang jroh hana jipeubuet le buet nyang jroh, teuma ka jipeuphon peubuet buet nyang jeuhet dan banmandum buet nyang luwat hán ék teukira, nyang lazém jih jipeubuet lé ureuëng jeuhet, peu kheueh jih teutab udeb? Hana! Nibak buet-buet jih nyang gét nyan, hana meusapeue pih teu ingat lom. Gobnyan maté sabab buet jih nyang meudesya dan hana seutia ubak Ulôn.
25 Mungken na nyang peugah lagée nyoe, 'Buet TUHAN nyan keuliru.' Deungoe kheueh, he ureuëng Israel! Peu kheueh keuliru tindakan Ulôn? Gata kheueh nyang keuliru.
26 Meunyoe ureuëng nyang jroh hana jipeubuet le nyang gét, teuma ka jipeuphon peubuet nyang jeuhet, gobnyan maté, sabab buet nyang jeuhet nyang ka jipeubuet lé gobnyan.
27 Teuma meunyoe ureuëng nyang jeuhet hana le jipeubuet desya teuma ka jipeuphon peubuet nyang beutôi dan gét, jaweueb jih na kheueh seulamat.
28 Ureuëngnyan ka sadar bandum salah jihnyan laju jipiôh jipeubuet desya. Deungon lagée nyan jihnyan hana maté, teuma teutab udeb.
29 Dan gata, he ureuëng Israel, gata peugah bahwa tendakan TUHAN nyan keuliru. Peu kheueh keuliru tendakan Ulôn, he Israel? Hana! Gata kheueh nyang keuliru!"
30 TUHAN Nyang Mahamanyang, meufeureuman, "He ureuëng-ureuëng Israel, Ulôn kupeusidang somantong ureuëng nyang paih deungon buet jih. Meutobat kheueh nibak desya-desya gata. Bék tapeubiyeu desya gata jipeuhanco droe gata keudroe.
31 Piôh laju bandum buet nyang jeuhet nyang gata peubuet dan bah kheueh até dan pikeran gata jeuet keu barô. Pakon gata harôh maté?
32 Ulôn hana galak meunyoe sidroe ureuëng maté. Tinggai kheueh bandum desya-desya gata jeuet gata teutab udeb. Ulôn, TUHAN Nyang Mahamanyang ka Lôn peugah haba."

Chapter 19

Po teu Allah geuyue bak ulôn lôn peuca-e ratok nyoe keu dua droe pangeran Israel:
2 Ma gata lagée singa inong nyang hayeue dan luwa biasa. Gobnyan nyang peurayeuk aneuëk-aneuëk jih keudroe lamkawan singa-singa nyang peukasa.
3 Saboh lamkawan aneuëk jihnyan laju jipeurunoe pakriban cara jih teumita mangsa. Dan jeuet kheueh jihnyan keu singa raya nyang teugöm dan nyang pajoh manusia.
4 Bansa-bansa nyang deungoe keuhai jih nyan laju meugumpôi keu jijak drob singa raya nyan. Singa nyan laju jijeubak lam uruek óh lheuehnyan jidrob, laju jihue u nanggroe Meusé deungon ceunawiét.
5 Sia-sia mantong nang singa nyan jipreh-preh aneuëk; laju jiteupeue dan gadôh kheueh harapan keu aneuëk teucinta. Dan aneuëk jihnyan nyang laén jilateh lom jeuet keu singa nyang buih dan peukasa.
6 Aneuëk singa nyan ka jeuet keu rayeuk dan jimeurakan ngon singa-singa nyang laén. Laju jimeurunoe jimita mangsa, dan jeuet keu singa nyang makheun manusia.
7 Kuta-kuta laju jiheuntam, banda-banda jipeuhanco. Bandum peunduduek nanggroe yo meugám-gám jideungoe tauém singa nyan sampoe meugeunta.
8 Teuma bansa-bansa nyang lam wilayah keulileng nyan jiseureugab jihnyan rot meubagoe jurosan. Jicok ngon jeue laju jitiek keuneuk drob singa buih nyan, dan singa nyan pih meucarueh lam peurangkab awaknyan.
9 Laju jipeutamong lam uempueng singa, jiba laju u nanggroe Babel meuhadab raja. Singa nyan jijaga kong that mangat tauém jih bék teudeungoe le di ateueh bukét-bukét Israel nyang manyang.
10 Ma gata lagée bak anggô nyang ceudah nyang timoh di lampôh bak binéh aneuk krueng. Bak anggô nyan ka jeuet keu rampak dan jimuboh sabab ié disinan na meulimpah ruwah.
11 Cabeueng jih kong, hana mudah teuwiet gagah meunyoe teucok keu tungkat keurajeuen. Pucak jih manyang meulambong rab sampoe u dalam awan. Jihnyan jihoreumat lé bandum ureuëng sabab timoh jih manyang dan ôn jih rampak.
12 Teuma kayée nyan jibot lé jaroe-jaroe nyang beungéh, óh lheuehnyan jiseumpom ateueh tanoh. Watée jipot Angén Timu, sampoe habéh tho boh jih nyang gét. Cabeueng jih patah, ka jeuet keu tho laju teutot.
13 Jinoenyoe jihnyan teupula di padang pasie, bak tanoh nyang tho lom hana meu ié.
14 Bak anggô nyan laju jilieh lé apui hu nyang teungoh jimeu éue; cabeueng dan boh jih habéh tutong. Cabeueng jih jinoe hana teunaga; hana mungken teupeu jeuet keu tungkat keurajeuen. Nyan kheueh ratok nyang meu ulang-ulang nyang jipeu ca-e lé umat.

Chapter 20

Bak tanggai siploh buleuen limong, bak thon nyang keutujoh masa kamoe teupeu aséng di teumpat nyang teuböih, na papa dub droe peumimpén Israel jijak meurumpok ubak ulôn keu jilakée peutunyok TUHAN. Óh ka lheueh awaknyan jiduek dikeue ulôn,
2 ulôn deungoe TUHAN meufeureuman ubak ulôn,
3 "He manusia fana, tapeugah kheueh ubak peumimpén-peumimpén nyan dan tapeugah laju bahwa Ulôn, TUHAN Nyang Mahamanyang geupeugah lagée nyoe, 'Tajeuet that gata lakée peutunyok ubak Ulôn! Deumi Ulôn, Allah nyang udeb, Ulôn hana kutem gata lakée peutunyok lé gata! Ulôn, TUHAN Nyang Mahamanyang ka Lôn peugah haba.' "
4 "He manusia fana, peu kheueh ka siab gata peusidang awaknyan? Dan, peubuet laju! Peu ingat kheueh bak awaknyan peue-peue mantong keukeujian nyang ka jipeubuet lé indatu awaknyan.
5 Peusampoe kheueh peue nyang Ulôn peugah nyoe. Ulôn ka Lôn piléh Israel dan Lôn baiát sumpah keu awaknyan. Di nanggroe Meusé, Ulôn peugah droe ubak awaknyan sira Lôn kheun, 'Ulôn kheueh TUHAN Allah gata.'
6 Bak watée nyan Ulôn meusumpah Lôn ba awaknyan u luwa nanggroe nyang Ulôn piléh keu awaknyan. Nanggroe nyan kaya dan subô, tanoh nyang paleng gét bansigom donya.
7 Ulôn yue awaknyan mangat jitiek banmandum patong-patong nyang lumpah luwat nyang awaknyan galak nyan, dan Ulôn tam awaknyan bék jijak peukuto droe deungon jiseumah beurala-beurala di Meusé, sabab Ulôn kheueh TUHAN Po teu Allah awaknyan.
8 Teuma awaknyan jilawan Ulôn dan hana jitem deungoe Ulôn. Awaknyan hana jitem böih patong-patong beurala nyang kutoe ngon luwat nyan dan meunan cit hana jitem piôh jiseumah beurala-beurala Meusé nyan. Bak watée awaknyan mantong disideh, Ulôn ka siab keuneuk peusampoe beungéh Ulôn keu awaknyan.
9 Teuma Ulôn hana Lôn peubuet, mangat nan Ulôn hana jihina lé bansa-bansa di teumpat awaknyan tinggai. Sabab dikeue bansa-bansa nyan, ka lheueh Ulôn peumaklum bahwa bansa Israel Lôn peuteubiet lam nanggroe Meusé.
10 Laju Ulôn ba awaknyan peuteubiet nibak nanggroe Meusé teujak u padang pasi.
11 Disinan Ulôn jok keu awaknyan peurintah-peurintah Ulôn dan Lôn peuruno bak awaknyan huköm-huköm Lôn nyang harôh awaknyan peubuet, sabab ureuëng nyang taát ubak huköm nyan teutab udeb.
12 Ulôn yue bak awaknyan mangat jihoreumat uroe Sabat sibagoe tanda peujanjian Ulôn ngon awaknyan, keuteupeu ingat bak awaknyan bahwa Ulôn kheueh TUHAN, ka Lôn peu khusos awaknyan keu Ulôn.
13 Teuma di padang pasi nyan cit teuma awaknyan jilawan Ulôn. Awaknyan ji iengkeue peue-peue nyang Ulôn peurintah, dan jitulak huköm-huköm nyang Ulôn bri nyang teujamin bahwa ureuëng nyang taát ubak huköm-huköm nyan teutab udeb. Awaknyan ka jipeukutoe that uroe Sabat. Sabab nyan, di padang pasi nyan Ulôn ka siab keuneuk Lôn peusampoe beungéh Ulôn nyang hana teukira brat jih keu awaknyan dan Lôn peuranab awaknyan banmandum.
14 Teuma bandum nyan hana Lôn peubuet deumi keuhoreumatan nan Ulôn, mangat nan Ulôn hana jihina lé bansa-bansa nyang ka jikalon Lôn peuteubiet bansa Israel di nanggroe Meusé.
15 Di padang pasi nyan cit Ulôn ancam bahwa bansa Israel hana Ulôn peutamong ubak tanoh nyang ka teukeubah keu awaknyan, tanoh nyang kaya dan subô dan nyang paleng gét bansigom donya.
16 Ancaman nyan Ulôn peugah sabab awaknyan jianggab remeh peu-peu nyang Ulôn peurintah, ji iengkeue huköm-huköm Lôn dan jipeukutoe uroe Sabat. Awaknyan leubeh galak jiseumah beurala-beurala jih keudroe.
17 Teuma óh lheueh nyan Ulôn wéueh keu awaknyan, sampoe awaknyan hana jadeh Ulôn poh di padang pasi nyan.
18 Sikeubit jih ureuëng-ureuëng muda nyang na lamkawan awaknyan Ulôn naseuhat lagée nyoe, 'Bék kheueh taseutôt peue-peue mantong peuratoran nyang jipeugét lé indatu gata. Bék taseutôt keubiasaan awaknyan dan bék teuma tapeukutoe droe gata keudroe deungon cara taseumah beurala-beurala awaknyan.
19 Ulôn kheueh TUHAN, Allah gata, taát kheueh ubak huköm-huköm dan peurintah Ulôn.
20 Horeumat kheueh keu uroe Sabat mangat jeuet keutanda peujanjian Ulôn deungon gata, mangat jeuet keu peuingat ubak gata bahwa Ulôn kheueh TUHAN Allah gata.'
21 Teuma angkatan muda nyan pih jipeu kreueh jungka keu Ulôn. Awaknyan ji iengkeue keu huköm-huköm Lôn dan jianggab kon bandum peue-peue nyang ka Ulôn peurintah keu jih nyan, Ulôn nyang jamin bahwa ureuëng nyang taát ubak huköm Lôn teutab udeb. Awaknyan jipeukutoe uroe Sabat. Sabab nyan kheueh Ulôn ka siab keuneuk peusak höéb ngon beungéh nyang hana ngon peusa keu awaknyan nyang na di padang pasi nyan dan Lôn poh maté awaknyan banmandum.
22 Teuma bandum nyan hana Lôn peubuet mangat nan Ulôn bék jihina lé bansa-bansa nyang ka jikalon Lôn peuteubiet bansa Israel lam nanggroe Meusé.
23 Dipadang pasi nyan cit teuma Ulôn meusumpah bahwa Ulôn Lôn peucrebre awaknyan bansigom donya,
24 sabab awaknyan ka jianggab hana peurintah-peurintah Ulôn, jilingkeue huköm-huköm Lôn, jipeukutoe uroe Sabat, dan teutab jiseumah dewa-dewa nyang jipujoe lé indatu awaknyan keudroe.
25 Óh lheueh nyan Ulôn jok ubak awaknyan huköm-huköm nyang hana gét dan peurintah-peurintah nyang hana hase teubri udeb.
26 Ulôn peubiyeu awaknyan jipeukutoe droe deungon keureubeuen-keureubeuen nyang jipeubuet keudroe, dan aneuëk-aneuëk agam jih keudroe nyang tuha pi awaknyan keureubeuen. Deungon cara nyan Ulôn huköm awaknyan mangat awaknyan jiteupeue bahwa Ulôn kheueh TUHAN.
27 Meunan kheueh, hé manusia fana, peutrok laju keu ureuëng Israel, peue nyang Ulôn, TUHAN Nyang Mahamanyang peugah ubak awaknyan: Nyoe cuntoh nyang laén nyang teutunyok pakriban indatu gata jihina Ulôn dan hana seutia ubak Ulôn.
28 Ulôn ba awaknyan bak tanoh nyang ka Lôn meujanji ubak awaknyan. Watée awaknyan jikalon bukét-bukét nyang manyang dan bak-bak kayée nyang rampak, awaknyan jipeuseumah keureubeuen bak teumpat nyan. Awaknyan jipeujeuet Ulôn beungéh sabab keureubeuen-keureubeuen nyang teutot dan peuseumahan anggô awaknyan.
29 Ulôn peugah ubak awaknyan, 'Teumpat-teumpat manyang peue nyang gata saweue nyan?' Dan phon uroenyan teumpat nyan geuboh nan 'Teumpat-teumpat manyang'.
30 Dan peusampoe kheueh ubak ureuëng Israel peue nyang Ulôn, TUHAN Po teu Allah Nyang Mahamanyang peugah ubak awaknyan. 'Pakon gata peubuet desya-desya lagée nyang ka jipeubuet lé indatu gata? Lagée awaknyan, gata taseutôt cit beurala-beurala nyang kutoe ngon luwat nyan.
31 Dan sampoe án uroenyoe pih gata peukutoe droe gata deungon cara gata ba peuseumahan dan tatot aneuëk-aneuëk gata keudroe sibagoe keureubeuen keu beurala-beurala. Dan mantong cit tajeuet lakée peutunyok nibak Ulôn? Deumi Ulôn, Po teu Allah nyang udeb, TUHAN Nyang Mahamanyang, gata hana Lôn idhin talakée peutunyok ubak Ulôn.
32 Gata keuneuk peusaban ngon bansa-bansa laén dan peunduduek nanggroe nyang jiseumah bak-bak kayée dan batée. Teuma keuheundak gata nyan hana meuhase.' "
33 "Deumi Ulôn, Allah nyang udeb, TUHAN Nyang Mahamanyang, gata Ulôn peuingat bahwa deungon beungéh Ulôn nyan, gata Lôn peurintah deungon kreueh dan teugaih sampoe gata rasa keudroe kuasa Ulôn. Gata Lôn peusapat dan Lôn ba lom u jeueb-jeueb nanggroe di teumpat gata nyang ka Ulôn peucrebre.
35 Laju gata Ulôn ba ubak 'Guron Bansa-bansa'. Disinan gata Ulôn peusidang meuhadab muka,
36 lagée nyan nyang ka Ulôn peubuet teuhadab indatu gata di Guron Sinai. Ulôn, TUHAN Nyang Mahamanyang ka Lôn peugah haba.
37 Gata Lôn peusaneut deungon gasa dan kreueh mangat gata taát ubak peujanjian Ulôn.
38 Bubena ureuëng beurontak dan ureuëng jeuhet Lôn peuaséng di teungoh-teungoh gata. Awaknyan Ulôn ba nibak nanggroe-nanggroe nyang jinoenyoe na awaknyan tinggai dan hana Lôn idhin jigisa u tanoh Israel. Teuma barô kheueh gata teupeue bahwa Ulôn kheueh TUHAN."
39 TUHAN Nyang Mahamanyang geupeugah, "He ureuëng-ureuëng Israel, jinoenyoe teuseurah ubak gata. Bék tapiôh tapeubuet desya deungon beurala-beurala gata! Teuma ingat kheueh bahwa óh ka lheueh nyan gata harôh tataát Ulôn dan hana le tapeukutoe nan Ulôn nyang suci deungon taba peuseumahan ubak beurala-beurala gata nyan.
40 Sabab di tanoh Israel, bak pucak gunong Ulôn nyang suci, gata bandum, bansa Israel taseumah Ulôn. Disinan Ulôn teuma galak keu gata dan Lôn tem teurimong keureubeuen-keureubeuen nyang gata peuseumah, peue-peue nyang gata peuseumah nyang paleng gét dan meuneubri-meuneubri gata nyang paleng khusos.
41 Óh ka lheueh gata Ulôn peuteubiet nibak nanggroe-nanggroe teumpat gata teupeu crebre, Ulôn Lôn peusapat gata dan Lôn teurimong bandum keureubeuen gata nyang teutot. Dan barô kheueh jiteupeue lé bandum bansa bahwa Ulôn kheueh Po teu Allah Nyang Mahakudus.
42 Meunyoe gata ka Ulôn peuwoe lom u tanoh Israel, tanoh nyang Ulôn peujanji keu indatu gata, barô kheueh gata teupeue bahwa Ulôn kheueh TUHAN.
43 Disinan gata teuingat bandum buet-buet nyang lumpah luwat dan kutoe nyang ka jipeukutoe droe gata keudroe. Dan gata bosan taingat bandum buet nyang jeuhet nyan.
44 Meunyoe gata ka Lôn peusaneut nyang lagée nyan deumi keuhoreumatan nan Ulôn, dan bukon sipadan deungon pi-e gata nyang brok meunan cit pi-e gata nyang jeuhet, tateupeue kheueh lé gata ureuëng Israel bahwa Ulôn kheueh TUHAN. Ulôn TUHAN Nyang Mahamanyang ka Lôn peugah haba."
45 TUHAN meufeureuman ubak ulôn, lagée nyoe,
46 "He manusia fana, takalon kheueh u siblaih seulatan. Teugaih kheueh tanoh seulatan dan beungéh kheueh bak uteuen-uteuen disinan.
47 Tayue kheueh bak uteuen nyang disinan peue nyang Ulôn, TUHAN Nyang Mahamanyang peugah keu awaknyan, 'Deungoe kheueh! Ulôn Lôn peuhu apui nyang jipeututong bandum bak kayée nyang na nibak gata, bah kheueh nyan kayée tho meunan cit deungon kayée udeb. Apui nyang hu meuhuéb-huébnyan hana hase teupeulon. Apui nyan jimeu éue nibak seulatan u utara, dan bandum manusia jirasa keu seu uém apui nyan.
48 Awaknyan sadar bahwa Ulôn, TUHAN ka Lôn peuhu apui nyan, dan hana meusidroe pi nyang hase peulon apui nyan.' "
49 Teuma ulôn Yehezkiel ulôn peugah hainyan hana lôn harök dan lôn peugah, "TUHAN Nyang Mahamanyang, bék tayue ulôn peugah hainyan! Bandum ureuëng ka apoh apah sabab ulôn galak lôn peugah haba deungon miseu umpama sampoe payah teupuphom."

Chapter 21

TUHAN meufeureuman ubak ulôn, kheun Gobnyan,
2 "He manusia fana, kutôk kheueh Yerusalem. Kutôk kheueh teumpat-teumpat iébadat nyang na disinan. Peuingat kheueh tanoh Israel,
3 bahwa Ulôn, TUHAN, Lôn peugah lagée nyoe, 'Ulôn nyoe musoh gata. Ulôn Lôn suet peudeueng lam saröng dan Lôn cang bumaté gata bube nyang na, bah kheueh nyan nyang jeuhet meunan cit nyang jroh.
4 Deungon peudeueng Lôn kulawan bandum ureuëng di utara sampoe seulatan.
5 Dan bandum ureuëng jiteupeue bahwa Ulôn, TUHAN, Lôn suet peudeueng Lôn dan hana Lôn pasoe lam saröng le.'
6 He manusia fana, Meu óe-óe kheueh dan apoh apah kheueh dikeue ureuëng Israel, siulah-ulah gata patah até dan putôh asa.
7 Meunyoe awaknyan jitanyong pakon gata áh éuh, peugah kheueh laju bahwa gata seudeh sabab haba nyang teuma teuka. Deungon na haba nyan teuka yo lam até awaknyan, jaroe awaknyan leumoh, dan teuöt awaknyan yo meugám-gám, awaknyan patah seumangat. Keubit that watée jih ka teuka, dan bandum nyan teujadi. Ulôn TUHAN Nyang Mahamanyang ka Lôn peugah haba."
8 TUHAN meufeureuman ubak ulôn,
9 "He manusia fana, meuramai kheueh! Jak bri tée kheueh ubak dumna ureuëng bahwa Ulôn, TUHAN, Lôn peugah lagée nyoe, 'Na sikrak peudeueng, peudeueng nyang teugeusok dan teuasah.
10 Peudeueng nyan teuasah mangat jeuet teupeumaté peue nyang na, teu uet óh gleh mangat meukilat. Nibak umat Lôn hana le keugeumbiraan sabab bandum peu ingatan dan huköman awaknyan anggab hana.
11 Peudeueng nyan teuasah mangat siab óh watée teupeuguna laju jijok bak sidroe-sidroe ureuëng tukang seumeusie.
12 He manusia fana, meuratok kheueh dan tameuhôi kheueh! Sabab peudeueng nyan ka siab jilawan umat Lôn. Bandum peumimpén Israel meusajan silurôh bansa jitob lé peudeueng nyan sampoe binasa. Teuma tapéh kheueh dada gata ngon até nyang gulana,
13 sabab Ulôn teungoh Lôn ujoe umat Lôn, meunyoe awaknyan hán jitem ubah peurangoe, bandum nyan teujadi ateueh awaknyan.'
14 Nyan, he manusia fana, meuramai kheueh. Péh kheueh paleuet jaroe gata, sibagoe tanda keu peudeueng nyan keu teupeuphon seumeusie. Peudeueng nyan lumpah teumakot.
15 Peudeueng nyan ka jipeujeuet bansa Ulôn gadôh ceubeueh jih dan reubah meugantoh. Di Ulôn ancam banda awaknyan ngon peudeueng nyan nyang meuble-ble lagée kilat, dan nyang ka siab keu peumaté.
16 He peudeueng nyang tajam, ceumeucang kheueh u uneuen dan ublah wie, dan ho homantong nyang gata galak.
17 Ulôn Lôn péh cit paleuet jaroe, laju beungéh Ulôn seungab. Ulôn, TUHAN, ka Lôn peugah haba."
18 TUHAN meufeureuman ubak ulôn, kheun Gobnyan,
19 "He manusia fana, gamba kheueh dua boh rot nyang jeuet jijak lé raja Babel nyang teungoh jiba peudeueng gobnyan. Bandua boh rot nyan harôh meuuboe nibak nanggroe nyang saban; rot nyang saboh teutuju u Raba, banda Amon; nyang saboh teuk u Yerusalem, banda meu kuta di Yehuda. Peugöt kheueh papeuen peutunyok rot dipat rot nyan ka jipeuphon meucabeueng.
21 Raja Babel laju geudong bak papeuen peutunyok rot ueh nyan. Mangat jiteupeue rot nyang toh nyang harôh jijak, laju lé raja Babel nyan jilakée peutunyok bak beurala-beurala jihnyan, jiguncang panah dan jipeureksa até beulatang nyang ban lheueh jikeureubeuen.
22 Teunyata panah nyang teucok bak jaroe jihnyan teutunyok arah u Yerusalem! Nyan tanda jih raja harôh jiprang banda Yerusalem, jidumpék prang meuhubo dan jiyue sipa-i jihnyan mangat jisuson alat-alat peundobrak, geuyue pasang bak pintoe-pintoe geureubang Yerusalem, geuyue tamon tanoh jeuet keu kuta teukeupong dan geuyue khueh lhueng-lhueng.
23 Peunduduek Yerusalem hana jipeucaya bahwa awaknyan keunong seurang, sabab awaknyan ka jipeugét janji deungon Babel. Teuma ramaian nyoe teupeu ingat ubak awaknyan bahwa awaknyan teudrob ngon sabab desya-desya awaknyan keudroe.
24 Ulôn, TUHAN Nyang Mahamanyang Lôn peugah ubak awaknyan, 'Desya-desya gata ka teuteupeue dan bandum ureuëng jiteupeue bahwa gata meusalah. Keujeuhetan gata nyan leumah bak tieb-tieb buet gata. Jinoenyoe ka trok watée jih gata teuhuköm dan gata Lôn seurah ubak musoh gata.'
25 Dan ubak raja Israel Ulôn peugah, 'He raja nyang jeuhet dan doraka! Watée keu teuhuköm gata nyang keuneulheueh ka tô that.
26 Ulôn, TUHAN Nyang Mahamanyang ka Lôn peugah haba. Peuhah kheueh mahkota gata dan peulheueh kheueh seureuban gata. Jinoenyoe, keuadaan ka meu ubah. Beuôt kheueh keududuekan ureuëng gasien dan bri kheueh bak awaknyan kuasa! Peutron kheueh dumna peunguasa nibak martabat jih!
27 Banda nyoe Lôn peuhanco sapan sapa, sampoe dipat mantong na rungka-rungka. Teuma hainyan barô kheueh teujadi meunyoe ureuëng nyang Ulôn piléh keu teuhuköm banda nyoe ka teuka. Keu ureuëng nyan Ulôn jok banda nyoe.' "
28 "He manusia fana, meuramai kheueh! Jak peugah kheueh ubak ureuëng Amon nyang ka jihina Israel, bahwa Ulôn, TUHAN Nyang Mahamanyang Lôn peugah, 'Sipucok peudeueng ka siab keu teumeucang; peudeueng nyan ka teuasah meuble-ble lagée kilat, mangat jeuet siab keu teupeumaté.
29 Nyang deuh gata ngieng nyan na kheueh peuleusu, dan ramaian nyang gata peugah nyan na kheueh buhak dan sulet. Gata jeuhet dan doraka, dan saát keu teuhuköm gata nyang keuneulheueh ka tô that. Peudeueng nyan jikoh takue gata.
30 He ureuëng Amon, peutamong kheueh peudeueng gata nyan dalam saröng! Gata Lôn peusidang di teumpat gata teucebta dan teupeulahé.
31 Ulôn Lôn peulheueh u ateueh gata beungéh Ulôn nyang hana ngon peusa. Dan gata Ulôn jok ubak ureuëng-ureuëng keujam nyang ka teulateh keu jipeubinasa.
32 Gata habéh tutong jipajoh lé apui. Darah gata rô di nanggroe gata keudroe, dan hana meusidroe pih nyang na mantong teuingat keu gata. Ulôn, TUHAN ka Lôn peugah haba.' "

Chapter 22

TUHAN meufeureuman ubak ulôn, kheun Gobnyan,
2 "He manusia fana, peu kheueh ka siab gata tapeusidang banda nyang peunoh deungon ureuëng peumaté jihnyan. Tunyok kheueh ubak jihnyan bandum buet jihnyan nyang kutoe dan luwat nyan."
3 TUHAN Nyang Mahamanyang geuyue bak ulôn jak peusampoe nyang lagée nyoe ubak Yerusalem, "Gata meusalah sabab ka ta poh maté jai that nibak peunduduek gata keudroe, dan ka teupeukutoe droe gata deungon cara teuseumah beurala-beurala nyang gata peugét keudroe, sabab nyan kheueh watée teuhakém gata ka tô that dan riwayat gata sigra meu akhé. Gata Ulôn peubiyeu jeuet keu bahan hinaan dan jipeukém lé bansa-bansa dan bandum nanggroe.
5 Gata jipeukém-peukém dan jihina lé nanggroe-nanggroe nyang jiôh dan tô sabab gata hana piôh-piôh taiengkeue ubak huköm dan peuratoran.
6 Banmandum peumimpén Israel nyang jipeubangga na kheueh teunaga jih keudroe dan jipeubuet seumeupoh maté teuhadab ureuëng laén.
7 Hana meusidroe pih nibak peunduduek gata geuhoreumat ureuëng syiek jih. Gata tatipée ureuëng aséng dan tacok laba nibak keususahan inong balée dan aneuëk yatim ngon muntui.
8 Teumpat-teumpat iébadat keu Ulôn gata peukutoe dan uroe Sabat hana gata pakoe.
9 Lamkawan peunduduek gata na ureuëng-ureuëng ba peusuna nyang galak that bak buet peusuna keu ureuëng laén mangat ureuëng nyang keunong peusuna nyan teuhuköm maté. Na teuma nyang pajoh uengkot sie nyang ka teukeureubeuen keu beurala. Na lom nyang galak jipeubuet mukah.
10 Na nyang jigoda dan jimeumukah ngon ma uei jih, na cit ngon ureuëng inong nyang teungoh teuka he,
11 peurumoh ureuëng laén atawa ngon meulintée jih atawa adoe jihnyan nyang laén ma.
12 Na teuma nyang jeuet keu ureuëng peumaté gob cara teubayeue, lintah darat dan nyang pajoh ureuëng-ureuëng seubansa jih keudroe. Awaknyan banmandum ka jituwoe keu Ulôn. Ulôn, TUHAN Nyang Mahamanyang ka Lôn peugah haba.
13 Teuma bak saát nyoe Ulôn Lôn heuntam bube na peurampok dan tukang peumaté gob.
14 Peu kheueh mantong tajeuet atawa mantong teuga gata keu tabeuôt jaroe gata óh ka lheueh seuleusoe Lôn huköm gata? Ulôn, TUHAN Nyang Mahamanyang ka Lôn peugah haba dan Ulôn Lôn peubuet peue nyang ka Ulôn peugah.
15 Ulôn Lôn peucrebre peunduduek gata u jeueb-jeueb nanggroe dan bansa, dan Ulôn Lôn peupiôh buet gata nyang jeuhet nyan.
16 Gata jihina lé bansa-bansa laén, dan barô kheueh gata teupeue bahwa Ulôn kheueh TUHAN."
17 TUHAN meufeureuman ubak ulôn,
18 "He manusia fana, ureuëng-ureuëng Israel nyan hana meuguna nibak Ulôn. Awaknyan ibarat bröh logam nyang meujampu, lagée teumaga, timah, beuso dan timah itam nyang na leubeh óh ka lheueh pirak teupeu gleh didalam apui.
19 Dan bak watée nyoe, Ulôn, TUHAN Nyang Mahamanyang, Ulôn peugah ubak awaknyan bahwa awaknyan saban lagée logam nyang hana meuguna nyan. Lagée toh rabok pirak, peurunggu, beuso, timah itam dan timah putéh teupeutamong lam sinungkée apui keu teupeu gleh, meunan cit teuma awaknyan Lôn peusapat dan Ulôn ba u Yerusalem. Beungéh Ulôn nyang luwa biasa nyan Lôn peuhanco awaknyan lagée apui jipeuhanco rabok-rabok logam.
21 Nyoe, Ulôn Lôn peusapat awaknyan di Yerusalem, Lôn peuhu apui beungéh Ulôn dimiyueb awaknyan, sampoe awaknyan hanco meudeudak.
22 Lagée pirak nyang teupeuhanco lam sinungkée apui, meunan kheueh awaknyan teupeuhanco di Yerusalem. Dan barô kheueh jiteupeue lé awaknyan bahwa Ulôn, TUHAN, ka Lôn peulheueh beungéh Ulôn ateueh awaknyan."
23 TUHAN meufeureuman lom ubak ulôn, kheun Gobnyan,
24 "He manusia fana, jak peugah ubak ureuëng Israel bahwa tanoh droe jih nyan kutoe, dan sababnyan Ulôn beungéh dan Lôn huköm.
25 Bubena peumimpén awaknyan lagée singa nyang teuma uém óh ka lheueh jiteugöm mangsa. Awaknyan tukang peumaté rakyat, jireupah bandum hareuta dan keukayaan nyang jiteumé sabab nyan le lumpah na ureuëng inong nyang jeuet keu balée.
26 Bandum teungku imeum Israel jilingkeue ubak huköm-huköm Lôn dan jipeukutoe bandum beunda nyang teupeu khusos keu Ulôn. Awaknyan hana jibeda nyang toh nyang haleue dan nyang toh teuma nyang hareuem. Meunan cit awaknyan hana jipeurunoe rakyat mangat jipeubeda nyang toh nyang gleh dan nyang toh teuma nyang kutoe meunurot peuratoran agama. Awaknyan hana jipeureumeun keu uroe Sabat. Deungon lagée nyan Ulôn ka jihina lé bansa Israel.
27 Peujabat-peujabat peumeurintah awaknyan lagée srigala nyang jipriek priek mangsa jih. Awaknyan jipeumaté manusia simata-simata jimita untông.
28 Bandum nabi jisöm-söm bubena desya-desya nyan; awaknyan lagée ureuëng cét bintéh beuton nyang kuto. Keumalon-keumalon awaknyan peuleusu, meunan cit deungon ramaian-ramaian awaknyan hana beutôi. Awaknyan meungaku bahwa peusan nyang awaknyan peusampoe na kheueh meuasai nibak TUHAN Nyang Mahamanyang, padahai Ulôn meubacut pih hana Lôn peugah haba bak awaknyan.
29 Ureuëng-ureuëng kaya jitipée gob meurampok. Awaknyan jipeubuet ateueh ureuëng gasien ban galak droe dan jicok laba bak ureuëng aséng.
30 Lamkawan ureuëng Israel nyan, Ulôn mita ureuëng nyang carông jipeudong bintéh beuton, atawa jidong bak teumpat-teumpat nyang bintéh beuton jih reuloh keu teupeuteun nanggroe nyan meunyoe Ulôn keuneuk peuhanco lam ju meudok-dok beungéh Ulôn; teuma hana meusidroe pih nyang meurumpok ngon Lôn.
31 Sabab nyan bak saátnyoe Ulôn peulheueh beungéh Ulôn nyan ateueh awaknyan, dan lagée apui Ulôn peubinasa awaknyan ngon bandum buet awaknyan. Ulôn TUHAN Nyang Mahamanyang ka Lôn peugah haba."

Chapter 23

TUHAN meufeureuman ubak ulôn, kheun Gobnyan,
2 "He manusia fana, na dua droe ureuëng inong, adoe aduen.
3 Yoh masa muda, awaknyan tinggai di nanggroe Meusé. Di nanggroe Meusé nyan awaknyan bandua ka gadôh peurawan, laju awaknyan jeuet keu inong lunte.
4 Nyang tuha nan jih Ohola; jihnyan teupeulambang keu Samaria. Adoe jih teuhôi nan Oholiba; jihnyan teupeulambang keu banda Yerusalem. Ulôn meukawen ngon awaknyan laju meuteumé aneuëk bak bandua inong nyan.
5 Bahpi Ohola ka jeuet keu peurumoh Lôn, jihnyan teutab meulunte, dan that-that gurangsang jipeutimang geunaséh-geunaséh jih di Asyur.
6 Awaknyan na kheueh tantra nyang sok peukayan seuragam mirah ungu, ureuëng bansawan dan peujabat-peujabat manyang; bandum nyan na kheueh peuwira-peuwira pasokan meuguda nyang ruman jih gagah-gagah.
7 Deungon ureuëng-ureuëng rayeuk nyan kheueh Ohola meumukah. Lom teuma that-that gurangsang beureuhi inong nyan, jipeukutoe teuma droe jih deungon jiseumah beurala-beurala nyang jiseumah lé awaknyan.
8 Inong nyan teutab hana jipiôh jipeubuet jeuhet lagée nyang ka jipeubuet di nanggroe Meusé, diteumpat inong nyan gadôh peurawan jih. Yoh masa ubit jih, inong nyan ka jipeuéh dan jipeusaneut lagée inong meumukah.
9 Sabab nyan kheueh Ulôn jok jihnyan ubak geunaséh-geunaséh jih, ureuëng-ureuëng Asyur nyang lumpah jirindu nyan.
10 Jihnyan jipeulon lé awaknyan deungon gasa, laju jipoh maté ngon peudeueng, dan aneuëk-aneuëk inong nyan jireupah. Dipat mantong naseb inong nyan jeuet keu boh bibie kawöm hawa.
11 Oholiba, adoe inong nyan jikalon keujadian nyan, teuma jihnyan leubeh meunafeusu jipeubuet mukah nyan nibak Ohola.
12 Meunan cit di Oholiba gét that jimeuharab ubak ureuëng-ureuëng Asyur nyan, na kheueh peumuda-peumuda gagah nibak pasokan meuguda, ureuëng bansawan dan peujabat manyang, dan sipa-i nyang sok seuragam mirah ungu nyan.
13 Ulôn ngieng keudroe bahwa Oholiba paleng jeuhet, saban lagée poda jih.
14 Maken treb Oholiba seumaken beujat. Jihnyan lumpah teutarek ubak gamba-gamba nyang meu uke nibak bintéh, dan nyang teuwareuna deungon cét lagée darah mirah. Gamba-gambanyan teupeulambang peuwira-peuwira Babel deungon talo keuieng nyang ceudah dan seureuban nyang meujuntée.
16 Watée Oholiba jikalon gamba-gamba nyan, laju teuka beureuhi dan gurangsang jihnyan luwabiasa dan jihnyan laju jikirém undangan ubak peuwira-peuwira nyan di Babel.
17 Dan teuka kheueh awaknyan dan jiéh ngon inong nyan. Awaknyan jinoda inong nyan luwabiasa sampoe inong nyan teuka luwat keu awaknyan.
18 Óh lheueh nyan deungon trang-trang inong nyan jimeujinah dan jimeumukah sira jipeukalon droe dikeue ureuëng ramé. Ulôn luwat that Lôn kalon inong nyan, saban cit lagée Ulôn luwat keu poda jih.
19 Maken treb maken kayém jipeubuet mukah, hana beuda jih yoh jihnyan jimeumukah yoh inong nyan mantong di nanggroe Meusé.
20 Inong nyan lumpah beureuhi keu ureuëng agam nyang ju nafeusu gurangsang jih, dan nyang geujolak nafeusu beureuhi jih sabe rayeuk lagée nafeusu guda agam. (
21 He Oholiba, gata keuneuk ulang lom buet jeuhet nyan nyang gata peubuet yoh gata mantong muda, watée ureuëng Meusé meucumbu rayu deungon gata.)"
22 TUHAN Nyang Mahamanyang meufeureuman, "He Oholiba, gata ka bosan deungon geunaséh-geunaséh gata, teuma Ulôn Lôn peusuna awaknyan jeuet awaknyan beungéh keu gata dan jikeupong gata.
23 Ulôn kugumpôi dan Ulôn ba bandum geunaséh gata nyang na di Babel, Pekod, Soa, Koa, Asyur, meunan cit deungon ureuëng-ureuëng Kaldea. Ulôn ba keu gata peumuda-peumuda gagah nyang meupangkat manyang, bansawan, peujabat peunteng dan peuwira-peuwira pasokan meuguda.
24 Awaknyan jijakprang gata rot utara deungon tantra nyang raya, deungon geuritan-geuritan prang dan geuritan nyang ba beukai. Deungon teulindong ngon peurisai dan tupi-tupi waja, awaknyan jikeupong gata. Teuma Lôn peubiyeu awaknyan jihuköm gata meunurot huköm-huköm nyang na bak awaknyan keudroe.
25 Sabab Ulôn beungéh keu gata, Lôn peubiyeu awaknyan jipeubuet ateueh gata deungon keujam. Idong dan ôn punyueng gata awaknyan koh dan aneuëk-aneuëk gata jicok dan jitot udeb-udeb.
26 Gata jipeulon dan piasan-piasan gata jireupah.
27 Meunan kheueh Ulôn kupeupiôh nafeusu beureuhi gata dan bandum buet mukah nyang ka gata peubuet yoh phon gata mantong di nanggroe Meusé. Gata hana meuharab le ubak beurala toh mantong atawa teuingat ubak Meusé."
28 TUHAN Nyang Mahamanyang meufeureuman, "Ulôn Lôn seurah gata ubak ureuëng-ureuëng nyang paleng gata luwat dan nyang gata banci.
29 Sabab awaknyan banci keu gata, bandum hase jeureh payah gata jireupah lé awaknyan. Gata jitinggai teulon bulat hana meuija meusiurat beuneueng lagée inong lunte nyang jitonton lé ureuëng ramé. Nafeusu beureuhi dan buet cabui gata nyan kheueh
30 nyang peuteuka hase nyang brok nyoe keu gata. Gata jeuet keulunte keu bansa-bansa, dan tapeukutoe droe gata deungon beurala-beurala awaknyan.
31 Gata taseutôt pi-e poda gata, lé sabab nyan gata Ulôn huköm deungon huköman nyang saban."
32 TUHAN Nyang Mahamanyang meufeureuman, "Asoe cangkie poda gata harôh gata jieb. Cangkie nyan raya dan lhok. Asoe cangkie nyan peunoh meu asoe ejekan dan hinaan, nyang harôh gata tanggong nibak tieb-tieb ureuëng.
33 Cangkie poda gata Samaria, asoe jih teumakot dan hanco nyang hana teukira. Óh ka lheueh gata jieb bandum asoe jih gata mabök dan meudeurita. Dan deungon péng-péng cangkie nyang beukah meurabok nyan gata tapriek-priek dada gata. Ulôn, TUHAN Nyang Mahamanyang ka Lôn peugah haba."
35 TUHAN Nyang Mahamanyang meufeureuman, "Sabab gata ka tuwoe bak Ulôn dan tapeulikot Ulôn, gata meudeurita akibat nafeusu beureuhi gata dan lunte gata."
36 TUHAN meufeureuman ubak ulôn, "He manusia fana, peu kheueh ka siab teupeuhuköm Ohola dan Oholiba? Sapa kheueh awaknyan keuhai keujeuhetan nyang ka awaknyan peubuet.
37 Awaknyan ka jipeubuet meumukah dan jipeumaté gob; awaknyan ka jimeumukah ngon beurala-beurala dan jipoh maté aneuëk-aneuëk Ulôn nyang awaknyan peulahé. Aneuëk-aneuëk nyan ka awaknyan peuseumah ubak beurala-beurala awaknyan.
38 Dan bukon nyan mantong. Awaknyan ka teuma jipeukutoe Baét Ulôn dan uroe Sabat nyang ka Lôn peuteutab nyan.
39 Bak uroe awaknyan jipeumaté aneuëk-aneuëk Ulôn dan jipeuseumah keu beurala-beurala, bandua droe aduen adoe nyan geuteuka u Baét Lôn dan laju jipeukutoe Baét Ulôn nyan!
40 Dan awaknyan jikirém undangan keu ureuëng-ureuëng agam di nanggroe nyang jiôh, dan ureuëng nyang teu undang nyan laju jiteuka. Keu teusambot jamé nyang teu undang nyan, bandua adoe aduen nyan laju jimanoe, jiboh cilak mata sira jingui piasan-piasan.
41 Laju awaknyan jiduek ateueh teumpat duek nyang ceudah. Dikeue jihnyan na saboh meuja hidangan nyang peunoh deungon meubagoe rupa peunajoh, hana keutinggalan dupa dan minyéuk zaiton nyang ka Ulôn jok keu awaknyan.
42 Di luwa teudeungoe su ureuëng ramé nyang lumpah subra teungoh jipeupueh até ban galak droe. Ureuëng-ureuëng nyan ka ji undang jeuet jiteuka nibak padang pasi. Awaknyan jipeusök gleueng bak jaroe ureuëng inong adoe aduen nyan, dan jipeuseuôn mahkota-mahkota nyang lagak ateueh ulée awaknyan.
43 Laju Lôn pike, 'Peu kheueh mantong jitem awaknyan geumeuén cinta ngon inong jeuhet nyang ka layée sabab buet meumukah nyan?'
44 Ngon cara meugantoe-gantoe awaknyan jijak ubak Ohola dan Oholiba, bandua inong lunte nyang ka beujat nyan.
45 Teuma, ureuëng-ureuëng saléh geupeu huköm ureuëng inong adoe aduen nyan ateueh dasai buet meumukah dan seumupoh maté, sabab awaknyan biet-biet meusalah."
46 TUHAN Nyang Mahamanyang meufeureuman, "Jak tawök kheueh laju saboh kawan ureuëng mangat jijak reupah dan jiseksa bandua ureuëng inong lunte nyan.
47 Bah kheueh awaknyan jigeulawa ngon batée dan jicang deungon peudeueng. Bah kheueh aneuëk-aneuëk awaknyan jitak-tak dan rumoh-rumoh awaknyan jitot.
48 Bansaboh nanggroe Lôn peuhanco bandum buet-buet nyang jeuhet lagée nyan. Tendakan Ulôn nyan jeuet keu peuingat keu bandum ureuëng inong mangat bék jipeubuet jeuhet lagée dua droe inong adoe aduen nyan.
49 He Ohola dan Oholiba, ulôn kuhuköm gata sabab gata meumukah dan taseumah beurala. Dan barô kheueh gata teupeue bahwa Ulôn kheueh TUHAN Nyang Mahamanyang."

Chapter 24

Bak tanggai siploh, buleuen siploh, bak thon nyang keu sikureueng lam masa kamoe geuböih u teumpat aséng, TUHAN meufeureuman ubak ulôn,
2 "He manusia fana, cetet kheueh tanggai uroe nyoe, sabab uroenyoe raja Babel geupeuphon keupong Yerusalem.
3 Ulôn, TUHAN, na saboh miseu keu tapeusampoe ubak umat Lôn nyang galak beurontak: Leng laju ié u dalam ayan peuduek laju ateueh apui.
4 Peutamong laju eungkot sie lam ayan nyan sie nyang paleng gét mutu jih; asoe bahô dan asoe pa meunan cit ngon tuleueng-tuleueng nyang le sumsum jih.
5 Peuguna kheueh uengkot sie bubiri nyang teumbon dan muda tamah kheueh peuseudiaan kayée apui. Bah kheueh ju dan meubok-bok ié jih reuboh kheueh uengkot sie nyan meunan cit ngon tuleueng-tuleueng jih."
6 TUHAN Nyang Mahamanyang meufeureuman, "Ceulaka kheueh banda nyang peunoh deungon ureuëng poh peumaté manusia! Bandanyan lagée beulangöng meugeuratan nyang hántom na teu uet. Uengkot sie nyang ka na lam nyan teupeuteubiet sikrak-krak, sampoe hana meusikrak pi nyang na tinggai.
7 Di banda nyan teujadi ureuëng poh gob sampoe maté, teuma darah ureuëng nyang keunong poh nyan hana rô ateueh bumoe, teuma ateueh batée kreueh, sampoe hana hase teuseubée.
8 Darah nyan Ulôn peubiyeu disinan sampoe leumah teukalon dan teutueng bila."
9 TUHAN Nyang Mahamanyang meufeureuman, "Ceulaka kheueh banda nyang peunoh ngon tukang peumaté manusia nyan! Ulôn keudroe nyang atoe kayée mangat Lôn tot.
10 Tamah kheueh kayée jih! Kipah kheueh apui jih! Rebôh kheueh asoe jih! Jak tiek kheueh kuah jih. Tot kheueh tuleueng-tuleueng jih!
11 Jinoenyoe keubah kheueh kanöt peurunggu nyang soh nyan ateueh apui dan bah kheueh disinan sampoe tutong dan hu mirah meubara. Óh lheueh geuratan jih tutong, beulangöng nyan gleh lom meunurot peuratoran agama.
12 Teuma hana bandum geuratan jih habéh jipajoh lé apui.
13 He Yerusalem, buet-buet gata nyang jeuhet dan beujat nyan ka tapeukutoe badan gata keudroe. Ulôn ka Lôn ujoe Lôn peugleh gata, teuma hana meuguna, sabab gata teutab kutoe. Gata hana gleh le sampoe Ulôn peulheuh beungéh Ulôn u ateueh gata.
14 Ulôn, TUHAN Nyang Mahamanyang ka Lôn peugah haba. Ka trok saát jih nibak Ulôn keu meutindak. Ulôn hana Lôn tuwoe keu desya gata dan hana teuma Lôn peu amphon dan Lôn gaséh gata. Gata Lôn huköm nyang sisuai deungon buet gata. Ulôn, TUHAN Nyang Mahamanyang ka Lôn peugah haba."
15 TUHAN meufeureuman ubak ulôn, "He manusia fana, deungon meudadak Ulôn cok ureuëng nyang paleng gata cinta. Teuma digata hana jeuet tameuratok tamo ba-e, atawa tapeubiyeu ié mata gata meuleng-leng.
17 Bék sampe mo gata nyang meusök-meusök nyan teudeungoe uluwa. Bék kheueh watée tajak hana tatôb ulée, atawa hana meulapek gaki, sibagoe ureuëng nyang meukabong, bék teuma gata tôb muka gata, dan bék tapajoh ruti meukabong."
18 Ban seuboh that Ulôn mariet ngon bansa nyan dan watée malam peurumoh Ulôn meuninggai donya. Óh singoh beungoh laju Ulôn peubuet peue nyang ka geupeurintah ubak Ulôn.
19 Rakyat jiteumanyong, "Pakon Bapak peubuet lagée nyoe? Peue guna jih keu kamoe?"
20 Laju ulôn peugah ubak awaknyan, "TUHAN geuyue bak ulôn
21 geuyue jak peugah peusan nyoe ubak gata: Gata tapeubangga teunaga Baét TUHAN. Gata galak tapandang dan tasaweue sabe, teuma TUHAN geupeukutoe rumoh Gobnyan. Dan anggota-anggota keuluwarga gata nyang mantong muda, nyang na tinggai di Yerusalem, teuma jipoh maté dimideuen prang.
22 Laju gata tapeubuet lagée nyang lôn peubuet bak saát nyoe. Gata hana tatôb muka gata atawa tapajoh ruti meukabong.
23 Gata hana tajak ngon hana teutôb ulée atawa meulapek gaki, hana meuratok atawa tamo ba-e. Gata seumaken meurana sabab desya-desya gata; gata apoh apah keudroe keu ureuëng laén.
24 Dan ulôn, Yehezkiel jeuet keucuntoh nibak gata; gata teuma tapeubuet lagée nyang ulôn peubuet bak saát nyoe. TUHAN geupeugah bahwa meunyoe hainyoe teujadi, gata tateupeue bahwa Gobnyan kheueh TUHAN Nyang Mahamanyang."
25 TUHAN meufeureuman ubak ulôn, "Nyan, he manusia fana, Ulôn cok nibak awaknyan Baét Ulôn nyang kong nyan, nyang ka jeuet keubanggaan dan keuseunangan awaknyan, dan nyang awaknyan pandang dan jisaweue ngon galak até. Laju Lôn cok cit teuma aneuëk-aneuëk awaknyan.
26 Bak uroe Ulôn peubuet hai nyang lagée nyan, sidroe nyang hase teupeusie nibak keubinasaan nyan teuma teuka, dan geupeusampoe haba nyan ubak gata.
27 Bak uroenyan cit teuma gata jeuet tapeugah haba lom dan hana kalu le. Laju gata tamariet deungon ureuëng nyan. Meunan kheueh gata jeuet keutanda keu awaknyan; dan barô kheueh jiteupeue lé awaknyan bahwa Ulôn kheueh TUHAN."

Chapter 25

TUHAN meufeureuman ubak ulôn,
2 "He manusia fana, kutok kheueh nanggroe Amon.
3 Yue kheueh bak bansa nyan peue nyang Ulôn, TUHAN Nyang Mahamanyang peugah ubak awaknyan, 'Gata galak takalon Baét Ulôn jipeukutoe dan tanoh Israel jipeurusak dan bansa Yahudi jiböih u teumpat aséng.
4 Lé sabab nyan gata Lôn peubiyeu jipeutaloe lé sukée-sukée bansa nibak guron timu. Awaknyan jipeudong khimah-khimah di nanggroe gata laju teutab tinggai disinan. Awaknyan jipajoh boh-boh kayée dan jijieb ié susu beulatang peulara gata.
5 Banda Raba Lôn ubah jeuet keu teumpat rabe unta, dan bansaboh nanggroe Amon Lôn peujeuet keu teumpat rabe bubiri. Dan barô kheueh gata teupeue bahwa Ulôn kheueh TUHAN.' "
6 TUHAN Nyang Mahamanyang meufeureuman, "Gata tapéh peleut jaroe sira meulikak ria. Gata anggab phui tanoh Israel.
7 Lé sabab nyan gata Lôn peujok ubak bansa-bansa nyang le nyang rampok dan reupah bandum atra milék gata. Gata Lôn peubinasa lagée nyan bagoe, sampoe hana le jeuet keu saboh bansa dan hana teuma na nanggroe keudroe. Dan neuteupeue kheueh lé gata bahwa Ulôn kheueh TUHAN."
8 TUHAN Nyang Mahamanyang meufeureuman, "Moab jipeugah bahwa Yehuda nyan saban cit lagée bansa-bansa laén.
9 Lé sabab nyan banda-banda nyang jipeuteun bataih nanggroe Moab Lôn peubiyeu jiprang lé musoh meunan cit deungon banda-banda nyang paleng ceudah, banda-banda nyan na kheueh: Bet-Yesimot, Baal-Meon dan Kiryataim.
10 Ulôn kupeubiyeu sukée-sukée bansa di guron Timu jipeutaloe Moab meusajan ngon nanggroe Amon, sampoe Moab ka hana le jeuet keu saboh bansa.
11 Ulôn kuhuköm Moab, dan barô kheueh jiteupeue lé awaknyan bahwa Ulôn kheueh TUHAN."
12 TUHAN Nyang Mahamanyang meufeureuman, "Bansa Edom ka jipeubuet salah nyang paleng raya sabab ka jipeubuet keujam ateueh bansa Yehuda, sabab jibalah dam.
13 Sababnyan Ulôn peumaklum bahwa Ulôn kuhuköm Edom dan Lôn peumaté tieb-tieb manusia dan bubena beulatang nyang na disinan. Bansaboh nanggroe nyan, phon di banda Téman sampoe trok u banda Dedan, Ulôn peujeuet seungue seungab; rakyat nyang na disinan maté dimideuen prang.
14 Bansa Ulôn Israel Ulôn peuguna keu teubalah dam ateueh Edom, dan Edom teupeusaneut deungon dahsyat nyang sipadan ngon beungéh Ulôn. Edom jiteupeue pakriban rasa jih jeuet keusasaran beungéh Ulôn. Ulôn, TUHAN Nyang Mahamanyang ka Lôn peugah haba."
15 TUHAN Nyang Mahamanyang meufeureuman, "Ureuëng-ureuëng Filistin ka jibalaih dam deungon keujam ateueh musoh treun meutreun awaknyan dan jipeubinasa awaknyan deungon peunoh banci.
16 Sababnyan Ulôn peumaklum Lôn prang ureuëng-ureuëng Filistin dan Lôn peuranab awaknyan. Tieb-tieb ureuëng nyang na mantong tinggai di sitot binéh panté Filistin Lôn poh maté.
17 Ulôn kuhuköm awaknyan deungon brat dan Lôn peulheuh dam Lôn sampoe puih. Meunyoe awaknyan jirasa beungéh Ulôn, jiteupeue kheueh lé awaknyan bahwa Ulôn kheueh TUHAN."

Chapter 26

Bak tanggai sa buleuen teuteuntée bak thon keu siblaih masa kamoe teuböih, TUHAN meufeureuman ubak ulôn, kheun Gobnyan,
2 "He manusia fana, peunduduek Tirus ka meusurak-surak sira jipeugah, 'Yerusalem ka hanco! Meugah banda nyan lamhai meuniaga ka hana le! Banda nyan ka hana jeuet le keusiteru tanyoe!' "
3 TUHAN Nyang Mahamanyang meufeureuman, "Ulôn nyoe musoh gata, he Tirus! Ulôn Lôn ba bansa nyang le mangat jijak prang gata, dan awaknyan teuka lagée umbak ié di laôt.
4 Awaknyan jipeuhanco bintéh-bintéh beuton gata dan jipeureubah bubena meunara gata. Bandum tanoh nyang na disinan Lôn sampôh akhéji nyang tinggai na kheueh sianeuk batée tho di teungoh laôt.
5 Bubena neulayan jiadée jeue ateueh batée nyan. Ulôn TUHAN Nyang Mahamanyang ka Lôn peugah haba. Tirus teuma jeuet keu uempeun lé bansa-bansa nyang le.
6 Awaknyan jireupah dan jipoh maté bube nyang na peunduduek di banda-banda ateueh tanoh darat Tirus. Dan barô kheueh jiteupeue lé peunduduek Tirus bahwa Ulôn kheueh TUHAN."
7 TUHAN Nyang Mahamanyang meufeureuman, "Ulôn kuba Raja Nebukadnezar di nanggroe Babel mangat jijak prang gata, he Tirus. Raja nyang paleng teuga nyan teuka rot utara deungon tantra nyang raya, deungon guda nyang le dan geuritan-geuritan prang meunan cit pasokan meuguda.
8 Bubena peunduduek di sigala banda nyang na ateueh tanoh darat teupoh maté watée muprang nyan. Musoh jikueh lueng-lueng teumpat meuteun, jiseubée bubena beuton meugunong-gunong dan jisuôn peurisai-peurisai raya nyang jipeuguna lé awaknyan keu jilawan gata.
9 Awaknyan jitulak bintéh-bintéh timbok gata deungon alat tulak dan jipeuhanco bubena meunara gata deungon bak-bak beuso.
10 Guda-guda awaknyan jai that-that, sampoe óh jibot langkah jipeupo abée habéh teutôb ateueh-ateueh gata. Su meugrum-grum pasokan meuguda nyang jitarek geuritan jiba bahan beukai dan geuritan prang meugeunta bak bintéh-bintéh beuton gata watée awaknyan jiliwat rot babah-babah pintoe geureubang nyang jitamong lam banda nyang ka jeuet keu rungka-rungka nyan.
11 Pasokan meuguda nyan jiseureubu di jalan-jalan gata dan jipeumaté peunduduek gata deungon peudeueng awaknyan keudroe. Tugu-tugu gata nyang meugah dan kong nyan jireuloh.
12 Musoh-musoh gata nyan jireupah bandum keukayaan dan barang meukat gata. Awaknyan jipeuhanco beuton-beuton gata dan jireuloh banmandum rumoh-rumoh gata nyang meuwáh. Óh lheueh jireuloh awaknyan jicok batée-batée jih, papeuen-papeuen dan tanoh jih, laju jigeulawa lam laôt.
13 Ulôn kupeuseungab bandum ca-e-ca-e gata dan musik keucapi gata.
14 Nyang na Ulôn tinggai na kheueh si aneuk batée nyang tandus, teumpat ureuëng neulayan jiadée jeue-jeue jih. Banda nyan hana teupeudong le. Ulôn, TUHAN Nyang Mahamanyang ka Lôn peugah haba."
15 TUHAN Nyang Mahamanyang geupeugah ubak banda Tirus, "Peunduduek daerah panté yo ngon teumakot watée jideungoe su gata kliek nyang ka taloe dan su peudeh ngon sakét ureuëng-ureuëng nyang teungoh jicang dan jikoh takue.
16 Teukalon naseb gata nyan, raja-raja nyang na bak binéh laôt jibeudôh ateueh takhta, sira jisuet bajée keurajeuen dan bajée awaknyan nyang meukasab, laju jiduek ngon badan yo nibak tanoh. Awaknyan lumpah teumakot meubacutpih hana teunang.
17 Óh lheuehnyan awaknyan jibaca ca-e peutron lam jrat lagéenyoe keu gata: Ka kheueh habéh hanco banda nyang teupujoe! Bandum kapai nyang na disinan habéh teusampôh lam laôt raya. Peunduduek disinan nyang awaiphon meukuasa lam laôt habéh teumakot dumna ureuëng panté.
18 Jinoe, bak uroe gata jipeutaloe, bubena peunduduek pulo habéh yo meugeunta. Teukeujot kheueh awaknyan banmandum watée jingieng gata hanco nyang hana teukira."
19 TUHAN Nyang Mahamanyang meufeureuman, "Ulôn peujeuet gata seungue ngon seungab lagée banda nyang hana peunduduek. Ulôn kupeulam gata ngon ié nibak tuwie laôt raya.
20 Laju gata Lôn kirém lam donya ureuëng maté mangat meusaho ngon ureuëng-ureuëng jamén ilée. Lôn peubiyeu gata tinggai teutab lam donya ureuëng maté nyan, di teungoh rungka-rungka abadi, meusapat-sapat ngon ureuëng maté. Dan tanoh gata hana le ureuëng duek, dan gata hana teukira lamkawan ureuëng udeb.
21 Gata Lôn peujeuet cuntoh nyang lumpah gli dan teumakot, dan nyan kheueh keuneulheuh riwayat gata. Ureuëng ramé jimita gata, teuma gata hana meurumpok. Ulôn TUHAN Nyang Mahamanyang ka Lôn peugah haba."

Chapter 27

TUHAN Nyang Mahamanyang meufeureuman ubak ulôn, "He manusia fana, meuca-e kheueh lagée peutron lam jrat nyoe keu Tirus, banda bak binéh nyang meuniaga ngon bandum peunduduek binéh panté: He Tirus, deungon sombong gata peugah, 'Gagah ulôn peusampoereuna!'
4 Nibak gata laôt raya tapeuniet rumoh. Gata tapeudong lagée kapai nyang ceudah.
5 Bintéh gata kayée aras Gunong Hermon taméh layeue gata kayée ceumara di Libanon.
6 Keu keunayôh gata teupeugét nibak kayée raya di Basan. Geuladak gata teupeugét nibak kayée ceumara, nibak pulo-pulo Siprus asai jih, piasan jihnyan takhta gadeng nyang meuhái hareuga.
7 Layeue dan tanda teuturi gata nibak lineun Meusé? deungon meubagoe kasab teusulam. Keubit halôh that keubahan-bahan khimah gata, ija asai nanggroe Siprus nyang meuwareuna ungu.
8 Keunayôh gata nibak Sidon dan Arwad. Aneuëk buah gata keudroe ureuëng-ureuëng peulaôt carông.
9 Utöih-utöih kayée nyang peugét kapai gata na kheueh ureuëng-ureuëng peungrajin asai Gebal. Nibak tieb-tieb nanggroe kapai-kapai jiteuka keuneuk jipeuna hubongan niaga.
10 Sipa-i sipa-i asai nanggroe Persia, Lidia dan Libia jitamong tentra gata. Awaknyan jigantung peurisai dan tupi waja bak timbok-timbok banda gata. Awaknyan ka jitulông jipeutaloe musoh-musoh dan jipeutamah meusyeuhu gata.
11 Sipa-i sipa-i asai Arwad jijaga bak beuton-beuton gata; meunara-meunara jikawai lé ureuëng-ureuëng asai Gamad. Peurisai awaknyan meugantung meureuti bak bintéh-bintéh beuton gata. Awaknyan kheueh nyang peuleungkab keu gagah gata.
12 Gata tapeubloe barang-barang niaga gata nyang meulimpah-limpah nyan u nanggroe Spanyol, sibagoe meunayeue jih gata teurimong pirak, beuso, timah putéh dan timah itam.
13 Gata meuniaga di Yunani, di Tubal, dan di Mesekh, dan sibagoe meunayeue jih gata teurimong bak awaknyan namiet-namiet dan barang-barang nibak peurunggu.
14 Gata tatuka barang-barang gata ngon guda geuritan, guda pasang dan bagal nibak Bet-Togarma.
15 Meunan cit peunduduek Rodus na cit meuniaga deungon gata dan peunduduek daerah binéh pasi jibloe cit barang niaga gata deungon gadeng dan kayée itam.
16 Bubena ureuëng meukat asai Siria jibloe barang-barang meuneukat gata dan hase-hase gata nyang jai meulimpah nyan. Awaknyan jibayeue ngon peumata nibak batée zamrud, ija mirah ungu, ija meusulam, ija lineun halôh, peumata nyang teupeuget nibak batée koral dan batée mirah deulima.
17 Yehuda dan Israel jituka barang niaga gata deungon gandom, meulisan, minyéuk zaiton dan reumpah-reumpah.
18 Peunduduek Damsyik jibloe barang niaga gata dan hase-hase gata dan jibayeue ngon anggô asai Helbon, bulée bubiri asai Sahar, beuso tempa dan reumpah-reumpah.
20 Peunduduek Dedan jibayeue barang-barang gata deungon ija-ija peulana
21 Ureuëng Arab dan peunguasa tanoh Kedar jibloe barang-barang gata ngon aneuëk bubiri, bubiri agam dan kaméng.
22 Keu teubloe barang-barang gata bubena ureuëng meuniaga asai Syeba dan Raema jiba peumata-peumata, méuh dan reumpah-reumpah nyang paleng gét.
23 Banda-banda Haran, Kane, Eden, saudaga-saudaga asai Syeba, banda-banda Asyur dan Kilmad, bandum nyan meuniaga deungon gata.
24 Awaknyan jipeubloe keu gata peukayan meuwáh, ija mirah ungu, ija meukasab, peureumadani-peureumadani nyang meubagoe curak, dan talo teumalo nyang kong-kong.
25 Barang niaga gata nyan teu angkot deungon kapai-kapai raya nyang meulayeue meuiréng-iréng. Gata lagée kapai nyang geuhon teupeudieng barang, kapai nyang meulayeue lam laôt raya.
26 Ureuëng meudayong jiba gata u teungoh laôt. Gata jiheuntam angén timu nyang teuka deungon keujam.
27 Peue-peue mantong barang niaga gata nyang gata peudieng lam kapai nyan, bandum peulaôt dan aneuëk buah gata, bandum tukang kayée dan saudaga gata, bandum sipa-i nyang na lam kapai nyan, bandum awaknyan gadôh dan lam bak watée gata lam.
28 Peulaôt-peulaôt jikliek-kliek sira teumawök sabab teumakot su geumeuciek awaknyan meudeungöng sampoe teudeungoe u panté-panté bak binéh pasie.
29 Jinoe kapainyan ka jitinggai, bandum peulaôt gata jiteungoh u panté.
30 Awaknyan jipeuba-e naseb gata, apoh apah, áh éuh jimeuratok deungon pilu. Awaknyan jisipreuk abée ateueh ulée dan jibalek-balek lam abée tanda meuduka.
31 Deumi gata awaknyan rila jicukô ôk bak ulée, jingui ija kröng peunoh duka cita. Awaknyan jimo seudeh ngon jimeuratok dan jipeuba-e naseb gata.
32 Laju awaknyan jimeuca-e saboh lagu teupeukubu lam jrat, 'He Tirus, soe kheueh imbang gata? Tirus, di laôt jinoe gata ka kalu.
33 Watée laôt raya gata arông deungon barang peunoh meuasoe, gata peupeunoh nyang jipeureulée lé bansa-bansa; raja-raja pih gata peukaya.
34 Jinoe gata ka lam, hanco lam tuwie laôt lhok. Bandum aneuëk buah gata dan barang-barang gadôh meusajan gata lam laôt raya.'
35 Bandum ureuëng nyang na tinggai bak binéh panté yo ngon teumakot watée jiingat keu naseb gata. Meunan cit raja-raja awaknyan teumakot raya; teumakot ngon gli deuh teukalon bak muka awaknyan.
36 Gata ka gadôh seungab sapan sapa. Bubena ureuëng meuniaga bansigom donya ka jeuet keu yo sabab teumakot jirasa naseb nyang lagée nyan teuma."

Chapter 28

TUHAN meufeureuman ubak ulôn,
2 "He manusia fana, jak peusampoe kheueh ubak raja Tirus, peue nyang Ulôn, TUHAN Nyang Mahamanyang peugah ubak gobnyan, 'Deungon sombong gata anggab droe gata dewa nyang meutahta di teungoh-teungoh laôt. Jeuet mantong gata meulagak lagée dewa, teuma ingat kheueh, gata na kheueh manusia biasa.
3 Tapike gata leubeh carông nibak Danel, sampoe hana rahsia nyang teusöm nibak gata.
4 Gata peuguna hikeumat dan peungeurtian gata keu gata peusapat hareuta, méuh dan pirak.
5 Keubit beutôi, gata carông tameuniaga dan saátnyoe ka kaya ijo, dan deungon kaya gatanyan sampoe gata ka jeuet keu ureuëng sombong!' "
6 TUHAN Nyang Mahamanyang meufeureuman ubak Tirus, "He Tirus, sabab gata ta anggab droe saban lagée Po teu Allah, Ulôn kukirém tantra aséng nyang lumpah keujam jijak prang gata. Awaknyan jipeuhanco bandum keumeugahan nyang ka gata teumé beureukat hikeumat dan peungeurtian gata.
8 Gata jipeumaté dan jikubu lam laôt.
9 Deungon nyan, meunyoe trok saát jih, peu kheueh mantong gata peugah bahwa gata Po teu Allah? Dikeue ureuëng-ureuëng tukang peumaté gata, deuh kheueh disinan bahwa gata na kheueh manusia biasa.
10 Gata maté lagée ureuëng hina sabab jipoh maté lé ureuëng aséng nyang hana jituri keu Po teu Allah. Ulôn, TUHAN Nyang Mahamanyang ka Lôn peugah haba."
11 TUHAN meufeureuman lom ubak ulôn, kheun Gobnyan,
12 "He manusia fana, peuba-e dan meuratok kheueh keu raja Tirus. Peusampoe kheueh peue nyang Ulôn, TUHAN Nyang Mahamanyang peugah keu jihnyan, 'Gata ka lheueh jeuet keu lambang keusampoereuna; yoh dilée gata keubit bijaksana dan gagah!
13 Teumpat tinggai gata di Eden, taman Po teu Allah. Peukayan gata teupeungui ngon meubagoe rupa peumata: batée deulima dan intan, topas, batée pirus, batée yakut, ratna, ceumpaka, batée nilam, zamrud dan batée alkali mirah. Meunan cit deungon piasan méuh gata le. Bandum atra nyan teupeugét keu gata bak uroe gata teucebta.
14 Malaikat nyang keujam dan teumakot Lôn peuduek disinan keu jikeumiet gata. Gata tinggai di ateueh gunong Lôn nyang suci dan tajak-jak di teungoh-teungoh batée peumata nyang muble-ble cahya.
15 Peurangoe gata sampoereuna yohphon gata teucebta sampoe gata tapeuphon peubuet jeuhet.
16 Gata laloe ngon bloe peubloe, dan nyan kheueh nyang ba gata ubak buet nyang jeuhet dan desya. Teuma Ulôn use gata di gunong Lôn nyang suci, dan malaikat nyang keumiet gata jiparôh gata nibak teungoh-teungoh peumata nyang muble-ble cahya nyan.
17 Ruman gata nyang ceudah teupeujeuet gata sombong dan meusyeuhu gata nyang meugah nyan meuakibat jih gata bangai. Sababnyan gata Ulôn seumpom bak tanoh dan Lôn peujeuet keupeu ingat keu raja-raja nyang laén.' "
18 TUHAN meufeureuman, "He Tirus, gata ka tapeukutoe teumpat-teumpat iébadat gata sabab buet-buet nyang salah dan ilat nyang gata peubuet watée blo publo. Sababnyan kheueh Ulôn tot gata sampoe habéh rata ngon tanoh. Bandum ureuëng nyang ngieng ateueh gata nyang jikalon na kheueh abée.
19 Gata ka gadôh tandeuh le siumu masa. Bandum bansa nyang ka jituri gata ka jeuet keu yo sabab teumakot keujirasa nyang lagée nyan."
20 TUHAN meufeureuman ubak ulôn,
21 "He manusia fana, takutok kheueh banda Sidon.
22 Jak peusampoe kheueh ubak peunduduek disinan bahwa Ulôn TUHAN Nyang Mahamanyang Lôn peugah ubak awaknyan, 'Ulôn nyoe musoh gata, he Sidon. Ureuëng ramé jipujoe ulôn sabab buet Ulôn keu gata. Bak watée Lôn huköm peunduduek gata, awaknyan jiteupeue bahwa Ulôn kheueh TUHAN nyang suci.
23 Ulôn kupeuteuka bala peunyakét, dan Lôn peubiyeu darah ji ile bak rot-rot gata. Gata jiprang lé musoh rot jeueb-jeueb sagoe, dan peunduduek gata teupoh maté. Dan barô kheueh gata teupeue bahwa Ulôn kheueh TUHAN.' "
24 TUHAN meufeureuman, "Nanggroe-nanggroe nyang ka lheueh jihina Israel, hana le jeuet keu duro lam asou nyang peususah Israel. Awaknyan sadar bahwa Ulôn kheueh TUHAN Nyang Mahamanyang."
25 TUHAN Nyang Mahamanyang meufeureuman, "Ulôn ku peusapat ureuëng-ureuëng Israel di nanggroe nyang jiôh di teumpat awaknyan ka Lôn peu crebre, dan bandum bansa jiteupeue bahwa Ulôn nyoe suci. Bansa Israel teuma jiduek lom bak tanoh awaknyan keudroe, tanoh nyang ka Ulôn jok bak hamba Lôn Nabi Yakub.
26 Awaknyan udeb deungon aman disinan dan jipeudong rumoh-rumoh meunan cit jipeugét lampôh anggô. Ulôn ku huköm bandum kawöm silingka awaknyan nyang ka jihina awaknyan, deungon nyan Israel ka jeuet keu aman. Dan barô kheueh jiteupeue lé awaknyan bahwa Ulôn kheueh TUHAN Allah awaknyan."

Chapter 36

TUHAN meufeureuman, "He manusia fana, tajak mariet kheueh ubak gunong-gunong Israel dan tayue awaknyan beujideungoe amanat TUHAN Nyang Mahamanyang,
2 'Watée bansa-bansa nyang na seukeulileng nyan jijak prang dan jireubot gata, awaknyan ka jihina bansaboh Israel. Deungon galak that awaknyan jipeugah bahwa saátnyoe bukét-bukét purbakala nyan ka jeuet keumilék awaknyan. Sabab nyan, he gunong-gunong dan bukét-bukét, aneuk-aneuk krueng dan pantôn-pantôn, he banda-banda nyang ka jeuet keu rungka dan nyang ka jitinggai lé ureuëng po jih lom jireupah dan jihina lé bansa-bansa nyang na seukeulileng awaknyan, deungoe kheueh peue nyang geupeugah lé TUHAN Nyang Mahamanyang ubak gata: Deungon ju dan seu uem watée beungéh Ulôn laju Ulôn dhot dan Ulôn seugah bansa-bansa seukeulileng gata khusos jih bansa Edom, sabab awaknyan deungon galak dan meusikeub meuhina, ka jireubot tanoh Ulôn dan jireupah bandum blang-blang naleueng Lôn. Jinoenyoe Ulôn beungéh dan Lôn heuntam ban galak droe sabab bansa-bansa nyan ka lumpah that meuhina dan jipeujayeh gata.
7 Ulôn, TUHAN Nyang Mahamanyang Lôn meusumpah bahwa bansa-bansa nyang di seukeulileng gata nyan keunong hina teuma.
8 Teuma keu gata Ulôn peugah he gunong-gunong Israel, bak-bak kayée meutarök dan jimuboh keu umat Lôn Israel nyang katô that watée jiwoe.
9 Ulôn kudong blah gata he Israel, dan Ulôn Lôn bri keupastian bahwa tanoh gata jicatok lom dan jitabu bijéh.
10 Ulôn Lôn tamah jeumeulah umat Lôn Israel. Awaknyan tinggai di banda-banda dan jipeudong lo banmandum rungka jih nyang ka reuloh.
11 Peunduduek dan beulatang peulara gata Lôn tamah, sampoe ka meutamah le, leubeh jai nibak yoh awai, dan awaknyan meu aneuëk cucoe nyang le. Awaknyan udeb disinan lagée yoh awai dan Ulôn peujeuet keumakmu, lagée gohlom na gata rasa. Dan jiteupeue kheueh lé awaknyan bahwa Ulôn kheueh TUHAN.
12 Umat Ulôn Israel, Lôn puwoe mangat jiduek bak nanggroe jih lom. Tanoh nyan jeuet keu hak milék awaknyan keudroe dan sabe na teubri hase sampoe aneuëk-aneuëk awaknyan ka hana maté sabab keunong deuk.
13 Ulôn, TUHAN Nyang Mahamanyang Lôn peugah: Keubit beutôi tanoh nyoe teuboh nan gala tukang pajoh manusia dan tukang reupah aneuëk-aneuëk miet -- bansa nyang tinggai bak tanoh nyan.
14 Teuma phon saát nyoe tanoh nyoe hana le jipajoh manusia atawa teureupah aneuëk-aneuëk awaknyan. Ulôn TUHAN Nyang Mahamanyang ka Lôn peugah haba.
15 Hana peureulée lé tanoh nyoe jideungoe jihina lé bansa-bansa atawa jitanggong hinaan gob. Tanoh nyoe hana teupeumaté le ureuëng nyang tinggai disinan. Ulôn, TUHAN Nyang Mahamanyang kalon peugah haba.' "
16 TUHAN meufeureuman ubak ulôn,
17 "He manusia fana, bak watée ureuëng-ureuëng Israel tinggai di nanggroe jihnyan keudroe, awaknyan ka jipeukutoe deungon buet jih keudroe dan pi-e awaknyan. Buet awaknyan nyang lagée nyan ka Ulôn anggab hareuem, lagée ureuëng inong nyang teungoh teuka he.
18 Beungéh Ulôn nyang lumpah jai keu awaknyan sabab awaknyan ka jipoh maté manusia nyang le that-that bak tanoh nyan dan jipeukutoe teuma deungon beurala-beurala jih keudroe.
19 Awaknyan Ulôn huköm nyang sisuai deungon cara udeb dan pi-e awaknyan keudroe, laju awaknyan Ulôn peucrebre u nanggroe-nanggroe aséng.
20 Ho mantong awaknyan jijak, sabe jipeukutoe nan Ulôn nyang suci. Sabab lé ureuëng ramé jipeugah lagée nyoe, 'Bansa nyoe na kheueh umat Po teu Allah, teuma awaknyan harôh jitinggai tanoh nyang geubri lé Po teu Allah keu awaknyan.'
21 Ulôn inseueh that sabab nan Ulôn nyang suci ka jipeukutoe lé ureuëng-ureuëng Israel ho-ho mantong nyang awaknyan jak.
22 Lé sabab nyan, jak peusampoe kheueh peue nyang Ulôn, TUHAN Nyang Mahamanyang peugah ubak bansa Israel, 'Peue nyang Lôn peubuet teuma na kheueh kon ngon sabab gata, he ureuëng-ureuëng Israel, teuma lé sabab nan Ulôn nyang suci, nyang ka gata peukutoe ho-ho mantong gata jak.
23 Ulôn Lôn tunyok keusucian nan Ulôn nyang rayeuk nyan, nan nyang ka lheueh gata peukutoe lamkawan bansa, dan jiteupeue kheueh lé awaknyan bahwa Ulôn kheueh TUHAN. Ulôn, TUHAN Nyang Mahamanyang ka Lôn peugah haba. Ulôn Lôn peuguna gata jeuet tapeuleumah ubak bansa-bansa bahwa Ulôn nyoe suci, TUHAN Nyang Mahasuci.
24 Nibak tieb-tieb bansa dan nanggroe, gata Lôn peusapat dan Ulôn puwoe ubak tanoh gata keudroe.
25 Óh ka lheuehnyan gata Ulôn reuték deungon ié jeureunéh, mangat gata gleh nibak bandum beurala gata dan nibak peue-peue mantong nyang ka jipeuayeub nan gata.
26 Teuma ubak gata Ulôn bri até nyang barô dan pikeran nyang barô. Até gata nyang kreueh lagée batée nyan Lôn gantoe ngon até nyang taát.
27 Roh Ulôn Lôn peutreun lam até gata dan gata Lôn jaga mangat gata udeb meunurot huköm-huköm Lôn dan tataát peue-peue nyang Ulôn peurintah.
28 Dan gata tatinggai bak tanoh nyang ka Ulôn bri keu indatu gata. Gata teuma jeuet keu umat Lôn dan Ulôn pih jeuet keu Allah gata.
29 Gata Lôn peuleupah nibak peue-peue mantong nan gata nyang ka meucupa. Ulôn Lôn bri peurintah ubak gandom mangat timoh deungon subô sampoe gata hanale keunong deuk.
30 Ulôn Lôn tamah bubena bak kayée gata mangat udeb subô dan meunan cit hase blang gata Lôn tamah meulipat ganda, sampoe gata hanale keunong deuk nyang teupeubrok nan gata bak mata bansa-bansa.
31 Gata teuingat keu pi-e gata nyang jeuhet dan buet gata nyang hana pantaih nyan, laju gata bosan keudroe gata keudroe sabab desya-desya dan keukeujian gata nyan.
32 Ingat kheueh he Israel, bahwa bandum nyan Ulôn peubuet kon sabab gata. Gata harôh meurasa malée dan hina sabab pi-e gata. Ulôn TUHAN Nyang Mahamanyang ka Lôn peugah haba.' "
33 TUHAN Nyang Mahamanyang meufeureuman, "Óh ka lheueh gata Ulôn peugleh bandum desya gata, gata Lôn peuidhin tinggai di banda-banda gata lom, dan tapeudong lom rungka-rungka nyang ka hanco nyan.
34 Yoh masa ilée ureuëng-ureuëng nyang jak rot ladang-ladang gatanyan jikalon padubna tandus jih tanoh nyan, teuma Ulôn Lôn peujamin mangat tapeubuet lom tanoh nyang tho nyan.
35 Dan bandum ureuëng jeuet keuhireuen, sabab tanoh nyang yoh awai tandus nyan jinoe ka jeuet keu Taman Eden, dan banda-banda nyang yoh awai seungue, hanco dan ka jeuet keu rungka-rungka, bak saátnyoe ka jeuet keu banda-banda nyang paleng khong kuta peutahanan jih dan peunduduek pi meutamah le.
36 Dan bansa-bansa silingka nyang mantong na disinan, jiteupeue bahwa Ulôn, TUHAN ka geupeudong lom banda-banda nyang ka hanco, dan teupeubuet keulai blang-blang nyang ka jeuet tandus. Ulôn, TUHAN, ka Lôn peugah haba dan pasti atranyan Ulôn keureuja."
37 TUHAN Nyang Mahamanyang meufeureuman, "He bansa Israel, ubak gata ka Ulôn bri idhin lom talakée tulông ubak Ulôn; Ulôn kutamah jeumeulah gata lagée kawan bubiri.
38 Banda-banda nyang bak saátnyoe ka hanco, saboh saát peunoh ureuëng duek disinan saban lagée Yerusalem watée uroe-uroe raya yoh masa ilée, peunoh deungon bubiri-bubiri nyang jipeuseumah. Dan tateupeue kheueh lé gata bahwa Ulôn kheueh TUHAN."

Chapter 37

Ulôn lumpah teurasa kuasa TUHAN, dan roh Gobnyan nyang ba ulôn geupeutron u pantôn nyang peunoh deungon tuleueng-tuleueng.
2 Ulôn geutunton lé TUHAN meuwet-wet bak pantôn nyan, dan ulôn kalon bahwa bansaboh pantôn nyan meusiseu bubena tuleueng nyang lumpah le dan ka tho-tho.
3 TUHAN geutanyong ubak ulôn, "He manusia fana, peu kheueh mungken tuleueng-tuleueng nyoe udeb lom?" Ulôn jaweueb, "TUHAN Nyang Mahamanyang, teuma Droeneueh kheueh nyang teupeue."
4 Laju TUHAN geuyue ubak ulôn jak peusampoe peusan Gobnyan ubak tuleueng-tuleueng nyang ka tho nyan,
5 "Ulôn TUHAN Nyang Mahamanyang Ulôn yueb nafáh lam tuboh gata mangat gata udeb lom.
6 Ulôn peuduek urat dan asoe ubak gata dan Lôn balot gata deungon kulét. Gata Ulôn bri nafáh mangat udeb. Dan tateupeue kheueh lé gata bahwa Ulôn kheueh TUHAN."
7 Laju ulôn Yehezkiel ulôn mariet ubak tuleueng-tuleueng nyan sisuai ngon peurintah TUHAN. Dan teungoh ulôn peugah haba, laju teudeungoe su meukrub-krub, sabab tuleueng-tuleueng nyan ka jipeuphon meusambat tuleueng nyang saboh deungon nyang laén.
8 Teungoh ulôn kalon hai nyang teungoh teujadi nyan, tuleueng-tuleueng nyan ka jipeuphon meu urat dan meuasoe meunan cit deungon kulét ka meuleukék teuma tuboh nyan gohlom na meunafáh.
9 Po teu Allah meufeureuman ubak ulôn, "He manusia fana, mariet kheueh ubak angén. Tapeugah kheueh bahwa Ulôn, TUHAN Nyang Mahamanyang Lôn peurintah ubak angén nyan mangat teuka rot meubagoe arah, jeuet jiprôh nafáh ubak tuboh-tuboh nyang maté nyan sampoe tuboh-tuboh nyang teu-éh nyan udeb lom teuma."
10 Dan ulôn meututoe sisuai deungon peurintah TUHAN dan angén pih laju teuka rot meubagoe arah dan laju teuyueb nafáh u dalam tuboh-tuboh nyan dan tuboh nyang ka teuyueb nafáh nyan laju udeb óh lheuehnyan laju jidong. Jeumeulah awaknyan lumpah that jai, séb keu teubina saboh pasokan tantra nyang raya.
11 Po teu Allah meufeureuman ubak ulôn, "He manusia fana, tuleueng-tuleueng nyoe teupeulambang ubak bansa Israel. Awaknyan apoh apah bahwa awaknyan tho kreng hana harapan dan uroe ukeue.
12 Sabab nyan meuramai kheueh ubak umat Ulôn Israel nyan bahwa Ulôn, TUHAN Nyang Mahamanyang Lôn peuhah pintoe jrat awaknyan. Ulôn Lôn peuteubiet awaknyan disinan dan Lôn peuwoe awaknyan u tanoh Israel.
13 Óh ka lheueh Lôn peubuet banmandum nyan, umat ulôn jiteupeue bahwa Ulôn kheueh TUHAN.
14 Ulôn Lôn yueb nafáh lam tuboh awaknyan keu teupeu udeb awaknyan, laju awaknyan Lôn bri idhin jitinggai di nanggroe jih keudroe. Dan jiteupeue kheueh lé awaknyan bahwa Ulôn kheueh TUHAN. Ulôn TUHAN ka Lôn peugah haba dan pasti Lôn peubuet nyang Ulôn peugah nyan."
15 TUHAN meufeureuman lom ubak ulôn,
16 "He manusia fana, tacok kheueh laju saboh tungkat dan tatuléh kheueh laju haba nyang lagée nyoe nibak tungkat nyan, 'Keurajeuen Yehuda'. Dan tacok kheueh teuma saboh tungkat nyang laén, dan tatuléh kheueh di ateueh jih: 'Keurajeuen Israel'.
17 Óh lheuehnyan tamat kheueh bandua boh tungkat nyan sampoe ujong bandua tungkat nyan meusaho jeuet keusaboh tungkat.
18 Meunyoe bansa gata jitanyong makna jih,
19 tapeugah kheueh ubak awaknyan bahwa Ulôn, TUHAN Nyang Mahamanyang Lôn cok tungkat nyang teupeulambang Israel dan Lôn peusaho ngon tungkat nyang teupeulambang Yehuda. Bandua boh tungkat Lôn peusaho sampoe meusaboh dan Ulôn reugam lam jaroe Lôn.
20 Tamat kheueh bandua boh tungkat nyan dan tapeuleumah kheueh ubak bansa nyan.
21 Laju tapeugah kheueh ubak awaknyan bahwa Ulôn, TUHAN Nyang Mahamanyang Lôn cok banmandum bansa Ulôn nibak nanggroe-nanggroe ho mantong awaknyan nyang ka jijak. Awaknyan Lôn peusapat dan Ulôn puwoe lom u nanggroe awaknyan keudroe.
22 Awaknyan Lôn peujeuet keusaboh bansa di tanoh nyan, di gunong-gunong Israel. Awaknyan jipeurintah lé sidroe raja, dan hana teubagi le jeuet dua bansa atawa dua keurajeuen.
23 Awaknyan hana le jipeukutoe droe deungon jipeubuet desya dan jiseumah ubak beurala-beurala nyang luwat dan najih nyan. Ulôn kupeubeubaih awaknyan nibak bandum buet nyang meunyeuleweng nyang meusabab awaknyan jikhianat Ulôn. Ulôn Lôn peusuci awaknyan; awaknyan jeuet keu umat Lôn, dan Ulôn jeuet keu Allah awaknyan.
24 Awaknyan teupeusaboh dimiyueb sidroe raja lagée Raja Nabi Daud nyang mat peurintah siumu masa. Deungon seutia awaknyan jitaát ubak huköm-huköm Lôn. Dan keu siumu masa awaknyan meunan cit deungon keuturonan awaknyan jitinggai nibak tanoh nyan, tanoh nyang Ulôn bri keu Nabi Yakub dan jiduek lé indatu awaknyan.
26 Ulôn Lôn peugét saboh peujanjian deungon awaknyan nyang teujamin keuamanan awaknyan sampoe keukai dan abadi. Ulôn Lôn bri beureukat dan Lôn tamah jeumeulah awaknyan. Bak tanoh awaknyan Lôn peudong Rumoh Ulôn nyang teutab disinan siumu masa.
27 Ulôn tinggai meusajan awaknyan, dan Ulôn teuma jeuet keu Po teu Allah awaknyan dan awaknyan jeuet keu umat Lôn.
28 Meunyoe Rumoh Ulôn ka na lamkawan awaknyan siumu masa, barô kheueh jiteupeue lé bansa-bansa nyang laén bahwa Ulôn kheueh TUHAN, ka Lôn piléh Israel jeuet keu umat Lôn keudroe."

Chapter 38

TUHAN meufeureuman ubak ulôn,
2 "He manusia fana, takutok kheueh Gog raja agong di nanggroe Mesekh dan Tubal di tanoh Magog.
3 Tapeugah kheueh ubak jihnyan bahwa Ulôn, TUHAN Nyang Mahamanyang, na kheueh musoh jih.
4 Ulôn kupeuwet jihnyan, Lôn pasang ceunawiét nibak geuhéum jih, dan Lôn peuteubiet jihnyan bandum deungon pasokan nyang meupeukayan seuragam nyan. Tieb-tieb sidadu jiba peurisai dan peudeueng.
5 Raja ji-iréng lé sipa-i-sipa-i asai Persia, Sudan dan Libia, maséng-maséng jiba peudeueng dan tupi waja.
6 Bandum peujuang nibak nanggroe-nanggroe Gomer dan Bet-Togarma di utara, jimaju meusajan ngon jihnyan, dan le bansa nyang laén jiseutôt sajan.
7 Tayue kheueh bak jihnyan mangat meusiab-siab dan tapeurintah kheueh ubak banmandum tantra nyang meugabong ngon jihnyan jeuet siab-siab jipreh peurintah nibak gobnyan.
8 Kira-kira padubthon teuk jihnyan Lôn peurintah mangat jijakprang saboh nanggroe deungon peunduduek nyang ka meusapat jiwoe nibak bansa-bansa nyang le dan nyang óh lheueh nyan tinggai seungab di nanggroe nyang aman. Gog jiduek bak gunong-gunong Israel nyang ka treb that seungue dan nyang ka jeuet keu rungka-rungka, teuma nyang saátnyoe jiduek lé rakyat nyang udeb deungon damé.
9 Jihnyan dan sipa-i jihnyan meunan cit deungon sipa-i nyang le nyang jeuet ji-iréng jihnyan teuka jijak prang lagée angén badée dan teutôb banmandum nanggroe lagée awan."
10 TUHAN Nyang Mahamanyang meufeureuman ubak Gog, "Bak saátnyan gata tapeugét reuncana nyang jeuhet.
11 Gata tapeuputôh keu taseureubu nanggroe nyang hana meukuta nyan, nyang toh peunduduek jih udeb deungon aman dan teuntram di banda-banda nyang hana meukuta dan hana alat-alat peutahanan.
12 Gata tarampok dan tareupah hareuta peunduduek di banda-banda nyang yoh dilée ka tinggai rungka-rungka. Peunduduek disinan nyang teugumpôi nibak meubagoe bansa, bak saátnyoe ka le hareuta dan beulatang peulara dan awaknyan tinggai bak pusat donya.
13 Peunduduek Syeba dan Dedan meunan cit deungon ureuëng meukat nyang na di banda-banda nanggroe Spanyol jitanyong ubak gata lagéenyoe, 'Peu kheueh gata takrah tantra teuma keu tareupah dan tarampok méuh, pirak, beulatang peulara, dan hareuta beunda, dan gata angkot banmandum nyan?' "
14 Sababnyan TUHAN Nyang Mahamanyang geukirém ulôn keu lôn jak peusampoe ubak Gog haba nyoe, "Justru bak saát umat Ulôn Israel udeb deungon aman dan teuntram, gata teuka tajak prang.
15 Gata tajak nibak teumpat gata tinggai, jiôh di utara, ji iréng lé pasokan tantra nyang raya dan hebat, bandum nibak pasokan meuguda dan meubagoe macam bansa.
16 Laju gata prang umat Ulôn Israel lagée angén badée jiheuntam bumoe. Meunyoe watée jih ka sampoe, gata Lôn kirém keu gata duek bak tanoh Lôn. Deungon lagéenyan Lôn meulalu gata, he Gog, bansa-bansa jiteupeue soe Ulôn nyoe, na kheueh Po teu Allah nyang suci.
17 Kon kheueh keuhai gata Ulôn yoh dilée Lôn peugah haba meulalu hamba-hamba Lôn nabi Israel? Awaknyan ka jiramai bahwa bak masa nyang teuma teuka Ulôn kuyue sidroe ureuëng keu jiseurang Israel. Ulôn, TUHAN Nyang Mahamanyang ka Lôn peugah haba."
18 TUHAN Nyang Mahamanyang meufeureuman, "Teuma hana treb óh lheueh Gog jiseurang Israel, Ulôn jilab beungéh.
19 Dan deungon beungéh that Ulôn peuteubiet ancaman, bahwa nibak uroenyan na geumpa bumoe nyang keubit hebat di nanggroe Israel.
20 Bandum uengkot dan cicém, bandum beulatang rayeuk dan ubit, dan bandum ureuëng di ateueh bumoe yo meugám-gám keu Ulôn. Gunong-gunong reuloh, barieh-barieh gunong teupurö dan bandum bintéh beuton hanco.
21 Laju Gog Lôn peukeujot deungon sigala macam beuncana. Ulôn, TUHAN Nyang Mahamanyang ka Lôn peugah haba. Aneuëk buah jihnyan saléng meuhéuntam deungon peudeueng.
22 Jihnyan Lôn huköm deungon bala peunyakét dan darah saléng jipeuroe. Ujeuen raya dan ujeuen és, apui dan beulerang Lôn sintong ateueh jihnyan dan sipa-i jihnyan dan ateueh bansa nyang laén nyang ka meusaho deungon jihnyan.
23 Deungon na lagée nyan Lôn tunyok ubak sigala bansa bahwa Ulôn nyoe agong dan suci. Dan jiteupeue kheueh lé awaknyan bahwa Ulôn kheueh TUHAN."

Chapter 39

TUHAN Nyang Mahamanyang meufeureuman, "He manusia fana, taancam kheueh Gog, raja agong di nanggroe Mesekh dan nanggroe Tubal, dan tapeugah ubak jihnyan bahwa Ulôn nyoe na kheueh musoh jih.
2 Ulôn Lôn peuwet jihnyan, dan Lôn ba jihnyan Lôn peuteubiet nibak daerah jiôh di utara, u gunong-gunong Israel.
3 Disinan Lôn seukok busur jihnyan sampoe lheueh nibak jaroe wie jih, dan Ulôn peulheueh aneuk-aneuk panah jihnyan nibak jaroe uneuen jihnyan.
4 Di ateueh gunong-gunong nyang na di Israel, Gog meusajan ngon bandum sidadu jihnyan dan sikutu jihnyan maté, dan manyét-manyét awaknyan Ulôn bri ubak bubena cicém dan meulatang buih jeuet jipajoh.
5 Sipa-i-sipa-i nyan reubah dan maté teugageueng di ladang-ladang. Ulôn, TUHAN Nyang Mahamanyang ka Lôn peugah haba.
6 Ulôn Lôn peuteuka apui sampoe habéh tutong di tanoh Magog di binéh-binéh panté, di teumpat peunduduek jihnyan udeb deungon aman. Dan jiteupeue kheueh lé awaknyan bandum bahwa Ulôn kheueh TUHAN.
7 Teuma lamkawan ureuëng Israel, Lôn peumaklum nan Ulôn nyang suci, dan nan Ulôn nyan hana lé jipeukutoe. Dan jiteupeue kheueh lé bansa-bansa bahwa Ulôn kheueh TUHAN, Po teu Allah suci di Israel."
8 TUHAN Nyang Mahamanyang meufeureuman, "Uroe nyang Ulôn peugah nyan teuma teuka.
9 Peunduduek banda-banda di Israel jiteubiet meurön-rön keu jijak peusapat bandum sinjata nyang ka jitinggai, atra nyan na kheueh, peurisai dan peudeueng, panah dan aneuk panah teutamah lom ngon tungkat seumeupoh. Bandum awaknyan peujeuet keu kayée apui, dan nyan seb keu tujoh thon.
10 Jadi, awaknyan hana peureulée jipeusapat kayée apui di ladang atawa jiteubang kayée lam gle, sabab sinjata-sinjata nyang jitinggai nyan lumpah that jai teucok keukayée apui. Awaknyan jirampok dan jireupah atra ureuëng-ureuëng nyang ka lheueh meurampok dan jireupah atra awaknyan. Ulôn, TUHAN Nyang Mahamanyang ka Lôn peugah haba."
11 TUHAN meufeureuman, "Meunyoe bandumnyoe ka teujadi, Ulôn Lôn jok ubak Gog tanoh keu lampôh jrat di Israel, di Pantôn rot jeumeurang nyang teumpat jih siblaih utimu rot Laôt Maté. Disinan kheueh Gog ngon bandum sipa-i jihnyan teukubu, dan pantôn nyan teupeunan, 'Pantôn Pasokan Gog'.
12 Tujoh buleuen treb jih ureuëng-ureuëng Israel mehmoh jipasoe lam jrat manyét-manyét nyan mangat tanoh bék kutoe le.
13 Bandum peunduduek nanggroe jimeuseuraya jitanom lam jrat manyét-manyét nyan; dan keunyan awaknyan jiteurimong tanda peunghargaan bak uroe keumeunangan Ulôn. Ulôn, TUHAN Nyang Mahamanyang ka Lôn peugah haba.
14 Óh lheueh tujoh buleuen nyan ka habéh, napadubdroe ureuëng jibri tugaih keujijak rawöh bansaboh nanggroe nyan jijak mita manyét-manyét nyang na mantong teutinggai teugageueng bak tanoh, dan meunyoe na, laju jipasoe lam jrat manyét nyan jeuet nanggroe nyan gleh nibak nyang kutoe.
15 Watée jimita manyét-manyét nyan, tieb-tieb na jiteumé tuleueng manusia, awaknyan jijok tanoh bak binéh nyan, mangat lé tukang-tukang kubu manyét jikalon nyan dan jipeukubu tuleueng nyan di Pantôn Pasokan Gog.
16 Deungon caranyan, tanoh nyan ka teupeugleh nibak nyang kutoe. (Óh uroe dudoe, nibak pantôn nyan teuma na banda nyang nan jih saban deungon Pasokan Gog.)"
17 TUHAN Nyang Mahamanyang meufeureuman ubak ulôn, "He manusia fana, tatawök kheueh bandum cicém dan beulatang nyang laén, jeuet jiteuka rot patmantong jeuet jijak pajoh keureubeuen nyang Ulôn keubah keu awaknyan. Ulôn teuma Lôn peuna khanuri nyang paleng rayeuk bak gunong-gunong Israel, disinan awaknyan meuteumé jipajoh uengkot sie dan ji-jieb darah.
18 Awaknyan meuteumé jipajoh manyét-manyét pahlawan, dan ji-jieb darah nyang mat-mat kuasa ateueh rhueng donya. Bubena pahlawan dan nyang mat kuasa nyan teupoh maté lagée teupoh maté kaméng-kaméng agam atawa aneuëk-aneuëk kaméng, atawa banteng-banteng teumbon.
19 Óh ka lheueh Lôn peumaté ureuëng-ureuëng nyan lagée keureubeuen, cicém-cicém dan beulatang-beulatang nyang laén jijak pajoh bandum gapah nyan sampoe án troe meugeureu ôb, dan ji-jieb darah sampoe mabök.
20 Nibak meuja Lôn awaknyan jeuet jipeutroe pruet deungon banmandum guda dan nyang duek ateueh gudanyan dan deungon bandum peujuang. Ulôn, TUHAN Nyang Mahamanyang ka Lôn peugah haba."
21 TUHAN meufeureuman, "Ulôn Lôn ngieng keumuliaan Lôn keu bansa-bansa. Awaknyan bandum jikalon pakriban Ulôn peuguna keukuasaan Lôn keu Lôn peubuet keuputosan-keuputosan nyang ade.
22 Phon saátnyan ureuëng Israel jiteupeue bahwa Ulôn kheueh TUHAN Allah awaknyan.
23 Dan bandum bansa insaf bahwa ureuëng Israel teukirém u teumpat nyang teuböih sabab desya awaknyan ateueh Ulôn. Awaknyan ka Ulôn tinggai dan Lôn peubiyeu meunan mantong jipeutaloe lé musoh dan jipeumaté dimideuen prang.
24 Ulôn peubuet ateueh awaknyan nyang lagée nyan na kheueh sisuai deungon buet nyang kutoe dan nyang jeuhet nyang ka jipeubuet lé awaknyan, dan laju Ulôn tinggai awaknyan."
25 TUHAN Nyang Mahamanyang meufeureuman, "Teuma bak saátnyoe Ulôn Lôn gaséh umat Israel keuturonan Nabi Yakub, dan Lôn peujeuet awaknyan makmu lom. Deungon lagéenyan teutab Lôn jaga mangat nan Ulôn teutab jihoreumat.
26 Meunyoe awaknyan tinggai lom deungon teunang di nanggroe jih keudroe, dan hana meusidroe pih nyang peutakot awaknyan, teuma awaknyan tuwoe pakriban awaknyan ka jipeumalée ngon sabab ka jikhianat Ulôn.
27 Ulôn Lôn peuwoe lom awaknyan nibak nanggroe-nanggroe musoh awaknyan keudroe, dan keusucian Lôn leumah ubak bandum bansa ngon sabab buet Ulôn nyan.
28 Dan jiteupeue kheueh lé umat Lôn bahwa Ulôn kheueh TUHAN Po teu Allah awaknyan. Sabab Ulôn kheueh nyang ka kirém awaknyan u teumpat nyang teuböih, teuma Ulôn nyang ka puwoe awaknyan ubak nanggroe awaknyan keudroe, dan hana Lôn tinggai meusidroepih awaknyan disinan.
29 Ulôn Lôn sintong roh Ulôn ateueh bansa Israel, dan hana Lôn tinggai awaknyan lagée nyang ka-ka. Ulôn, TUHAN Nyang Mahamanyang ka Lôn peugah haba."

Chapter 40

Watéenyan tanggai siploh buleuen sa, bak thon nyang keu dua ploh limong masa kamoe teuböih, peuet blaih thon óh ka lheueh Yerusalem teupeutaloe, laju ulôn rasa kuasa TUHAN, dan laju ulôn geuba.
2 Bak saboh keumalon, Po teu Allah geuba ulôn ubak tanoh Israel dan geupeuduek ulôn bak gunong nyang manyang. Dikeue ulôn leumah lôn kalon saboh keulompok bangunan nyang rab saban ngon saboh banda.
3 Ulôn geuba keunan dan deuh ulôn ngieng sidroe ureuëng agam nyang meucahya lagée peurunggu geudong bak binéh pintoe geureubang. Bak jaroe gobnyan geumat talo sineupat nibak lineun meunan cit ngon kayée sineupat.
4 Ureuëng agam nyan geupeugah ubak ulôn, "He manusia fana, deungoe kheueh beugét-gét dan simak kheueh peue-peue mantong nyang ulôn peuleumah ubak gata, sabab keunyan kheueh gata teuba keunoe. Tapeugah kheueh ubak bansa Israel bandum nyang teuma gata kalon."
5 Laju ulôn kalon Baét TUHAN nyang jikeulileng lé bintéh beuton. Ureuëng agam nyan geupeuphon uko beuton nyan ngon kayée seunupat nyang panyang jih na lhée metée. Teunyata teuma bahwa bintéh beuton nyan manyang jih lhée metée dan teubai jih pih lhée metée.
6 Óh lheuehnyan gobnyan geujak ubak babah pintoe geureubang nyang meuhadab utimu, gobnyan laju geuék ateueh reunyeun dan óh ka trok u ateueh, laju geu uko ambang pintoe nyan, luwah jih lhée metée.
7 Dilikot geureubang nyan na saboh jurong dan bak maséng-maséng binéh jih na meuteumé lhée boh kama jaga.
8 Bandum kama saban rayeuk jih; bantuek jih peuet boh sagoe, dan panyang tieb-tieb binéh jih na lhée metée.
9 Bintéh-bintéh beuton bataih tieb-tieb kama saban teubai jih, na kheueh dua siteungoh metée. Jurong nyan panyang jih na lhée metée teuk dan teutuju bak ruweueng raya meuhadab u Baét TUHAN.
10 Di ureuëng agam nyan laju geu sipat ruweueng raya nyan dan teunyata luwah jih na peuet metée; teuduek jih bak ujong babah pintoe geureubang, siblaih udalam, na kheueh nyang paleng rab ngon Baét TUHAN. Beuton-beuton nyang meuhadab ubak bagian Baét TUHAN, teubai jih na simetée.
11 Óh lheuehnyan di ureuëng agam nyan laju geu sipat luwah bagian jurong di babah pintoe geureubang; na nam siteungoh metée, dan meunan cit luwah babah pintoe geureubang nyan na limong metée.
12 Dikeue kama-kama jaga nyang ukoran jih lhée kali lhée metée nyan, na beuton miyueb nyang manyang jih siteungoh metée, dan teubai jih na teuma siteungoh metée.
13 Laju lé ureuëng agam nyan geu sipat teuma jiôh nibak beuton likot saboh kama jaga sampoe trok bak beuton likot kama jaga di meurandeh, na kheueh 12,5 metée.
14 Meunan cit lé ureuëng agam nyan geu sipat ruweueng raya nyan: panyang jih siploh metée. Pintoe ruweueng nyan teutuju ubak seuramoe Baét TUHAN
15 Jiôh jih nibak pintoe geureubang blah luwa trok ubak beuton ruweueng rayeuk nyang meuhadab ubak u Baét TUHAN na kheueh 25 metée.
16 Bak beuton likot dan bintéh bataih kama-kama nyan na peuradeun-peuradeun ubit. Beuton bagian dalam nyang meuhadab ubak jurong, teuculek ngon meubagoe rupa ukeran bak palem.
17 Óh lheuehnyan lé ureuëng agam nyan geuba ulôn meulalu babah pintoe geureubang ubak peulataran Baét TUHAN. Bak binéh beuton luwa ban seukeulileng Baét TUHAN nyan teupeugét 30 boh kama. Dikeue kama-kama nyan na aleue batée
18 nyang teukeulileng bandum peulataran nyan. Peulataran luwa leubeh miyueb nibak peulataran dalam.
19 Disinan na babah pintoe geureubang nyang laén nyang teumpat jih leubeh manyang dan nyang teutuju ubak peulataran dalam. Ureuëng agam nyan geusipat jiôh lamkawan bandua pintoe geureubang nyan: 50 metée.
20 Óh lheueh nyan di ureuëng agam nyan geusipat teuma babah pintoe geureubang siblaih utara nyang teutuju ubak seuramoe dalam.
21 Di babah pintoe geureubang nyan, ban lhée boh kama jaga bak maséng-maséng binéh jurong nyan, bintéh-bintéh beuton bataih nyan meunan cit deungon ruweueng raya nyan, bandum nyan saban ukoran jih deungon nyang na di siblaih utimu. Bandum jurong geureubang nyan panyang jih 25 metée dan luwah jih 12,5 metée.
22 Meunan cit deungon ruweueng raya, peuradeun-peuradeun nyan, dan ukeran-ukeran bak palem jih saban deungon nyang na disiblaih utimu. Tujoh beuk aneuëk reunyeun nyang teutuju ubak babah pintoe geureubang nyan, dan bak ujong nyan na ruweueng raya nyang meuhadab ubak seuramoe luwa Baét TUHAN.
23 Meuhadab keue deungon babah pintoe geureubang utara, na ruweueng laén nyang teutuju ubak peulataran dalam, saban lagée nyang na di siblaih geureubang timu. Ureuëng agam nyan geusipat jiôh lamkawan bandua geureubang nyan: 50 metée.
24 Laju óh lheuehnyan, ureuëng agam nyan geuba ulôn ubak babah pintoe seulatan dan laju geu uko. Teunyata pintoe geureubang nyan saban deungon geureubang-geureubang nyang laén.
25 Peuradeun-peuradeun nyang na disinan saban deungon nyang na bak babah babah pintoe geureubang nyang laén. Panyang jurong geureubang nyan 25 metée, dan luwah jih 12,5 metée.
26 Tujoh neuk reunyeun nyang teutuju ubak geureubang nyan dan ruweueng rayeuk jih pih na nibak ujong, meuhadab ubak peulataran Baét TUHAN. Beuton-beuton nyang na bagian dalam nyang meuhadab ubak jurong, teuhias deungon ukeran-ukeran bak palem.
27 Disinan na cit pintoe geureubang nyang teutuju ubak peulataran dalam. Ureuëng agam nyan geusipat jiôh lamkawan bandua boh geureubang nyan na: 50 metée.
28 Lheueh nyan, ureuëng agam nyan geuba ulôn meulalu babah pintoe geureubang seulatan laju teutamong ubak peulataran dalam. Gobnyan laju geusipat geureubang seulatan nyan, dan ukoran jih saban deungon ukoran-ukoran pintoe geureubang di luwa.
29 Kama-kama jaga gobnyan, ruweueng rayeuk geuhnyan, dan beuton-beuton nyang na didalam nyan saban rayeuk jih deungon nyang na nibak babah-babah pintoe geureubang nyang laén. Kama-kama bak babah pintoe geureubang nyoe pih na meupeuradeun-peuradeun. Jurong geureubang nyan panyang jih 25 metée dan luwah jih 12,5 metée.
30 Teuma ruweueng rayeuk jih meuhadab ubak peulataran luwa. Beuton-beuton bagian dalam nyang meuhadab ubak jurong, meunan cit na teu uke deungon ukeran-ukeran bak palem. Lapan neuk reunyeun nyan teutuju ubak pintoe geureubang nyan.
31
32 Óh ka lheueh nyan ureuëng agam nyan geuba ulôn meulalu babah pintoe geureubang timu laju teutamong ubak leuen bagian dalam. Ureuëng agam nyan laju geusipat geureubang nyan deungon sineupat nyang saban deungon ukoran-ukoran babah pintoe geureubang nyang laén.
33 Kama-kama jaga, bintéh-bintéh beuton nyang na disinan dan ruweueng rayeuk ukoran jih lagée nyang na bak babah-babah pintoe geureubang nyang laén. Nibak kama-kama nyan dan bak ruweueng rayeuk nyan na peuradeun-peuradeun. Panyang jurong geureubang nyan na 25 metée dan luwah jih 12,5 metée.
34 Ruweueng rayeuknyan meuhadab ubak peulataran luwa. Beuton-beuton bagian dalam nyang meuhadab ubak jurong, teu uke deungon ukeran-ukeran bak palem. Lapan neuk reunyeun teutuju ubak pintoe geureubang nyan.
35 Akhé jih ureuëng agam nyan geuba ulôn ubak geureubang utara. Gobnyan laju geusipat babah pintoe geureubang nyan dan ukeran jih saban deungon babah-babah pintoe geureubang nyang laén.
36 Meunan cit deungon kama-kama jaga jih, bintéh-bintéh beuton dalam dan ruweueng rayeuk jih saban deungon nyang na nibak babah-babah pintoe geureubang nyang laén. Nibak kama-kama jih dan nibak ruweueng-ruweueng rayeuk jih na peuradeun-peuradeun. Panyang jurong geureubang nyan na 25 metée dan luwah jih 12,5 metée.
37 Meunan cit deungon ruweueng keue jih meuhadab ubak peulataran luwa. Beuton-beuton bagian dalam nyang meuhadab ubak jurong, teu uke deungon ukeran-ukeran bak kayée palem. Na lapan neuk reunyeun nyang teutuju ubak babah pintoe geureubang nyan.
38 Di peulataran luwa na saboh kama seunamah nibak geureubang dalam siblaih utara. Nibak kama seunamah nyan na saboh pintoe rot jak ubak ruweueng rayeuk. Disinan kheueh teumpat rhah beulatang-beulatang keu keureubeuen nyang teutot.
39 Di ruweueng raya nyan, na peuet boh meuja, dua boh di tieb-tieb binéh jih. Di ateueh meujanyan kheueh teumpat sie beulatang keu keureubeuen nyang teutot atawa keureubeuen peuamphon desya atawa lom keureubeuen gantoe rugoe.
40 Diluwa ruweueng rayeuk nyan na lom peuet boh meuja, dua boh di tieb-tieb binéh geureubang utara nyan.
41 Jadi, bandum nyan na lapan boh meuja teumpat sie keureubeuen: peuet boh didalam, dan peuet teuk diluwa peulataran.
42 Ban peuet boh meuja nibak kama seunamah nyang teupeuguna keu teupeusiab keureubeuen nyang teutot teupeut nibak batée. Meujanyan manyang jih siteungoh metée, seudangkan bagian ateueh jih meusagoe peuet, panyang dan luwah jih maséng-maséng na lhée seuper peuet metée. Di ateueh meuja nyan teukeubah peukakaih keu sie beulatang keureubeuen.
43 Teuma nibak meuja-meujanyan na meubinéh nyang luwah jih 75 milimetée. Bandum uengkot sie nyang teuma teukeureubeuen teukeubah ateueh meuja-meuja nyan.
44 Óh lheuehnyan lé ureuëng agam nyan laju geuba ulôn ubak peulataran dalam. Disinan na dua boh bangsal, nyang saboh bak sampéng geureubang utara dan meuhadab u seulatan, seudangkan nyang saboh teuk disampéng babah pintoe geureubang seulatan dan meuhadab u utara.
45 Ureuëng agam nyan geupeugah ubak ulôn bahwa bangsal nyang meuhadab u seulatan nyan teukeubah keu teungku-teungku imeum nyang meutugaih di Baét TUHAN,
46 seudangkan bangsal nyang meuhadab u utara teukeubah keu teungku imeum nyang meutugaih nibak mezbah. Bandum teungku imeum nyan harôh nibak keuturonan Zadok. Sabab nibak sukée Lewi nyang na nibak keuturonan Zadok nyang jeuet meuhadab TUHAN keu teulayani Gobnyan dalam iébadat.
47 Ureuëng agam nyan laju geusipat bagian peulataran dalam. Bentuek jih meusagoe peuet: panyang dan luwah maséng-maséng na 50 metée. Baét TUHAN nyan na di siblaih ubarat, dan dikeue nyan na saboh mezbah.
48 Óh lheueh nyan lé ureuëng agam nyan geuba ulôn u ruweueng keu Baét TUHAN deungon teuék papadub neuk reunyeun. Gobnyan laju geusipat ruweueng tamong; luwah jih na tujoh kali dua siteungoh metée, deungon bintéh-bintéh bandua binéh nyan teubai sa siteungoh metée. Di wie uneuen jih na pilar. Ruweueng keue nyan keudroe panyang jih na siploh metée dan luwah jih na nam metée.

Chapter 41

Ureuëng agam nyan laju geuba ulôn bak kama teungoh, nyang teuboh nan Teumpat Nyang Suci. Gobnyan laju geusipat jurong nyang teutuju keunan: panyang jih na lhée metée,
2 dan luwah jih limong metée. Bintéh bandua binéh jih teubai jih na dua siteungoh metée. Óh lheuehnyan laju geu sipat Teumpat Nyang Suci nyan: panyang jih na 20 metée dan luwah jih 10 metée.
3 Óh lheuehnyan ureuëng agam laju geutamong lam kama dalam. Gobnyan laju geusipat jurong nyang teutuju keunan: panyang jih na simetée, luwah jih lhée metée, dan bintéh bandua boh binéh jih teubai jih lhée siteungoh metée.
4 Laju gobnyan keusipat teuma kama nyan: bantuek jih timang peuet sagoe, panyang dan luwah jih maséng-maséng siploh metée. Óh lheueh nyan ureuëng agam nyan geupeugah ubak ulôn, "Nyoe kheueh Teumpat Nyang Mahasuci."
5 Óh ka lheuehnyan di ureuëng agam nyan laju geusipat beuton dalam Baét TUHAN: teubai jih lhée metée. Bak bintéh beuton silingka Baét TUHAN nyan na kama-kama nyang luwah jih maséng-maséng dua metée.
6 Kama-kama nyan meutingkat lhée dan bak tieb-tieb tingkat na
30 boh kama. Bintéh timbok luwa di tieb-tieb tingkat leubeh lipeh nibak beuton nyang na di tingkat dimiyueb, seuhingga kama-kama nyan jeuet teususon deungon hana teupeuruhuéng bintéh beuton Baét TUHAN nyan.
7 Rot luwa, bintéh beuton Baét TUHAN nyan deuh jih saban teubai jih nibak miyueb sampe trok u ateueh. Bak bintéh timbok luwa nibak Baét TUHAN, disiblaih uluwa kama-kama nyan, na dua boh reunyeun nyang raya, deungon nyan jeuet teu ék phon tingkat sa trok ubak tingkat dua dan lhée.
8 Bintéh luwa nibak kama-kama nyan teubai jih na dua siteungoh metée. Bangunan nyan na pintoe nyang teutuju ubak kama-kama siblaih utara Baét TUHAN, dan pintoe laén nyang teutuju ubak kama-kama siblaih seulatan. Ban sikeulileng Baét TUHAN na seuramoe nyang luwah jih dua siteungoh metée; teuduek jih lhée metée ateueh tanoh, dan teupeugét saban manyang jih deungon pondasi kama-kama nibak beuton Baét TUHAN. Lamkawan seuramoe dan geudong-geudong nyang geupeuguna lé teungku-teungku imeum, na manjue nyang luwah jih siploh metée, di wie uneuen Baét TUHAN.
12 Dimeurandeh peulataran siblaih ubarat, na bangunan rayeuk nyang panyang jih 45 metée dan luwah jih 35 metée, dan teubai bintéh-bintéh jih dua siteungoh metée.
13 Ureuëng agam nyang geusipat panyang jih Baét TUHAN: 50 metée. Rot siblah ulikot Baét TUHAN sampoe trok ubak beuton likot bangunan rayeuk disiblaih ubarat nyan jiôh jih na cit 50 metée.
14 Bagian keue nibak Baét TUHAN nyang meuhadab utimu deungon peulataran di wie ngon uneuen jih, luwah jih na cit 50 metée.
15 Ureuëng agam nyan keusipat cit bangunan nyang rayeuk nyang meuhadab peulataran siblaih ubarat: luwah jih 50 metée, meunan cit deungon bintéh-bintéh wie ngon uneuen jih. Ruweueng-ruweueng di Baét TUHAN, ruweueng bagian keue, Teumpat Nyang Suci, dan Teumpat Nyang Mahasuci,
16 teuhias deungon bingkée kayée, phon aleue sampoe ubak peuradeun-peuradeun jih. Peuradeun-peuradeun nyan jeuet teutôb deungon tirée.
17 Bandum bintéh bagian dalam teuhias deungon meubagoe rupa ukeran
18 bak palem dan kerub, sibak bak palem lamkawan tieb-tieb dua kerub. Kerubnyan na teuma dua boh rupa,
19 saboh rupa manusia nyang meuhadab ubak bak palem siblaih si uwie, dan rupa singa nyang meuhadab ubak bak palem siblaih si uneuen. Mubagoe rupa ukeran nyan na meuteumé nibak Baét TUHAN,
20 phon nibak aleue sampoe ubak bagian ateueh pintoe.
21 Taméh-taméh pintoe nibak Teumpat Nyang Suci bantuek jih peuet sagoe timang. Dikeue Teumpat Nyang Mahasuci na sisuatu nyang leumah jih lagée mezbah nyang teupeugét nibak kayée.
22 Manyang jih sa siteungoh metée dan luwah jih simetée. Sudut-sudut jih, lapék jih dan bintéh jih teupeugét nibak kayée. Ureuëng agam nyan geupeugah ubak ulôn, "Nyoe kheueh meuja nyang na dikeue keuhaderan TUHAN."
23 Bak ujong jurong nyang teutuju u Teumpat Nyang Suci na saboh pintoe, meunan cit bak ujong jurong nyang teutuju ubak Teumpat Nyang Mahasuci.
24 Pintoe-pintoe nyan na dua ôn pintoe nyang teuhah bak teungoh.
25 Pintoe-pintoe di Teumpat Nyang Suci teuhias deungon ukeran-ukeran bak palem dan kerub-kerub, lagée bak bintéh-bintéh jih. Bak muka ruweueng keue na kheueh siblaih siuluwa, na tirée nyang teupeugét nibak kayée.
26 Bak bandua binéh bintéh sampéng nyan na peuradeun-peuradeun, dan bintéh jih teuhias deungon ukeran bak palem.

Chapter 42

Óh lheuehnyan ureuëng agam nyan laju geuba ulôn ubak peulataran luwa dan geutunton ulôn ubak bangunan nyang laén di siblaih utara Baét TUHAN, hana jiôh nibak bangunan rayeuk di siblaih barat Baét TUHAN nyan.
2 Bangunan nyan panyang jih limong ploh metée, dan luwah jih dua ploh limong metée.
3 Saboh sagoe nibak bangunan nyan meuhadab ubak seuramoe nyang luwah jih siploh metée nyan, seudangkan sagoe nyang laén meuhadab ubak aleue batée bak peulataran luwa. Bangunan nyan meutingkat lhée; tieb-tieb tingkat meujulue leubeh udalam nibak tingkat miyueb jih.
4 Dikeue kama-kama nyan, disiblaih udalam na jurong nyang luwah jih limong metée dan panyang jih limong ploh metée. Pintoe-pintoe jih meuhadab u utara.
5 Kama-kama bak tingkat ateueh leubeh sampiek nibak kama-kama nyang na di miyueb, sabab jurong-jurong nyang na dikeue kama-kama di ateueh nyan leubeh luwah nibak nyang na dimiyueb jih.
6 Kama-kama nyan meutingkat lhée teuma hana jitumpang lé taméh-taméh lagée bak geudong-geudong di teungoh leuen.
7 Siteungoh nibak tingkat miyueb, panyang jih dua ploh limong metée na kheueh beuton mantong, seudangkan nibak bagian nyang laén, meunan cit panyang jih na dua ploh limong metée, teupeugét kama-kama. Bak tingkat nyang paleng ateueh na kama-kama ban sipanyang geudong nyan.
9 Di miyueb kama-kama nibak ujong timu bangunan nyoe, dan nibak uram beuton, na saboh pintoe nyang teutuju ubak peulataran luwa. Nibak binéh seulatan rot Baét TUHAN, na bangunan nyang saban, teuduek jih hana jiôh nibak bangunan siblaih ubarat.
11 Dikeue kama-kama nyan na saboh jurong nyang saban lagée jurong siblaih utara. Ukoran jih saban, mode jih pih saban, dan pintoe-pintoe jih pih saban.
12 Dimiyueb kama-kama siblaih seulatan, nibak ujong timu bak uram beuton, na cit saboh pintoe.
13 Ureuëng agam nyan geupeugah ubak ulôn, "Bandua bangunan nyan suci. Disinan, teungku-teungku imeum nyang jeuet meuhadab ubak keuhaderan TUHAN, teupajoh keureubeuen-keureubeuen nyang paleng suci. Meunan cit disinan awaknyan harôh geukeubah keureubeuen-keureubeuen nyang paleng suci, atra nyan na kheueh: keureubeuen gandom dan keureubeuen peuamphon desya atawa keureubeuen gantoe rugoe.
14 Meunyoe teungku-teungku imeum nyan ka seuleusoe meutugaih bak Baét TUHAN, dan geu keuneuk jak ubak peulataran luwa, peukayan khusos nyang awaknyan ngui watée geupeubuet iébadat harôh awaknyan tinggai nibak kama-kama nyan. Awaknyan harôh geungui peukayan laén, óh ka lheuehnyan barô kheueh awaknyan jeuet geujak ubak teumpat rakyat meugumpôi."
15 Óh ka seuleusoe geu uko lé ureuëng agam nyan bangunan Baét TUHAN bagian si udalam, gobnyan laju geupeuteubiet uluwa ulôn rot geureubang timu, laju geusipat bagian keulileng Baét TUHAN.
16 Deungon tungkat sineupat jih gobnyan laju geusipat binéh siblaih utimu: 250 metée.
17 Óh lheuehnyan gobnyan laju geusipat binéh siblaih utara, binéh siblaih seulatan, dan binéh siblaih ubarat; tieb-tieb binéh panyang jih saban, na kheueh 250 metée.
20 Deungon nyan, daerah Baét TUHAN teuduek jih ateueh saboh keubeueng tanoh peuet sagoe tamang, deungon ukoran 250 nibak tieb-tieb binéh. Bideueng tanoh nyan jikeulileng lé saboh bintéh beuton keu teupeung kréeh daerah nyang khusos keu TUHAN nibak daerah nyang keu umum.

Chapter 43

Óh lheuehnyan lé ureuëng agam nyan geuba ulôn ubak pintoe geureubang nyang meuhadab utimu,
2 dan disinan kheueh ulôn kalon teuka rot arah timu cahya muble-ble sibagoe tanda keuhaderan Po teu Allah Israel. Su Po teu Allah teudeungoe lagée su ié laôt raya nyang meutaga, dan bumoe hu meuble-ble sabab cahya keuhaderan Allah.
3 Nyang deuh teungieng nyan saban lagée nyang ka lheueh ulôn kalon bak watée Po teu Allah teuka keu geujak peuhanco Yerusalem, dan lagée nyang ka lheueh lôn kalon nibak Krueng Kebar. Laju ulôn peureubah droe dan ulôn sujut.
4 Cahya muble-ble nyan meugrak-grak meulalu geureubang timu dan laju jitamong udalam Baét TUHAN.
5 Roh TUHAN geuangkat ulôn dan geuba ulôn ubak peulataran dalam; disinan ulôn kalon Baét TUHAN ka habéh peunoh jigöm lé cahya keuhaderan TUHAN.
6 Watée ureuëng agam nyan mantong geudong bak binéh ulôn, laju lôn deungoe TUHAN meufeureuman ubak ulôn,
7 "He manusia fana, nyoe kheueh takhta Ulôn. Disinoe kheueh Ulôn tinggai di teungoh-teungoh umat Israel dan Lôn mat peurintah ateueh awaknyan siumu masa. Bah kheueh awaknyan, meunan cit deungon raja-raja awaknyan, hana le jipeukutoe nan Ulôn nyang suci deungon jiseumah beurala atawa deungon cara teupeukubu manyét raja-raja awaknyan di teumpat nyoe.
8 Yoh masa ilée raja-raja awaknyan jipeugét ambang-ambang pintoe meuligoe awaknyan disampéng ambang-ambang dan taméh-taméh pintoe Baét Ulôn, sampoe teuma na saboh bintéh mantong lamkawan nyan. Awaknyan ka jipeukutoe nan Ulôn nyang suci deungon buet nyang jipeubuet lé awaknyan nyang kutoe dan luwat nyan. Sababnyan kheueh awaknyan Ulôn peubinasa lam beungéh ulôn nyang hana teukira.
9 Teuma phon saátnyoe awaknyan harôh jipiôh jiseumah beurala dan jipinah manyét-manyét raja jihnyan. Óh ka lheuehnyan, Ulôn teuma tinggai lamkawan awaknyan keu siumu masa."
10 Laju TUHAN meufeureuman lom, "He manusia fana, tajak peugah kheueh ubak umat Lôn Israel keuhai Baét Ulôn nyoe, dan yue kheueh ubak awaknyan mangat jiseulidek rancangan jihnyoe. Tapeujeuet kheueh awaknyan beu malée sabab banmandum desya nyang jipeubuet.
11 Dan óh ka lheueh awaknyan malée sabab buet-buet nyang ka jipeubuet nyan, tapeutrang kheueh rancangan Baét Lôn nyoe ubak awaknyan: phon nibak mode jih, pintoe-pintoe tamong dan pintoe teubiet jih, susonan bangunan jih, bandum peuratoran dan huköm-huköm jih. Tuléh kheueh bandum nyan keu awaknyan mangat awaknyan jeuet jikalon dan jipeurati dan hase jiatoe bandum nyan, dan jitaát bandum peuratoran nyan.
12 Nyoe kheueh sifeuet khas nibak Baét TUHAN: Bandum daerah nyang na di seukeulileng bak pucak gunong na kheueh suci that."
13 Nyoe kheueh ukoran mezbah meunurot ukoran nyang teupeuguna keu teu uko Baét TUHAN. Bansikeulileng mezbah na saboh paret nyang lhok jih siteungoh metée dan luwah jih pih na siteungoh metée, deungon bibie bak binéh luwa jih na manyang siper peuet metée.
14 Nibak paret sampoe ubak rot miseubah nyang paleng miyueb, manyang jih simetée. Bagian teungoh na manyang dua metée, dan siteungoh metée leubeh sampiek nibak keulileng gaki miseubah. Bagian keu lhée, na kheueh pucak miseubah, meunan cit siteungoh metée leubeh sampiek nibak keulileng bagian teungoh nyan.
15 Bagian keu lhée nyoe na kheueh teumpat tot keukeureubeuen; manyang jih dua metée. Nibak banpeuet boh sudut jih na bagian nyang meujulue lagée lungkée.
16 Pucak miseubah nyan hiji peuet sagoe timang; tieb-tieb binéh ukoran jih nam metée.
17 Bagian teungoh jih meusagoe peuet, tieb-tieb binéh ukoran jih tujoh metée, deungon saboh binéh bak binéh luwa nyang manyang jih siper peuet metée. (Luwah paret jih siteungoh metée.) Bak binéh siblaih utimu na reunyeun nyang teutuju u pucak mezbah.
18 TUHAN Nyang Mahamanyang meufeureuman ubak ulôn, "He manusia fana, deungoe kheueh peue nyang Ulôn peugah ubak gata. Meunyoe miseubah nyan ka lheueh teupeudong, gata harôh tabaiát deungon cara tatot keureubeuen di ateuehnyan dan tasipreuk darah keureubeuen u ateueh miseubah nyan.
19 Teungku Imeum keuturonan Zadok nibak sukée Lewi mantong nyang jeuet jak ubak hadirat Lôn keu jijak peubuet iébadat. Ulôn, TUHAN Nyang Mahamanyang nyang peurintah hainyan. Tajok kheueh ubak awaknyan saboh leumô agam nyang mantong muda sibagoe keureubeuen teusampôh desya.
20 Tacok kheueh bacut darah jih dan tasiliék kheueh laju ubak lungkée-lungkée bak ban peuet boh sagoe pucak miseubah nyan, meunan cit ubak sagoe-sagoe bagian teungoh jih meunan cit ban seukeulileng binéh miseubah nyan. Deungon caranyan kheueh gata peusuci miseubahnyan dan gata peukhusos atranyan keu Ulôn.
21 Óh lheuehnyan, tacok kheueh laju leumô agam keu teusampôh desya nyan, dan tatot kheueh bak teumpat nyang ka teupeuteuntée, na kheueh diluwa lingkongan suci Baét TUHAN.
22 Óh singoh nyan gata harôh takeureubeuen saboh kaméng agam nyang hana meucacat keu keureubeuen peu amphon desya. Neupeugleh kheueh miseubah nyan deungon darah kaméng nyan, saban lagée nyang gata peusaneut ngon leumô agam nyang muda nyan.
23 Meunyoe ka seuleusoe hai nyan gata peubuet, tacok kheueh saboh leumô agam muda dan saboh kaméng agam muda, bandua boh beulatang nyang hana cacat cupa,
24 óh lheuehnyan taba kheueh laju ubak Ulôn. Lé teungku-teungku imeum harôh kheueh geusipréuk sira ateueh beulatang nyan bandua dan tatot atranyan mangat jeuet keu keureubeuen keu Ulôn.
25 Tieb-tieb uroe nyang treb jih tujoh uroe, gata harôh neukeureubeuen saboh kaméng, leumô agam muda, dan kaméng agam keu keureubeuen peu amphon desya. Beulatang-beulatang nyan hana jeuet cacat bahpi meubacut.
26 Tujoh uroe treb jih lé teungku-teungku imeum harôh jipeuna upacara peuntahbisan mezbahnyan dan jipeusiab nyan keu jeuet teupeuguna.
27 Óh ka seuleusoe tujoh uroe nyan habéh, lé teungku-teungku imeum harôh geupeuphon peuseumah ateueh miseubah nyan keureubeuen nyang teutot dan keureubeuen peudamé keu umat. Dan Ulôn galak deungon gata banmandum. Ulôn, TUHAN Nyang Mahamanyang ka Lôn peugah haba."

Chapter 44

Óh lheuehnyan lé ureuëng agam nyan geuhue lom ulôn ubak pintoe geureubang luwa di siblaih utimu lingkongan Baét TUHAN. Pintoe geureubang nyan teutôb,
2 TUHAN meufeureuman ubak ulôn, "Pintoe geureubang nyoe harôh teutab teutôb dan hana jeuet teupeuhah. Hana meusidroepi nyang jeuet tamong keunan, sabab Ulôn, TUHAN Po teu Allah Israel, ka Lôn tamong u Baét Lôn meulalu babah pintoe geureubang nyoe. Jadi babah pintoe geureubang nyoe harôh teutab teutôb.
3 Teuma lé peunguasa nyang mat peurintah nanggroe jeuet jijak ubak teumpat nyan keu jipajoh peunajoh suci dikeue Ulôn. Gobnyan harôh jitamong rot ruweueng rayeuk dan jigisa rot nyan cit lom."
4 Óh lheuehnyan lé ureuëng agam nyan geuba ulôn ubak pintoe geureubang utara nyang meuhadab ngon Baét TUHAN. Ulôn peurati, dan ulôn kalon Baét TUHAN nyan ka peunoh deungon cahya muble-ble sibagoe tanda TUHAN teuka. Laju ulôn peureubah droe dan lôn sujut,
5 dan TUHAN meufeureuman ubak ulôn, "He manusia fana, tangieng kheueh beugét-gét peue nyang gata kalon dan peue nyang gata deungoe. Ulôn kupeugah ubak gata banmandum peuratoran dan huköm keuhai Baét Ulôn nyoe. Tacetet kheueh beugét-gét soe-soe nyang teubri idhin jitamong lam Baét Ulôn nyoe dan soe-soe teuma nyang hana teubri tamong.
6 Tapeugah kheueh ubak umat Israel nyang galak bak buet beurontak nyan bahwa Ulôn, TUHAN Nyang Mahamanyang, hán Lôn peubiyeu le awaknyan jipeubuet kutoe.
7 Awaknyan ka jipeukutoe Baét Ulôn, sabab teungoh darah dan gapah keureubeuen jipeuseumah ubak Ulôn, awaknyan jipeu idhin jitamong udalam ureuëng-ureuëng aséng nyang hana meusunat, dan nyang hana taát ubak Ulôn. Deungon buet-buet awaknyan nyang kutoe dan luwat nyan, awaknyan ka ji-iengkeue peujanjian Ulôn deungon awaknyan.
8 Bukon jih awaknyan keudroe nyang peubuet upacara-upacara suci lam Baét Lôn, teuma ureuëng-ureuëng aséng nyang awaknyan bri tugaih keu jipeubuet bandum nyan.
9 Ulôn, TUHAN Nyang Mahamanyang, Ulôn peumaklum bahwa ureuëng aséng nyang hana meusunat dan ureuëng nyang hana taát ubak Ulôn, ureuëng nyang lagée nyan hana jeuet jitamong lam Baét Lôn. Hainyan keunong cit teuma ubak ureuëng aséng nyang tinggai teutab lamkawan bansa Israel."
10 TUHAN meufeureuman ubak ulôn, "Ulôn kuhuköm bubena ureuëng Lewi nyang meusajan-sajan ngon ureuëng-ureuëng Israel nyang laén, ka jitinggai Ulôn dan jiseumah beurala.
11 Di dalam Baét Lôn, awaknyan teuma jeuet jipeutimang Ulôn sabagoe peugawée dan nyang jaga pintoe geureubang. Awaknyan jeuet jisie bubena beulatang keu keureubeuen nyang teutot dan keureubeuen peuseumahan, dan awaknyan wajéb jilayani umat.
12 Teuma sabab awaknyan ka jipeubuet upacara seumah beurala keu bansa Israel, dan deungon caranyan ka jihila bansa nyan udalam desya, dan, Ulôn, TUHAN Nyang Mahamanyang, meusumpah bahwa awaknyan harôh teuhuköm.
13 Awaknyan hana jeuet le jipeutimang Ulôn sibagoe teungku imeum atawa jicukéeh peue-peue nyang suci nibak Ulôn, atawa jitamong ubak teumpat Nyang Mahasuci. Nyan kheueh huköman ateueh buet-buet nyang kutoe nyang ka awaknyan peubuet.
14 Jinoe awaknyan Ulôn bri tugaih keu jipeubuet buet-buet nyang geuhon dan gasa nyang peureulée jipeubuet di Baét Ulôn."
15 TUHAN Nyang Mahamanyang meufeureuman, "Bak watée bansa Israel jitinggai Ulôn, teungku-teungku imeum Lewi nibak keuturonan Zadok teutab seutia jipeutimang Ulôn di Baét Ulôn. Sababnyan awaknyan kheueh nyang jinoe harôh jipeutimang Ulôn dan jimeuhadab ukeue Ulôn keu jipeuseumah gapah dan darah nibak keureubeuen nyang na.
16 Teuma awaknyan mantong nyang jeuet tamong u Baét Lôn, jipeutimang Ulôn di miseubah Lôn, dan jipimpén seumayang di Baét Ulôn.
17 Bak watée awaknyan jitamong bak pintoe geureubang teutuju ubak peulataran dalam, awaknyan harôh jisôk peukayan lineun. Hana jeuet awaknyan ngui peukayan nyang teupeugét nibak ija wol meunyoe teungoh meutugaih bak peulataran dalam, atawa didalam Baét Ulôn.
18 Mangat hana seu uém dan meureuôh, awaknyan harôh jisök peukayan ija lineun ngon bék jingui talo keuieng, dan ikat ulée lineun.
19 Meunyoe awaknyan jijak ubak leuen bagian luwa, diteumpat umat teungoh meugumpôi, teungku-teungku imeum nyan harôh jisuet peukayan dinaih droe jih didalam kama-kama suci Baét Ulôn, laju jisôk peukayan laén, mangat peukayan khusos nyan hana teupeuceulaka umat.
20 Di teungku-teungku imeum hana jeuet jicukoe habéh ôk nibak ulée jihnyan, atawa jipeubiyeu ôk jihnyan panyang. Ôk nyan harôh teukoh paneuk meunurot atoran nyang ka teupeuteutab.
21 Awaknyan hana jeuet ji-jieb ié anggô meunyoe keuneuk tamong u peulataran dalam.
22 Di teungku-teungku imeum jeuet jimeukawen ngon aneuëk-aneuëk dara Israel nyang mantong peurawan atawa beukaih inong balée nibak teungku imeum. Awaknyan hana jeuet jimeukawen ngon inong nyang jitaleuek lé lakoe.
23 Lé teungku-teungku imeum harôh jipeurunoe ubak umat Lôn mangat jeuet jipeubeda nyang toh nyang khusos keu Ulôn dan nyang toh nyang hana jeuet, nyang toh nyang gleh meunurot agama dan nyang toh teuma nyang kutoe.
24 Meunyoe teuka meulaén waham lam hai huköm, awaknyan harôh peuseuleusoe sisuai deungon huköm-huköm Lôn. Awaknyan harôh jipeuna khanuri-khanuri keu agama, meunurot atoran-atoran dan huköm-huköm Lôn, dan jihoreumat uroe Sabat sibagoe uroe nyang khusos keu Ulôn.
25 Sidroe teungku imeum hana jeuet jipeukutoe droe ngon cara jimat manyét, teukeucuali manyét ureuëng syiek jihnyan, aneuëk jihnyan, syedara jihnyan nyang agam atawa syedara jihnyan nyang inong nyang gohlom meukawen.
26 Óh ka lheueh jihnyan gleh lom, jihnyan harôh jipreh tujoh uroe teuk,
27 laju jijak ubak peulataran bagian dalam Baét ulôn, dan jipeuseumah keureubeuen keu jipeugleh droe jihnyan mangat jihnyan jeuet meutugaih lom di Baét Lôn. Ulôn, TUHAN Nyang Mahamanyang ka Lôn peugah haba.
28 Lé teungku-teungku imeum jiteurimong jabatan imeum nyan sibagoe bagian nibak awaknyan nibak peue nyang ka Ulôn bri ubak Israel salen meusalen. Awaknyan hana jeuet jicok keumilék peue-peue mantong nyang na di Israel: Ulôn kheueh hareuta awaknyan.
29 Awaknyan harôh udeb nibak peuseumahan gandom, keureubeuen teusampôh desya, dan keureubeuen geunantoe rugoe; dan peue-peue mantong nyang ka jipeukhusos keu Ulôn, atranyan harôh teubri keu awaknyan.
30 Ubak teungku-teungku imeum harôh teubri bagian nyang paleng gét nibak peue-peue mantong hase panen nyang phon-phon that teucok, dan nibak peue mantong nyang teupeuseumah ubak Ulôn. Pajan mantong bansa Israel jipeugét ruti, teuma ruti nyang phon that na kheueh keu teungku-teungku imeum. Dan Ulôn Lôn bri beureukat keu rumoh-rumoh bansa Israel.
31 Cicém dan beulatang-beulatang nyang laén nyang maté keudroe, atawa nyang jiteugöm lé beulatang buih, atranyan hana jipajoh lé teungku-teungku imeum."

Chapter 45

Sigohlom tanoh nyan teuwéuek-wéuek jeuet keutanoh pusaka keu tieb-tieb sukée, harôh teuwéuek saboh bulueng keu TUHAN. Tanoh nyan panyang jih harôh 12,5 kilometée, dan luwah jih 10 kilometée. Bansaboh daerahnyan teupeumaklum suci.
2 Keu Baét TUHAN teupeuna nibak tanoh nyan siladum nyang meusagoe peuet, ukoran jih 250 metée tieb-tieb binéh jih, dan jikeulileng lé padang nyang luwah jih 25 metée dan disinan kheueh harôh teupeudong Baét TUHAN.
3 Siladum nibak tanoh nyan, nyang panyang jih 12,5 kilo metée, dan luwah jih
5 kilometée harôh teukeubah keu teupeudong Baét TUHAN, na kheueh daerah nyang paleng suci.
4 Tanoh nyan suci, dan teukeubah keu teungku-teungku imeum nyang meutugaih jipeuna seumayang di Baét TUHAN. Siladum nibak tanohnyan jeuet keu teumpat rumoh awaknyan, dan siladum teuk keu Baét TUHAN.
5 Siteungoh teuk nibak tanoh nyan 12,5 kilometée kali
5 kilometée harôh teukeubah keu ureuëng-ureuëng Lewi nyang geumeubuet di Baét TUHAN. Diteumpat nyan teupeudong banda-banda dan awaknyan jeuet tinggai disinan.
6 Disampéng tanoh nyang suci nyan, harôh teupeung kréeh saboh keubeueng tanoh nyang panyang jih dua blaih siteungoh kilo metée dan luwah jih dua siteungoh kilometée, keu saboh banda nyang jeuet tinggai disinan soemantong nibak bansa Israel.
7 Keu ureuëng peunguasa nyang mat peurintah harôh cit teukeubah tanoh. Tanoh nyan meureuntang nibak bataih barat daerah nyang teupeukhusos keu TUHAN nyan, sampoe ubak Laôt Teungoh, dan nibak bataih timu nyang teupeukhusos nyan, sampoe ubak bataih timu nanggroe nyan. Jadi panyang jih saban deungon panyang saboh bulueng tanoh nyang teubri ubak sukée-sukée Israel.
8 Tanoh nyan jeuet keumilék peunguasa nyang mat peurintah bak tanoh Israel, mangat hana jitindéeh le ateueh umat Lôn, teuma teubri daerah nyang leubeh nyan jeuet keuhak milék sukée-sukée Israel.
9 TUHAN Nyang Mahamanyang meufeureuman, "Ka seb kheueh nyan desya-desya gata, he peunguasa Israel! Tapeupiôh kheueh buet gata nyang ban galak droe tatindéeh rakyat nyan. Tapeubuet kheueh peue nyang beuna dan ade. Bék sagai-sagai use umat Ulôn nibak tanoh awaknyan. Ulôn, TUHAN Nyang Mahamanyang nyang peurintah nyan ubak gata.
10 Peuguna kheueh céung dan sinukat nyang beuna:
11 Saboh efa keu teusukat bahan nyang tho harôh saban asoe jih deungon saboh bat keu teusukat bahan caye. Patok harôh kheueh saboh homer. Deungon nyan, sinukat-sinukat nyan harôh lagée nyoe: 1 homer = 10 efa = 10 bat.
12 Boh céng gata harôh lagée nyoe: 1 syikal = 20 gera 1 mina = 60 syikal
13 Nyoe kheueh dasai ukoran keu teupeuteutab peuseumahan-peuseumahan: gandom: 1/60 bagian nibak hase panen gata jawawut: 1/60 bagian nibak hase panen gata minyéuk zaiton: 1/100 bagian nibak hase bak-bak kayée. (Sukat kheueh meunurot bat: 10 bat = 1 homer = 1 kor) bubiri: saboh bubiri nibak tieb-tieb 200 boh. Gata harôh tapeuseumah keureubeuen gandom, keureubeuen nyang teutot, dan keureubeuen peudaméan, mangat desya-desya gata teupeu amphon. Ulôn, TUHAN Nyang Mahamanyang nyang bri peurintah keu nyan.
16 Bandum peunduduek nanggroe nyan harôh jiba peuseumahan-peuseumahan nyan ubak peunguasa nyang mat peurintah di Israel.
17 Jihnyan kheueh nyang wajéb bloe beulatang peulara keu keureubeuen nyang teutot dan bahan-bahan keu keureubeuen gandom dan keureubeuen anggô keu banmandum bansa Israel bak uroe-uroe raya, Peurayaan Buleuen Barô, uroe-uroe Sabat dan uroe-uroe raya laén. Jihnyan harôh jipeuduek keureubeuen peu amphon desya, keureubeuen gandom, keureubeuen nyang teutot, dan keureubeuen peudaméan keu teulakée amphon keu bansa Israel."
18 TUHAN Nyang Mahamanyang meufeureuman ubak umat Gobnyan, "Bak tanggai sa buleuen sa, gata harôh tapeugleh Baét Ulôn deungon cara tapeuseumah saboh leumô agam muda nyang hana cacat.
19 Teungku imeum harôh jicok darah nibak keureubeuen peu amphon desya nyan, laju jisampôh ubak taméh-taméh pintoe Baét Ulôn, meunan cit ubak ban peuet sagoe miseubah, dan ubak taméh-taméh pintoe geureubang nyang teutuju ubak peulataran dalam.
20 Tapeubuet kheueh lagée nyan bak tanggai tujoh buleuen nyan, keu tieb-tieb ureuëng nyang ka meudesya deungon hana jisaja atawa ngon sabab hana jiteupeue. Deungon cara lagée nyan gata tajaga keusucian Baét Ulôn.
21 Bak tanggai peuet blaih buleuen sa, gata harôh tapeuna Khanuri Paskah. Tujoh uroe treb jih bandum ureuëng harôh jipajoh ruti nyang hana meuragoe.
22 Bak uroe nyang keuphon, peunguasa nyang mat peurintah harôh jipeuseumah saboh leumô agam keu keureubeuen peu amphon desya keudroe jihnyan dan keu banmandum rakyat.
23 Teungoh peurayaan nyang treb jih tujoh uroe nyan, tieb-tieb uroe jihnyan harôh jipeuseumah ubak TUHAN tujoh boh leumô agam dan tujoh boh bubiri agam nyang hana meucacat, laju teutot atranyan bulat-bulat. Tieb-tieb uroe jihnyan harôh teuma jipeuseumah saboh kaméng agam keu keureubeuen peu amphon desya.
24 Seulaén nyan, harôh teuma jipeuseumah gandom 17,5 arée keu tieb-tieb leumô agam meunan cit lhée arée minyéuk zaiton keu tieb-tieb bubiri agam.
25 Bak Khanuri Jambo Ôn, nyang teupeuphon tanggai limong blaih buleuen tujoh, tieb-tieb uroe nyang treb jih tujoh uroe peunguasa harôh jipeuseumah keureubeuen-keureubeuen nyang saban, na kheueh keureubeuen peuamphon desya, keureubeuen nyang teutot, dan keureubeuen gandom ngon minyéuk zaiton."

Chapter 46

TUHAN Nyang Mahamanyang meufeureuman, "Pintoe geureubang timu nyang teutuju ubak peulataran dalam harôh teutab teutôb nyang treb jih nam uroe keureuja. Pintoe geureubang nyan barô kheueh jeuet teupeuhah bak uroe Sabat dan Peurayaan Buleuen Barô.
2 Bak uroe-uroe nyan peunguasa harôh geutamong meulalu peulataran luwa dan meulalu ruweueng raya laju geudong bak binéh taméh geureubang, dan di teungku-teungku imeum geupeuseumah keureubeuen nyang teutot dan keureubeuen peudamé nibak peunguasa. Bak babah pintoe geureubang nyan gobnyan harôh geusujut dan geuseumah TUHAN, óh lheuehnyan laju geujak. Óh lheueh nibaknyan sampoe án malam, geureubang nyan hana jeuet teutôb.
3 Dikeue geureubang nyan cit teuma, banmandum rakyat harôh jisujut jiseumah TUHAN tieb-tieb uroe Sabat dan Peurayaan Buleuen Barô.
4 Bak uroe Sabat peunguasa harôh geupeuseumah ubak TUHAN keureubeuen nyang teutot nyang maséng-maséng na kheueh: nam boh aneuëk bubiri dan saboh bubiri agam, banmandum nyang hana cacat.
5 Meusigoe ngon bubiri agam nyan harôh teupeuseumah teuma keureubeuen gandom nyang le jih 17,5 arée, dan meusajan deungon tieb-tieb aneuëk bubiri, harôh teupeuseumah keureubeuen gandom nyang le jih lagée nyang teulakée. Tieb-tieb keureubeuen gandom harôh meusigoe deungon lhée arée minyéuk zaiton.
6 Bak Peurayaan Buleuen Barô bahan nyan harôh kheueh saboh leumô agam, nam boh aneuëk bubiri, dan saboh bubiri agam, banmandum nyan nyang hana meucupa bahpi meubacut.
7 Meusigoe deungon tieb-tieb leumô agam dan kaméng agam, jihnyan harôh jipeuseumah gandom nyan le jih 17,5 arée, dan meusigoe deungon tieb-tieb aneuëk bubiri, padub mantong meunurot nyang geulakée. Tieb-tieb keureubeuen gandom meusigoe deungon peuseumahan lhée arée minyéuk zaiton.
8 Meunyoe peunguasa keuneuk iébadat di Baét Ulôn, jihnyan harôh jitamong meulalu ruweueng raya, dan watée jiwoe meulalu rot nyan cit lom.
9 Sikeubit jih, meunyoe bak uroe-uroe rayeuk rakyat jiteuka jijak meuiébadat ubak TUHAN, teuma awaknyan nyang jitamong meulalu pintoe geureubang utara, watée jiwoe harôh meulalu pintoe geureubang seulatan óh ka lheueh awaknyan seuleusoe meuiébadat. Dan awaknyan nyang tamong meulalu pintoe geureubang seulatan, watée jiwoe harôh meulalu babah pintoe geureubang utara. Ubak bandum ureuëng nyan teutam hanjeuet jijak rot watée jitamong; awaknyan harôh jiwoe meulalu babah pintoe geureubang nyang na di meurandeh.
10 Peunguasa harôh jitamong u Baét TUHAN meusigoe-sigoe deungon rakyat dan jiwoepi harôh meusigoe teuma.
11 Bak uroe-uroe khanuri dan peurayaan, meusigoe deungon leumô agam dan bubiri agam harôh teuma teupeuseumah gandom nyang le jih 17,5 arée, dan meusigoe deungon tieb-tieb aneuëk bubiri, padub mantong meunurot nyang jikeuheundaki lé ureuëng nyang meuiébadat. Tieb-tieb keureubeuen gandom harôh meusigoe deungon lhée arée minyéuk zaiton.
12 Meunyoe peunguasa keuneuk jibri peuseumahan keugalak até ubak TUHAN, bah kheuehnyan keureubeuen nyang teutot meunan cit deungon keureubeuen peudamé, babah pintoe geureubang timu nyang teutuju ubak leuen dalam harôh teupeuhah keu gobnyan. Ureuëng nyan harôh jipeuseumah keureubeuen nyan deungon cara nyang saban lagée nyang jipeubuet bak uroe Sabat, teuma meunan jihnyan ka jiwoe, babah pintoe geureubang nyan harôh teutôb lom."
13 TUHAN meufeureuman, "Tieb-tieb uroe watée beungoh, saboh aneuëk bubiri nyang meu umu sithon dan nyang hana meucacat meubacutpi harôh teupeuseumah keu keureubeuen nyang teutot ubak TUHAN.
14 Seulaén nibaknyan, tieb-tieb beungoh harôh teupeuseumah teuma dua kilogram gandom dan si arée minyéuk zaiton mangat teulawok deungon gandom nyan. Nyan kheueh keureubeuen gandom nyang tieb-tieb uroe harôh teupeuseumah ubak TUHAN; atoran nyan teutab teupeubuet keu siumu masa.
15 Tieb-tieb beungoh, harôh teupeuseumah sabe ubak TUHAN; saboh aneuëk bubiri, keureubeuen gandom dan minyéuk zaiton."
16 TUHAN Nyang Mahamanyang geupeurintah, kheun Gobnyan, "Meunyoe peunguasa nyang mat peurintah jibri siladum nibak tanoh pusaka nyan ubak sidroe lamkawan aneuëk jihnyan nyang agam, tanoh nyan ka jeuet keuhak milék aneuëk agam jihnyan dan ka jeuet keuhareuta keuluwarga.
17 Teuma meunyoe peunguasa nyan jibri siladum nibak tanoh jihnyan keu sidroe lamkawan namiet jihnyan, tanoh nyan jeuet lom hak milék peunguasa nyan nibak Thon Teujok Pulang. Tanohnyan na kheueh atra milék jihnyan dan teuma jihnyan ngon aneuëk-aneuëk agam jih mantong nyang jeuet kuasa ateueh tanoh nyan keu siumu masa.
18 Peunguasa nyan hana jeuet jicok mubacut pih nibak hareuta pusaka rakyat jih. Teuma tanoh jihnyan keudroe nyang jeuet jijok ubak aneuëk-aneuëk agam jihnyan sampoe hana meusidroe pih nibak umat Ulôn hase jipeu crebre nibak hak milék jihnyan."
19 Óh lheuehnyan lé ureuëng agam nyan laju geuba ulôn meulalu babah pintoe di sampéng pintoe geureubang, ubak kama-kama suci nyang meuhadab u utara. Kama-kama nyan teukeubah keu teungku-teungku imeum. Ureuëng agam nyan geutunyok ubak ruweueng bak ujong siblaih ubarat,
20 dan geupeugah, "Nibak teumpat nyoe lé bandum teungku imeum harôh jireubôh keureubeuen peusampôh desya dan keureubeuen gantoe rugoe dan jitot keureubeuen gandom, mangat na bahpi bacut nibak keureubeuen-keureubeuen nyang suci nyan hana teuba ubak peulataran luwa sampoe akibat jih teupeuceulaka rakyat."
21 Óh lheueh nyan ulôn geuba teuma ubak peulataran luwa dan geupeuleumah ubak ulôn bahwa nibak ban peuet boh sagoe jih, maséng-maséng na peulataran nyang leubeh ubit, panyang jih 20 metée dan luwah jih 15 metée.
23 Tieb-tieb leuen nyan jikeulileng lé beuton batée, dan nibak beuton nyan na sinungkée-sinungkée.
24 Kheun ureuëng agam nyan ubak ulôn, "Nyoe kheueh dapu-dapu teumpat peulayan-peulayan Baét TUHAN jireubôh keureubeuen-keureubeuen nyang jipeuseumah lé rakyat."

Chapter 47

Ureuëng agam nyan geuba lom ulôn ubak babah pintoe tamong u Baét TUHAN. Leumah lôn kalon ié teungoh ji ile rot miyueb pintoe nyan u arah timu, lagée Baét TUHAN pih meuhadab u timu. Ié nyan ji ile rot miyueb ambang pintoe Baét TUHAN bagian seulatan meulalu sisi seulatan nibak mezbah.
2 Óh lheueh nyan lé ureuëng agam nyang geupeuteubiet ulôn meulalu babah pintoe geureubang utara dan geutunton ulôn ubak geureubang timu. Krueng ubit nyan ji ile nibak sisi seulatan geureubang nyan.
3 Teungoh teusipat ngon tungkat seuneupat gobnyan, ureuëng agam nyan geuba laju ulôn seutôt talo krueng nyan arah utimu nyang jiôh jih na 500 metée, laju geuyue ulôn mangat lôn jeumeurang. Nibak teumpatnyan ié cit éuet mata gatôk.
4 Óh lheuehnyan gobnyan geusipat 500 metée teuk, dan di teumpat nyan ié jih na éuet teuôt. Gobnyan geusipat 500 metée teuk, dan ié jih na éuet keuieng.
5 Geusipat lom sigoe teuk nyang jiôh jih 500 metée, dan disinan ié jih lumpah that lhok keu teubloh teujak ngon tapak. Meunyoe ureuëng keuneuk jeumeurang harôh kheueh jimeulangue.
6 Laju geupeugah lé ureuëng nyan ubak ulôn, "He manusia fana, takalon kheueh nyoe beujroh-jroh." Óh lheuehnyan gobnyan geuba lom ulôn teujak seutôt talo krueng,
7 dan ulôn kalon bahwa bak bandua binéh krueng nyan jai that jitimoh bak kayée.
8 Ureuëng nyan geupeugah ubak ulôn, "Krueng nyoe ji ile utimu meulalu nanggroe nyoe dan meulalu Pantôn Krueng Yordan teutuju u Laôt Maté. Meunyoe ié jih trok u dalam Laôt Maté, ié laôt nyang masen nyan geugantoe ngon ié tabeue.
9 Ho mantong ié krueng nyan ji ile, disinan cit teuma na meuteumé meubagoe macam uengkot dan beulatang laén. Ié Laôt Maté geupeujeuet jeuet keu ié tabeue, dan homantong ié nyan ji ile, disinan na udeb.
10 Nibak mata-mata ié di En-Gedi sampoe trok ubak mata-mata ié di En-Eglaim, tieb-tieb bagian binéh jih ramé that deungon ureuëng-ureuëng neulayan nyang geu ade jeue gobnyan nibak teumpat nyan. Beubagoe macam uengkot na didalam ié nyan, lagée nyan na lam Laôt Teungoh.
11 Teuma ié nyang na lam-lam rawa dan paya-paya bansipanyang panté nyan hana jeuet keutabeue, teuma teutab jeuet keu sumber sira.
12 Ban sipanyang krueng nyan timoh meubagoe macam bak kayée muboh. Ôn kayée nyan hántom na layée, dan boh-boh kayée nyan hántom na habéh. Bak bak kayée nyan jimuboh boh kayée nyang barô tieb-tieb buleuen, sabab ié nyang ile disinan na kheueh ié nibak Baét TUHAN. Boh-boh kayée nyan jeuet keupeunajoh dan ôn-ôn kayée nyan meuguna jeuet keu ubat."
13 TUHAN Nyang Mahamanyang meufeureuman, "Nyoe kheueh bataih-bataih tanoh nyang teubagi-bagi ubak bandua blaih sukée Israel. Sukée Yusuf jiteurimong dua bagian.
14 Ulôn ka Lôn meusumpah bahwa tanoh nyan Ulôn bri ubak indatu gata. Sabab nyan, tacok kheueh tanoh nyan dan neubagi kheueh deungon ade lamkawan gata.
15 Bataih rot utara teupeuphon di Laôt Teungoh teutuju utimu sampoe u banda Hetlon, u arah Hamat, laju u banda Zedad,
16 u Berota dan Sibraim (banda-banda nyan teuduek jih lamkawan banda Damsyik dan banda Hamat), óh lheuehnyan u banda Hazar-Enan, dibataih banda Hauran.
17 Jadi, bataih siblaih utara teupeuphon rot Laôt Teungoh sampoe utimu, u banda Hazar-Enan; dan daerah Damsyik dan Hamat na di siblaih utara bataih nyan.
18 Bataih siblaih utimu teutuju u seulatan, nibak saboh teumpat lamkawan Damsyik dan daerah Hauran. Jadi, Krueng Yordan na kheueh bataih lamkawan tanoh Israel di siblaih ubarat dan Gilead siblaih utimu, sampoe trok u Tamar di Panté Laôt Maté.
19 Bataih disiblaih seulatan teutuju ubarat daya, nibak Tamar ubak mata ié Kades-Meriba, laju ubarat laôt sipanyang bataih nanggroe Meusé sampoe u Laôt Teungoh.
20 Bataih siblaih ubarat teupeuget lé Laôt Teungoh, laju teutuju u utara ubak saboh teumpat di siblaih ubarat rot tamong u Hamat.
21 Taweuek kheueh tanoh nyan seusabe gata, meunurot sukée-sukée Israel;
22 dan tanoh nyan na kheueh atra gata keu siumu masa. Ureuëng-ureuëng aséng nyang tinggai teutab lamkawan gata, dan na aneuëk-aneuëk nyang lahé disinan, harôh meuteumé cit bulueng nibak atranyan. Awaknyan harôh teuanggab sibagoe warga nyang peunoh nibak bansa Israel, dan awaknyan harôh turot teu undi mangat jeuet meuteumé tanoh watée teupeuna peumbagian di lamkawan sukée-sukée Israel.
23 Tieb-tieb peunduduek aséng harôh teubri tanoh meusajan ngon sukée Israel dipat mantong awaknyan tinggai. Ulôn, TUHAN Nyang Mahamanyang ka Lôn peugah haba."

Chapter 48

Bataih tanoh siblaih utara meubuju utimu, phon di Laôt Teungoh u arah banda Hetlon, rot tamong u Hamat, banda Hazar-Enan, sampoe ubak bataih lamkawan banda Damsyik dan banda Hamat. Sukée-sukée seulanjut jihnyoe maséng-maséng harôh meuteumé saboh jeumba nibak tanoh nyang luwah bak bataih timu teutuju ubarat sampoe u Laôt Teungoh, dalam urotan jih na kheueh lagée nyoe phon di barat trok u seulatan: Dan Asyer Naftali Manasye Efraim Ruben Yehuda
8 Bagian seulanjut jih nibak tanoh nyan harôh teupeung kréeh keu teupeuguna khusos. Panyang jih harôh 12,5 kilometée nibak bataih utara sampoe u seulatan. Bataih-bataih timu dan barat harôh saban panyang jih deungon jeumba-jeumba nyang geubri ubak sukée-sukée Israel. Baét TUHAN teupeudong nibak bagian nyan.
9 Siladum nibak daerah nyan teupeukhusos keu TUHAN, na kheueh saboh keubeueng tanoh di bagian pusat, panyang jih 12,5 kilometée dan luwah jih 10 kilometée.
10 Bak bagian teungoh tanoh nyan teupeudong Baét TUHAN. Keu teungku-teungku imeum harôh meuteumé bagian nibak daerah nyang suci nyan. Jeumba awaknyan na kheueh 12,5 kilometée phon nibak binéh timu sampoe u bagian barat, dan limong kilometée nibak binéh utara u seulatan.
11 Daerah nyang khusos nyan teuma jeuet keu hakmilék teungku-teungku imeum keuturonan Zadok. Awaknyan ka jipeutimang TUHAN deungon seutia dan bukon lagée ureuëng Lewi nyang saboh sukée deungon awaknyan, nyang sajan jipeubuet desya deungon ureuëng-ureuëng Israel nyang laén.
12 Sabab nyan ubak keuturonan Zadok harôh teubri tanoh khusos disampéng tanoh nyang teubri ubak ureuëng Lewi. Dan tanoh khusos nyan keubit that suci.
13 Tanoh ureuëng-ureuëng Lewi nyan panyang jih 12,5 kilometée rot timu ubarat, dan luwah jih 5 kilometée rot utara u seulatan dan teuduek jih sare meuatoe deungon tanoh teungku-teungku imeum.
14 Sijingkai pih nibak tanoh nyan hana jeuet awaknyan peubloe atawa awaknyan tuka; bagian nyang paleng jroh nibak tanoh Israel hana jeuet teupinah lam jaroe ureuëng laén, sabab tanoh nyan ka teupeukhusos keu TUHAN dan jeuet keuhak milék jihnyan.
15 Di siblaih seulatan tanoh khusos nyan, mantong na tinggai nyang panyang jih 12,5 kilometée, dan luwah jih dua siteungoh kilometée. Bagian nyan hana suci dan jeuet geupeuguna lé rakyat keu teumpat tinggai dan keu blang naleueng, dibagian teungoh jih harôh teupeudong saboh banda.
16 Banda nyan harôh meubantuek peuet sagoe timang, tieb-tieb binéh jih harôh na ukoran dua siper peuet kilometée.
17 Bansikeulileng banda nyan harôh na tanoh luwah nyang luwah jih 125 metée.
18 Di siblaih utimu dan barat banda nyan na tanoh luwah nyang luwah jih maséng-maséng limong kali dua siteungoh kilometée. Bandua boh teumpat tanoh luwah nyan harôh teupeuguna keu teumpat meutani lé peunduduek banda.
19 Ureuëng-ureuëng di bandua sukée Israel nyang tinggai nibak bandua banda nyan jeuet jimubuet nibak tanohnyan.
20 Lé sabab nyan, bansaboh daerah nyan, meunan cit deungon tanoh nyang khusos dan tanoh keu banda, bantuek jih peuet sagoe timang deungon ukoran 12,5 kilometée tieb-tieb saboh sagoe.
21 Tanoh disiblaih ubarat dan siblaih utimu di daerah khusos nyang teukeubah keu Baét TUHAN, lé teungku-teungku imeum, ureuëng Lewi dan banda nyan keudroe, na kheueh keu peunguasa nyang mat peurintah. Di siblaih utimu tanoh nyan luwah jih meubataih sampoe utimu, dan siblaih ubarat sampoe u Laôt Teungoh, dan teuduek jih lamkawan tanoh Yehuda ngon tanoh Benyamin.
23 Tanoh nyang na disiblaih seulatan nibak daerah nyang khusos nyan, na kheueh keu sukée-sukée nyang laén. Luwah tanoh nyan phon nibak bataih timu u arah barat trok laju u Laôt Teungoh, dan teubagi meunurot susonan nyoe di utara sampoe u seulatan na kheueh: Benyamin Simeon Isakhar Zebulon Gad
28 Di siblaih seulatan tanoh Gad na meuteumé peubatasan nyang phon di barat daya Tamar liwat mata ié Kades-Meriba, laju u arah barat laôt sibuju peubatasan nanggroe Meusé sampoe u Laôt Teungoh.
29 TUHAN Nyang Mahamanyang meufeureuman, "Meunan kheueh tanoh nyan harôh teuwéuek-wéuek keu sukée-sukée Israel."
30 Babah pintoe tamong u banda Yerusalem banmandum na dua blaih boh. Ban peuet boh bintéh beuton jih maséng-maséng na ukoran dua siper peuet kilometée, dan na lhée boh pintoe geureubang. Tieb-tieb saboh pintoe geureubang teuboh nan meunurot nan sidroe lamkawan sukée bansa Israel. Babah-babah pintoe geureubang nyang na siblaih utara geuboh nan Ruben, Yehuda dan Lewi; babah-babah pintoe geureubang nibak bintéh beuton siblaih utimu geuboh nan Yusuf, Benyamin, dan Dan; nyang na nibak beuton seulatan geuboh nan Simeon, Isakhar dan Zebulon; seudangkan nyang na disiblaih ubarat geuboh nan Gad, Asyer, dan Naftali.
35 Bandum bintéh beuton nyan panyang jih sikureueng kilometée. Dan phon saátnyoe geuboh nan banda nyan lé ureuëng: "TUHAN NA DISINAN!"